Ia Tetee Atu i le Tiapolo, Ona Sola Lea o Ia!

“Ia outou gauaʻi . . . i le Atua; ia outou tetee atu i le tiapolo, ona sola ese ai lea o ia iā te outou.”—IAKOPO 4:7.

1, 2. (a) O le ā le uiga o le Tiapolo o loo iloa i se taʻutinoga i le Isaia mataupu e 14? (e) O ā fesili o le a tatou iloiloina?

E FAASAUSILI le Tiapolo. E iloa lona faamaualuga i upu a Isaia. I le silia ma le 100 tausaga a o leʻi avea Papelonia ma malo malosi, o le taʻutinoga lenei e foliga mai na fai e tagata o Ieova i “le tupu o Papelonia”: “O oe foʻi sa e faapea ifo i lou loto, Ou te alu aʻe i le lagi, ou te siitia i luga loʻu nofoālii ia sili i fetu a le Atua [o tupu o le gafa o Tavita], . . . ma te tutusa ma lē Silisili ese.” (Isaia 14:3, 4, 12-15; Numera 24:17) O le faamaualuga o “le tupu o Papelonia,” e pei lava o le faamaualuga o Satani “le atua o le lalolagi nei.” (2 Korinito 4:4) Ae e iʻu i le malaia Satani ma lona faasausili, e pei foʻi ona faalumaina Papelonia ina ua faaumatia.

² E iai ni fesili ua lāgā talu ai o loo iai pea Satani: Pe e tatau ona tatou fefefe iā Satani? Aiseā e uunaʻia ai e Satani tagata ia sauāina Kerisiano? E faapefea ona lē ʻoleʻolegia i tatou e le Tiapolo?

Pe e Tatau Ona Fefefe i le Tiapolo?

3, 4. Aiseā e lē fefefe ai Kerisiano faauuina ma a latou aumea i le Tiapolo?

³ E faamāfanafanaina Kerisiano faauuina i fetalaiga a Iesu: “Aua lava e te fefe i mea o le a e tigā ai. Faauta, o le a tuuina atu ni o outou e le tiapolo i le fale puipui, ina ia tofotofoina ai outou; e pō agafulu foʻi e puapuagatia ai outou. Ia e faamaoni seʻia oo i le oti, ona ou avatu ai lea iā te oe o le pale o le ola.” (Faaaliga 2:10) O Kerisiano faauuina ma a latou aumea o ē faamoemoe e ola e faavavau i le lalolagi, e lē fefefe i latou iā Satani le Tiapolo. E lē faapea o i latou o ni toa. Ae peitaʻi, o le māfuaaga e lē fefefe ai, ona e matataʻu i latou i le Atua ma ‘faatuatua i le paolo o ona apaʻau.’—Salamo 34:9; 36:7.

⁴ E leʻi fefefe uluaʻi soo o Iesu Keriso o ē na faamaoni e oo i le oti, e ui lava i mea na latou puapuaga ai. Latou te leʻi matataʻu i mea na ono faia e Satani le Tiapolo, auā na latou iloaina e lē taitai ona tuulafoaʻia e Ieova tagata e faamaoni iā te Ia. O loo faapena foʻi ona vilivilitaʻi Kerisiano faauuina ma a latou aumea, ina ia latou tumau i le faamaoni iā Ieova lo latou Atua e ui lava i sauāga ogaoga i ona pō nei. Ae ui i lea, na faaalia e le aposetolo o Paulo, e mafai e le Tiapolo ona faaoo le oti i tagata. Pe e lē tatau la ona tatou fefefe i lenā mea?

5. O le ā le mea ua tatou iloa mai le Eperu 2:14, 15?

 ⁵ Na fai mai Paulo, na iai iā Iesu le toto ma le tino “ina ia faaumatia e ia i lona maliu o lē ua i ai le malo e oti ai, o le tiapolo lea, ma tuusaunoaina ai i latou uma, o ē na faapologaina i o latou olaga uma ona o le mataʻu i le oti.” (Eperu 2:14, 15) Talu ai o Satani o “lē ua i ai le malo e oti ai” po o se isi ona uiga, e mafai ona ia faaoo le oti i tagata, o lea la na ia manumalo iā Iuta le Sekara ona faaaogā lea o taʻitaʻi Iutaia ma tagata Roma ina ia fasioti Iesu. (Luka 22:3; Ioane 13:26, 27) Ae e ala i lona maliu, ua tuusaʻoloto ai e Iesu tagata agasala mai le pule a Satani, ma mafai ai ona tatou maua le ola e faavavau.—Ioane 3:16.

6, 7. O le ā le malosi o Satani e faaoo ai le oti i tagata?

⁶ O le ā le malosi o Satani e faaoo ai le oti i tagata? Ua oo le oti i tagata talu ai amioga leaga a Satani, aemaise ana tala pepelo ma lana taʻitaʻiga. Ua tupu lenei mea ona na agasala Atamu ma ua faasolo mai ai le agasala ma le oti i tagata uma lava. (Roma 5:12) Ua sauāina foʻi e auauna a Satani i le lalolagi, tagata tapuaʻi o Ieova. Ua feoti foʻi auauna a Ieova i isi taimi, e pei ona sa oo le oti iā Iesu Keriso.

⁷ Peitaʻi ane, e lē tatau ona tatou manatu e faaoo e le Tiapolo le oti i so o se tagata lava e na te loto e fasioti. E puipuia e le Atua ona tagata. Na te lē tuuina atu Satani e faaumatia ana auauna faamaoni uma lava i lalolagi. (Roma 14:8) E moni e lē taofia e Ieova le sauāina o ona tagata, ma na te lē taofia foʻi le maliliu o nisi o ana auauna, ona o osofaʻiga a le Tiapolo. Ae ui i lea, o loo taʻua i le Tusi Paia le faamoemoe matagofie o le toe tū mo ē o loo i le ‘tusi faamanatu’ a le Atua, ma e lē mafai e le Tiapolo ona taofia le toe faaolaina mai o tagata!—Malaki 3:16; Ioane 5:28, 29; Galuega 24:15.

Aiseā ua Sauāina ai e Satani?

8. Aiseā ua sauāina ai e le Tiapolo auauna a le Atua?

⁸ Afai tatou te auauna faamaoni i le Atua, e iai la se māfuaaga tāua e sauāina ai i tatou e le Tiapolo. E manaʻo o ia ina ia tatou fulitua i le faatuatua. E māfana la tatou mafutaga ma lo tatou Tamā i le lagi, ma e manaʻo Satani e faaleaga lenā mafutaga. E lē o se mea lenā e ofo ai. Na valoia e Ieova i le faatoʻaga i Etena, o le a iai le “feitagaʻi” i le va o le “fafine” faafaatusa ma le “gata,” ma i le va o la laʻua “fanau.” (Kenese 3:14, 15) Ua faapea mai le Tusi Paia o le Tiapolo “o le gata tuai lea,” ua lotoa tele o ia auā ua na iloa ua saasaa ona pō. (Faaaliga 12:9, 12) E iloa e auauna a Ieova o le a sauāina i latou, a o faaauau ona feitagaʻi “fanau” nei  e lua. (2 Timoteo 3:12) Po o e silafia ea le māfuaaga autū o sauāga mai iā Satani?

9, 10. O le ā le finauga na lāgā e le Tiapolo, ma e faapefea ona aafia ai amioga a tagata?

⁹ Na lāgā e le Tiapolo le finauga i le pule silisili ese, lea na ia fesiligia ai foʻi le faamaoni o tagata i Lē na faia i latou. Na sauāina e Satani le tagata faamaoni o Iopu. Aiseā? Ina ia lafoaʻia e Iopu lona faamaoni iā Ieova. Na faaaogā e le Tiapolo le avā a Iopu ma “tagata faamāfanafana faasoesa” e toʻatolu. E pei ona taʻua i le tusi o Iopu, na luʻia e le Tiapolo le Atua ma finau atu e lē faamaoni se tagata i le Atua, pe a tuu atu le tagata e na te tofotofoina. Ae na faamaoni pea Iopu i le Atua, ma faamaonia ai e pepelo Satani. (Iopu 1:8–2:9; 16:2; 27:5; 31:6) I aso nei, ua sauāina e le Tiapolo Molimau a Ieova ma le faamoemoe ia lafoaʻia lo latou faamaoni, lea o le a faaalia ai le moni o lana finauga.

¹⁰ E mafai ona tatou faamalolosi ma loto tetele, pe a tatou iloa ua sauāina i tatou e le Tiapolo ona o lona manaʻo tele ina ia lafoaʻia lo tatou faamaoni i le Atua. (Teuteronome 31:6) O lo tatou Atua o le Pule Silisili Ese lea i le lagi ma le lalolagi, ma e fesoasoani mai ina ia tatou tumau i le faamaoni. Tau ina ia tatou taumafai e faafiafia le finagalo o Ieova e ala i le tutumau faamaoni, ma avatu ai sana tali i Lē e sili ona faifai iā te Ia, o Satani le Tiapolo.—Faataoto 27:11.

‘Ia Laveaʻi i Matou ai Lē e Leaga’

11. O le ā le uiga o le talosaga, “Aua foʻi e te taʻitaʻiina i matou i le faaosoosoga”?

¹¹ E tatau ona tatalo faatauanau, auā e lē faigofie le tumau faamaoni. Ua fesoasoani iā i tatou le tatalo faaaʻoaʻo a Iesu. Na fetalai Iesu: “Aua foʻi e te taʻitaʻiina i matou i le faaosoosoga, A ia e laveaʻi iā i matou ai [lē e] leaga.” (Mataio 6:13) E lē faaosoosoina i tatou e Ieova e fai le agasala. (Iakopo 1:13) Ae e iai mau o le Tusi Paia ua faapea mai, o le Atua na faia se mea po o ia foʻi na māfua ai se mea. O le mea moni, e tuu pea e Ieova mea ina ia tutupu. (Ruta 1:20, 21) O lea la, pe a tatou tatalo e pei o Iesu, ua tatou ole atu iā Ieova e aua neʻi tuu i tatou e lolo atu i faaosoosoga. E faafofoga mai Ieova, auā o le taʻutinoga lenei o i le Tusi Paia: “Ua faamaoni le Atua, o lē na te lē tuuina atu outou i le faaosoosoga e sili i se mea ua outou lavatia, a e sauni foʻi faatasi ma le faaosoosoga se mea e sao ai, ina ia outou lavā oono.”—1 Korinito 10:13.

12. Aiseā e tatalo ai: “Ia e laveaʻi iā i matou ai [lē e] leaga”?

¹² Ina ua uma ona taʻua e Iesu faaosoosoga i lana tatalo, ona ia fetalai lea e tusa ai ma faaliliuga mai le uluaʻi gagana: “A ia e laveaʻi iā i matou ai lē e leaga.” Ua faaliliuina lenei fuaiupu i le Tusi Paia Samoa e faapea: “A ia laveaʻi iā i matou ai le leaga.” Peitaʻi, o le upu “laveaʻi” e masani ona faatatau atu i tagata, ma ua fai mai le tusi o Mataio, o le Tiapolo o “lē faaosooso,” o lona uiga la o loo faasino atu i se tasi. (Mataio 4:3, 11) O lea la, e tāua ona tatalo ina ia laveaʻi mai ‘lē e leaga,’ o Satani le Tiapolo. O loo galue Satani e faaosooso i tatou ina ia agasala i le Atua. (1 Tesalonia 3:5) Pe a tatou tatalo, “Ia e laveaʻi iā i matou ai [lē e] leaga,” ua tatou faatoga atu i lo tatou Tamā o i le lagi e na te taʻitaʻi ma fesoasoani  mai, ina ia lē ʻoleʻolegia i tatou e le Tiapolo.

Ia Lē ʻOleʻolegia e le Tiapolo

13, 14. Aiseā na tatau ai ona suia e Kerisiano i Korinito le auala e feagai ai ma se tamāloa i le faapotopotoga o lē na amioleaga muamua?

¹³ Na augani atu Paulo i Kerisiano i Korinito ina ia fefaamagaloaʻi. Na tusi o ia: “O lē ua outou faamagalo atu i ai se mea, o aʻu foʻi lea; auā afai ua ou faamagalo atu se mea, o lē ua ou faamagalo atu i ai, ua ou faia lea ona o outou i luma o Keriso; ina neʻi ʻoleʻolegia i tatou e Satani; auā tatou te lē vālea i ana togafiti.” (2 Korinito 2:10, 11) E eseese auala e mafai ona ʻoleʻolegia ai i tatou e le Tiapolo. Aiseā na tusia ai e Paulo lenei mau?

¹⁴ Na aʻoaʻia e Paulo le faapotopotoga i Korinito, ona na faatasitasi pea ma se tamāloa amioleaga i le faapotopotoga. E lē taumatea na soisoi Satani, ona na taʻuleagaina ai le faapotopotoga i le lē tuuesea o se tagata na faitaaga, “o le faitaaga faapea foʻi e lē o taʻua i nuu ese.” Na iʻu ina faateʻaina le tamāloa fai mea sesē. (1 Korinito 5:1-5, 11-13) Ae na toe salamō mulimuli ane o ia. Afai e lē faamagaloina e le faapotopotoga le tamāloa ma toe faaaʻe o ia, o le a toe ʻoleʻolegia foʻi i latou e Satani. E faapefea? O le a latou soonafai tagata ma lē alolofa pei lava o Satani. Afai e “tofatumoanaina” le tamāloa ua salamō “i le tigā matuā tele” ma lē toe tapuaʻi ai i le Atua, e ono tuuaʻia la toeaina i lenā mea e tusa ai ma le silasila a Ieova, le Atua alofa mutimutivale. (2 Korinito 2:7; Iakopo 2:13; 3:1) O Kerisiano moni e lē fia faaaʻoaʻo iā Satani i le agaleaga atu i isi ma soonafai i latou, e aunoa ma se alofa mutimutivale.

Puipuia e le Ofutau Mai le Atua

15. O le ā le taua o loo tatou tau ai, ma o le ā le mea e faalagolago i ai lo tatou manumalo?

¹⁵ Ina ia laveaʻi i tatou mai le Tiapolo, e tatau ona tatou tau i se taua faaleagaga faasaga i agaga leaga. O le manumalo i na agaga leaga, e faalagolago lea i lo tatou ofuina o le “ofutau atoatoa mai le Atua.” (Efeso 6:11-18) O lenei ofutau e iai le “ufifatafata o le amiotonu.” (Efeso 6:14) Na lē usiusitai Saulo le tupu o Isaraelu i le Atua ma na ia lē toe mauaina le agaga paia. (1 Samuelu 15:22, 23) Tatou te maua le agaga paia o le Atua ma le puipuiga faasaga iā Satani ma ana temoni, pe a tatou faia le amiotonu ma ofuina le ofutau atoatoa faaleagaga.—Faataoto 18:10.

16. E faapefea ona puipuia pea i tatou mai agaga leaga?

¹⁶ Ina ia puipuia pea i tatou mai agaga leaga, e tatau ona tatou toʻaʻaga e faitau ma suʻesuʻe le Afioga a le Atua, ma lomiga ua ala mai i ‘le auauna faamaoni,’ ma fai isi gaoioiga faaleagaga. (Luka 12:42) O le faia faapea, tatou te manatunatu ai i mea faaleagaga e lelei mo i tatou, lea e ōgatusa ma le apoapoaʻiga a Paulo: “Le ʻau uso e, o le toe upu lenei; o mea uma ua moni, o mea uma ua taʻuleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foʻi o se isi  amio lelei, po o se tasi mea e viia, ia outou manatunatu i ia lava mea.”—Filipi 4:8.

17. O ā mea e fesoasoani iā i tatou ina ia tatou taulau ai i le talaʻia o le tala lelei?

¹⁷ E fesoasoani mai Ieova e “faaseevaeina o [tatou] vae i le sauniga o le tala lelei o le filemu.” (Efeso 6:15) Ua tatou lava ta oso e folafola atu le tala lelei o le Malo o le Atua, ona o le auai e lē aunoa i sauniga faa-Kerisiano. O se fiafiaga tele le fesoasoani atu i tagata ina ia aʻoaʻoina upu moni a le Atua ma saʻoloto ai faaleagaga! (Ioane 8:32) E tāua tele le “pelu a le Agaga, o le afioga lea a le Atua” ina ia puipuia ai i tatou mai aʻoaʻoga sesē ma “lepetia ai ʻolo.” (Efeso 6:17; 2 Korinito 10:4, 5) E mafai ona tatou aʻoaʻo atu le upu moni ma puipuia i tatou mai le lolo atu i togafiti a le Tiapolo, pe a tatou popoto e faaaogā le Tusi Paia.

18. E faapefea ona tatou “tetee atu i togafiti a le tiapolo”?

¹⁸ O upu amata nei a Paulo a o talanoa i lo tatou ofutau faaleagaga: “Ia outou loto tetele i le Alii, ma le malosi o lona mana. Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo.” (Efeso 6:10, 11) O le upu Eleni ua faaliliuina i le “tetee,” e fesootaʻi atu i le mafai ona tūmausalī o se fitafita. E mafai ona tatou tutūmausalī i le taua faaleagaga, e ui ina tele togafiti a Satani ina ia saveʻu lo tatou autasi, faaleaga a tatou aʻoaʻoga pe gausia lo tatou faamaoni i le Atua. Ae e leʻi taulau lava taumafaiga a le Tiapolo, ma e lē taitai taulau! *

Ia Tetee Atu i le Tiapolo, Ona Sola Lea o Ia

19. O le ā se tasi auala e tetee atu ai i le Tiapolo?

¹⁹ E mafai ona tatou manumalo i le taua faaleagaga e tetee atu i le Tiapolo ma ana agaga leaga. E leai se mea o le a tatou fefefe ai fua iā Satani, auā na tusi Iakopo: “Ia outou gauaʻi . . . i le Atua; ia outou tetee atu i le tiapolo, ona sola ese ai lea o ia iā te outou.” (Iakopo 4:7) O se tasi o auala e tetee atu ai iā Satani ma ana agaga leaga, o le faamamao mai lea i mea faataulāitu ma tagata o loo faia mea na. E manino le tala a le Tusi Paia, e lē tatau i auauna a Ieova ona saʻili i faailoga pe saʻili i fetu ma togafiti faataulāitu. Afai tatou te malolosi faaleagaga, tatou te lē fefefe la neʻi faalauatau i tatou e se tagata.—Numera 23:23; Teuteronome 18:10-12; Isaia 47:12-15; Galuega 19:18-20.

20. E faapefea ona tatou tetee atu i le Tiapolo?

²⁰ Tatou te “tetee atu i le tiapolo” pe a tatou mulimuli i tapulaa ma upu moni a le Tusi Paia, ma tutūmausalī e faasagatau atu i le Tiapolo. E fiafia le lalolagi iā Satani auā o ia o le atua o le lalolagi. (2 Korinito 4:4) Ona o lea, tatou te teena ai amioga a le lalolagi e pei o le faamaualuga, manatu faapito, amioga lē mamā, sauā ma le matapeʻapeʻa. Tatou te iloa na sola ese le Tiapolo ina ua teena e Iesu ana togafiti, i lona taʻua lea o mau o le Tusi Paia a o faaosoosoina o ia i le vao. (Mataio 4:4, 7, 10, 11) E faapena foʻi ona toʻilalopopo Satani ma “sola ese” mai iā i tatou, pe a tatou gauaʻi iā Ieova i mea uma lava, ma faalagolago iā te Ia i le tatalo. (Efeso 6:18) E lē mafai e se tasi ona faia se mea tatou te leaga ai e faavavau e aofia ai ma le Tiapolo, ona ua fesoasoani mai Ieova le Atua ma lona Alo pele!—Salamo 91:9-11.

[Faamatalaga pito i lalo]

O le ā Sou Taofi?

• Pe e tatau ona tatou fefefe iā Satani le Tiapolo?

• Aiseā e sauāina ai e Satani Kerisiano?

• Aiseā tatou te tatalo ai ina ia laveaʻi i tatou ai ‘lē e leaga’?

• E faapefea ona tatou manumalo i le taua faaleagaga?

[Fesili mo le Suʻesuʻega]

[Ata i le itulau 26]

E leʻi fefefe uluaʻi soo o Keriso o ē na faamaoni e oo i le oti

[Ata i le itulau 27]

E lē mafai e le Tiapolo ona taofia le toe tutū mai o ē e manatua e Ieova

[Ata i le itulau 28]

Pe e te tatalo ina ia laveaʻi oe mai ‘lē e leaga’?

[Ata i le itulau 29]

Po o e ofuina le “ofutau atoatoa mai le Atua”?