Faaopoopoina Mea i le Lagi ma le Lalolagi
Faaopoopoina Mea i le Lagi ma le Lalolagi
‘E tusa ma lana lava pule tunoa, ina ia toe faaopoopoina iā Keriso o mea uma i le lagi, atoa ma mea o i le lalolagi.’—EFESO 1:9, 10.
1. O le ā le “pule tunoa” po o le finagalo o Ieova mo le lagi ma le lalolagi?
E FINAGALO “le Atua e ona le manuia” ma le filemu, ina ia filemu ē i le lagi ma le lalolagi. (Eperu 13:20) Na ia faaosofia Paulo e tusi e faapea, o Lana “pule tunoa” po o lona finagalo, ia toe “faaopoopoina iā Keriso . . . o mea uma lava o i le lagi, atoa ma mea o i le lalolagi.” (Efeso 1:9, 10) O le ā le uiga o le veape ua faaliliuina “faaopoopoina” i lenei mau? Ua taʻua e le alii poto o le Tusi Paia o J. B. Lightfoot: “E faasino atu lenā upu i le autasi ma le maopoopo o ē i le lagi ma le lalolagi, e lē toe iai ni mea e fevaevaeaʻi ai, ae o le a taulaʻi atu ma le autasi i le Keriso. O le a lē toe iai le agasala, oti, faanoanoa, mea e iʻuvale ma puapuaga.”
‘Mea Uma i le Lagi’
2. O ai “mea uma i le lagi” lea e tatau ona faaopoopoina iā Keriso?
2 Na taaofaʻi e Peteru le faamoemoe matagofie o Kerisiano moni ina ua ia tusi: “E faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.” (2 Peteru 3:13) O loo faasino atu le “lagi fou” lea na folafola mai, i le pulega fou o le Malo o le Mesia. E “faaopoopoina iā Keriso o mea uma i le lagi,” lea na taʻua e Paulo i lana tusi i Kerisiano i Efeso. E faatapulaa le aofaʻi o nei tagata ua filifilia e pule faatasi ma Keriso i le lagi. (1 Peteru 1:3, 4) O nei Kerisiano faauuina e 144,000 “ua faatauina nai le lalolagi,” “o ē ua faatauina nai tagata,” ina ia avea ma suli faatasi ma Keriso i lona Malo i le lagi.—Faaaliga 5:9, 10; 14:3, 4; 2 Korinito 1:21; Efeso 1:11; 3:6.
3. Aiseā e faapea atu ai o ē faauuina o loo ‘nonofo i latou i le lagi’ e ui o loo ola pea i le lalolagi?
3 O Kerisiano faauuina, ua toe fanau i le agaga paia ina ia fai ma atalii faaleagaga o Ieova. (Ioane 1:12, 13; 3:5-7) Ua fai i latou ma uso o Iesu ona ua avea i latou ma “tamafai” a Ieova. (Roma 8:15; Efeso 1:5) O le māfuaaga lea, ua taʻua ai i latou ‘ua toe faatutū ma nonofo faatasi ma Keriso Iesu i mea o i le lagi,’ e ui o loo soifua pea i latou i le lalolagi. (Efeso 1:3; 2:6) Ua faamamaluina i latou i lenei tulaga faaleagaga, ona ua ‘faamaufaailogaina i latou e le Agaga Paia na folafolaina mai, o le faamaoni o lo latou tofi’ ua taofia mo i latou i le lagi. (Efeso 1:13, 14; Kolose 1:5) O lea la, o i latou na o loo faasino i ai ‘mea uma i le lagi,’ o ē e ao ona faaopoopoina iā Keriso e tusa ma le aofaʻi o i latou na muaʻi tofia e Ieova.
Amata Ona Faaopoopo Mea
4. O anafea ma na faapefea ona amata le faaopoopoina o ‘mea uma i le lagi’?
4 E tusa ai ma le “sauniuniga” a Ieova po o lana auala e faafoe ai mea, e amata ona faaopoopo ‘mea uma i le lagi’ “i le faaatoaga o tausaga.” (Efeso 1:10) Na taunuu lenā aso i le Penetekoso 33 T.A. O le aso lenā na liligi ifo ai le agaga paia i le ʻauaposetolo, atoa ma soo e aofia ai tane ma fafine. (Galuega 1:13-15; 2:1-4) Sa faamaonia ai, ua amata le feagaiga fou ma faavae ai le faapotopotoga Kerisiano ma le nuu fou o Isaraelu faaleagaga, o le “Isaraelu o le Atua.”—Kalatia 6:16; Eperu 9:15; 12:23, 24.
5. Aiseā na faia ai e Ieova se “nuu” fou e suia le fanauga a Isaraelu?
5 O le feagaiga o le Tulafono lea na osia ma le fanauga a Isaraelu, e leʻi maua mai ai se “malo o ositaulaga, ma nuu paia” o ē auauna e faavavau i le lagi. (Esoto 19:5, 6) Na fetalai atu Iesu i taʻitaʻi lotu Iutaia: “E aveesea le malo o le Atua iā te outou, a e tuuina atu i se nuu e au mai ai ona fua.” (Mataio 21:43) O lenā nuu po o Isaraelu faaleagaga, o Kerisiano faauuina ia o ē e iai i le feagaiga fou. O i latou na, na tusi atu i ai Peteru: “O outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai e le Atua ina ia outou taʻutaʻu atu ana galuega lelei—o lē na valaau iā te outou nai le pōuliuli e oo i lona lava malamalama e matuā ofo ai; o ē na lē fai ma nuu anamua, a o ona pō nei ua fai ai ma nuu o le Atua.” (1 Peteru 2:9, 10) Sa lē toe avea le fanauga a Isaraelu ma tagata na osi feagaiga ma Ieova. (Eperu 8:7-13) E pei ona valoia e Iesu, na aveesea mai iā i latou le faaeaga o le auai i le Malo o le Mesia, ma tuuina atu i tagata e 144,000 o le Isaraelu faaleagaga.—Faaaliga 7:4-8.
Valaauina i le Feagaiga o le Malo
6, 7. O le ā le feagaiga faapitoa na osia e Iesu ma ona uso na faauuina e le agaga, ma o le ā le uiga o lenei mea mo i latou?
6 I le pō na faavaeina ai e Iesu le Faamanatuga o lona maliu, na ia fetalai atu i ona aposetolo faamaoni: “O outou foʻi, ua outou tumau iā te aʻu i oʻu tofotofoga. E faapei ona tofia mai e loʻu Tamā o le malo iā te aʻu, e faapea foʻi ona ou tofia outou, ina ia outou aai ma inu i laʻu laoai i loʻu malo, ma ia nonofo i nofoālii, ma faamasino atu i itu aiga o Isaraelu e sefulu ma le lua.” (Luka 22:28-30) Na fetalai Iesu i se feagaiga faapitoa na ia osia ma ona uso e 144,000 ua faauuina e le agaga, o ē o le a tumau i le “faamaoni seʻia oo i le oti,” ma ‘o ē e manumalo.’—Faaaliga 2:10; 3:21.
7 Ua lafoaʻia e lenei vaega toʻaitiiti, le faamoemoe o le ola e faavavau i le lalolagi o ni tagata. O le a latou pule faatasi ma Keriso i le lagi, e nonofo i nofoālii ina ia faamasinoina tagata. (Faaaliga 20:4, 6) Seʻi o tatou tilofaʻia nisi mau e taulaʻi patino i ē faauuina, lea e faaalia ai le māfuaaga e lē taumamafa ai “isi mamoe” i le areto ma le uaina o le Faamanatuga.—Ioane 10:16.
8. O le ā le mea ua faailoa mai e le ʻaufaauuina i lo latou taumafaina o le areto? (Tagaʻi i le pusa i le itulau e 23.)
8 O le a puapuagatia le ʻaufaauuina e pei o Keriso, ma e lotomalilie foʻi e maliliu pei o ia. Ona o ia o se tasi o lenā vaega, na taʻua ai e Paulo na nofosauni o ia e tuua mea uma ‘ina ia maua ai Keriso, ma iloa o ia ma le mana o lona toe tū mai, ma ia faatasi i ona tigā.’ Ioe, na lotomalie Paulo e oti e pei o “lona maliu.” (Filipi 3:8, 10) Ua onosaia e le toʻatele o Kerisiano faauuina puapuaga ogaoga i o latou tino e pei o Iesu.—2 Korinito 4:10.
9. O le ā le ituaiga o tino ua faatusa i ai le areto o le Faamanatuga?
9 A o faavaeina le Talisuaga a le Alii, na fetalai Iesu: “O loʻu tino lenei.” (Mareko 14:22) Na faasino atu Iesu i lona tino aano ma ivi lea o le a sasa faamoʻamoʻa ma tafetotoi. Ua talafeagai le areto lē faafefeteina e fai ma faatusa o lona tino. Aiseā? Auā foʻi o mea faafefete i le Tusi Paia, e mafai ona fai ma faailoga o le agasala ma le amioleaga. (Mataio 16:4, 11, 12; 1 Korinito 5:6-8) Na lelei atoatoa Iesu, ma e leai se agasala a lona tino. O le a ia ofoina atu lona tino lelei atoatoa e fai ma taulaga. (Eperu 7:26; 1 Ioane 2:2) O lenei gaoioiga e aogā i Kerisiano faamaoni uma, pe e faamoemoe e ola i le lagi pe ola e faavavau i le parataiso i le lalolagi.—Ioane 6:51.
10. E faapefea i ē taumafaina le uaina o le Faamanatuga ona “auai faatasi . . . i le toto o Keriso”?
10 Na tusi Paulo e uiga i le uaina e taumafaina e Kerisiano faauuina i le Faamanatuga: “O le ipu o le faafetai o tatou o faafetai ai, e lē o le auai faatasi ea lea i le toto o Keriso?” (1 Korinito 10:16) E faapefea i ē taumafaina le uaina ona “auai faatasi . . . i le toto o Keriso”? E lē faapea e ofoina atu o latou tino e fai ma taulaga, auā e tatau foʻi ona togiolaina i latou. Ua faamagaloina a latou agasala ma taʻuamiotonuina i latou mo le ola i le lagi, ona o le faatuatua i le malosi o le toto o Keriso e laveaʻi ai tagata. (Roma 5:8, 9; Tito 3:4-7) O le toto o Keriso ua “faapaiaina” ai le 144,000 o ē ua fai ma suli faatasi ma Keriso, ua faaesea ai i latou ma faamamāina mai le agasala, e avea ma le “ʻau paia.” (Eperu 10:29; Tanielu 7:18, 27; Efeso 2:19) Ioe, o lona toto na maligi na faatauina ai e Keriso “tagata . . . mo le Atua, mai ituaiga uma, ma gagana eseese, ma nuu, atoa ma atunuu; ua . . . faia foʻi i latou ma nuu faatupu, o ositaulaga foʻi i lo matou Atua; e fai foʻi i latou ma tupu i le lalolagi.”—Faaaliga 5:9, 10.
11. O le ā le mea ua faaalia i le taumafaina e le ʻaufaauuina o le uaina o le Faamanatuga?
11 Ina ua faavaeina e Iesu le Faamanatuga o lona maliu, na ia tauaaoina atu le ipu o le uaina i ona aposetolo faamaoni ma fetalai atu: “Inā inu ia outou uma i ai; auā o loʻu toto lenei, o le toto o le feagaiga ua faamaligiina mo tagata e toʻatele e faamagalo aʻi agasala.” (Mataio 26:27, 28) E pei ona faamauina e le toto o povi ma ʻoti le feagaiga o le Tulafono i le va o le Atua ma le fanauga a Isaraelu, ua faapena foʻi ona faamauina e le toto o Iesu le feagaiga fou ua osia e Ieova ma Isaraelu faaleagaga, e amata mai i le Penetekoso e 33 T.A. (Esoto 24:5-8; Luka 22:20; Eperu 9:14, 15) O le taumafaina o le uaina lea ua fai ma faatusa o le “toto o le feagaiga,” ua faaalia ai e le ʻaufaauuina ua valaauina i latou i le feagaiga fou, ma ua latou maua mai ai aogā.
12. E faapefea ona papatisoina le ʻaufaauuina i le maliu o Keriso?
12 E iai foʻi se isi mea ua faamanatu atu i le ʻaufaauuina. Na fetalai atu Iesu i ona soo faamaoni: “[Tou] te inu lava i le ipu ou te inu ai; atoa ma le papatisoina e papatisoina ai aʻu e papatisoina ai [outou].” (Mareko 10:38, 39) Na taʻua mulimuli ane e Paulo, le “papatisoina” o Kerisiano i le ‘maliu o Keriso.’ (Roma 6:3) E ola faataulaga le ʻaufaauuina. Latou te maliliu faataulaga ona latou te tuulafoaʻia lo latou faamoemoe e ola ai e faavavau i le lalolagi. E māeʻa le papatisoga o nei Kerisiano faauuina i le maliu o Keriso, pe a maliliu faamaoni ma toe tutū aʻe i tino agaga e fai i latou ma “tupu faatasi” ma Keriso i le lagi.—2 Timoteo 2:10-12; Roma 6:5; 1 Korinito 15:42-44, 50.
Taumafaina o le Areto ma le Uaina
13. Aiseā e lē taumafaina ai e ē fia ola i le lalolagi le areto ma le uaina, ae aiseā latou te auai ai i le Faamanatuga?
13 Talu ai o mea uma e pei ona taʻua, o loo aofia ai i le taumafaina o le areto ma le uaina o le Faamanatuga, e lē talafeagai la ona taumafaina e i latou e fia ola e faavavau i le lalolagi. Ua iloa e ē o loo fia soifua i le lalolagi, o i latou e lē o ni tagata e faauuina o le tino o Keriso. E lē aofia foʻi i latou i le feagaiga fou ua osia e Ieova ma ē e pule faatasi ma Iesu Keriso. Talu ai o “le ipu” ua fai ma faatusa o le feagaiga fou, e na o i latou la o loo i le feagaiga fou e taumafaina le areto ma le uaina. O ē e fia ola e faavavau i le tino lelei atoatoa i le lalolagi i le pulega a le Malo, e lē papatisoina i latou i le maliu o Keriso ma e lē valaauina foʻi i latou e pule faatasi ma Keriso i le lagi. Afai latou te taumafaina le areto ma le uaina, o lona uiga ua fetagofi i mea e lē tatau ona fetagofi i ai. O lea la, latou te auai e maimoaina ma le faaaloalo le Faamanatuga, ae latou te lē taumafaina le areto ma le uaina. Latou te talisapaia mea uma lava ua faia e Ieova mo i latou e ala i lona Alo, e aofia ai le faamagaloina o agasala, e ala i le toto na faamaligiina o Keriso.
14. E faapefea ona faamalosia faaleagaga le ʻaufaauuina i le taumafaina o le areto ma le uaina?
14 Ua toeitiiti māeʻa le faamaufaailogaina o le vaega itiiti o Kerisiano, ua valaauina e pule ma Keriso i le lagi. Ua faamalosia faaleagaga le ʻaufaauuina i le taumafaina o le areto ma le uaina, seʻia oo ina muta lo latou soifuaga i le lalolagi. E logo i o latou tino lo latou autasi ma isi uso ma tuafāfine faauuina o le tino o Keriso. O le taumafaina o le areto ma le uaina, e faamanatu atu ai lo latou tiute tauave e tumau ma le faamaoni e oo i le oti.—2 Peteru 1:10, 11.
Faaopoopoina “Mea o i le Lalolagi”
15. O ai ua faaopoopoina ina ia lagolagoina Kerisiano faauuina?
15 E amata mai i se vaimea o le 1934 e oo i le 1936, na lagolagoina ai le ʻaufaauuina e “isi mamoe” o ē e fia ola e faavavau i le lalolagi, ma e lē o nisi o le “lafu mamoe itiiti.” (Ioane 10:16; Luka 12:32; Sakaria 8:23) Ua fai i latou ma aumea faamaoni a uso o Keriso, ma e telē so latou sao i le talaʻia o le “tala lelei o le malo” e fai ma molimau i nuu uma. (Mataio 24:14; 25:40) Ona o lea, ua mafai ai ona faamasinoina i latou e Keriso o ana “mamoe” ma talia lelei i latou i “lona itu taumatau,” pe a ia faamasinoina nuu. (Mataio 25:33-36, 46) O le a avea i latou ma “motu o tagata e toʻatele,” o ē e faasaoina nai “le puapuaga tele,” ona o le faatuatua i le toto o Keriso.—Faaaliga 7:9-14.
16. O ai e aofia ai i “mea o i le lalolagi,” ma e mafai faapefea ona fai i latou ma “fanau a le Atua”?
16 A māeʻa le faamaufaailogaina o le 144,000, ona faaagi mai lea o “matagi” o le faaumatiaga o le lalolagi amioleaga a Satani. (Faaaliga 7:1-4) I le Pulega o le Afe Tausaga a Keriso ma ē e nofotupu ma faitaulaga faatasi ma ia, o le a aufaatasi ai le motu o tagata e toʻatele ma le anoanoaʻi o tagata e toe tutū mai. (Faaaliga 20:12, 13) E mafai ona latou maua le ola e faavavau o ni tagatānuu o le Mesia ua fai ma Tupu, o Keriso Iesu. A māeʻa le pulega o le Afe Tausaga, ona toe tofotofoina lea o i latou “o i le lalolagi.” O tagata uma lava e tumau i le faamaoni, o le a fai i latou ma “fanau a le Atua” i le lalolagi.—Efeso 1:10; Roma 8:21; Faaaliga 20:7, 8.
17. O le a faapefea ona faataunuu le finagalo o Ieova?
17 E ala i lana “sauniuniga” poto po o lana auala e faafoe ai mea, o le a faataunuu ai e Ieova lona finagalo ina ia toe “faaopoopoina iā Keriso . . . o mea uma lava o i le lagi, atoa ma mea o i le lalolagi.” O le taimi lenā o le a autasi ai ma filemu ē uma o i le lagi ma le lalolagi, ma gauaʻi atu ma le olioli i le pule amiotonu a Ieova, o Lē e saʻolele lona finagalo.
18. O le ā se aogā e maua e ē faauuina ma a latou aumea ona o le auai i le Faamanatuga?
18 Ioe, o se faalaeiauga le potopoto o le ʻaufaauuina toʻaitiiti, ma le faitau miliona o a latou aumea o isi mamoe iā Aperila 12, 2006! Latou te faamanatuina le maliu o Keriso, e pei ona poloaʻi mai Iesu: “Tou te faia le mea nei e fai ma faamanatuga iā te aʻu.” (Luka 22:19) O ē uma e auai i lenā aso, e tatau ona latou manatua le mea na fai e Ieova mo i latou, e ala i lona Alo pele o Keriso Iesu.
Ia Toe Autalu
• O le ā le finagalo o Ieova mo mea i le lagi ma mea o i le lalolagi?
• O ai ‘mea uma i le lagi,’ ma ua faapefea ona faaopoopoina i latou?
• O ai “mea o i le lalolagi,” ma o le ā lo latou faamoemoe?
[Fesili mo le Suʻesuʻega]
[Pusa i le itulau 23]
“Le Tino o Keriso”
A o talanoa Paulo i le 1 Korinito 10:16, 17 i le tāua o le areto i uso o Keriso o ē ua faauuina e le agaga, na ia taʻua ai le “tino” i se auala faapitoa. Na fai mai o ia: “O le areto tatou te tofitofi ai, e lē o le auai faatasi ea lea i le tino o Keriso? Ona ua tasi lava le areto, o lea ua tino e tasi ai i tatou, e ui ina toʻatele, auā ua tofusia i tatou uma i le areto e tasi.” A taumafaina e Kerisiano faauuina le areto o le Faamanatuga, e faaalia ai le autasi o le faapotopotoga o ē faauuina, e pei o se tino e tasi a o Keriso o le Ao lea.—Mataio 23:10; 1 Korinito 12:12, 13, 18.
[Ata i le itulau 23]
Aiseā e na o ē faauuina e taumafaina le areto ma le uaina?
[Ata i le itulau 25]
O le a autasia ē o i le lagi ma le lalolagi e ala i le sauniuniga a Ieova