Lē Fiafia Muamua ae Mulimuli Ane Talia

I NI tausaga ua mavae, na ō atu ai Santiago ma lana avā o Lourdes, i le aai matagofie o Huillicapata i Peru, e talaʻi atu ai le feʻau o le Tusi Paia i tagata. E leʻi leva ae taunuu se faifeʻau mai Cuzco ma faapotopoto tagata o le aai. Na ia lapataʻia i latou e faapea, o le iai o Molimau a Ieova i le aai, o le a tupu ai se mala, o le a mamafa tele le kiona, mamate a latou lafu povi ma faatamaʻia fua o a latou faaeleeleaga.

Na taaʻina nisi i lenei valoaga ma e sili atu i le ono masina, e leai ma se isi o le aai na taliaina le valaaulia a Satiago ma Lourdes ina ia suʻesuʻe faatasi le Tusi Paia. Na tuli e se tagata maualuga o le aai e suafa iā Miguel, o ia o se sui kovana, ia Santiago ma Lourdes i le auala ma tauʻai i laʻua i maa. Ae na toʻa pea le tai ma la faaalia uiga faa-Kerisiano.

Mulimuli ane, na talia e nisi tagata o le aai se suʻesuʻega faale-Tusi Paia. E oo lava iā Miguel, na suia ona uiga. Na amata ona ia suʻesuʻe le Tusi Paia ma Santiago, lē toe inu tele ma ua avea o se tagata filemu. Mulimuli ane sa talia e Miguel, lana avā ma le toʻalua o ona afafine le upu moni.

I aso nei o loo olaola se faapotopotoga o Molimau a Ieova i lenei aai. Ua fiafia Miguel ona e leʻi lavevea Santiago ma Lourdes i ana maa. E na te faafetaia le ulugalii ona o la laʻua faaaʻoaʻoga lelei o le toʻafilemu.

[Ata i le itulau 32]

O le toʻafilemu o Santiago ma Lourdes (luga) na suia ai uiga o Miguel (i le itu taumatau)