‘Ia ō Atu e Fai Nuu ma Soo, ma Papatiso i Latou’

“O lenei, ia outou ō atu e fai nuu uma lava ma soo, ma papatiso atu iā te i latou . . . , ia outou aʻoaʻo atu iā te i latou ia tausi i mea uma ua ou fai atu ai iā te outou.”—MATAIO 28:19, 20.

1. O le ā le filifiliga na fai e le fanauga atoa a Isaraelu a o iai i le Mauga o Sinai?

PE TUSA ma le 3,500 tausaga ua mavae, na faapotopoto ai le fanauga atoa a Isaraelu i le Mauga o Sinai, ma faia sa latou tautoga i le Atua. Na latou folafola atu i lumāmea: “Matou te faia lava mea uma ua fetalai mai ai Ieova.” Mai lava la i lenā taimi na avea ai Isaraelu ma nuu ua tuuina atu i le Atua, o lana “oloa tāua.” (Esoto 19:5, 8; 24:3) Sa latou fiafia e tulimataʻi lana puipuiga ma ola ai i lea tupulaga ma lea tupulaga i le laueleele “o loo tafe ai le suāsusu, ma le meli.”—Levitiko 20:24.

2. O le ā le faiā e mafai ona iai i tagata ma le Atua i aso nei?

² Ae ui i lea, na faailoa mai e le faisalamo o Asafo e faatatau iā Isaraelu e faapea na latou “lē tausia le feagaiga a le Atua, na lē mafafai foʻi ona latou savavali i lana tulafono.” (Salamo 78:10) Latou te leʻi tausisi i le tautoga na tautō ai o latou augātamā iā Ieova. O le iʻuga, sa lē toe iai sa latou faiā faapitoa ma le Atua e pei ona sa iai o latou augātamā. (Failauga 5:4; Mataio 23:37, 38) O lea na ‘silasila atu ai le Atua i nuu ese, e maua ai se nuu mo lona suafa.’ (Galuega 15:14) Ma i aso nei e gata ai, o loo ia aoaoina “le motu o tagata e toʻatele mai atu nuu uma, ma aiga, ma nuu, ma gagana eseese, e lē mafaitaulia e se tasi,” o ē o loo taʻutino mai ma le olioli: “O i ai le faaolataga i lo tatou Atua, o lē tiʻetiʻe i le nofoālii, atoa ma le Tamaʻi Mamoe!”—Faaaliga 7:9, 10.

3. O ā laasaga e ao ona uia e se tasi ina ia maua ai se la faiā māfana ma le Atua?

³ Ina ia iai faatasi ma ē o loo olioli i se faiā tautele faapena ma le Atua, e tatau i se tasi ona ia faia se tuuina atu iā Ieova, ma faailoa i le lautele lenā tuuina atu e ala i le papatisoga i le vai. O le usitaia lenā o le poloaʻiga tuusaʻo a Iesu i  ona soo: “O lenei, ia outou ō atu e fai nuu uma lava ma soo, ma papatiso atu iā te i latou i le suafa o le Tamā, ma le Atalii, ma le Agaga Paia; ia outou aʻoaʻo atu iā te i latou ia tausi i mea uma ua ou fai atu ai iā te outou.” (Mataio 28:19, 20) Sa faalogologo le fanauga a Isaraelu a o faitauina “le tusi o le feagaiga.” (Esoto 24:3, 7, 8) O inā na latou malamalama ai i lo latou tiute tauave agaʻi iā Ieova. E faapena foʻi i aso nei, a o leʻi papatisoina se tasi, e manaʻomia ona iā te ia le poto saʻo i le finagalo o le Atua e pei ona iai i lana Afioga le Tusi Paia.

4. O le ā e tatau ona fai e se tasi ina ia agavaa mo le papatisoga? (Faaaofia le pusa i luga.)

⁴ Ua manino la, e finagalo Iesu ina ia mausalī le faavae o le faatuatua o ona soo a o leʻi papatisoina i latou. Na ia faatonuina ona soo ina ia ō atu, e lē gata ia fai isi ma soo, ae ia aʻoaʻo foʻi na tagata ‘ia tausi i mea uma ua ia fai atu ai.’ (Mataio 7:24, 25; Efeso 3:17-19) O lona uiga, o i latou ua agavaa mo le papatisoga e masani lava ona tele ni masina pe oo atu foʻi i se tausaga pe lua foʻi latou te suʻesuʻeina ai le Tusi Paia, ina ia lē faatopelau pe lē mafaufauina lelei le faiga o sa latou filifiliga. I le aso o le papatisoga, e tali ai e i latou o le a papatiso ni fesili autū se lua. Talu ai sa faamamafa e Iesu le tāua o la tatou ‘Ioe, ia Ioe; ma le Leai, ia leai’ e tatau la iā i tatou uma lava ona toe iloilo totoʻa le uiga autū o nei fesili e lua o le papatisoga.—Mataio 5:37.

Salamō ma le Tuuina Atu

5. O ā vala autū e lua ua faamamafa mai e le fesili muamua o le papatisoga?

⁵ O le fesili muamua o le papatisoga, e fesiligia ai le sui papatiso pe ua salamō mai lona olaga tuai sa iai ae tuuina atu lona ola iā Ieova e fai lona finagalo. Ua faamamafa e lenei fesili vala tāua e lua e tatau ona muaʻi faia a o leʻi papatiso—le salamō ma le tuuina atu.

6, 7. (a) Aiseā e talafeagai ai i tagata uma o loo fuafua e papatiso ona salamō? (e) O ā suiga e tatau ona faia e se tasi pe a salamō?

⁶ Aiseā e tatau ai i se tasi ona salamō a o leʻi papatisoina o ia? Ua faapea mai le aposetolo o Paulo: “Na amio faatasi i tatou uma lava . . . ina ua tatou nonofo i tuʻinanau o o tatou tino.” (Efeso 2:3) A o tatou leʻi maua le poto saʻo i le finagalo o le Atua, sa tatou ola e tusa ma lenei lalolagi, faapea ma ona tapulaa ma amioga. Sa puleaina o tatou olaga e le atua o lenei faiga o mea, o Satani. (2 Korinito 4:4) Peitaʻi, ina ua tatou iloa le finagalo o le Atua, ua tatou filifili ai ‘ina ia lē toe usiusitai i tuʻinanau o tagata, a ia usiusitai i le finagalo o le Atua.’—1 Peteru 4:2.

⁷ E anoanoaʻi aogā e maua e se tasi o loo ola i lenei auala fou o le olaga. Aemaise ai le mauaina o se la faiā tautele ma Ieova, lea sa faatusaina e Tavita e pei o se valaaulia e ulu atu i le “fale fetafaʻi” o le Atua ma lona “mauga paia”—o se matuā faaeaga sili lea. (Salamo 15:1) O le mea moni e lē faasoloatoa le valaaulia a Ieova i so o se tasi, ae na o i latou o ē ‘savavali ma le amio saʻo, ma ua fai le amiotonu, ma tautala ma le faamaoni i [o latou] loto.’ (Salamo 15:2)  Ona o le eseese o o tatou tulaga sa iai a o leʻi aʻoaʻoina le upu moni, e foliga mai la ina ia agavaa e maua lenei valaaulia, o lona uiga e tatau ona tatou faia nisi o suiga—i a tatou amio faapea o tatou uiga totino. (1 Korinito 6:9-11; Kolose 3:5-10) O na suiga e uunaʻia e le salamō—o lagona matuā faanoanoa ona o le olaga sa ola ai muamua, ma se filifiliga maumauaʻi e faafiafia Ieova. O inā o le a matuā faia ai se suiga atoatoa—ua lafoaʻi se olaga manatu faapito ma uiga faalelalolagi, ae saʻili se olaga e finagalo malie mai i ai le Atua.—Galuega 3:19.

8. E faapefea ona fai lo tatou tuuina atu, ma e faapefea ona fesootaʻi atu i le papatisoga?

⁸ O le vala lona lua o le fesili muamua o le papatisoga, e fesiligia ai sui papatiso po ua tuuina atu i latou lava iā Ieova e faia lona finagalo. O le tuuina atu, o se laasaga e manaʻomia tele a o leʻi papatiso. E faia i le tatalo, lea e faaleo atu ai o tatou faanaunauga ina ia foaʻi atu o tatou ola iā Ieova e ala atu iā Keriso. (Roma 14:7, 8; 2 Korinito 5:15) Ona avea lea o Ieova ma o tatou Matai ma Lē Ana i tatou, ma tatou fiafia ai e fai le finagalo o le Atua e pei ona sa faia e Iesu. (Salamo 40:8; Efeso 6:6) E na o le tasi lava le taimi e fai ai lenei taʻutinoga tāua iā Ieova. Peitaʻi, ona sa na o tatou lava na tatalo ma faia le tuuina atu, ua avea ai le aso o le papatisoga o se faalauiloaga i tagata uma e faapea, o lea ua māeʻa ona tatou faia lenei tuuina atu tāua i lo tatou Tamā i le lagi.—Roma 10:10.

9, 10. (a) O le ā e aofia i le faia o le finagalo o le Atua? (e) Na faapefea ona malamalama lelei leoleo Nasi i lo tatou tuuina atu?

⁹ O ā mea e aofia i le usitaia o le faaaʻoaʻoga a Iesu i le faia o le finagalo o le Atua? Na fetalai Iesu i ona soo: “Ai se tasi e fia mulimuli mai iā te aʻu, ia faafiti o ia iā te ia, ma ave lona satauro, i le mulimuli mai [“ai pea,” NW] iā te aʻu.” (Mataio 16:24) I inei o loo faamaʻoti mai ai e Iesu gaoioiga e tolu e tatau ona tatou faia. Muamua, ia ‘faafitia’ i tatou lava. O lona uiga, ua lafoaʻi o tatou faanaunauga manatu faapito, ae lotomalie e usiusitai i faatonuga ma taʻiala a le Atua. Lona lua, ia ‘ave lo tatou satauro.’ I le vaitaimi a o soifua Iesu i le lalolagi, o le satauro sa fai ma faailoga o ni lagona māsiasi ma le matuā puapuagatia. O i tatou la o ni Kerisiano e tatou te talia le mea moni, e iai taimi e tatou te puapuagatia ai ona o le tala lelei. (2 Timoteo 1:8) E ui ina amusia pe faitioina i tatou e le lalolagi, ae ua faapei i tatou o Keriso, ua ‘faatauvaa iā i tatou le mā,’ ae fiafia i le iloa o loo tatou faafiafiaina le finagalo o le Atua. (Eperu 12:2) Ma le manatu faaiʻu, e tatou te mulimuli atu “pea” iā Iesu.—Salamo 73:26; 119:44; 145:2.

¹⁰ E oo lava i nisi tagata tetee, ua malamalama lelei i le uiga moni o le tuuina atu o loo fai e Molimau a Ieova i le Atua—ina ia auauna atoatoa atu iā te ia. O se faaaʻoaʻoga, i Buchenwald o le nofoaga o faasalaga a Nasi i Siamani, na manaʻomia ai i Molimau na mumusu e faafitia lo latou faatuatua, ona saini le faamatalaga tusitusia lenei: “O loo avea pea aʻu o se Tagata Aʻoga o le Tusi Paia ma o le a lē taitai ona solia laʻu taʻutinoga ua ou tautō ai iā Ieova.” Ua matuā faailoa manino ai i inei lagona o loo iai i auauna uma tuuina atu ma faamaoni a le Atua!—Galuega 5:32.

Ua Mātaulia o se Molimau a Ieova

11. O le ā le faaeaga e maua e le tagata lea e papatiso?

¹¹ O le fesili lona lua e fesiligia ai le tagata lea e papatiso, muamua lava, po o malamalama o  lona papatisoga ua mātaulia ai o ia o se Molimau a Ieova. O le māeʻa o lona papatisoga, o le a avea ai loa o ia ma faifeʻau tofia e tauave le suafa o Ieova. O se faaeaga sili ma o se tiute tauave tāua foʻi. O inā foʻi ua tatala mai ai i le tagata papatiso le faamoemoe mo le ola e faavavau, pe afai e tumau pea lona faamaoni iā Ieova.—Mataio 24:13.

12. O le ā le matafaioi o loo ō mai faatasi ma le faaeaea e tauave le suafa o Ieova?

¹² O se faaeaea maualuga le tauaveina o le suafa o Ieova, o le Atua e ou le malosi uma. Na faapea mai le perofeta o Mika: “O nuu uma e taʻitasi ma savali i le igoa o latou atua, o i tatou foʻi, tatou te savavali i le suafa o Ieova lo tatou Atua e faavavau faavavau lava.” (Mika 4:5) Peitaʻi o loo ō mai faatasi lenei faaeaea ma se matafaioi e ao ona fai. E ao ona tatou taumafai malosi ia ola i ni olaga e faamamaluina ai le suafa o loo tatou tauaveina. Na faamanatu e le aposetolo o Paulo i Kerisiano i Roma, o le lē savali o se tasi e tusa ma mea o loo ia talaʻia, e “upuleagaina” pe taʻuvalea ai le suafa o le Atua.—Roma 2:21-24.

13. Aiseā ua maua ai e auauna tuuina atu a Ieova le tiute tauave e molimau atu e uiga i lo latou Atua?

¹³ O le avea o se tasi ma Molimau a Ieova, ua ia talia ai le tiute tauave e molimau atu i isi e uiga i lona Atua. Na valaauina e Ieova le nuu tuuina atu o Isaraelu e avea ma ana molimau, ina ia latou faamaonia atu, o ia lava o le Atua mai le vavau e oo i le faavavau. (Isaia 43:10-12, 21) Peitaʻi e leʻi faamaoni le nuu o Isaraelu e faataunuu lo latou tiute tauave, seʻia oo ai lava ina lafoaʻia atoatoa i latou e Ieova. I aso nei, o se mitamitaga mo Kerisiano le iai o so latou faaeaga e molimau atu e uiga iā Ieova. Tatou te faia faapea talu ai lo tatou alofa iā te ia ma faanaunau e faapaia lona suafa. E lē mafai ona tatou toe nofoaʻi ae e tatou te taʻu atu i isi le upu moni lea ua tatou iloa, e faatatau i lo tatou Tamā i le lagi ma ana fuafuaga. E tutusa o tatou lagona ma le aposetolo o Paulo ina ua ia faapea mai: “Ua leai saʻu faitalia i lea mea. Oi talofa foʻi iā te aʻu, pe a ou lē folafolaina le tala lelei!”—1 Korinito 9:16.

14, 15. (a) O le ā le matafaioi o loo faatino e le faalapotopotoga a Ieova i lo tatou tutupu aʻe faaleagaga? (e) O ā sauniuniga ua tatou maua e fesoasoani i lo tatou itu faaleagaga?

¹⁴ E faamanatu mai foʻi e le fesili lona lua i le sui papatiso lona tiute tauave, ina ia lagolagosua i le faalapotopotoga ua faatonutonuina e le agaga o Ieova. E lē mafai ona fai toʻatasi la tatou auaunaga i le Atua; e tatou te manaʻomia le fesoasoani, le lagolagosua ma faalaeiauga a “le ʻau uso” uma. (1 Peteru 2:17; 1 Korinito 12:12, 13) E tāua tele le matafaioi o loo faatino e le faalapotopotoga a le Atua i lo tatou tutupu aʻe faaleagaga. E anoanoaʻi lomiga faale-Tusi Paia ua latou saunia mai, ina ia tatou malamalama lelei i le poto saʻo, ia gaoioi ma le atamai pe a fesagaʻi ma faafitauli, ma ati aʻe se faiā māfana ma le Atua. E pei lava ona manaʻo se tinā ia faamautinoa o loo lelei ona fafaga ma tausi lana tama, ua faapena foʻi ona saunia e “le auauna faamaoni ma le mafaufau” le anoanoaʻi o taumafa faaleagaga ua talafeagai lelei mo le faaleleia atili o la tatou faiā ma Ieova.—Mataio 24:45-47; 1 Tesalonia 2:7, 8.

¹⁵ I sauniga faalevaiaso, ua aumaia ai i tagata o Ieova ni aʻoaʻoga ma faalaeiauga e latou te manaʻomia ina ia avea o ni Molimau faamaoni a Ieova. (Eperu 10:24, 25) O le Aʻoga o le Faiva Faatiokarate e aʻoaʻo ai la tatou tautala atu i le lautele, ae o le Sauniga o le Auaunaga e toleni ai ia uigā le auala tatou te momoli atu ai le feʻau. E lē gata i a tatou sauniga, ae o lo tatou  lava foʻi suʻesuʻeina o lomiga faale-Tusi Paia, ua mafai ona tatou faamaonia ai le taʻitaʻia ma le faatonutonuina e le agaga paia o Ieova o lana faalapotopotoga. O loo faaaogā e Ieova nei sauniuniga faifai pea ina ia tatou nofouta ai i lamatiaga, ia aʻoaʻoina i tatou e avea ma faifeʻau uigā, ma atili ai ona tatou mataala faaleagaga.—Salamo 19:7, 8, 11; 1 Tesalonia 5:6, 11; 1 Timoteo 4:13.

Le Uunaʻiga ua Papatiso Ai

16. O le ā le uunaʻiga ua tuuina atu ai i tatou iā Ieova?

¹⁶ Ioe, o fesili e lua o le papatisoga ua faamanatu mai ai i sui papatiso le uiga tāua o le papatisoga i le vai ma matafaioi e ō mai faatasi ai. O lea la, o le ā le uunaʻiga ua latou filifili ai e papatiso? O le avea o i tatou ma soo papatiso ua māfua, e lē ona o se uunaʻiga e faamalosi mai e isi, ae o Ieova ua na ‘tosina maia’ i tatou. (Ioane 6:44) Talu ai “o le Atua, o le alofa lava ia,” ua ia pulea ai foʻi mea uma i lona alofa, ae lē i se auala e fai faamalosi. (1 Ioane 4:8) Tatou te tosina iā Ieova talu ai ona uiga agalelei ma le auala o loo feutagaʻi mai ai iā i tatou. Na foaʻi mai e Ieova lona Alo pele e toʻatasi mo i tatou, ma faatulaga mo i tatou se lumanaʻi e sili ona lelei. (Ioane 3:16) I la tatou tali atu, ua uunaʻia i tatou e foaʻi atu—pe tuuina atu iā te ia—o tatou ola.—Faataoto 3:9; 2 Korinito 5:14, 15.

17. O ai tonu e ao ona tatou tuuina atu i ai?

¹⁷ Ua tuuina atu i tatou, e lē i se manatu ua ioeina e nisi pe i se galuega patino, ae iā Ieova lava ia. E iai le taimi e suia ai le galuega ua faatulaga e le Atua mo ona tagata, peitaʻi e tumau pea lo latou tuuina atu iā te ia. Mo se faaaʻoaʻoga, o le galuega na ia faatonuina Aperaamo e fai, e matuā ese lava mai le galuega na ia faatonu atu iā Ieremia. (Kenese 13:17, 18; Ieremia 1:6, 7) Peitaʻi, sa taufai galulue uma i laʻua i le faatinoga o galuega patino na tuu atu i ai e le Atua, talu ai sa la alolofa iā Ieova ma mananaʻo e faia ma le faamaoni lona finagalo. A o faagasolo nei taimi o le iʻuga, o loo taumafai malosi soo papatiso uma o Keriso e faataunuu le poloaʻiga a Keriso ina ia talaʻi atu le tala lelei o le Malo ma faia isi ma soo. (Mataio 24:14; 28:19, 20) O lo tatou faia ma le lotoatoa o lenā galuega, o se auala ua sili ona lelei lea e faaalia ai tatou te alolofa i lo tatou Tamā faalelagi, ma ua tatou tuuina atu atoatoa iā te ia.—1 Ioane 5:3.

18, 19. (a) O le ā le folafolaga tatou te faia i luma o le lautele pe a tatou papatiso? (e) O ā manatu o le a talanoaina i le mataupu o sosoo mai?

¹⁸ Ma le mautinoa lava, e tele faamanuiaga e maua i le papatisoga, peitaʻi o se laasaga e tatau ona matuā mafaufauina ma le faaeteete. (Luka 14:26-33) O inā e taʻu atu ai se filifiliga ua faia e laualuga atu na i lo isi lava tiute tauave. (Luka 9:62) O le taimi e papatisoina ai i tatou, e tusa lea o loo tatou folafola atu i luma o le lautele: “O lenei Atua, o lo [matou] Atua lava ia e faavavau faavavau lava; o ia lava na te taʻitaʻiina i [matou] e oo lava i le oti.”—Salamo 48:14.

¹⁹ I le mataupu o sosoo mai o le a talanoaina ai isi fesili e ono lāgā e tusa ai ma le papatisoga i le vai. Faamata e iai ni māfuaaga tatau e faatalatū ai se tasi mai le papatisoina? Pe tāua le matua o le tagata e ao ona iai faatoʻā papatiso? E faapefea ona saosaolaumea tagata uma i le tulaga mamalu o le sauniga o le papatisoga?

Pe Mafai Ona E Faamatala?

• Aiseā e tatau ai i Kerisiano taʻitoʻatasi ona salamō a o leʻi papatisoina?

• O ā mea e aofia i le tuuina atu i le Atua?

• O ā matafaioi e ō mai faatasi ma le faaaeaea e tauave le suafa o Ieova?

• O le ā le uunaʻiga e tatau ona fai ai la tatou filifiliga ina ia papatiso?

[Fesili mo le Suʻesuʻega]

[Pusa/Ata i le itulau 22]

FESILI E LUA O LE PAPATISOGA

E faavae i le taulaga togiola a Iesu Keriso, po ua e salamō mai i au agasala ma tuuina atu oe iā Ieova e faia lona finagalo?

Po o e malamalama o lou tuuina atu ma le papatisoga, ua mātaulia ai oe o se Molimau a Ieova e fesootaʻi atu i le faalapotopotoga ua faatonutonuina e le agaga o le Atua?

[Ata i le itulau 23]

O le tuuina atu o se taʻutinoga aʻiaʻi e fai atu iā Ieova e ala i le tatalo

[Ata i le itulau 25]

O la tatou galuega talaʻi o se faailoaga o lo tatou tuuina atu i le Atua