Pe Tatou te Manaʻomia le Mesia?

ATONU e te lāgā lenā fesili, “Pe tatou te manaʻomia le Mesia?” Ioe, o se mea talafeagai lo tatou tomānatu pe e aogā moni le Mesia i o tatou olaga.

O manatu o nisi atonu e te ioe i ai, ua faamautinoa atili ai le tali manino: E te manaʻomia moni lava le Mesia, e pei foʻi o isi. Na tusi se faitofā Iutaia e uiga i le Mesia: “Auā o ia o le Ioe i mea uma ua folafolaina e le Atua.” Sa ia faamatilatila le matafaioi tāua a le Mesia e faataunuu le finagalo o le Atua, o le faamanuia lea o atunuu uma o le lalolagi. (2 Korinito 1:20) E tāua tele le vaegafai a le Mesia, auā o loo faasino atu le tele o valoaga i le Tusi Paia i lona afio mai i le lalolagi. I se tusi na faitau ai le faitau miliona o tagata i le silia ma le 70 tausaga ua mavae, na taʻua ai e Henry H. Halley: “Sa tusia le Feagaiga Tuai ina ia uunaʻia tagata e faatalitalia le Mesia, ma saunia i latou e talia lona afio mai.” Pe e aogā lona afio mai? Aiseā e tāua ona e uaʻi atu i ai?

Ua faauiga atu le “Mesia” i “Lē ua Faauuina,” ma e taitutusa i le faalupega, “Keriso.” O lenei Mesia e pei ona faasino i ai le lomiga o le 1970 o le Encyclopædia Britannica, o le “togiola silisili,” na afio mai ona o le agasala na faia e Atamu ma Eva. Sa faia i laʻua e lelei atoatoa, faatasi ai ma se faamoemoe matagofie o le ola e faavavau i le Parataiso, peitaʻi na la melea lenā faamanuiaga. Na faapea atu le agelu fouvale o Satani ua pulepuletutū tele le Atua, ma o le a sili atu ona lelei lo la tulaga, pe afai e tuu i lo laʻua lava faitalia e filifili le mea lelei ma le mea leaga.—Kenese 3:1-5.

Sa talitonu ma faasesēina Eva i lenā pepelo. Na faatāua e Atamu le faiā ma lana avā na i lo le faamaoni i le Atua, ma o lea na ia faatasi atu ai i le fouvale a le Tiapolo. (Kenese 3:6; 1 Timoteo 2:14) Ona o nei gaoioiga, ua la lafoaʻia ai le meaalofa o le ola e faavavau i se siʻomaga matagofie, ma ua tuufaasolo mai ai āuga o le agasala ma le oti i a la fanau.—Roma 5:12.

Na finagalo Ieova e faasaoina tagata mai aafiaga leaga o lenei fouvalega. Muamua, na ia faatulagaina se leleiga a tagata ma ia, e pei ona taʻua i le tulafono a Mose—ia sui atu le ola i le ola. (Teuteronome 19:21; 1 Ioane 3:8) Sa manaʻomia ona faataunuuina lenei taʻiala faaletulafono, ina ia ola ai e faavavau le fanau a Atamu, e tusa ai ma le muaʻi finagalo o le Atua mo tagata. O le māfuaaga lea na afio mai ai le Mesia.

 Na taʻua e Ieova le faasalaga o le Tiapolo i le uluaʻi valoaga o le Tusi Paia: “Ou te faatupuina le feitagaʻi iā te oulua ma le fafine, o lau fanau foʻi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:15) Na taʻua e se tasi o faitofā o le Tusi Paia e faapea, “o loo amata folafolaga e uiga i le Mesia, i le valoaga [lenei] o le Tusi Paia.” Na faapea mai foʻi se tasi o alii atamai, o le Mesia na tofia e le Atua “o le a ia aveesea puapuaga uma ona o le agasala a le uluaʻi tagata” ae i le taimi e tasi, o le a ia aumaia faamanuiaga i tagata.—Eperu 2:14, 15.

Peitaʻi, atonu ua e silafia e lē o faamanuiaina tagata i aso nei. Ua siliga tali i seu faamoemoega ma o loo atuatuvale tagata uma. Ua faapea mai le World Book Encyclopedia, e “toʻatele tagata Iutaia o loo tatali atu i le afio mai o le Mesia,” ma “o le a ia toe faaleleia mea uma ma faatoʻilalo fili o tagata.” Peitaʻi, ua taʻua i le Tusi Paia ua uma ona afio mai le Mesia. Pe e te talitonu i ai? O le a maua le tali i le mataupu o sosoo mai.