Talia e Nuu Maotua o Polivia le Tala Lelei

PE A ma se toʻa 20 i matou na faapotopoto i le matafaga, ona sa fiafia tele e malaga atu i se vaa e asia nuu e lata i le vaitafe. Na matou i ai i auvae mauga o Andes, le mea o loo tafe mai ai le vaitafe o Beni i fanua laugatasi o le Amasone. O se nofoaga e uigaese le matagofie.

Peitaʻi, e lē o i matou o ni turisi. O nisi o i matou o ni tagatānuu; o nisi na faimalaga mai i nuu mamao e nonofo i Rurrenabaque. O se taulaga laʻitiiti ae matagofie, e iai laau e mananaia o latou fua ma fale atolau. E filemu foʻi, e faatoʻā lagona lava se pisa pe a ō atu ni taavale i nisi o taimi. Aiseā ua matou faia ai lenei malaga?

O lenei malaga o se mea e masani ai i le tele o isi vaega o Polivia. O loo talaʻia ai e Molimau a Ieova mai isi atunuu, le tala lelei o le Malo o le Atua i taulaga laiti.—Mataio 24:14.

O Polivia, o loo i le ogatotonu o Amerika i Saute. E faaluaina le telē o le laueleele o Falani faatoʻā maua Polivia, ae o lo latou faitau aofaʻi, e pe a o le 10 pasene o le aofaʻiga o tagata Falani. O le tele lava o tagatānuu o Polivia, e nonofo a lē i nuu ma taulaga ia e eli ai le palapala i vaipanoa maualuluga, ia po o nofoaga o faatoʻaga ia e i vanu. Ae o nofoaga maualalalo ma vevela, e tūtū solo ai nuu ona o le telē o le vaomatua.

I vaitausaga o le 1951 i le 1969, na taʻimua ai e ni misionare lototetele le galuega i le tele o nuu maotua, e pei o Betty Jackson, Elsie Meynberg, Pamela Moseley, ma Charlotte Tomaschafsky. Na latou aʻoaʻoina tagata loto faamaoni i upu moni o le Tusi  Paia, ma fesoasoani i le faatūina o faapotopotoga laiti. A o faagasolo vaitausaga o le 1981 e oo i le 1999, na faaono ona faateleina le faitau aofaʻi o Molimau a Ieova, aemaise lava i aai. O lea la ua iai faapotopotoga i vaega taʻitasi o nei aai. E te maua nei faapotopotoga i itumalo tamaoaiga, ia o loo faigaluega ai tagata i fogāfale maualuluga, nonofo i fale matagofie, ma fai a latou faatauga i supa maketi. Ae o loo iai foʻi ni faapotopotoga i nuu maotua, ia o loo nonofo ai tagata i fale e fai i le palapala, ma e faia a latou faatauga i maketi taalaelae, ma oofu i laʻei felanulanuaʻi o lo latou lava atunuu. Ae e faapefea ona fesoasoani i tagata o loo i nofoaga maotua e iloa Ieova?

Tuua le Olaga i le Taulaga

I le 20 tausaga ua mavae, e anoanoaʻi tagata mai nofoaga ia e eli ai le palapala ma nuu maotua o Polivia, na siitia atu i aai. E lē o se mea e masani ai le siitia o tagata mai aai i nuu i tua. O le tele o nuu e na o le tasi le telefoni, ma e na o nai itula lava o le aso e mafai ona ola ai le eletise. E na o aʻoaʻoga amata foʻi e maua i ia nuu. E faatoʻā mafai ona feiloaʻi Molimau a Ieova ia o loo nonofo i nei nuu laiti i o latou uso talitonu, pe a oo i tauaofiaga faaletausaga. Ae e fai si taugatā o le faimalaga atu i nei tauaofiaga, e lamatia ai le ola ma e vaivai ai foʻi. O lea la, o le ā le mea ua uunaʻia ai nisi o nei Molimau a Ieova, e malaga ese mai aai ma ō atu i nei nuu i tua?

E leʻi leva talu ai nei na faapea mai ai Lui: “Sa mafai ona ou faigaluega i le aai o La Paz. Ae sa masani ona taʻu mai e oʻu mātua iā te aʻu e faapea, e sili atu ona tāua le galuega talaʻi. O lea, na ou aʻoga ai i le mataupu tau i faugāfale. A o oʻu iai i Rurrenabaque i le vaitaimi o tuuaga, sa ou mātauina ai le fiafia tele o tagata e faalogo i le tala lelei. Peitaʻi, e toʻalaiti nai uso sa iai i inā, sa ou manatu ai loa e sili pe a ou alu e fesoasoani iā i latou. O loo oʻu faia i le taimi nei ni suʻesuʻega faale-Tusi Paia se 12. O se faaaʻoaʻoga, sa matou suʻesuʻe ma se tamāloa ma lana avā, e toʻafā le fanau. Sa masani ona inu tele le tamāloa ma taalo i taaloga faitupe, ae sa ia taofia nei masaniga, ma taʻu atu i ana uō mea na ia aʻoaʻoina e uiga iā Ieova. E masani ona sauniuni lelei ana lesona. E faanoanoa o ia pe a alu e tā laau i le vaomatua mo ni aso se tolu pe fā foʻi, auā ua ia misia ai gaoioiga faa-Kerisiano. Pe a latou ō mai uma i sauniga faa-Kerisiano, ona ou manatu lea ua matuā aogā le tuua o loʻu aiga ae siitia mai i inei.”

O Luana o se matua nofo toʻatasi. Ua faapea mai o ia: “Sa ou galue o se teine teufale i La Paz. Sa ou talaʻi faataimi atoa i le aai a o laʻitiiti laʻu tama tama. Ina ua ou asiasi atu i Rurrenabaque, sa ou iloa ai le tele e mafai ona ou ausia pe  a siitia mai i inei. O lea na ma siitia ai loa, ma maua ai saʻu galuega o se teine teufale. I le amataga, sa faigatā ona onosaia le vevela o le tau ma iniseti. Peitaʻi, o lea ua fitu tausaga talu ona ma iai i inei. Ua ou faia le tele o ni suʻesuʻega faale-Tusi Paia i vaiaso taʻitasi, ma e toʻatele tagata aʻoga ua faaalia lo latou talisapaia, e ala i le auai mai i sauniga.” O Luana ma lana tama, o nisi o i latou na malaga atu i le vaa i le vaitafe. E lē taumatea o le a e fiafia i la matou tala.

Le Malaga i le Vaitafe

Na ola leotele le afi o le vaa a o matou agaʻi atu i le vaapiapi o mauga. Na fetagisi le taumanu o koke e faailoa mai ai lo latou lē malilie iā i matou. Na tafe malolosi mai vai palapalā mai mauga, a o taumafai le ave vaa e faafoe lelei le vaa i le tafega. Na matou taunuu i le nuu ina ua maualuga le lā. O i inā na matou feiloaʻi atu ai i se toeaina o le faapotopotoga a Rurrenabaque, ma na ia faailoa mai iā i matou le mea e talaʻi ai.

Sa talimālō le nuu iā i matou, a lē o lalo o se laau paolo, ia o totonu o se fale na faia i ofe ma laupama. E leʻi leva ae ma feiloaʻi i se ulugalii talavou, o loo galulue i le tatauina o le sua o le tolo i totonu o se pesini telē. La te faapunaina le sua seʻia oo ina avea ma meli totoo, ona faatau atu loa lea i le taulaga. Sa matou ō i lo la fale, ma e tele ni la fesili na lāgā e uiga i le Tusi Paia.

Sa faaauau ona matou agaʻi atu i le vaitafe, e talaʻi atu mai lea nuu i lea nuu. E toʻatele i latou na fiafia ina ua iloa mai i le Tusi Paia, le iʻuga o faamaʻi ma le oti. (Isaia 25:8; 33:24) O i inei, e matuā mafatia lava le tele o aiga pe a oti se tamaitiiti, auā e tau leai ni togafitiga faafomaʻi. E ese le faigatā ma le lē mautonu o le olaga faifaatoʻaga ma le faifaiva, auā e faalagolago lo latou ola i mea latou te totōina ma maua mai le sami. O lea, e toʻatele na fiafia i folafolaga a le Atua ia o loo faamauina i le Salamo 72, e uiga i se malo lea o le a ia aveesea le mativa. Peitaʻi, po o e tomānatu ea o le a faia ni taumafaiga a tagata loto fiafia, o nei nofoaga maotua e auai i sauniga faa-Kerisiano? O le fesili lenā na manatunatu ai Elika ma Viki, o se ulugalii galulue faataimi atoa i Santa Rosa, lea e tolu itula le mamao e toe malaga atu ai i le Amasone.

Po o le a Auai Mai Ē Loto Fiafia i le Sauniga?

Na malaga mai Elika ma Viki mai Kalifonia i Amerika, i Polivia i le 12 tausaga ua mavae. Na talosagaina i laʻua e se ovasia femalagaaʻi ina ia  siitia atu i Santa Rosa. Ua faapea mai Viki: “E na o le lua telefoni i le taulaga, ma e leai se Initineti. E ese le tele o manu tataa. E masani ona ma vaaia ni kolokotaila, renani, ma gata lapopoʻa, a o ma asiasi atu i vaipanoa mamao i a ma uilaafi. E ui i lea, o le mea e sili ona ma fiafia i ai, o tagata. O loo matou suʻesuʻe ma le ʻau Vaca, o se ulugalii talavou lea e iai sa la fanau laiti e toʻafā. E 16 maila (26 kilomita) le mamao o le mea e nonofo ai mai le taulaga. Sa masani ona inu tele le tamā, peitaʻi ua suia o ia. I vaiaso taʻitasi, na te aumaia ai lona aiga atoa ma lona tuafafine laʻitiiti i sauniga. Na te faanonofo lana avā ma lona afafine laʻitiiti, i le ato o loo i tua o lana uila vilivae. E aumai e lona atalii e iva tausaga lona tuafafine laʻitiiti i le isi uila, ae vilivili mai le isi tamaitiiti e valu tausaga na o ia i lana uila. E tolu itula e faimalaga mai ai lenei aiga.” E matuā alolofa lenei aiga iā Ieova, ma latou te faia taumafaiga uma ina ia auai faatasi ma le faapotopotoga.

E na o le 18 masina, ae agavaa loa tagata e toʻa 3 i Santa Rosa mo le papatisoga, ma pe tusa ma le 25 na auai i sauniga i le Maota fou. E ui e anoanoaʻi tagata na mananaʻo e suʻesuʻe le Tusi Paia, ae o le toʻatele e iai faafitauli e faigatā ona foʻia ina ia auauna ai iā Ieova.

Le Luʻi o le Faamauina Faaletulafono o Faaipoipoga

Na faamatalaina e Marina ma Oseni o ni misionare, o loo auauna i se nuu maotua e lata ane i le tuaoi o Polivia ma Pasili e faapea, o le toʻatele e manatu māmā i le faaipoipoga faapea o se noataga e tumau. E lē na o se tasi se paaga e fai. Ua faapea mai Oseni: “O se faafitauli e taofia ai le agaʻigaʻi i luma faaleagaga. O le faaipoipoga o se gaoioiga e sili ona faigatā ma lavelave i inei, pe a mananaʻo tagata e avea o ni Kerisiano moni. O nisi e tatau ona faamuta faiā ma a latou paaga na iai muamua, ma faaipoipo faaletulafono. O lea la, talu ai ua latou iloa o le lesitalaina o le faaipoipoga, o se faatonuga lea mai le Tusi Paia, na galulue mamafa ai loa nisi ina ia maua le tupe manaʻomia e totogi ai le lesitala.”—Roma 13:1, 2; Eperu 13:4.

Ua faamatala mai e Marina le mea na tupu iā Nopeto. “Sa nonofo muamua Nopeto ma ni fafine eseese, a o leʻi nonofo ma se fafine e faifalaoa. E 35 tausaga e laʻitiiti ai lenei fafine iā Nopeto, ma e iai sana tama tama lea na tausia aʻe e Nopeto. A o tuputupu aʻe lenei tamaitiiti, na manaʻo Nopeto e fai se faaaʻoaʻoga lelei mo ia. O lea ina ua asiasi atu se Molimau a Ieova i le fale falaoa, ma ofo atu se suʻesuʻega faale-Tusi Paia e aunoa ma se totogi, sa ia taliaina loa e ui e lē iloa faitau, ma ua silia foʻi ma le 70 ona tausaga. Ina ua iloa e Nopeto ma lenei fafine faatulagaga a Ieova, sa la faaipoipo loa faaletulafono ma papatiso mulimuli ane. Na avea le tamaitiiti o se talavou Kerisiano maufaatuatuaina—e pei ona manaʻo i ai lona tamāfai. Ua iloa nei e Nopeto faitau, ma ua faia foʻi ni ana lauga i sauniga a le faapotopotoga. E ui ua vaivai ma ua afu lona soifua, ae o ia o sē e maelega e talaʻi le tala lelei.”

Faamalosia e le Agaga o Ieova

Na fetalai atu Iesu i ona soo: “O le a maua e outou le mana, pe a afio ifo le Agaga Paia i luga iā te outou; e fai foʻi outou ma molimau iā te aʻu . . . e oo lava i le tuluʻiga o le lalolagi.” (Galuega 1:8) O le iloaina e faapea, na uunaʻia e le agaga o le Atua nei tane ma fafine Kerisiano e siitia atu i tuluʻiga mamao, o se mea e matuā faalaeiauina ai! O se faataʻitaʻiga, na talia e ni Kerisiano maelega se 30 i Polivia i le 2004, ni tofiga mo sina taimi puupuu e talaʻi faataimi atoa i oganuu maotua. Ua latou talisapaia le faaaʻoaʻoga na faia e ni tagata ese e 180, o ē na  siitia atu i Polivia e auauna ai o ni paeonia, ovasia matagaluega, galulue tauofo i le Peteli, ma ni misionare. O loo faia e tagata talaʻi e 17,000 ni suʻesuʻega faale-Tusi Paia se 22,000, i aiga o tagata loto fiafia i Polivia.

O le iloaina e nei uso o loo taʻitaʻia i latou uma e le agaga o Ieova, ua aumaia ai le olioli tele iā i latou. O se faaaʻoaʻoga, na talia e Ropati ma Katerina se tofiga e avea o ni misionare i Camiri. O Camiri, o se nuu maotua e tu i atumauga lanulauʻava, i autafa o se vaitafe. Ua faapea mai Ropati: “E foliga mai na ma taunuu i le taimi tonu lava. E lua tausaga ae avea loa nisi e toʻa 40 ma tagata talaʻi o le tala lelei.”

Talia e Sē na Ola i le ʻAva ma Taaloga Faitupe le Tala Lelei

Ua maofa le toʻatele e nonofo i le taulaga, ona o suiga ua faia e i latou na suʻesuʻeina le Tusi Paia. O se faaaʻoaʻoga, i le fā tausaga ua mavae i se tasi o aso, na taoto ai Ariel i le moega ua tigā lona ulu ona sa onā. E ui sa taʻutaʻua o ia i taaloga faitupe, ae sa iai pea ni popolega ona o le tele o ana aitalafu, faafitauli i le faaipoipoga, ma le tuufau o lana fanau teine. O le taimi tonu lava lenā na asiasi ane ai se tasi o Molimau a Ieova, sa talaʻi atu mai lea fale i lea fale. Sa faalogologo ma le lē gasē Ariel, a o faamatala e le uso mau mai le Tusi Paia. O le iʻuga, na toe foʻi Ariel e taoto ua faafouina lona mafaufau, ma faitau tusi e uiga i le mauaina o se aiga fiafia, le Parataiso, ma le auaunaga i le Atua. Mulimuli ane, sa ia lotomalie e suʻesuʻe le Tusi Paia.

E taunuu atu misionare i Camiri, o loo fai foʻi se suʻesuʻega a le avā a Ariel, o Amina, peitaʻi e leai sona naunau tele. Sa ia faapea mai: “O le a ou faia so o se taumafaiga e taofia ai o ia mai le inu tele. Ae ailoga o le a suia ai le tamāloa. E maʻimau ai le taimi.” Peitaʻi, na avea le suʻesuʻega faale-Tusi Paia ma mea na sili atu ona fiafia i ai, na i lo le mea sa ia mafaufauina. E leʻi atoa se tausaga, ae papatisoina loa Amina ma molimau atu i lona aiga. E leʻi leva ae tuuina atu loa ona tauaiga iā Ieova.

Sa avea pea o se luʻi iā Ariel le taumafai e taofia lana inu, ulaula, ma le taalo i taaloga faitupe. Ae na iai se suiga tele ina ua ia valaaulia ana uō i le Faamanatuga o le maliu o Iesu. Sa ia taʻu atu: “O i latou e lē auai mai, ou te lē toe faauō i ai. Ae o ē o le a auai mai, o le a ou suʻesuʻe le Tusi Paia ma i latou.” O le auala lenā sa ia amataina ai ni suʻesuʻega se tolu. E ui e leʻi oo i le taimi e avea ai Ariel o se tasi o le faapotopotoga, ae na ia suʻesuʻe le Tusi Paia ma se tasi o ona tauaiga o lē na agaʻigaʻi i luma, ma la papatiso faatasi ai i le aso e tasi. Ua faapea mai Amina: “Ua matuā suia atoatoa le amio a Ariel.”

Ua faapea mai Ropati: “I le taimi nei, e toʻa 24 sui o lenei aiga ua auai e lē aunoa i sauniga. E toʻa 10 ua uma ona papatiso, ma le isi toʻavalu ua avea o ni tagata talaʻi e leʻi papatisoina. Na amata foʻi e nisi o ē na mātauina suiga o a latou amio, ona suʻesuʻe le Tusi Paia ma o loo auai mai i sauniga. Sa faatupulaʻia le faitau aofaʻi o tagata mai le 100 i le 190. O loo ma faia nei ma Katerina ni suʻesuʻega faale-Tusi Paia se 30, ma o loo auai uma mai i le sauniga. O se fiafiaga iā i maʻua le auauna i inei.”

O le mea o loo tupu i nuu maotua o Polivia, ua na o se vaega lenā o le tuufaatasiga i le lalolagi aoao lea na valoia i le Faaaliga mataupu e 7. O loo taʻua ai i inā le tuufaatasiga i le “aso o le Alii,” o i latou o le a faasaoolaina atu i le puapuaga tele. (Faaaliga 1:10; 7:9-14) E leʻi tupu muamua lava i le talafaasolopito se mea faapea, o le autasia o le faitau miliona mai atunuu uma, i le tapuaʻiga i le Atua moni e toʻatasi. Maʻeu ni faamaoniga faagaeeloto, o le iloaina ua lata le faataunuuga o folafolaga a le Atua!

[Ata i le itulau 9]

Betty Jackson

[Ata i le itulau 9]

Pamela Mosely

[Ata i le itulau 9]

Elsie Meynberg

[Ata i le itulau 9]

Charlotte Tomaschafsky, i le itu taumatau

[Ata i le itulau 10]

O Elika ma Viki o loo auauna i le nofoaga na manaʻomia tele ai ni tagata talaʻi o le Malo

[Ata i le itulau 10]

I vaiaso taʻitasi, e malaga atu ai le ʻauaiga o Vaca i uila mo itula e tolu i le Maota e fai ai sauniga

[Ata i le itulau 11]

O tagatānuu e nonofo lata ane i le vaitafe o Beni, o loo faalogologo ma le lē gasē i le tala lelei

[Ata i le itulau 12]

O Ropati ma Katerina o loo auauna o ni misionare i Camiri