Faaaʻoaʻo i le Onosai o Ieova

“E lē faatuai mai le Alii i le mea na folafolaina mai, . . . a e peitaʻi ua onosai mai lava o ia.”—2 PETERU 3:9.

1. O le ā le meaalofa e lē mafaatusalia ua ofo mai e Ieova i tagata?

UA OFO mai e Ieova iā i tatou se mea e lē mafai e se isi ona ofo mai. O se mea e matuā naunau i ai ma e tāua, e lē mafai ona faatau mai pe maua ona o se galuega sa fai. O le mea ua ia ofoina mai, o le meaalofa o le ola e faavavau, o lona uiga o le ola e faavavau i le parataiso i le lalolagi. (Ioane 3:16) Maʻeu le fiafia o le a iai! O le a lē toe iai mea e māfua ai le mafatia, feteenaʻiga, sauā, mativa, solitulafono, maʻi ma le oti. O le a soifua tagata i le filemu moni ma le autasi i le pulega alofa a le Malo o le Atua. Maʻeu lo tatou faanaunau mo lenā parataiso!—Isaia 9:6, 7; Faaaliga 21:4, 5.

2. Aiseā ua lē aveesea ai e Ieova le faiga o mea a Satani?

² O loo faanaunau atu foʻi Ieova i le taimi o le a ia faavaeina ai le parataiso i le lalolagi. Auā foʻi e fiafia o ia i le amiotonu ma le faamasinoga tonu. (Salamo 33:5) E lē fiafia lona finagalo e silasila mai i tagata e lē ano pe feita i ana taʻiala amiotonu, o ē tetee i lana pule pe sauāina ona tagata. Ae e iai māfuaaga talafeagai ua lē aveesea ai e Ieova le faiga leaga o mea a Satani. O na māfuaaga e aofia ai amioga tatau lea e fesootaʻi atu i lana pule silisili ese. O le foʻiaina o nei mataupu, ua faaalia ai e Ieova se uiga tatou te tosina atu ai iā te ia, le uiga lea e lē o maua e le toʻatele, o le onosai.

3. (a) O le ā le uiga o le upu Eleni ma le Eperu ua faaliliuina i le Tusi Paia o le “onosai”? (e) O ā fesili o le a tatou iloiloina nei?

³ I le Tusi Paia ua iai se upu Eleni o lona uiga moni o le “umi ona oono” ma e masani ona faaliliu i le “faapalepale” ma le “onosai.” O loo maua ai i le upu Eleni ma le upu Eperu mo le “onosai” le manatu o le lavātia ma le faagesegese ona ita. E faapefea ona tatou mauaina aogā mai le onosai o Ieova? O ā lesona tatou te aʻoaʻoina mai le onosai ma le tumau o Ieova ma ana auauna faamaoni? E faapefea ona tatou iloa e gata mai le onosai o Ieova? Seʻi o tatou iloiloina.

Manatunatu i le Onosai o Ieova

4. E tusa ai ma le onosai o Ieova, o le ā le faamatalaga a Peteru?

⁴ E tusa ai ma le onosai o Ieova, na tusi Peteru: “A e aua neʻi lilo iā te outou, le au pele, lenei mea e tasi, e tusa i luma o le Alii le aso e tasi ma tausaga e afe, o le afe foʻi o tausaga e tusa ma le aso e tasi. E lē faatuai mai le Alii i le mea na folafolaina mai, faapei o le manatu a isi tagata i le faatuai; a e peitaʻi ua onosai mai lava o ia iā te outou, ona ua lē finagalo ia fano se tasi, a ia oo uma lava i le salamō.” (2 Peteru 3:8, 9) Seʻi mātau manatu tāua e lua o loo taʻua i inei e fesoasoani iā i tatou e malamalama ai i le onosai o Ieova.

5. E faapefea ona aafia gaoioiga a Ieova i lana silasila i le taimi?

⁵ O le manatu muamua, e lē silasila Ieova i le taimi e pei ona tatou manatu i ai. I le silafaga a Lē e soifua e faavavau, e tusa iā te Ia le afe o tausaga ma le aso e tasi. E lē faatapulaaina pe pulea o ia e le taimi, ae peitaʻi e lē faatuai o ia i le faasaʻoina o se tulaga. Ona o lona poto e lē gata mai, ua silafia la e Ieova le taimi sili ona talafeagai e gaoioi ai mo le lelei o tagata, ma ua ia onosai seʻia oo i lenā taimi. Ae peitaʻi, e lē tatau ona tatou faapea,  e lē manatu mamafa Ieova i puapuaga o ana auauna ae ua onosai pea o Ia. O ia o le Atua e ‘mutimutivale lona alofa’ ma o le alofa lava ia. (Luka 1:78; 1 Ioane 4:8) O le a ia aveesea atoa ma e faavavau so o se afāina ua oo i se tasi ona o puapuaga ia o loo tutupu i le taimi nei.—Salamo 37:10.

6. O le ā le manatu e lē tatau ona iā i tatou e uiga i le Atua, ma aiseā?

⁶ E lē faigofie i se tasi ona faatalitali i se mea ua ia faamoemoe i ai. (Faataoto 13:12) O lea la, pe a lē vave ona faataunuu e tagata a latou folafolaga, e manatu nisi e leai so latou faanaunauga e faia ai faapea. E lē o se mea poto le mafaufau faapena i le Atua! Pe afai tatou te faauiga sesē le onosai o le Atua i le faatuai, e mafai i le mavae atu o tausaga ona tatou masalosalo, faavaivai, ma oo ina tautulemomoe ai faaleagaga. Ae o le mea e sili atu ona leaga, o le ono taʻitaʻisesē o i tatou e i latou ia na lapataʻi mai ai Peteru, o ē tauemu ma e leai so latou faatuatua. Ua latou faapea mai ma le aamu: “Ofea nei le folafolaga o lona afio mai? auā talu ona momoe o le augātamā, ua tutumau pea o mea uma pei ona faatoʻā faia.”—2 Peteru 3:4.

7. E faapefea ona fesootaʻi atu le onosai o Ieova i lona finagalo ia salamō tagata?

⁷ O le manatu lona lua e tatou te maua mai upu a Peteru e faapea, e onosai Ieova ona e finagalo ia salamō tagata uma. O i latou e mumusu e liliu ese mai i o latou ala leaga, o le a faaumatia i latou e Ieova. Peitaʻi, e lē fiafia le finagalo o Ieova i le oti o le amioleaga. Ae e fiafia o ia e silasila mai ua salamō tagata, liliu ese mai i o latou ala leaga ma ola ai. (Esekielu 33:11) O le māfuaaga lea ua ia onosai ai pea, ma ua ia faamautinoa ua faalauiloa atu le tala lelei i le lalolagi uma ina ia maua ai e tagata le avanoa e ola ai.

8. Ua faapefea ona tatou iloa le onosai o le Atua i ana feutagaʻiga ma Isaraelu?

⁸ E tatou te iloa le onosai o le Atua i le auala na ia feutagaʻi ai ma Isaraelu. Na ia onosai i lo latou lē usiusitai mo le tele o tausaga. E ala i ana perofeta, na ia faamanatu atu pea iā i latou: “Ia outou liliu mai i o outou ala leaga, ma ia outou tausi i aʻu poloaʻiga ma aʻu sauniga, ia tusa ma le tulafono uma na ou poloaʻi atu ai i o outou tamā, na ou tuuina atu ai foʻi iā te outou e aʻu auauna o le au perofeta.” O le ā le iʻuga? E faanoanoa  ona na “lē faalogo” tagata.—2 Tupu 17:13, 14.

9. Na faapefea ona faaatagia atu e Iesu le onosai o lona Tamā?

⁹ Mulimuli ane na auina mai e Ieova lona Alo, o lē na taumafai pea i tagata Iutaia ia toe foʻi i le Atua. O le onosai o Iesu na faaatagia lelei atu ai le onosai o lona Tamā. Na silafia lelei e Iesu ua i faitotoʻa lona maliu, ma na ia auē: “Ierusalema e, Ierusalema e, o lē fasiotia perofeta, ma fetogi i maa i ē ua aauina atu iā te oe; ua tele lava oʻu manaʻo e faapotopoto i lau fanau, e pei o le moa ona ofaofataʻi i lana toloaʻi i lalo i ona apaʻau a e leʻi mafafai outou.” (Mataio 23:37) O nei upu faamomoiloto e lē o ni upu a se faamasino lē alofa e manaʻo e faasalaina se tasi, ae o upu a se uō alofa e onosai i tagata. I le pei o lona tamā o i le lagi, na finagalo Iesu ia salamō tagata ma sao mai le faasalaga. Sa faalogo nisi i lapataʻiga a Iesu ma sao ai mai le faamasinoga mataʻutia na oo i Ierusalema i le 70 T.A.—Luka 21:20-22.

10. O le ā le auala ua aogā ai le onosai o le Atua iā i tatou?

¹⁰ Pe lē o se mea matagofie ea le onosai o le Atua? E ui i le lē usiusitai o tagata, ae ua tuu mai e Ieova iā i tatou taʻitoʻatasi faatasi ma le faitau miliona o isi tagata le avanoa e iloa ai o ia, ma talia ai le faamoemoe o le faaolataga. Na tusi Peteru i uso Kerisiano: “Ia outou manatu o le onosai o lo tatou Alii o le faaolataga lea.” (2 Peteru 3:15) Pe tatou te lē lotofaafetai i le onosai o Ieova lea ua tatala ai le avanoa mo le faaolataga o i tatou? Pe tatou te lē tatalo iā Ieova ina ia onosai mai pea iā i tatou a o auauna atu iā te ia i aso uma?—Mataio 6:12.

11. O le malamalama i le onosai o Ieova ua uunaʻia ai i tatou e faia le ā?

¹¹ Pe a tatou malamalama i le pogai o le onosai o Ieova, e fesoasoani lea e faatalitali ai ma le onosai mo le faaolataga mai iā te ia. Tatou lē manatu ai ua faatuai ona ia faataunuu lana folafolaga. (Auega 3:26) A o tatou tatalo pea ia oo mai le Malo o le Atua, tatou te talitonu e silafia e le Atua le taimi sili ona talafeagai e tali mai ai i a tatou tatalo. E lē gata i lea, ua uunaʻia i tatou e faaaʻoaʻo iā Ieova e ala i le faaalia o le onosai i feutagaʻiga ma o tatou uso ma i latou e talaʻi atu i ai. E tatou te lē mananaʻo foʻi e faaumatia se tasi, a ia salamō ma maua le faamoemoe lava lea e tasi o le ola e faavavau.—1 Timoteo 2:3, 4.

Ia Manatunatu i le Onosai o Perofeta

12, 13. E tusa ai ma le Iakopo 5:10, na faapefea ona taulau Isaia i le faaalia o le onosai?

¹² O le manatunatu i le onosai o Ieova, e fesoasoani iā i tatou e talisapaia ma faatupu aʻe ai lea uiga. E lē faigofie i tagata lē lelei atoatoa ona onosai, peitaʻi e mafai lava ona faia faapea. E tatou te aʻoaʻoina ni lesona mai auauna a le Atua i aso anamua. Na tusi Iakopo: “Oʻu uso e, ia outou faaaʻoaʻo i le faatoatoa i le leaga, atoa ma le onosai o le au perofeta, ē na tautala mai i le suafa o le Alii.” (Iakopo 5:10) E faamāfanafanaloto ma faalaeiau le iloa ua foʻia e isi faafitauli e pei o ia tatou te fesagaʻia.

¹³ O se faaaʻoaʻoga o le perofeta o Isaia, sa ia manaʻomia le onosai i lona tofiga. Na faaalia e Ieova lea tulaga ina ua ia fetalai atu iā Isaia: “Inā alu ia, ma ia e faapea atu i lenā nuu, Ia outou matuā faalogo lava, a e tou te lē lagona; ia outou matuā vaai foʻi, a e tou te lē iloa. Ia faamafiafiaina loto o lenā nuu, ia faatutuli o latou taliga, ma ia faatauaso o latou mata; ina neʻi vaai o latou mata, ma faalogo o latou taliga, ma lagona o latou loto, ma latou liliu mai, ma faamālōlōina i latou.” (Isaia 6:9, 10) E ui i le lē tali lelei ane o tagata, ae na onosai Isaia ma faalauiloa atu lapataʻiga a Ieova pe a ma le 46 tausaga! I se tulaga faapena, o le a fesoasoani le onosai iā  i tatou e tumau ai i le talaʻia o le tala lelei e tusa lava pe lē tali lelei mai le toʻatele.

14, 15. O le ā se mea na fesoasoani iā Ieremia e faafetaiaʻia faigatā ma le lotovaivai?

¹⁴ O le mea moni, a o faia le talaʻiga a perofeta, e lē gata i le lē tali lelei ane o tagata, ae sa latou mafatia foʻi i sauāga. Na tuuina Ieremia i laau faamau, ave i le “fale puipui” ma tuu i se lua. (Ieremia 20:2; 37:15; 38:6) Na mafatia o ia i lenei sauāga i lima o ē na ia fia fesoasoani i ai. Peitaʻi, e leʻi ita pe taui ma sui atu Ieremia. Na ia onosai ma tumau mo le tele o tausaga.

¹⁵ E leʻi mafai e sauāga ma tauemuga ona taofia ai Ieremia, ma e faapea foʻi i tatou i aso nei. O le mea moni, i nisi taimi tatou te lagona ai le faavaivai. Na faavaivai foʻi Ieremia. Na ia tusi: “Ua avea le afioga a Ieova ma mea e faalumaina ai aʻu, ma tauemua i aso uma. Ona ou fai atu lea, Ou te lē taʻutaʻuina o ia, ma ou lē toe tautala i lona suafa.” O le ā le mea na tupu? Pe na lē toe talaʻi ea Ieremia? Na ia faaauau mai: “A o loʻu loto e peiseaʻī o se afi mumū [le afioga a le Atua] sa i ai, ua punitia i oʻu ivi, ua lailoa aʻu i onosai, ua ou lē mafaia lava.” (Ieremia 20:8, 9) Mātau, ina ua ia uaʻi atu i tauemuga a tagata, na lē toe olioli ai o ia. Ae ina ua ia toe uaʻi atu i le matagofie ma le tāua o le feʻau, na ia toe olioli ai. E sili atu i lenā, sa faatasi Ieova ma Ieremia “e pei o le toa e mataʻutia,” ma faamalosia o ia e maelega e faalauiloa le afioga a le Atua ma le lototele.—Ieremia 20:11.

16. E faapefea ona tumau lo tatou olioli i le talaʻiga o le tala lelei?

¹⁶ Pe na olioli Ieremia i lana galuega? Ioe! Na ia faapea atu iā Ieova: “Na maua au afioga, ona ou ʻai ai lea; sa iā te aʻu lau afioga e fai ma mea e olioli ai ma fiafia ai loʻu loto; auā ua taʻua aʻu i lou suafa, Ieova e, le Atua o ʻau.” (Ieremia 15:16) Na olioli Ieremia i lona faaeaga o le avea ma sui o le Atua moni ma talaʻia lana afioga. E mafai foʻi ona tatou olioli. E lē gata tatou te olioli ae faapena foʻi agelu i le lagi, ona ua talia e le toʻatele le feʻau o le Malo, salamō ma amata ona ui i le ala o le ola e faavavau.—Luka 15:10.

“Le Onosai o Iopu”

17, 18. O le ā le auala na tumau ai Iopu, ma o le ā le iʻuga?

¹⁷ Ina ua uma ona taʻua perofeta anamua, na tusi Iakopo: “Ua tatou taʻuamuia i ē onosai. Ua outou faalogologo i le onosai o Iopu, ua outou iloa foʻi le iʻuga i la le Alii, ina ua mutimuti vale tele le Alii ma le alofa naunau.” (Iakopo 5:11) O le uluaʻi upu Eleni ua faaliliuina i inei i le “onosai” e ese mai le upu na faaaogā e Iakopo mo le “onosai” i le fuaiupu muamua atu. Na faapea mai se tagata atamai i le eseesega o upu e lua, o le upu Eleni mo le onosai i le fuaiupu 10 e faatatau atu pe a faileagaina i tatou e isi, ae o le upu Eleni i le fuaiupu 11 e faatatau i le tumau ma le lototele pe a oo puapuaga iā i tatou.

¹⁸ Na matuā puapuagatia Iopu. Na pagatia o ia i le aveesea o lona tamaoaiga, maliliu lana fanau ma se maʻi tigā. Na tuuaʻia sesē o ia e faapea ua faasalaina e Ieova. Na faailoa  atu e Iopu lona mafatia, na ia auē i lona tulaga ma na ia manatu ua sili atu lona amiotonu i lo le Atua. (Iopu 35:2) Peitaʻi, e leʻi mou ai lona faatuatua pe gausia ai lona faamaoni. E na te leʻi fetuuina le Atua e pei ona fai mai ai Satani o le a ia faia. (Iopu 1:11, 21) O le ā le iʻuga? Na sili ona faamanuia e Ieova “o le gataaga o Iopu i lona amataga.” (Iopu 42:12) Na toe faafoʻisia e Ieova le soifua mālōlōina o Iopu, faaluaina lona tamaoaiga ma tauia o ia i se olaga fiafia ma ē pele iā te ia. O le tumau ma le faamaoni o Iopu, na fesoasoani iā te ia e malamalama lelei ai i uiga o Ieova.

19. O le ā se mea ua tatou iloa mai le onosai ma le tumau o Iopu?

¹⁹ O le ā se mea ua tatou iloa mai le onosai ma le tumau o Iopu? I le pei o Iopu, atonu tatou te mafatia i maʻi po o isi faigatā. Atonu tatou te lē malamalama i le māfuaaga e lē taofia ai e Ieova se puapuaga patino e oo mai iā i tatou. Peitaʻi, o le mea e tasi ua tatou mautinoa ai: Pe afai tatou te tumau ma le faamaoni, o le a tauia i tatou. E tauia e Ieova i latou o ē saʻili ma le faamaoni iā te ia. (Eperu 11:6) Na fetalai Iesu: “A o lē tumau seʻia oo i le gataaga, e faaolaina lea.”—Mataio 10:22; 24:13.

“E Sau le Aso o le Alii”

20. Aiseā e mafai ai ona tatou mautinoa o le a oo mai le aso o Ieova?

²⁰ E ui e onosai Ieova, ae e amiotonu foʻi ma o le a lē faavavau ona ia onosaia amioleaga. E gata mai lona onosai. Na tusi Peteru: “E leʻi faasaoina foʻi [e le Atua] le lalolagi tuai.” Na faasaoina Noa ma lona aiga, ae na faaumatia lenā lalolagi faalēmataʻu i le vai. Na aumaia e Ieova le faamasinoga iā Sotoma ma Komoro ma matuā faaumatia i latou. O nei faasalaga “ua tuu ma faailoga i ē faalēmataʻu i aso amuli.” Ona o lenei mea, tatou te mautinoa ai: “E sau le aso o le Alii.”—2 Peteru 2:5, 6; 3:10.

21. E faapefea ona tatou onosai ma tumau, ma o le ā le auau o le mataupu o sosoo mai?

²¹ O lea la, seʻi o tatou faataʻitaʻi i le onosai o Ieova e ala i le fesoasoani atu i isi ia salamō ina ia faasaoina ai. Seʻi o tatou faaaʻoaʻo foʻi i perofeta, e ala i le faalauiloa atu ma le onosai le tala lelei e ui i le lē tali lelei mai o i latou tatou te talaʻi atu i ai. E lē gata i lea, pe afai tatou te pei o Iopu ma onosaia faigatā, e mautinoa o le a tauia i tatou e Ieova pe afai tatou te faamaoni pea. E tatou te olioli i le faiva pe a tatou mātauina le ʻoa o faamanuiaga a Ieova i taumafaiga a ona tagata ia talaʻi atu le tala lelei i le lalolagi uma. O le a tatou iloa lenei mea i le mataupu o sosoo mai.

Pe E te Manatua?

• Aiseā ua onosai ai Ieova?

• O le ā se mea ua tatou iloa mai le onosai o perofeta?

• Na faaalia faapefea e Iopu lona tumau, ma o le ā le iʻuga?

• E faapefea ona tatou iloa e gata mai le onosai o Ieova?

[Fesili mo le Suʻesuʻega]

[Ata i le itulau 18]

Sa atoatoa ona faaatagia e Iesu le onosai o lona Tamā

[Ata i le itulau 20]

Na faapefea ona tauia e Ieova le onosai o Ieremia?

[Ata i le itulau 21]

Na faapefea ona tauia e Ieova le tumau o Iopu?