Ia Fai ma Mea Fiafia le Manatunatu Loloto

O LE manatu o nisi i le manatunatu loloto, o se mea faigatā e manaʻomia ai le matuā uaʻi totoʻa atu i ai. Atonu e lagona e i latou na le nofosala ona o le lē faia, aemaise lava pe a latou faitau i lona tāua. (Filipi 4:8) E ao ona avea o se mea e fiafia i ai le manatunatu loloto e uiga iā Ieova, ona uiga lelei, mea na ia faia, ana tapulaa ma lona finagalo. Aiseā?

O Ieova le Atua o le Pule silisili ese o le aoao o mea ma o loo galue ma le tiotio i le faataunuuina o lona finagalo. (Ioane 5:17) E ui i lenā, o loo manatu mamafa o ia i ona tagata tapuaʻi taʻitoʻatasi. Na iloa e le faisalamo o Tavita lenei mea ma na ia tusi ai: “Ieova e, ua e suʻesuʻe mai iā te aʻu, ua e silafia lava aʻu. O oe lava ua e silafia loʻu nofo i lalo ma loʻu tulaʻi i luga; ua e silafia mamao mai oʻu manatunatu.”—Salamo 139:1, 2.

Atonu e manatu se tasi o na upu a le faisalamo e faalotovaivai. E ono manatu o ia, ‘E ui ina “mamao” le Atua ae o loo ia silafia mai manatunatuga leaga i loʻu mafaufau.’ E tāua lenā mea auā e fesoasoani iā i tatou. E fesoasoani iā i tatou e tetee atu i mafaufauga sesē, ma pe a iā i tatou na mafaufauga, e mafai ona faailoa atu i le Atua ma le mautinoa o le a ia faamagaloina i tatou i le faatuatua i le togiola o Iesu. (1 Ioane 1:8, 9; 2:1, 2) Ae i le taimi e tasi, e ao ona tatou manatua e suʻesuʻe e Ieova ona tagata tapuaʻi i se auala talafeagai. E uaʻi mai o ia pe a tatou talisapaia o ia i o tatou manatunatuga.

Atonu e te fesili, “Po o silafia moni e Ieova mafaufauga lelei uma o le toʻatele o ona tagata tapuaʻi?” Ioe, e mautinoa. Na faamamafa e Iesu le naunau o Ieova iā i tatou ina ua ia fetalai, e silafia e Ieova e oo lava i manu iti ma na ia toe faaopoopo mai: “Ua sili outou i manu iti e tele.” (Luka 12:6, 7) E lē mafai ona manatunatu manu iti iā Ieova. O lea la, afai e manatu o ia i manu iti, e sili atu ai la ona ia manatu mai iā i tatou ma e fiafia lona finagalo pe a tatou manatunatu e uiga iā te ia! Ioe, e mafai ona tatou tatalo ma le mautinoa e pei o Tavita: “Ia mālie foʻi iā te oe . . . mafaufauga o loʻu loto, Ieova e, loʻu papa ma lē na te togiolaina aʻu.”—Salamo 19:14.

O se isi faamaoniga o le liliu mai o fofoga o Ieova i le manatunatu loloto o ona tagata tapuaʻi faamaoni, o loo maua i le tusi a Malaki. Na ia valoia e faatatau i o tatou taimi: “Ona fetautalatalaʻi lea ē na matataʻu iā Ieova; ua liliu mai foʻi e Ieova ona fofoga, ma ua faafofoga mai; ona tusia lea o le tusi e faamanatu i ona luma, mo ē matataʻu iā Ieova, ma mafaufau i lona suafa.” (Malaki 3:16) O lo tatou manatuaina e “liliu mai pea fofoga” o Ieova pe a tatou manatunatu iā te ia, e mafai ai ona avea lo tatou manatunatu iā te ia o se mea e fiafia i ai. O lea la, seʻi o tatou ioe faatasi i upu a le faisalamo o lē na tusi: “Ou te manatunatu foʻi i au galuega uma, ou te mafaufau i mea na e faia.”—Salamo 77:12.