Agelu—O Ai i Latou?

NA MATUĀ ofo le tupu o se malo malosi i le mea na vaai i ai. Na faasalaoti ni tamāloloa se toʻatolu, a ua laveaʻia i latou mai se ogaumu aasa! O ai na laveaʻia i latou? Na faapea atu le tupu i tamāloloa nei e toʻatolu: “Ia faafetaia [lo outou Atua], o lē na auina mai lana agelu, ua laveaʻiina ai ana auauna ē na faatuatua iā te ia.” (Tanielu 3:28) Na vaaitino lenei tupu Papelonia o lē na soifua i le silia ma le 2,000 tausaga ua teʻa, a o laveaʻia e se agelu nei tamāloloa e toʻatolu. E anoanoaʻi tagata na talitonu i agelu i aso ua teʻa. E toʻatele foʻi tagata i aso nei e talitonu i agelu, ma manatu e iai taimi e taaʻina ai e agelu o latou olaga. O ai agelu, ma o fea na tupuga mai ai?

Ua fai mai le Tusi Paia, o agelu o agaga e pei foʻi o le Atua o le agaga lava ia. (Salamo 104:4; Ioane 4:24) E faitau miliona le aofaʻi o agelu. (Faaaliga 5:11) O “agelu o ē malolosi tele.” (Salamo 103:20) E pei agelu o tagata ona e iai o latou uiga ma faalogona, ma e mafai ona fai a latou lava filifiliga. Ae leʻi avea muamua agelu ma tagata. Na faia muamua e le Atua agelu, a o leʻi taitai ona faia tagata ma le lalolagi. Ua faapea mai le Tusi Paia, ina ua “faavaeina le lalolagi” e le Atua, na “pepese faatasi fetu [agelu] o le taeao, ma alalaga fiafia atalii uma o le Atua.” (Iopu 38:4, 7) Ua taʻua agelu o atalii o le Atua ona na faia i latou e le Atua.

Aiseā na faia ai e le Atua agelu? O le ā le matafaioi a agelu i olaga o tagata? Pe e taaʻina e agelu o tatou olaga i aso nei? Talu ai e mafai ona fai e agelu a latou lava filifiliga, pe e iai la ni agelu ua mulimuli iā Satani le Tiapolo ma fai ai i latou ma fili o le Atua? E maua i le Tusi Paia tali o nei fesili.