Fesili Mai le ʻAufaitau

Pe na o papa e lua na iai i totonu o le atolaau o le feagaiga, pe na iai nisi mea?

Ina ua faapaia le malumalu o Solomona i le 1026 T.L.M., “na lē i ai se mea i le atolaau, ua na o papa e lua na tuu ai e Mose i Horepa, ina ua osia le feagaiga e Ieova ma le fanauga a Isaraelu, ina ua latou ō mai nai Aikupito.” (2 Nofoaiga a Tupu 5:10) Ae e leʻi faapena i le taimi muamua.

“O ona masina e tolu talu ona tuua e le fanauga a Isaraelu le nuu o Aikupito,” na latou oo ai i le vao i Sinai. (Esoto 19:1, 2) Ona alu atu lea o Mose i le mauga o Sinai ma maua ai papa e lua o le Tulafono. Na faapea mai Mose: “Ona ou liliu lea, ma ou alu ifo nai le mauga, ua ou tuu foʻi papa i le atolaau na ou faia, o loo i ai lava, faapei ona poloaʻi mai ai o Ieova iā te aʻu.” (Teuteronome 10:5) E leʻi tumau ona iai lenei atolaau, auā e pei ona fetalai Ieova iā Mose, o se mea e tuu ai papa o le Tulafono i le taimi lenā. (Teuteronome 10:1) Na faatoʻā fai le atolaau o le feagaiga pe tusa o le taufaaiʻuiʻuga o le 1513 T.L.M.

Na amata ona muimui le nuu o Isaraelu i meaʻai, ina ua faatoʻā saʻoloto mai Aikupito. O le ala lea na foaʻi mai ai e Ieova le manai mo i latou. (Esoto 12:17, 18; 16:1-5) O le taimi lenā na faatonuina ai e Mose Arona: “Ia e ave se ato, ma tuu i ai le tumu o le omera o le manai, ma ia e tuuina i luma o Ieova, ina ia teu mo outou tupulaga amuli.” Ua faapea mai le tala: “Faapei ona fetalai mai Ieova iā Mose, ua faapea lava ona tuuina e Arona i luma o le atolaau o le tulafono [o se mea e teu ai ni pepa tāua], ina ia teu ai.” (Esoto 16:33, 34) A o aoaoina e Arona manai ma tuu i se ato, na lē mafai ona tuu i luma o le atolaau o le tulafono, ona na tatau ona faatali seʻi uma ona fai e Mose le Atolaau ma tuu i ai papa.

E pei ona taʻua muamua, na faatoʻā fai le atolaau o le feagaiga i le taufaaiʻuiʻuga o le 1513 T.L.M. Na tuu foʻi i ai le tootoo o Arona ina ua mavae le tele o tausaga, ina ua uma le fouvalega a Koru ma ē na ʻau ma ia. Na taʻua e le aposetolo o Paulo, “le atolaau o le feagaiga . . . sa i ai le ipu auro faaofuofu sa i ai le manai ma le tootoo o Arona sa tupu, ma papamaa o le feagaiga.”—Eperu 9:4.

Na saunia e Ieova le manai mo tagata Isaraelu a o aumau i le vao mo le 40 tausaga. E leʻi toe aumai e Ieova le manai ina ua ‘aai Isaraelu i mea na tutupu i le fanua’ o le Nuu Folafolaina. (Iosua 5:11, 12) Na tuu le tootoo o Arona i le atolaau o le feagaiga e fai ma faailoga mo tagata fouvale. O lea la, ua iloa ai na iai pea le tootoo i le atolaau o le tulafono, a o malaga le nuu o Isaraelu i le vao. E talafeagai la ona manatu, na aveese le tootoo o Arona ma le ipu auro o le manai mai le atolaau o le feagaiga, ina ua uma ona ulu atu tagata Isaraelu i le Nuu Folafolaina, ma a o leʻi faapaiaina le malumalu o Solomona.