Pe E te Fia Maua ni Uō Lelei?

O LE toʻatele o tagata e fia maua ni uō lelei. O le faifai mea faatasi ma ni uō māfana, e atili fiafia ai lou olaga. Peitaʻi, e faapefea ona e maua se faauōga moni? I le toetoe 2,000 tausaga ua mavae, na faaalia ai e Iesu le vala sili ona tāua e taulau ai mafutaga a tagata, o le alofa lea lē manatu faapito. Na ia aʻoaʻo: “Pei ona outou loto i tagata ona ia latou faia iā te outou, ia faapea lava ona outou faia iā te i latou.” (Luka 6:31) E masani ona taʻua e nisi lenei faaupuga o le Tulafono Faaauro. Ua faaalia ai ina ia maua ni uō, e ao ona avea oe o se tasi e lē manatu faapito ma e alofa. Ina ia maua sau uō e manaʻomia ona e faaleuō. E faapefea?

E lē vave ona maua se faauōga vavalalata ma māfana. Talu ai e sili ona tāua le uō na i lo o lē e te masani ai. O i latou na e te māfana atu i ai. O le atiina aʻe ma le faatumauina o ni faiā māfana e alu ai taumafaiga. O le faauōga, e masani ona manaʻomia ai lou tuu faamuamua o manaʻoga o lau uō na i lo oe lava. O uō, e iai taimi e fiafia faatasi ai e iai foʻi taimi e tigā faatasi ai.

E mafai ona avea oe o se uō moni e ala i le avatu o le lagolagosua taufaalogona, ma le fesoasoani i le tagata o loo mafatia. Ua taʻua i le Faataoto 17:17: “E alofa le uō i aso uma lava; a e fanau le uso mo le aso vale.” O le mea moni, e mafai ona malosi le noataga tau faiga uō na i lo le faiā faaleaiga. Ua taʻua i le Faataoto 18:24: “O le tagata ua fai ana uō, e iʻu ina tigāina ai o ia; a o i ai le tagata alofa e sili ona pipii mai i lo le uso.” Pe e te fia silafia atili le auala e atiina aʻe ai na faauōga māfana? Pe e fia avea oe ma se tasi o ē ua lauiloa i le fealofani? (Ioane 13:35) Afai o lenā, e fiafia Molimau a Ieova i lou vaipanoa e faasino iā te oe le auala e faia ai ni uō moni.