O se Tala “Faatusa” e Aogā iā i Tatou

SEMANŪ e lē faamalamalamaina mai e isi fuaitau o le Tusi Paia se manatu, pe ana lē faamatala mai e isi mau lenā manatu! Semanū e na ona faitau lava i se tala o loo i le Tusi Paia, ae lē malamalama i lona uiga faafaatusa. O se faaaʻoaʻoga, o le tala i fafine e toʻalua sa i le fale o le augātamā o Aperaamo. Na taʻua e Paulo o se tala “faatusa.”—Kalatia 4:24.

E lelei ona tatou uaʻi totoʻa atu i lenei tala, auā e matuā tāua le uiga faafaatusa iā i latou uma e naunau e maua faamanuiaga a Ieova. A o leʻi iloiloina le māfuaaga e tāua ai, seʻi o tatou suʻesuʻeina tulaga na uunaʻia ai Paulo e faailoa mai le uiga o le tala.

Sa iai se faafitauli na mapuna aʻe i Kerisiano i Kalatia i le uluaʻi senituri. O nisi o i latou sa “anaana i aso, ma masina, ma tau, ma tausaga,” o mea sa aofia i le Tulafono a Mose. Na latou faapea atu e tatau ona usiusitai pea i le Tulafono, ina ia finagalo malie mai ai le Atua. (Kalatia 4:10; 5:2, 3) Peitaʻi, na iloa lelei e Paulo e lē manaʻomia e Kerisiano nei faamanatuga. Ina ia faamaonia le saʻo o lenei manatu, sa ia faasino atu i se mea na tupu e masani ai tagata Iutaia.

Sa faamanatu atu e Paulo i tagata Kalatia, o Aperaamo, o le tamā lea o tagata Iutaia, na fanaua Isamaeli ma Isaako. Sa fanaua Isamaeli e le auauna fafine o Akara, ae na fanaua Isaako e le fafine saʻoloto o Sara. Sa masani lelei tagata Kalatia o ē na tausia le Tulafono a Mose, i le tala e uiga i le pa o Sara, ma le avatua o lana auauna fafine o Akara iā Aperaamo ina ia maua ai se tama mo ia. Sa latou iloa foʻi ina ua fanaua e Akara Isamaeli, ona ia ʻinoʻino lea i lona matai fafine o Sara. Ae na mulimuli ane fanaua e Sara Isaako  ina ua loomatua o ia, e tusa ai ma le folafolaga a le Atua. Mulimuli ane, sa tuu atu e Aperaamo Akara ma Isamaeli e ō ese, ona sa tauemu Isamaeli iā Isaako.—Kenese 16:1-4; 17:15-17; 21:1-14; Kalatia 4:22, 23.

O Fafine e Toʻalua, o Feagaiga e Lua Ia

Na faamatala e Paulo vala o lenei tala “faatusa.” Na ia tusi: “O fafine nei o feagaiga e lua ia; o le tasi mai le mauga o Sinai, e fanau mai tama e fai ma pologa, o Akara lea. . . . Ua la tutusa ma Ierusalema i ona pō nei, ua nofo pologa atoa ma lana fanau.” (Kalatia 4:24, 25) Ua faaataina e Akara le nuu o Isaraelu ma lona laumua o Ierusalema. Sa noatia le nuu o Iutaia i le feagaiga o le Tulafono iā Ieova, lea na faavaeina i le mauga o Sinai. I lalo o le feagaiga o le Tulafono, sa faamanatu atu pea iā Isaraelu ua faapologaina i latou i le agasala, ma e manaʻomia se togiola.—Ieremia 31:31, 32; Roma 7:14-24.

Ae o ai na faaata e le “fafine saʻoloto” o Sara ma lana tama o Isaako? Sa faaalia e Paulo o Sara, “le fafine e pa sa lē fanau,” na faaataina le avā a le Atua, le vaega faalelagi o lana faalapotopotoga. Sa pa lenei fafine faalelagi i se uiga faapea, sa leai sana “fanau” faauuina e le agaga o le Atua i le lalolagi, a o leʻi afio mai Iesu. (Kalatia 4:27; Isaia 54:1-6) Peitaʻi i le Penetekoso 33 T.A., na liligi ifo ai le agaga paia i luga o se vaega o tane ma fafine, o ē na toe fanaufouina e avea o ni fanau a lenei fafine faalelagi. O fanau na maua mai lenei faalapotopotoga, na vaetamaina o ni tamafai a le Atua, ma avea ma suli faatasi ma Iesu i lalo o se feagaiga fou. (Roma 8:15-17) Na tusi Paulo, o se tasi o lenei fanau: “O Ierusalema i lugā o lē saʻoloto ia, o le tinā o i tatou uma lava ia.”—Kalatia 4:26.

Fanau a le Fafine

E tusa ai ma le tala o loo i le Tusi Paia, na sauāina e Isamaeli ia Isaako. I se tulaga talitutusa, na tauemua ma sauāina fanau a Ierusalema i lugā, e fanau a Ierusalema lea na nofo pologa i le uluaʻi senituri T.A. Na faamatalaina e Paulo: “Faapei ona sauā o lē na fanau i la le tino [Isamaeli] i lē na fanau i la le Agaga [Isaako] i ia ona pō, e faapea foʻi i ona pō nei.” (Kalatia 4:29) Ina ua afio mai  Iesu i le lalolagi ma amata folafola atu le Malo, sa gaoioi taʻitaʻi lotu Iutaia e pei ona sa faia e Isamaeli le tama a Akara iā Isaako, le suli moni o Aperaamo. Sa latou tauemu ma sauāina Iesu, ona na latou manatu iā i latou lava o ni suli moni o Aperaamo, ae lē o Iesu.

A o lumanaʻi le fasiotia e taʻitaʻi Isaraelu o Iesu, na ia fetalai atu: “Ierusalema e, Ierusalema e, o lē fasiotia perofeta, ma fetogi i maa i ē ua aauina atu iā te oe; ua tele lava oʻu manaʻo e faapotopoto i laʻu fanau, e pei o le moa ona ofaofataʻi i lana toloaʻi i lalo i ona apaʻau a e leʻi mafafai outou. Faauta, ua tuua lo outou fale, e faatafunaina.”—Mataio 23:37, 38.

Ua faaalia i le tala o loo i le Tusi Paia, i le uluaʻi senituri, sa lē maua ni atalii o le nuu lea na faaata e Akara e avea ma suli faatasi ma Iesu, ona o i latou o ni tagata Iutaia. Sa teena e Ieova tagata Iutaia o ē na manatu faamaualuluga faapena. Ae na avea nisi o tagata Iutaia ma suli faatasi ma Keriso. Peitaʻi, sa faavae le mauaina o lenā faaeaga i lo latou faatuatua atu iā Iesu, ae lē faapea ona o i latou o ni tagata Iutaia.

Na iloatino nisi o i latou na avea ma suli faatasi ma Keriso i le Penetekoso 33 T.A. A o faagasolo taimi, na filifilia e Ieova nisi e avea ma atalii o le Ierusalema i lugā.

Na faamatalaina e Paulo lenei tala “faatusa,” ina ia faataʻitaʻi mai ai le maoaʻe o le feagaiga fou na i lo le feagaiga o le Tulafono, lea na avea ai Mose ma puluvaga. E lē mafai e se tasi ona maua le finagalo malie o le Atua ona o le Tulafono a Mose, auā e agasala tagata uma, ma na faamatilatila e le Tulafono le faapologaina o i latou i le agasala. Peitaʻi, e pei ona faamatalaina e Paulo, sa afio mai Iesu “ina ia faatau mai e ia i ē na nofo i le tulafono.” (Kalatia 4:4, 5) O lea la, o le faatuatua i le taulaga a Keriso, ua faasaʻoloto mai ai tagata mai le taʻusalaina e le Tulafono.—Kalatia 5:1-6.

Aogā iā i Tatou

Aiseā tatou te naunau ai i le faamatalaga a Paulo i lenei tala? O se tasi o māfuaaga, e aumaia ai se malamalamaga manino e uiga i le Tusi Paia, ia atonu e lē o manino pea iā i tatou. E atili faamalosia ai pea lo tatou mautinoa i le autasi ma le ōgatasi o le Tusi Paia.—1 Tesalonia 2:13.

E lē gata i lea, e tāua mea moni ua faaata mai i lenei tala i le mauaina o lo tatou fiafiaga i le lumanaʻi. Pe ana faapea e leai ni atalii o le Ierusalema i lugā, semanū o loo tatou nofo pologa pea i le agasala ma le oti. E ui i lea, o le a “manuia ai atu nuu uma lava o le lalolagi,” ona o le sauniuniga alofa a Keriso ma ona suli ia na folafola e le Atua o le a maua mai iā Aperaamo. (Kenese 22:18) O le a tupu lenei mea pe a faasaʻolotoina i latou e faavavau mai āuga o le agasala, lē lelei atoatoa, faanoanoa, ma le oti. (Isaia 25:8, 9) Maʻeu se taimi sili ona matagofie o le a iai!

[Ata i le itulau 11]

Na faavaeina le feagaiga o le Tulafono i le mauga o Sinai

[Faamatalaga i Ata]

Pictorial Archive (Near Eastern History) Est.

[Ata i le itulau 12]

O le ā le uiga o le tala “faatusa” na taʻua e Paulo?