Fesili Mai le ʻAufaitau

Ua taʻua i le Salamo 102:26, o le a “faaumatia” le lalolagi ma le lagi. Po o le uiga o lenā faaupuga o le a faaumatia lenei paneta?

Na taʻua e le faisalamo i lana tatalo iā Ieova: “O anamua na e faavaeina ai le lalolagi; o le lagi foʻi o le galuega lea a ou aao. E faaumatia ia mea, a o oe, e te tumau pea; e pala ia mea uma e pei o le ofu tele, e te liua ia e pei o le ofu, ona liua lava lea.” (Salamo 102:25, 26) Ua faaalia e le salamo atoa, o loo faamatalaina e nei fuaiupu e lē o le faaumatiaga o le lalolagi, ae o le faavavau o le Atua. Ua faaalia i fuaiupu o loo siʻomia ai le māfuaaga ua tāua ai lenā mea moni i auauna a le Atua.

Na amata e le faisalamo ona faamatala ona mafatiaga, atonu i le taimi na faaaunuua ai i Papelonia. Ua ia faapea mai e vave mavae ona aso “faapei o le asu.” Ona o le matuā popole lava, ua vaivai ai lona tino ma ua foliga mai ona ponaivi ua “mū e pei o le motumotu.” Ua ia vaivai, ‘ua magumagu pei o le vao iti,’ ma ua ia lagona le tuua toʻatasi e pei “o le manu iti e nofo toʻatasi i luga o le fale.” Ona o nei puapuaga ua lē toe fia ʻai ai ma ua tumu lona olaga i le faanoanoa. (Salamo 102:3-11) E ui lava i na mea, e leʻi faavaivai ai le faisalamo. Aiseā? Talu ai le folafolaga a Ieova i le mea o le a ia faia iā Siona po o Ierusalema.

E ui lava ua faatafunaina Siona, ae na folafola atu e Ieova, o le a toe faafoʻisia. (Isaia 66:8) O lea la, ua faapea atu ma le mautinoa le faisalamo iā Ieova: “E mutimuti vale lou alofa i Siona; auā ua oo mai ona pō e alofaina ai o ia, ua oo lava i ona aso na tuupōina. Auā e atiina aʻe Siona e Ieova.” (Salamo 102:13, 16) Ona toe taʻua lea e le faisalamo o le mataupu e uiga i lona mafatiaga. Ua ia faapea mai, afai e mafai ona toe faafoʻisia Ierusalema lea sa faagaogaoina i le mana o le Atua, e mautinoa lava la e mafai e Ieova ona laveaʻiina o ia mai tulaga faigatā. (Salamo 102:17, 20, 23) E iai se isi mea ua uunaʻia ai le faisalamo e faatuatua iā Ieova. O le ā lenā mea? O le manatu e faavavau le Atua.

E matuā matilatila le soifua e lē gata mai o Ieova, pe a faatusatusa i le puupuu o le soifua o le faisalamo. Ua ia faapea mai: “E āu tupulaga lava ou tausaga.” (Salamo 102:24) Ua toe taʻua e le faisalamo: “O anamua na e faavaeina ai le lalolagi; o le lagi foʻi o le galuega lea a ou aao.”—Salamo 102:25.

Peitaʻi, e tusa lava po o le ā le leva ona iai le lalolagi ma le lagi, ae lē mafai ona faatusalia le tumau pea o Ieova. Ua toe faaopoopo mai le faisalamo: “E faaumatia ia mea [lalolagi ma le lagi], a o oe, e te tumau pea.” (Salamo 102:26) O mea ia ua fausia aʻe le lalolagi ma le lagi faitino e mafai ona leaga. E moni, ua taʻua e Ieova o le a tumau e faavavau le lagi ma le lalolagi. (Salamo 119:90; Failauga 1:4) Ae e mafai ona faaumatia le lalolagi ma le lagi faitino pe afai o le finagalo lea o le Atua. I sona eseesega, e lē mafai ona maliu le Atua. O mea na Ia faia ua ‘faatumauina e faavavau’ ona ua faavavau le Atua. (Salamo 148:6) Pe afai e lē faafouina pea e Ieova mea na ia faia, “e pala ia mea uma e pei o le ofu tele.” (Salamo 102:26) E pei lava ona pala ofu o le tagata, o le a faapena foʻi mea na faia e Ieova, pe afai o lona finagalo lenā. Peitaʻi, ua tatou iloa mai isi mau e lē o lona finagalo lenā. Ua faamautinoa mai i le Afioga a le Atua, o le finagalo o Ieova i le lalolagi ma le lagi ia tumau e faavavau.—Salamo 104:5.

O se faamāfanafanaga le iloa ona o loo soifua e faavavau Ieova o le a ia faataunuuina ana folafolaga. Po o ā lava tulaga faigatā e oo iā i tatou, ae pe a tatou alalaga atu iā te ia, e tatou te mautinoa “e liuliualo mai o ia i le tatalo a lē ua mativa, e lē ʻinoʻino foʻi o ia i la latou tatalo.” (Salamo 102:17) Ioe, e sili atu ona mausalī le faamautinoaga e Ieova i le Salamo 102 o lana fesoasoani na i lo le lalolagi lea o loo tatou feola ai.