Fesili Mai le ʻAufaitau

O le ā na uiga i ai Paulo ina ua ia faapea mai e “aua neʻi tautala fafine i ekalesia”?

Na tusi Paulo i le faapotopotoga Kerisiano i Korinito: “E faapei o ekalesia uma o le ʻau paia, aua neʻi tautala fafine i ekalesia. Auā e lē tuuina iā te i latou e tautala.” (1 Korinito 14:33, 34) Ina ia malamalama i le uiga saʻo o lenei faaupuga, e tāua le iloilo o isi fuaiupu o le mau o loo iai le fautuaga a Paulo.

I le 1 Korinito mataupu e 14, na talanoaina ai e Paulo mataupu e fesootaʻi atu i sauniga a le faapotopotoga Kerisiano. Na ia faamatala mea e ao ona talanoaina i na sauniga ma fautua atu le auala e ao ona latou faia ai. (1 Korinito 14:1-6, 26-34) E lē gata i lea, na ia faamamafa le fuafuaga o sauniga “ina ia faamāfanafanaina” le faapotopotoga.—1 Korinito 14:4, 5, 12, 26.

Sa faatonu atu Paulo i le 1 Korinito mataupu e 14 e faapea: “aua le tautala,” “ia faalogologo” ma “aua neʻi tautala.” O faatonuga uma, o loo avatu i vaega eseese o le faapotopotoga, peitaʻi sa ia tuuina atu mo le māfuaaga lava e tasi, ina ia “faia mea uma lava ma le matagofie ma le sauni lelei.”—1 Korinito 14:40.

Muamua, na faapea atu Paulo: “Afai e tautala se tasi i le gagana ese, ia tautala se toʻalua, po o se toʻatolu e gata ai, ma ia feauaʻi; ma ia faamatala e se tasi. A e afai e leai sē na te faamatalaina, aua le tautala o ia i le ekalesia; a ia tautala o ia iā te ia ma le Atua.” (1 Korinito 14:27, 28) E lē o le uiga e faapea o le a lē mafai ai ona tautala lenā tagata i sauniga, peitaʻi e iai taimi e ao ai ona aua neʻi tautala. I le ma lea, e ao ona manatua, o le fuafuaga autū o sauniga, e faalaeiau ma faamāfanafana ai le tasi i le isi. O le a lē mafai ona faia faapea pe afai e tautala o ia i se gagana e lē malamalama ai se tasi.

Lona lua, na taʻua e Paulo: “Ia tautala perofeta e toʻalua, pe toʻatolu, ma ia faamasinoina e nisi. A e afai ua faaalia se mea i se tasi o loo nofo mai, ia faalologo lē na muamua.” E lē o lona uiga o le a na ona faalogologo  o le perofeta muamua i sauniga, peitaʻi e iai taimi e lē tatau ona tautala ai. O lē ua ia mauaina le faaaliga e mafai ona talanoa atu i le faapotopotoga, ma o le fuafuaga o le sauniga ina ia “faamāfanafanaina uma” ai e aofia ai ma le perofeta muamua.—1 Korinito 14:26, 29-31.

O le lona tolu, na talanoa atu Paulo i fafine Kerisiano i lona faapea atu: “Aua neʻi tautala fafine i ekalesia. Auā e lē tuuina iā te i latou e tautala; a ia latou usiusitai.” (1 Korinito 14:34) Aiseā na avatu ai e Paulo lenei faatonuga i tuafāfine? Ina ia sologa lelei ai pea le faapotopotoga. Ua ia faapea mai: “Afai foʻi ua latou fia iloa se tasi mea, ia latou fesili atu ai i a latou lava tane i o latou fale; auā o le mea matagā ona tautala o le fafine i le ekalesia.”—1 Korinito 14:35.

Atonu e luʻia nisi tuafāfine i mea o loo talanoaina i le faapotopotoga. Ua fesoasoani le fautuaga a Paulo i tuafāfine ina ia ʻalofia le agaga fouvale, ae ia talia ma le lotomaulalo o latou tulaga i le faatulagaga o le tulaga ulu o Ieova, aemaise lava e tusa ai ma o latou tane. (1 Korinito 11:3) E lē gata i lea, o le lē tautatala o tuafāfine, e faaalia ai latou te lē mananaʻo e avea ma aʻoaʻo i le faapotopotoga. Ina ua tusi Paulo iā Timoteo, na ia faaalia ai e lē talafeagai ona maua e se fafine le tiute tauave o le aʻoaʻo atu i le faapotopotoga: “Auā ou te lē tuuina atu i se fafine ia aʻoaʻo atu, pe pule i le tane, a ia nofo faalologo lava.”—1 Timoteo 2:12.

Po o lona uiga la o le a lē tautala ai lava se fafine Kerisiano i taimi o sauniga? E leai. I aso o Paulo, na faaosofia ai i nisi taimi e le agaga paia fafine Kerisiano, ma tatalo po o le vavalo i totonu o le faapotopotoga. I na tulaga, latou te iloa o latou tulaga e ala i le faaaogāina o se ufi ulu. * (1 Korinito 11:5) E lē gata i lea, i aso o Paulo ma aso nei, ua faalaeiauina tuafāfine ma uso ina ia faailoa atu i isi lo latou faamoemoe. (Eperu 10:23-25) E ese mai i le faiva, ua faalauiloa e tuafāfine lo latou faamoemoe ma faalaeiauina isi i le faapotopotoga, e ala i tali lava saunia ma taliaina tofiga e faia ni faataʻitaʻiga po o ni lauga i le Aʻoga mo le Faiva Faatiokarate.

O lea la, e lē “tautala” fafine Kerisiano e ala i le lē taumafai e maua tiute tauave a tane ma faatonu le faapotopotoga. Latou te lē lāgā ni fesili finau e luʻia ai le pule a i latou o loo aʻoaʻo. E ala i le faatinoina o o latou tiute talafeagai i le faapotopotoga, ua fesoasoani tuafāfine Kerisiano i le faatupuina o le filemu ma ia “faia mea uma [i sauniga a le faapotopotoga] e iʻu ai i le faamāfanafanaina.”—1 Korinito 14:26, 33.

[Faamatalaga pito i lalo]