O le Malamalama i le Tusi Paia—Se Faamanuiaga e Mafai Ona E Maua

O LOO iai i le Tusi Paia upu moni tautele mai le Atua. O loo taʻu mai iā i tatou le fuafuaga o le olaga, le māfuaaga o puapuaga o tagata, ma le lumanaʻi mo tagata. O loo aʻoaʻoina i tatou i le auala e maua ai le fiafia, e maua ai ni uō, ma taulau manuia ai i le foʻiaina o faafitauli. A o le mea e sili ona tāua, ua tatou aʻoaʻoina ai mea e uiga i lo tatou Tamā i le lagi o Ieova, o Lē na Faia i tatou. O le ituaiga poto lenā tatou te maua ai le fiafia ma uigā ai o tatou olaga.

O loo faatusa e le Tusi Paia le aʻoaʻoina o le poto i le Atua i le taumafa. Na fetalai Iesu: “E lē na o mea e ʻai e ola ai le tagata, a o afioga uma e tulei mai i le fofoga o Ieova.” (Mataio 4:4; Eperu 5:12-14) E pei lava ona talafeagai lo tatou aai i meaʻai lelei i aso taʻitasi ina ia tumau lo tatou ola, e faapena foʻi ona tatou manaʻomia le faitau e lē aunoa o le Afioga a le Atua, ina ia tatou maua le ola e faavavau lea o loo folafola mai e le Atua.

Tatou te fiafia e aai auā o le auala lenā na faia ai i tatou ma e faamalieina ai o tatou manaʻoga. Peitaʻi e iai se isi o tatou manaʻoga autū e tatau ona faamalieina pe a tatou fia maua le fiafia. Na fetalai Iesu: “Amuia i latou e manatu mamafa i o latou manaʻoga faaleagaga.” (Mataio 5:3, NW) E maua le fiafia auā e mafai ona faamalieina lenā manaʻoga pe a malamalama i le Afioga a le Atua.

O le mea moni, e lagona e nisi tagata le faigatā ona malamalama i le Tusi Paia. Mo se faaaʻoaʻoga, atonu e te manaʻomia se fesoasoani ina ia manino i nisi o mau o loo talanoaina ai ni aganuu e te lē masani ai, po o faaaogā ai foʻi ni faaupuga faafaatusa. E iai foʻi valoaga o loo tusia i se gagana faafaatusa, e faatoʻā malamalama i ai pe a suʻe i isi mau o le Tusi Paia o loo talanoaina ai lenā mataupu. (Tanielu 7:1-7; Faaaliga 13:1, 2)  E oo lava i tulaga faapena, e mafai moni ona e malamalama i le Tusi Paia. E faapefea ona e mautinoa lenā manatu?

Se Faamanuiaga e Mafai Ona Maua e Tagata Uma

O le Tusi Paia o le Afioga a le Atua. O inā o loo faamatala mai ai e le Atua lona finagalo iā i tatou. Pe aumaia ea e le Atua se tusi e faigatā ona tatou malamalama ai, pe e na o tagata ua maoaʻe so latou atamai e mafai ona malamalama i ai? E leai, e leai ni uiga lē alofa faapena o Ieova. Na fetalai Keriso Iesu: “O ai se tamā iā te outou e avatu ea e ia i lona atalii se maa, pe a ole mai se areto? Pe a ole mai se iʻa, e avatu ea iā te ia se gata a e lē o se iʻa? Pe a ole mai se fuāmoa, e avatu ea iā te ia se akarava? O lenei, o outou e leaga, afai ua iloa e outou ona avatu o mea lelei mā a outou fanau, e lē sili ea ona foaʻiina mai e lo outou Tamā o i le lagi le Agaga Paia i ē ole atu ai iā te ia?” (Luka 11:11-13) Ia e mautinoa la, e mafai telē ona e malamalama i le Tusi Paia, ma pe afai e faamaoni lau olega i le Atua, o le a ia saunia le fesoasoani mo oe ina ia e malamalama i lana Afioga. O le mea moni, e oo lava i tamaiti e mafai foʻi ona latou aʻoaʻoina ma malamalama i aʻoaʻoga faavae o le Tusi Paia.—2 Timoteo 3:15.

E ui e manaʻomia taumafaiga malolosi e malamalama ai i le Tusi Paia, ae tatou te maua ai āuga e sili ona lelei ma faalaeiauina ai. Ina ua toe faatūina aʻe Iesu, na ia faaali i ona soo e toʻalua, ma fetalai atu iā i laʻua e faatatau i valoaga a le Tusi Paia. Ua taʻua e le tala a Luka: “Ona faamatala ai lea e ia iā te i laʻua o mea ua tusia iā te ia i Tusi uma, ua amata mai iā Mose atoa ma le ʻau perofeta uma.” O le ā le iʻuga? I lenā afiafi, a o toe manatunatu nei soo i mea na la aʻoaʻoina, sa la fetautalatalaaʻi ai: “E leʻi mū ea o ta loto i totonu iā i taʻua, ina ua fetalai o ia iā te i taʻua i le ala, ina ua faamatala mai foʻi e ia o Tusi iā te i taʻua?” (Luka 24:13-32) Sa fiafia nei soo ina ua malamalama i le Afioga a le Atua, auā na atili ai ona mausalī lo la faatuatua i folafolaga a le Atua, ma la faatalitali atu ai ma le mautinoa i le lumanaʻi.

O le taumafai ia malamalama i le Afioga a le Atua e lē o se avega mamafa, ae ua pei o se mea fiafia, e pei lava ona maua le fiafia a o talisua i se taumafataga manaia. O le ā e tatau ona e fai ina ia maua ai lenā malamalamaga? O loo faaalia i le mataupu o loo sosoo mai le auala e te maua ai “le poto i le Atua.”—Faataoto 2:1-5.

[Ata i le itulau 4]

Ua pei Ieova o se tamā alofa, o loo Ia foaʻi mai lona agaga paia ina ia mafai ona tatou malamalama i le Tusi Paia