Na Latou Faafiafiaina Loto o o Latou Mātua

“LOʻU atalii e, afai e poto lou loto, ona fiafia ai lea o loʻu nei lava loto.” (Faataoto 23:15) O le mea moni, e fiafia mātua Kerisiano pe a maua e a latou fanau le poto i le Atua. I le Aso Toonaʻi o Setema 10, 2005, na auaʻi tagata e 6,859 mai atunuu eseese i le faauuga o le vasega lona 119 o le Aʻoga a le Olomatamata o Kiliata. Na matuā olioli o latou loto aemaise lava mātua o le ʻaufaauu e toʻa 56.

Na tatala e David Walker, o se sui ua loa o auauna i le aiga Peteli i Amerika, le polokalame i se tatalo. Na amata e le taʻitaʻifono o David Splane, o se sui o le Vaega Pule o Molimau a Ieova le polokalame o le faauuga i le faapea atu i na tamā ma tinā: “Ua tatau iā te outou la matou faamālō. O uiga na outou totō i o outou alo ua uunaʻia ai i latou e auai i le auaunaga faamisionare.” Atonu na popole na mātua ona o le a ō atu o latou alo i ni atunuu mamao. Ae na faamautinoa atu e le uso o Splane iā i latou: “Aua tou te popole i o outou alo. E mafai ona sili atu le tausiga a Ieova iā i latou na i lo le mea tou te mafaia.” Ona ia toe faapea atu lea: “Ia manatunatu i mea lelei o le a faataunuuina e o outou alo. O le a maua e tagata mafatia, le faamāfanafanaga moni i le taimi muamua i o latou olaga.”

Le Auala e Aumaia ai Pea le Olioli i Isi

Na faafeiloaʻi atu e le taʻitaʻifono failauga e toʻafā. O le failauga muamua o se sui o le Komiti o le Lālā a Amerika o Ralph Walls, na talanoa i le matua: “Ia Pupula o Outou Mata.” Na ia faamamafa le sili atu ona leaga o le tauaso faaleagaga na i lo le tauaso faaletino. Sa lē iloa e le faapotopotoga o Laotikaia i le uluaʻi senituri lo latou vaaiga faaleagaga. Na ofo atu le fesoasoani iā i latou o ē na tauaso faaleagaga i lenā faapotopotoga. Ae peitaʻi, e mafai ona ʻalofia le tauaso faaleagaga e ala i le mataala faaleagaga. (Faaaliga 3:14-18) Na faapea mai le failauga: “Ia pupula o outou mata, ma tagaʻi atu i taʻitaʻi o le faapotopotoga e pei ona silasila ai Ieova iā i latou.” E lē tatau ona soona popole le ʻaufaauu pe a iai ni faafitauli i le faapotopotoga. O loo mataala le Alii o Iesu Keriso i na mea uma. O le a ia tagaʻi i ai ma faafoe i lana taimi atofaina.

Na sosoo ma le taliina e Samuel Herd o se sui o le Vaega Pule le fesili: “Po ua E Nofosauni?” E pei ona ave e se tagata faimalaga ona ofu e manaʻomia, e ao foʻi la i le ʻaufaauu ona faaofuina i latou i uiga o le tagata fou. E ao ona iā i latou le alofa mutimutivale o Iesu. Ina ua faapea atu se lepela iā te ia: “Afai ua e finagalo i ai, e te mafaia ona faamamā ia te aʻu.” Na fetalai atu Iesu: “Ou te loto i ai, inā mamā ia oe.” (Mareko 1:40-42) Na faapea atu le failauga: “Pe afai tou te mananaʻo moni lava e fesoasoani i tagata, o le a outou maua le auala e fai ai.”  Ua taʻu atu e le Filipi 2:3 i Kerisiano ina ia manatu “ua sili nisi.” Na faapea atu le uso o Herd: “E sili atu ona tāua le lotomaulalo na i lo le poto. E faatoʻā maua aogā mai i lo outou poto e i latou tou te feiloaʻi atu i ai i le faiva, ma uso ma tuafāfine, pe afai tou te lotomaulalo.” Na ia faaiʻu i le faapea atu, afai e faaauau ona oofu pea le ʻaufaauu i le alofa faa-Kerisiano, ua nofosauni i latou e malaga atu i o latou tofiga fou ma le mautinoa e taulau manuia.—Kolose 3:14.

Na fia faalogologo le aofia iā Mark Noumair, o se tasi o faiaʻoga o le Aʻoga o Kiliata, ona o le matua o lana lauga, “Po o le a Outou Maua Pea Lenā Lagona?” E faatatau lenei lauga i lo tatou talisapaia o le agalelei o Ieova. Ua taʻua i le Salamo 103:2: “Loʻu agaga e, ia e faamanū atu iā Ieova, aua foʻi neʻi galo se mea e tasi o ana mea alofa.” Sa leai se talisapaia e Isaraelu o le manai lea na latou ola ai, na latou taʻua o “mea e ʻai faatauvaa.” (Numera 21:5) A o faagasolo taimi, e leʻi suia le tāua o le manai, ae na mou atu lo latou lotofaafetai. Na faapea atu le faiaʻoga: “Pe afai e galo iā te outou mea na faia e Ieova ma lē toe faatāuaina lau auaunaga i nuu mamao, o le a afāina ai lou manatu i le galuega na tuu atu e Ieova iā te oe.” Ua taʻua i le Salamo 103:4, ua faapaleina outou e Ieova i le “alofa.” O le a iloa e le ʻaufaauu le alofa o Ieova i a latou faapotopotoga fou.

Na talanoa le isi faiaʻoga o Kiliata o Lawrence Bowen, i le mataupu, “Po o le a Outou Maua ni Faamanuiaga?” Na ia taʻua, ua aʻoaʻoina lelei sui o le vasega lona 119 o Kiliata ina ia avea o ni misionare taulau manuia. Peitaʻi, o le taimi nei e ao ona latou piiama atu iā Ieova ma le galuega na ia tofia atu iā i latou. I le Faaaliga 14:1-4 o loo faamatalaina ai le 144,000 o “ē ua mulimuli atu i le Tamaʻi Mamoe i mea uma e alu i ai o ia.” Ua piiama atu ma le faamaoni lenā vaega iā Ieova ma lona Alo e ui i tulaga faigatā, ma ua latou ausia o latou sini. Na faapea atu le failauga: “E tusa lava po o le ā e ono tupu, ae ia piiama atu ma le faamaoni iā Ieova ma le galuega na ia tofia ai tatou.” O le faia faapea, o le a “maua” ai e le ʻaufaauu ia faamanuiaga a Ieova.—Teuteronome 28:2.

Fua Mai la Latou Auaunaga

O faaiʻuga uma lava o le vaiaso o le aʻoga, na auai le ʻauaʻoʻoga i le talaʻiga. I le lauga a Wallace Liverance, o le lesitala o le aʻoga, na ia taʻua ai faamaoniga o lo latou taulau i lenei itu. Na latou talaʻi atu le tala lelei pe a ma le itiiti ifo i le sefulu gagana ma amata ni suʻesuʻega faale-Tusi Paia. Na amata e se tasi ulugalii i le vasega se suʻesuʻega faale-Tusi Paia ma se tane Saina. Ina ua māeʻa ni asiasiga se lua, na la fesili atu iā te ia i sona lagona e faatatau i le iloaina o Ieova. Na ia suʻe lana Tusi Paia ma fai atu iā i laʻua e faitau le Ioane 17:3. Na ia manatu ua iai o ia i le ala o le ola.

Na faatalatalanoa e Anthony Morris o le Vaega Pule uso e toʻatolu, o ni sui o Komiti o le Lālā i le Côte d’Ivoire, Dominican Republic ma Ecuador. Na faamautinoa atu e nei uso i le ʻaufaauu e faapea, o loo tulimataʻia e Komiti o le Lālā lo latou taunuu atu ma o le a fesoasoani iā i latou ina ia faamasani i o latou tofiga fou.

Na sosoo lea ma le talanoa atu o Leonard Pearson mai le aiga Peteli i Amerika i sui o Komiti o Lālā mai le Democratic Republic of the Congo, Papua Niu Kini ma Uganda. Na faalaeiau e nei uso le ʻaufaauu ina ia maelega i le talaʻiga. O se ulugalii misionare e 21 tausaga o auauna i Congo, na fesoasoani i tagata e toʻa 60 ina ia tuuina atu ma papatiso. O loo faia nei e lenā ulugalii suʻesuʻega faale-Tusi Paia e 30, ma o le 22 o a la tagata aʻoga ua auai i sauniga a le faapotopotoga. O le taimi sili lenei ona lelei e galulue o ni misionare auā lenā seleselega faaleagaga.

Maelega e Molimau Atu Auā ua Lata le Iʻuga

Na taulimaina e Gerrit Lösch mai le Vaega Pule le lauga faaiʻu. O lana matua, “O le Talaʻiga e Uiga i le Atua ma le Molimau iā Iesu i le Aso o le Alii.” O upu “mau” ma le “molimau atu” e faa-19 taimi o taʻua i le tusi o Faaaliga i le uluaʻi gagana. O lea la, ua faaalia manino e Ieova le galuega o loo ia finagalo ai i ona tagata  e fai. O afea tatou te molimau atu ai ? I le “aso o le Alii.” (Faaaliga 1:9, 10) Na amata lenā aso i le 1914, ma o loo faaauau mai pea i o tatou aso e oo i le lumanaʻi. E tusa ai ma le Faaaliga 14:6, 7, o loo lagolagoina e agelu le talaʻiga e uiga i le Atua. Ua faaalia i le Faaaliga 22:17 ua tuuina atu i le vaega totoe o Kerisiano faauuina, le tiute o le faatonutonuina o le galuega o le molimau iā Iesu. Peitaʻi, e ao iā i tatou uma ona fai lenā galuega i le taimi nei. I le fuaiupu e 20, na fetalai Iesu: “Ou te vave alu atu.” Na lapataʻia e le uso o Lösch i latou uma na auai: “Ia valaau atu i tagata, ‘Inā ave fua ia le vai o le ola.’ Ua vave ona afio mai Iesu. Po o ua tatou nofosauni ea?”

Na taualuga e Fred Rusk, o lē na auauna o se faiaʻoga o Kiliata mo le 11 tausaga, le polokalame i se tatalo faafetai iā Ieova lea na pāʻia ai loto o i latou uma na auai. O se faaiʻuga talafeagai i se aso e olioli ai.

[Pusa i le itulau 13]

FAAMAUMAUGA O LE VASEGA

Aofaʻi o atunuu o loo iai o latou sui: 10

Aofaʻi o atunuu ua tofia i ai: 25

Aofaʻi o tagata aʻoga: 56

Faatatauga o tausaga: 32.5

Faatatauga o tausaga i le upu moni: 16.4

Faatatauga o tausaga i le faiva faataimi atoa: 12.1

[Ata i le itulau 15]

Vasega Faauu Lona 119 o le Aʻoga Faale-Tusi Paia a le Olomatamata o Kiliata

I le lisi o i lalo, e amata mai laina i luma ma faasolo i tua ma o suafa e lisi mai i le agavale e agaʻi i le taumatau.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.