Po o Mausalī Lou Faatuatua i le Atua?

“A ia outou muaʻi saʻili lona malo.”—MATAIO 6:33.

1, 2. O le ā le mea na faia e se tauleʻaleʻa i lana galuega, ma aiseā?

NA MANAʻO se tauleʻaleʻa ina ia matuā aogā i lana faapotopotoga. O lana galuega totogi na faalavelavea ai lona auai e lē aunoa i sauniga. Na faapefea ona ia foʻia lea tulaga? Na ia faafaigofie lona olaga, faamavae mai lana galuega ma maua se isi galuega e lē faalavelavea ai ana gaoioiga faa-Kerisiano. I aso nei, e itiiti se tupe ua ia maua na i lo le galuega muamua, ae o loo mafai pea ona ia tausia lona aiga ma ua sili atu ona fesoasoani i le faapotopotoga.

² Po o e malamalama i le māfuaaga na faia ai e lea tauleʻaleʻa lenā laasaga? Pe e mafai ona e faia se laasaga faapena pe afai e pei lou tulaga o ia? E faamālō atu ona o le toʻatele o Kerisiano ua latou faia ni laasaga faapena. O a latou gaoioiga ua faaalia ai lo latou talitonu i le folafolaga a Iesu: “A ia outou muaʻi saʻili lona malo ma lana amiotonu; ona faaopoopoina atu lea o ia mea uma iā te outou.” (Mataio 6:33) O loo latou faatuatua i le Atua mo le olaga manuia ae lē i le lalolagi.—Faataoto 3:23, 26.

3. Aiseā ua tomānatu ai nisi pe aogā i aso nei ona faamuamua le Malo o le Atua?

³ E ono tomānatu nisi po o se filifiliga atamai sa faia e lenā tauleʻaleʻa, pe a fua i aso faigatā nei ua tatou ola ai. I aso nei, ua ola nisi i ni olaga matuā matitiva lava, ae o isi o loo tamaoaiga ma ola fiafia. O loo naunau le toʻatele o tagata i atunuu matitiva ina ia faaleleia o latou olaga i le itu faaletino. Ae peitaʻi, ua lagona foʻi e le toʻatele i atunuu tamaoaiga le popole i o latou tulaga ona ua faalētonu le tamaoaiga, suia tulaga tau galuega, ma ua soona tagisā pule o falefaigaluega. Ona o faigatā ua aofia ai i le tausia o le soifua, ua tomānatu nisi, ‘Pe e aogā pea le muaʻi saʻilia o le Malo?’ Ina ia fesoasoani e tali lenā fesili, ia manatunatu i le aofia na fetalai atu i ai Iesu.

‘Aua Neʻi Popole’

4, 5. Na faaalia faapefea e Iesu e talafeagai i tagata o le Atua ona aua le soona popole i mea i aso taʻitasi?

⁴ Sa iai Iesu i Kalilaia, ma na ia fetalai atu i le motu o tagata mai nuu eseese. (Mataio 4:25) E toʻaitiiti i latou sa mauʻoa. E lē taumatea o le toʻatele sa matitiva. Peitaʻi, na faalaeiau i latou e Iesu e aua neʻi faamuamua le saʻilia o le tamaoaiga faaletino, ae ia toloaʻi se mea e sili ona tāua—o le ʻoa lea faaleagaga. (Mataio 6:19-21, 24) Na ia fetalai: “Aua neʻi outou popole i o outou ola, i mea tou te aai ai, ma mea tou te inu ai, po o outou tino, i mea tou te oofu ai. E lē sili ea le ola i le mea e ʻai, ma le tino i le ofu?”—Mataio 6:25.

⁵ Sa lē logolelei fetalaiga a Iesu i le toʻatele na faalogologo i ai. Na latou iloa, pe afai latou te lē galulue mamafa, o le a mafatia o latou aiga. Peitaʻi, na faamanatu atu e Iesu iā i latou ia manulele. E latou te saʻilia ni meaʻai ma mea e nonofo ai i aso taʻitasi, ae o loo tausia pea e Ieova i latou. Na faamanatu atu foʻi e Iesu le tausia e Ieova o fugālaau, ma e sili atu le matagofie o nei fugālaau i lo Solomona ma lona matagofie tele. Pe afai o loo tausia e Ieova manulele ma fugālaau, pe e lē sili atu ea la lona tausia o i tatou? (Mataio 6:26-30) E pei ona fetalai Iesu, e sili atu ona tāua ola ma o tatou tino na i lo meaʻai o loo faatauina ina  ia tausia ai o tatou ola, ma ofu tatou te maua e laʻei ai. Pe afai e alu uma a tatou taumafaiga i le na o le saʻilia o meaʻai ma ni ofu e laʻei ai, ae leai se taumafaiga e auauna ai iā Ieova, e lē aogā lea.—Failauga 12:13.

Ia Saʻo le Manatu

6. (a) O ā tiute tauave o Kerisiano? (e) O ai e ao ona faatuatua i ai Kerisiano?

⁶ O le mea moni, e leʻi faalaeiauina e Iesu lana aofia e aua neʻi toe galulue ma faatalitali i le Atua e saunia mea mo o latou aiga. E oo foʻi i manulele e tatau ona saʻilia ni meaʻai mo latou ma a latou toloaʻi. O lea la, sa tatau i Kerisiano ona galulue ina ia maua a latou mea tausami. Sa tatau ona tausia o latou tiute tauave i le aiga. E lē gata i lea, sa tatau foʻi i auauna ma pologa Kerisiano ona galulue mamafa mo o latou matai. (2 Tesalonia 3:10-12; 1 Timoteo 5:8; 1 Peteru 2:18) Sa masani ona galue Paulo o sē fai faleʻie ina ia tausia ai o ia. (Galuega 18:1-4; 1 Tesalonia 2:9) Peitaʻi, e leʻi manatu na Kerisiano ua latou maua le manuia ona o galuega. Na latou faatuatua ma faalagolago iā Ieova. O le iʻuga, sa latou olioli i le filemu o le loto, lea e lē o maua e isi. Na faapea mai le faisalamo: “O ē faalagolago iā Ieova e faapei o le mauga o Siona i latou, e lē faagaeetia, a e tumau e faavavau.”—Salamo 125:1.

7. O le ā le mea e ono manatu ai se tasi e lē mausalī lona faatuatua iā Ieova?

⁷ E ono ese le manatu o se tasi e lē mausalī lona faatuatua iā Ieova. E manatu le toʻatele o tagata o le tamaoaiga o le vala autū lea i se olaga manuia. O le mea lea, ua uunaʻia ai e mātua a latou fanau ina ia tuutoina o latou olaga talavou i tulaga tauaʻoaʻoga, ma le faamoemoe o le a maua ni galuega e maualuluga totogi. Ae pagā lea, o nisi aiga Kerisiano ua mafatia ona o le tele o le taimi ma taumafaiga ua alu i aʻoaʻoga, ua lē taulaʻi atu ai le fanau i mea faaleagaga ae ua liliu atu i le saʻilia o meafaitino.

8. O le ā le manatu saʻo o loo tausia e Kerisiano?

⁸ Ua iloa e Kerisiano atamamai, ua faatatau le fautuaga a Iesu i aso nei e pei o le uluaʻi senituri, ma ua latou taumafai ai ia saʻo o latou manatu. E tusa lava pe e ao ona alu le tele o le taimi i galuega totogi ina ia tausia ai le aiga, ae e lē avea le saʻilia o le tupe e latou te manatu māmā ai i mea sili ona tāua, o mea faaleagaga.—Failauga 7:12.

 Nisi Auala e ʻAlofia ai le Popole

9. Ua faapefea ona faalaeiau e Iesu i latou o ē matuā faatuatua iā Ieova?

⁹ I lana lauga i le Mauga, sa faalaeiau ai e Iesu lana aofia: “Aua neʻi outou popole, ma faapea ane. Ni ā mea tatou te aai ai, ni ā foʻi mea tatou te inu ai, ni ā foʻi mea tatou te oofu ai? Auā o mea uma ia ua saʻilia e nuu ese. Auā ua silafia e lo outou Tamā o i le lagi e aogā ia mea uma iā te outou.” (Mataio 6:31, 32) Maʻeu ni upu faalaeiau! Afai tatou te matuā faatuatua iā Ieova, o le a ia fesoasoani iā i tatou. Peitaʻi, e faatupu manatu foʻi fetalaiga a Iesu. Ua faamanatu mai e nei upu iā i tatou, pe afai tatou te “saʻilia” meafaitino, ua pei o tatou manatu o tagata o “nuu ese” o ē e lē o ni Kerisiano moni.

10. Ina ua alu atu se tauleʻaleʻa iā Iesu mo se fautuaga, na ia faaalia faapefea le mea e sili ona naunau i ai le tauleʻaleʻa?

¹⁰ I se tasi o mea na tupu, na fesili ai se tauleʻaleʻa iā Iesu i le mea e ao ona ia faia e maua ai le ola e faavavau. Na faamanatu atu e Iesu iā te ia mea e manaʻomia e le Tulafono, lea sa tausia pea i lenā taimi. Na taʻu atu e le tauleʻaleʻa iā Iesu: “Ua ou tausia na mea uma, se ā se mea o toe ou te leʻi faia?” E ono manatu nisi e lē talafeagai le tali a Iesu. Na ia fetalai atu: “Afai e te manaʻo ina ia atoatoa ona lelei o lau amio, ia e alu ma e faatau atu au mea, i le e avatu ai i ē matitiva; ona iā te oe lea o le faulaʻigaoloa i le lagi, i le e sau ma mulimuli mai iā te aʻu.” (Mataio 19:16-21) Na tigā le loto o le tauleʻaleʻa, ona sa lē mafai ona ia faatauina atu ana meatotino. Na sili atu lona naunau i ana meatotino na i lo le alofa iā Ieova.

11, 12. (a) O ā fetalaiga faatupu manatu a Iesu e tusa ai ma le tamaoaiga? (e) E mafai faapefea e meafaitino ona faafaigatā ai le auaunaga iā Ieova?

¹¹ O lenā mea na iʻu ina fetalai atu ai Iesu i se mea e faateʻia ai: “E faigatā ona sao atu o le mauʻoa i le malo o le lagi. . . . E faigofie ona ui atu o se kamela i le pu o le au, a e faigatā ona sao o le mauʻoa i le malo o le Atua.” (Mataio 19:23, 24) Po o le uiga o le fetalaiga a Iesu e leai se mauʻoa e sao atu i le Malo? E leai, auā na ia toe fetalai: “E mafaia mea uma e le Atua.” (Mataio 19:25, 26) O le mea moni, o le fesoasoani a Ieova na avea ai nisi tagata mauʻoa i tuā i inā ma Kerisiano faauuina. (1 Timoteo 6:17) Ae sa faia e Iesu na fetalaiga ona o se māfuaaga tatau. Na ia avatuina se lapataʻiga.

¹² Pe afai e pipii le loto o se tasi i ana meatotino e pei o lenā tauleʻaleʻa mauʻoa, o le a faafaigatā ai ona ia auauna iā Ieova ma le lotoatoa. E moni lenā tulaga i se tasi e mauʻoa atoa ma sē “fia mauʻoa.” (1 Timoteo 6:9, 10) O le matuā faalagolago i meafaitino e mafai ai e se tasi ona itiiti le manatu mamafa i ona manaʻoga faaleagaga. (Mataio 5:3) O le iʻuga, e ono manatu ai e lē toe manaʻomia le fesoasoani a Ieova. (Teuteronome 6:10-12) E na te ono faatalitalia lona aloaʻia i le faapotopotoga. (Iakopo 2:1-4) O le a tele lona taimi e alu i le faaaogāina o ana ʻoa e faafiafia o ia na i lo le auauna iā Ieova.

Ia Maua le Manatu Saʻo

13. O le ā le manatu sesē na iai i tagata Laotikaia?

¹³ Sa sesē le manatu o le faapotopotoga i Laotikaia i meafaitino. Na fetalai atu Iesu iā i latou: “Ua e fai mai, Ou te se mauʻoa, ua faatamaoaigaina aʻu, ou te lē mativa foʻi i se mea e tasi; a ua e lē iloa o oe o le malaia, ma le pagatia, ma le mativa, ma le tauaso, ma le lē lavalavā.” E lē o lo latou tamaoaiga na māfua ai ona leaga le tulaga faaleagaga o tagata Laotikaia. O le faafitauli o lo latou matuā faalagolago i le tamaoaiga na i lo Ieova. O le iʻuga, na latou faaleogalua faaleagaga, ma ua toeitiiti ona “luai” atu lea i fafo e fofoga o Iesu.—Faaaliga 3:14-17.

14. Aiseā na talafeagai ai le faamālō a Paulo i Kerisiano Eperu?

¹⁴ I le isi itu, na faamālō atu Paulo i Kerisiano Eperu i o latou uiga i taimi o sauāga. Na ia fai atu: “Auā na outou alolofa mai i ē ua noanoatia, ma outou onosai i le vetega o a  outou oloa ma le olioli, ina ua iloa e outou ua iā te outou le oloa e sili ona lelei ma le tumau.” (Eperu 10:34) Sa lē faanoanoa tele na Kerisiano ona o le avea e isi o a latou meafaitino. Na latou olioli pea ona o le tausisi i mea tāua lava, o le “oloa e sili ona lelei ma le tumau.” E pei o le faatauʻoa i le faataoto a Iesu, na ia tuua mea uma ae alu e saʻili le penina tautele, sa latou maumauaʻi e tausisi i le faamoemoe o le Malo e tusa lava po o le ā le tulaga. (Mataio 13:45, 46) Maʻeu se uiga lelei!

15. Na faapefea e se tamaʻitaʻi Kerisiano i Laiperia ona faamuamua le auaunaga o le Malo?

¹⁵ O le toʻatele i aso nei, ua iā i latou se agaga lelei faapea. O se faaaʻoaʻoga, i Laiperia, na maua e se tamaʻitaʻi Kerisiano se avanoa e aʻoga ai i le iunivesite. I lenā atunuu, o se avanoa faapena e manatu i ai o se auala lea e maua ai se olaga manuia. Peitaʻi, o ia o se paeonia ma na ia maua se valaaulia e auauna o se paeonia faapito lē tumau. Na ia filifili e muaʻi saʻili le Malo ma tumau i le auaunaga faataimi atoa. Na ia alu atu i lona tofiga ma amata ni suʻesuʻega faale-Tusi Paia se 21 i masina e tolu. O lenei tuafafine talavou ma le faitau afe o isi e pei o ia, ua latou saʻili muamua le Malo, e tusa lava pe lafoaʻia ai tulaga lelei faaletino. Ua faapefea ona latou tausisia lenā uiga lelei i lenei lalolagi manaʻo i meafaitino? Ua iā i latou ni uiga lelei. Seʻi o tatou talanoaina nisi o na uiga.

16, 17. (a) Aiseā e tāua ai le loto maulalo pe afai tatou te faatuatua iā Ieova? (e) Aiseā e ao ai ona tatou talitonu i folafolaga a le Atua?

¹⁶ Loto maulalo: Ua taʻua i le Tusi Paia: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala. Aua e te faafiapoto.” (Faataoto 3:5-7) I nisi taimi, e foliga mai e lelei se fuafuaga e manuia ai i le itu faaletino. (Ieremia 17:9) Peitaʻi, o se Kerisiano faamaoni e vaai atu iā Ieova mo le taʻitaʻiga. (Salamo 48:14) I ona “ala uma”—i meafai a le faapotopotoga, aʻoga ma galuega, faafiafiaga po o so o se mea lava—e loto maulalo o ia ma saʻili fautuaga a Ieova.—Salamo 73:24.

¹⁷ Talitonu i folafolaga a Ieova: Na faapea mai Paulo: “E tatau i lē alu atu i le Atua ona talitonu o loo soifua o ia, o ia foʻi na te tauia mai o ē matuā saʻili iā te ia.” (Eperu 11:6) Pe afai tatou te masalosalo i le faataunuuina e  Ieova ana folafolaga, atonu o le a tatou manatu e sili ai le ‘fetagofi atu i mea a le lalolagi nei.’ (1 Korinito 7:31) Peitaʻi afai e malosi lo tatou faatuatua, o le a tatou maumauaʻi ai e muaʻi saʻili le Malo. E faapefea ona maua se faatuatua malosi? E ala i le faalatalata atu iā Ieova e lē aunoa i le tatalo ma e ala i suʻesuʻega a le tagata lava ia. (Salamo 1:1-3; Filipi 4:6, 7; Iakopo 4:8) E mafai ona tatou tatalo e pei o Tavita: “Ou te faalagolago iā te oe Ieova e, ou te faapea atu, O oe lava loʻu Atua. Ua tele lava lou agalelei.”—Salamo 31:14, 19.

18, 19. (a) E faapefea e le filigā ona faamalosia lo tatou faatuatua iā Ieova? (e) Aiseā e ao ai i se Kerisiano ona lotomalie e tuua isi mea?

¹⁸ Filigā i le auaunaga iā Ieova: Na faafesootaʻi atu e Paulo le talitonu i folafolaga a Ieova i le filigā ina ua ia tusi: “Ua matou mananaʻo tele ina ia outou taʻitasi ma faaali mai lea lava filigā, ina ia mautinoa le faamoemoe e oo i le gataaga.” (Eperu 6:11) Pe afai tatou te maelega i le auaunaga iā Ieova, o le a ia sapasapaia i tatou. I taimi uma tatou te iloa ai lana lagolagosua, e atili malosi ai lo tatou faatuatua iā te Ia, ma tatou te “tumau, ma le lē faagaeetia” ai. (1 Korinito 15:58) E toe faafouina ai lo tatou faatuatua ma mausalī ai lo tatou faamoemoe.—Efeso 3:16-19.

¹⁹ Lotomalie e tuua isi mea: Na tuua e Paulo se galuega maualuga ina ia mulimuli ai iā Iesu. Na manino lona faia o se filifiliga saʻo, e ui lava na faigatā lona olaga i nisi taimi ona o le tulaga tau seleni. (1 Korinito 4:11-13) E leʻi folafola mai e Ieova se olaga mauʻoa ma i nisi taimi e onosaia ai e ana auauna tulaga faigatā. O lo tatou lotomalilie e faafaigofie o tatou olaga ma tuua nisi mea, ua faamaonia ai le malosi o lo tatou faanaunauga e auauna iā Ieova.—1 Timoteo 6:6-8.

20. Aiseā e tāua ai le onosai mo se tasi e faamuamua le auaunaga o le Malo?

²⁰ Onosai: Na faalaeiau e Iakopo le ʻauuso Kerisiano: “O lenei, le ʻau uso e, onosai ia seʻia oo i le afio mai o le Alii.” (Iakopo 5:7) E faigatā ona onosai auā e tele vave le olaga i lenei lalolagi. E tatou te mananaʻo ia vave ona oo mai mea. Peitaʻi, na faalaeiau i tatou e Paulo e faaaʻoaʻo iā i latou, o “ē ua maua i le faatuatua ma le onosai mea na folafolaina.” (Eperu 6:12) Ia lotomalilie e faatalitali iā Ieova. E matagofie le lumanaʻi lea tatou te faatalitali i ai!

21. (a) O le ā le mea tatou te faaalia ai pe a tatou faamuamua le auaunaga o le Malo? (e) O le ā le mataupu o le a talanoaina i le suʻesuʻega e sosoo mai?

²¹ Ioe, e aogā le fautuaga a Iesu ina ia muaʻi saʻili le Malo. Pe a tatou faia faapea, e faaalia ai tatou te matuā faatuatua iā Ieova, ma ua tatou filifilia le auala e tasi e ao ona ola ai se Kerisiano. Peitaʻi, na fautuaina foʻi i tatou e Iesu ina ia faaauau pea ona ‘muaʻi saʻili le amiotonu a le Atua.’ I le mataupu e sosoo ai, o le a tatou iloa ai le māfuaaga e matuā aogā ai lenā faalaeiauga i aso nei.

Pe e Mafai Ona E Faamatala?

• E tusa ai ma meafaitino, o le ā le manatu saʻo na faalaeiauina i tatou e Iesu ia maua?

• O le ā le mea ua tatou aʻoaʻoina mai le talafaatusa a Iesu i le kamela ma le pu o se au?

• O ā uiga faa-Kerisiano ua fesoasoani iā i tatou e muaʻi saʻili le Malo o le Atua?

[Fesili mo le Suʻesuʻega]

[Ata i le itulau 21]

O le toʻatele na faalogo i fetalaiga a Iesu, e matitiva

[Ata i le itulau 23]

Na sili atu le manaʻo o le tauleʻaleʻa mauʻoa i ana meatotino na i lo le alofa i le Atua

[Ata i le itulau 23]

Na tuua e le faatauʻoa i le faataoto a Iesu mea uma ina ia saʻili le penina tautele

[Ata i le itulau 24]

O le a fesoasoani Ieova iā i tatou pe afai tatou te maelega i lana auaunaga