E Maua i le Lalolagi Fou a le Atua le Olaga Manuia Moni

NA SIITIA atu Tavita, * o se tane Kerisiano i Amerika, ma lona manatu sa ia faia le mea saʻo. E ui e leʻi manaʻo o ia e tuua lana avā ma lana fanau, ae sa ia manatu e ono maua se olaga sili ona lelei mo i latou pe afai e tele ni tupe. O lea la na ia malaga atu ai i ona tauaiga i Niu Ioka ma e leʻi umi ae maua sana galuega i inā.

A o faagasolo taimi na amata ona mou atu le mautinoa o Tavita. Ua seāseā iai ni taimi mo mea faaleagaga. I se tasi o mea, na toetoe ai lava a mou atu lona faatuatua i le Atua. Na ia lolo atu i amioga lē mamā ma na ia iloa ai le mea moni e faatatau i lona tulaga. O lona taulaʻi atu i le ʻoa faaletino na faasolosolo malie ona see ese ai o ia mai mea e matuā tāua. E tatau ona faia se suiga.

I le pei o Tavita, e toʻatele ua siitia mai atunuu tauatiaʻe i tausaga taʻitasi, ina ia faaleleia lo latou tulaga tau tupe. Peitaʻi, e masani ona mafatia i latou i le itu faaleagaga. Ua tomānatu nisi, ‘Pe e mafai  e se Kerisiano ona saʻilia ʻoa faaletino ma mauʻoa i le Atua?’ Ua faapea mai le ʻautusitala taʻutaʻua ma faifeʻau, e mafai. Peitaʻi, e pei ona iloa e Tavita ma isi, e faigatā ona mauʻoa ma malosi faaleagaga.—Luka 18:24.

E Lē Leaga Tupe

O le mea moni, o tupe o mea ia sa faia e tagata. E pei o le tele o isi mea na fausia e tagata e lē leaga pe sesē. O le mea moni, e na o se mea e avatu ina ia maua ai se isi mea. O lea la, pe a faaaogā lelei, e mafai ona faataunuu ai se fuafuaga lelei. O se faaaʻoaʻoga, ua taʻua i le Tusi Paia e fai “tupe ma mamalu” o lona uiga o se puipuiga lea mai faafitauli o le mativa. (Failauga 7:12) Peitaʻi e foliga mai o le manatu o nisi, ‘e aogā tupe i mea uma.’—Failauga 10:19.

E taʻusalaina e le Tusi Paia le paiē ae o loo faalaeiauina le galue mamafa. E tatau ona tatou tausia o tatou aiga, ma pe afai e lava ia “avatu [se mea] i ē ua matitiva.” (Efeso 4:28; 1 Timoteo 5:8) E lē gata i lea, e lē o faasā e le Tusi Paia le maua o ni mea, ae ua faalaeiau tatou ina ia fiafia i mea ua maua. Ua faatonuina i tatou ‘ia fai o tatou tofi’ ma olioli i fua o a tatou galuega. (Failauga 5:18-20) O loo iai ni faaaʻoaʻoga i le Tusi Paia o tane ma fafine faamaoni na mauʻoa.

Tane Faamaoni na Mauʻoa

O Aperaamo, o ia o se auauna faamaoni a le Atua, sa mauʻoa i lafu manu, ario, auro, ma le faitau selau o auauna. (Kenese 12:5; 13:2, 6, 7) Sa mauʻoa foʻi le tagata amiotonu o Iopu i lafu manu, auauna, auro ma ario. (Iopu 1:3; 42:11, 12) Sa mauʻoa nei tane pe a faatusatusa mai i aso nei, ae peitaʻi sa mauʻoa foʻi i laʻua i le Atua.

Ua taʻua e Paulo Aperaamo o le “tamā o ē faatuatua uma.” E leʻi lima mau Aperaamo pe manumanu tele i mea na iā te ia. (Roma 4:11; Kenese 13:9; 18:1-8) E faapena foʻi ona taʻua e le Atua Iopu “o le tagata ua sao lana amio ma le amiotonu.” (Iopu 1:8) Na masani ona ia fesoasoani i ē matitiva ma ē mafatia. (Iopu 29:12-16) Na faatuatua Aperaamo ma Iopu i le Atua na i lo la ʻoa.—Kenese 14:22-24; Iopu 1:21, 22; Roma 4:9-12.

O se isi faaaʻoaʻoga o le tupu o Solomona. A o fai ma tupu i le nofoālii o le Atua i Ierusalema, na faamanuiaina Solomona e lē gata i le poto mai le Atua, ae o le tamaoaiga ma le mamalu. (1 Tupu 3:4-14) Sa faamaoni o ia i le tele o lona olaga. Ae peitaʻi, i tausaga mulimuli ane, na “lē sao lona loto iā Ieova lona Atua.” (1 Tupu 11:1-8) O le mea moni, ua faaalia i lana tala nisi o  lamatiaga masani o le tamaoaiga faaletino. Seʻi o tatou iloiloina nisi o na lamatiaga.

Lamatiaga o le ʻOa

O nisi ua lē malilie i mea ua latou maua ona o le ʻoa, ma ua mananaʻo tele i nisi mea. I le amataga o le nofoaiga a Solomona, na ia mātauina ai le faanaunauga lenei i nisi. Na ia tusi: “O lē ua manaʻo i le ario, e lē malie o ia i le ario; o lē ua manaʻo foʻi i le oloa tele, e leai sana mea e maua ai; o le mea faatauvaa foʻi lea.” (Failauga 5:10) Na lapataʻia e Iesu ma Paulo Kerisiano e faatatau i lenei manaʻoga ma le pepelo o le ʻoa.—Mareko 4:18, 19; 2 Timoteo 3:2.

Pe afai e avea tupe ma o tatou faanaunauga autū na i lo le manatu e na o se auala e fai ai ni mea, e faigofie ona paʻū atu ai i faaosoosoga, e pei o le pepelo, gaoi ma le faaʻoleʻole. Na faalata e Iuta le Sekara, o se soo o Keriso, lona matai i tupe siliva e 30. (Mareko 14:11; Ioane 12:6) Ona o le manaʻo tele i le tupe, ua oo ina tapuaʻi i ai nisi na i lo le Atua. (1 Timoteo 6:10) O lea la, e ao ai i Kerisiano ona faamaoni i lo latou faanaunauga mo le mauaina o tupe.—Eperu 13:5.

O le saʻilia o le tamaoaiga e iai foʻi lamatiaga e iloagatā. Muamua, a tele ana ʻoa, e mafai ona faamoemoe ai le tagata iā te ia lava. Na faaaofia e Iesu lenei mea ina ua ia faasino atu i le “pepelo o le ʻoa.” (Mataio 13:22) Na lapataʻia e Iakopo Kerisiano ina ia aua neʻi galo iā i latou le Atua pe a faia a latou fuafuaga tau pisinisi. (Iakopo 4:13-16) A mauʻoa se tasi e lē tau faalagolago i le isi tagata. O i latou e maua tupe ua iai le lamatiaga e faigofie ona latou faatuatua i a latou tupe na i lo le Atua.—Faataoto 30:7-9; Galuega 8:18-24.

Lona lua, e pei ona taʻua e Tavita, o le saʻilia o le tamaoaiga, e masani ona alu uma ai le taimi ma le malosi o se tasi, ma e faasolosolo mālie ona see ese ai o ia mai le saʻilia o mea faaleagaga. (Luka 12:13-21) Ona e mauʻoa tagata, e faigofie ai iā i latou ona faaaogā na ʻoa e saʻilia ai faafiafiaga po o manaʻoga o le tagata lava ia.

Faamata na fesoasoani le faaleagaina faaleagaga o Solomona i le tele o ana mea faitino na fiafia i ai? (Luka 21:34) Na ia iloa le faatonuga a le Atua e faasā le faaipoipo atu i tagata o nuu ese. Peitaʻi, na oo ina toʻaafe ana avā. (Teuteronome 7:3) O le manaʻo e faafiafia ana avā mai nuu ese, sa ia faia ai se faatulagaga tau tapuaʻiga e aofia ai le tapuaʻi i atua faapaupau. E pei ona taʻua muamua, na auaumālie ona vavae ese le loto o Solomona mai iā Ieova.

Ua faaali manino i nei faaaʻoaʻoga le saʻo o fautuaga a Iesu: “Tou te lē mafaia ona auauna i le Atua atoa ma le ʻoa.” (Mataio 6:24) O lea la, e faapefea i se Kerisiano ona fesagaʻia ma le manuia le luʻi o le tulaga tau tamaoaiga e pei ona feagai ma le toʻatele i aso nei? O le laualuga o na mea uma, o le ā le faamoemoe mo se olaga sili ona lelei i le lumanaʻi?

Ua i Faitotoʻa le Olaga Manuia

E leʻi faatonuina Aperaamo ma Iopu ma le nuu o Isaraelu, ia “ō atu e fai nuu uma lava ma soo” e pei ona faatonuina ai soo o Iesu. (Mataio 28:19, 20) Ina ia faia lenā galuega, e manaʻomia ai le taimi ma taumafaiga ia e ono alu i le saʻilia o meafaitino. O lea la, o le auala tatou te taulau manuia ai, o le anaana lea i le fetalaiga a Iesu: “A ia outou muaʻi saʻili lona malo ma lana amiotonu; ona faaopoopoina atu lea o ia mea uma iā te outou.”—Mataio 6:33.

Ina ua toetoe a malepe lona aiga ma toeitiiti faalētonu lona tulaga faaleagaga, na toe faasaʻosaʻo ai e Tavita ona ala. E pei ona  folafola mai e Iesu, ina ua toe faamuamua e Tavita le suʻesuʻeina o le Tusi Paia, tatalo ma le talaʻiga, na toe faaleleia isi tulaga o lona olaga. Na auaumālie ona toe māfana le mafutaga ma lana avā ma le fanau. Ua toe olioli ma maua le faamalieina. O loo galue mamafa pea o ia. E leʻi mauʻoa lava o ia, ae na ia iloa ni lesona tāua mai tulaga tigā na oo iā te ia.

Ua iloa nei e Tavita e foliga mai e lē lelei lana mea sa fai o le siitia atu i Amerika, o lea la ua ia maumauaʻi ai e lē toe avea tupe ma mea e faalavelavea ai ana filifiliga. Ua ia iloa nei foʻi e lē mafai ona faatauina i tupe mea e sili ona tāua i le olaga, o se aiga alolofa, uō lelei ma le mafuta i le Atua. (Faataoto 17:17; 24:27; Isaia 55:1, 2) O le mea moni, o le faamaoni e sili atu ona tāua na i lo le ʻoa. (Faataoto 19:1; 22:1) Ua maumauaʻi Tavita ma lona aiga e faamuamua mea e ao ona ave i ai le faamuamua.—Filipi 1:10.

Ua lē taulau taumafaiga a tagata ina ia maua le tamaoaiga ma ia amio lelei. Ae peitaʻi, ua folafola mai e le Atua, o le a aumaia e lona Malo le anoanoaʻi o meafaitino ma le faaleagaga o loo tatou manaʻomia ina ia ola fiafia ai. (Salamo 72:16; Isaia 65:21-23) Na aʻoaʻo e Iesu, ina ia maua le fiafia moni, ia tatou manatu mamafa muamua i o tatou itu faaleagaga. (Mataio 5:3) E tusa lava pe tatou te mauʻoa pe matitiva, ae o le faamuamua o mea faaleagaga i le taimi nei, o le auala sili lea tatou te sauniuni ai mo le lalolagi fou a le Atua i le lumanaʻi. (1 Timoteo 6:17-19) O lenā lalolagi o le a tamaoaiga faaletino ma faaleagaga ai.

[Faamatalaga pito i lalo]

[Ata i le itulau 5]

Sa faalagolago Iopu i le Atua, ae lē o ana ʻoa

[Ata i le itulau 7]

O mea aupito sili ona tāua i le olaga, e lē mafai ona faatauina i tupe