Pe a Faatino le Pule, Ia Faataʻitaʻi iā Keriso

I NI tausaga ua mavae, na faagasolo ai se suʻesuʻega i amioga a tagata, ma e mataʻina ni iʻuga na maua mai ai. E lua vaega na vaevae i ai tagata sa auai i lenei suʻesuʻega. O le isi vaega sa tofia e avea ma leoleo e vaavaaia pe leoleoina le isi vaega, lea na tofia e avea ma pagota. O le ā le iʻuga?

Na taʻua i le lipoti: “E leʻi tele lava ni aso, ae ua avea le toʻatele o leoleo, o ni tagata faasaunoa ma le fia malolosi, a o pagota ua matuā palaaai lava ma matafefefe.” Ona fai ai loa lea o le faaiʻuga lenei a le ʻausuʻesuʻe: E toetoe lava o tagata uma, e mafai ona lolo atu i le mailei o le faaaogā sesē o le pule.

Pule—Faaaogā Tatau ma le Lē Tatau

Pe afai e saʻo ona faaaogā le pule, e maua ai āuga lelei. E avatua ai taʻiala talafeagai ma maua ai manuia faaletino, i faalogona, ma le faaleagaga. (Faataoto 1:5; Isaia 48:17, 18) Peitaʻi e pei ona faaalia i le suʻesuʻega na muaʻi taʻua, o loo iai foʻi le lamatiaga mataʻutia, o le sesē ona faaaogā o le pule. O upu nei o loo taʻua ai e le Tusi Paia lenei lamatiaga: “A pule ē amio leaga, ua mapuitigā le nuu.”—Faataoto 29:2; Failauga 8:9.

E iai āuga leaga pe a faaaogā sesē e se tasi lana pule, e tusa lava pe lelei ana māfuaaga na faia ai. Mo se faaaʻoaʻoga, e lata mai nei na faatoese faalauaʻitele mai ai le aʻoga a se lotu i Aialani, ona o le lē fetaui o le auala sa faatino ai e nisi faiaʻoga la latou pule i tamaiti aʻoga. E mautinoa lava, e lelei ni faanaunauga na iai i le toʻatele o nei faiaʻoga, peitaʻi ua soona ʻinaʻinā auala sa faaaogā e nisi. Na lipotia e se tasi nusipepa e faapea, “e toʻatele tamaiti sa faamanuʻalia o latou faalogona ona o le mamafa o faiga sauā ma le ʻinaʻinā na fai e le toʻatele o faiaʻoga felela.” (The Irish Times) E faapefea la ona e faatinoina lau pule, ina ia mafai ai e isi ona faia mea e sili ona lelei, na i lo o lou faaita o i latou i au upu ma gaoioiga?—Faataoto 12:18.

Ua Tuuina iā Iesu Keriso le “Pule Uma Lava”

Seʻi manatu i le faaaʻoaʻoga a Iesu Keriso. A o toe o se aga afio aʻe i le lagi, na ia fetalai atu i ona soo: “Ua tuuina mai iā te aʻu le pule uma lava i le lagi ma le lalolagi.” (Mataio 28:18) Pe na fefefe ai ea ona soo i lenā fetalaiga? Pe na latou manatu ea faapea ai nei o le a faaalia e Iesu uiga o i latou na avea ma Kaisara o Roma, o ē na lauiloa i le sauā i so o se tasi na tetee i a latou pulega?

 E matuā leai se mea faapena o taʻua i le Tusi Paia! E faatino e Iesu Keriso lana pule i le auala o loo faatino ai foʻi e lona Tamā Lana pule. E ui ua tonu le avea o Ieova ma Pule Silisili Ese e ona le malosi uma, ae o lona finagalo ia auauna atu ma le lotomalie ona tagata iā te ia, na i lo le tau ina faataunuu, fai ma le fefe, po o le usiusitai e pei o se pologa. (Mataio 22:37) E lē taitai faatinoina e Ieova lana pule i se auala lē tonu. O le mea lenā o loo faaalia i le faaaliga mataʻina na faailoa atu i le perofeta o Esekielu.

I lenā faaaliga, na vaaia ai e Esekielu ni meaola e fā o loo faamamaluina le pule silisili ese a le Atua. E tofu meaola taʻitasi ma mata po o foliga taʻifā. Ua tusi mai Esekielu: “O le faatusa foʻi o latou mata, ua iā te i latou e fā o mata o le tagata, ma mata o le leona i le itu taumatau; ua iā te i latou foʻi e fā mata o le povi i le itu tauagavale; ua iā te i latou foʻi e fā mata o le aeto.” (Esekielu 1:10) O nei mata e fā ua fai ma sui o uiga o le Atua e sili ona tāua ma ua paleni atoatoa. O loo faailoa mai nei uiga i le Afioga a le Atua, e pei o le: alofa ua faaata mai e mata o le tagata; faamasinotonu ua faaata mai e mata o le leona; ma le poto ua faaata mai e mata o le aeto. E galulue felagolagomaʻi uma nei uiga e tolu faatasi ma le uiga lona fā—le malosi, lea e faaata mai e mata o le povi. O le ā le uiga o nei mea uma? Ua faaalia ai, e lē taitai ona faaaogā e Ieova lona malosi e lē gata mai ma lana pule, i se auala e lē ōgatusa ma isi ona uiga e sili ona tāua.

I le faataʻitaʻi o Iesu Keriso i lona Tamā, e na te faatino ai lana pule i se auala e ōgatusa lelei ma le alofa, poto, ma le faamasinotonu. Sa matuā lagona e ona soo le fiafia ma le faafouina a o taʻitaʻia i latou e Iesu. (Mataio 11:28- 30) Ae o le uiga silisili lava o Ieova le Atua ma Iesu Keriso, o le alofa, e lē o le malosi po o le pule!—1 Korinito 13:13; 1 Ioane 4:8.

O Faapefea Ona Faatino Lau Pule?

O faapefea ona e faatinoina lau pule? Mo se faaaʻoaʻoga i lou aiga, faamata o e pulepuletutū ma faatino mea uma i lau lava auala e te manaʻo ai? Faamata o usiusitai mai lou aiga i au faaiʻuga ona o le fefefe, pe ona o le alolofa? Po o māfua ea ona gauaʻi mai ona o oe lea e iai le pule? O fesili nei e tatau ona manatunatu i ai ulu o aiga, a o taumafai ia pulea o latou aiga i faatulagaga a le Atua.—1 Korinito 11:3.

E faapefea pe afai o loo e taulimaina se tulaga pule i totonu o le faapotopotoga Kerisiano? Ina ia faamautinoa po o lelei ona e taulimaina, seʻi siaki ane oe, e fua i mataupu silisili nei na faagaeeina e Ieova le Atua, ma sa faataʻitaʻia lelei mai e Iesu Keriso.

“O le auauna a le Alii . . . ia agamalu i tagata uma, . . . ia onosai, ia aʻoaʻi atu ma le agamalu i ē o finau mai.”—2 Timoteo 2:24, 25.

E iai nisi i le uluaʻi faapotopotoga Kerisiano sa telē se pule na latou faatinoina. O se faaaʻoaʻoga o Timoteo, sa mafai ona ia ‘vavao atu i nisi, ia aua foʻi neʻi latou aʻoaʻo i mataupu ese.’ (1 Timoteo 1:3) Peitaʻi tatou te mautinoa lelei, sa faaali atu e Timoteo uiga faale-Atua i mea uma sa ia faia, auā e mautinoa sa ia gaoioi e tusa ai ma le fautuaga a Paulo ina ia aʻoaʻo atu “ma le agamalu” ma ia “agamalu i tagata uma” a o ia tausia le faapotopotoga Kerisiano. Talu ai sa fai sina talavou o Timoteo i lenā taimi, sa tatau ai ona ia amioaʻi e faapei o se atalii e faaaloalo i tagata matutua, ma o se uso e lotoalofa i ē talavou. (1 Timoteo 5:1, 2) O se tausiga alofa faapena, e mafai ai ona atagia mai i le faapotopotoga Kerisiano le agaga e peiseaʻī o se aiga māfana ma le fealofani, ae lē pei o se fale faigaluega o ni tagata e galulue e aunoa ma ni lagona māfana ma le alofa.—1 Korinito 4:14; 1 Tesalonia 2:7, 8.

“O alii o nuu ese ua aliitaʻi i latou, o ē ua sili foʻi ua pule iā te i latou; a e lē faapea outou; a o sē fia sili iā te outou, ia fai o ia ma a outou auauna.”—Mataio 20:25, 26.

O pule sauā a le lalolagi e latou te “aliitaʻi” i isi e ala i le faaofi atu o o latou manatu i na tagata ma maumauaʻi e faia mea i a latou lava auala, ma faalālā atu ni faasalaga e faafefe ai isi pe a lē usiusitai mai iā i latou. Peitaʻi, sa faatāua e Iesu Keriso le auauna atu i isi ae lē o le faaopoopo atu i ai o avega mamafa. (Mataio 20:27, 28) E feutagaʻi o ia ma ona soo i taimi uma i se uiga alofa, ma le manatunatu mamafa. Pe afai e te faaaʻoaʻo iā Iesu, o le a atili faigofie ai foʻi mo isi ona felagolagomaʻi ma  oe. (Eperu 13:7, 17) E atili naunau ai foʻi isi e usiusitai mai iā te oe, e lē ona o loo fai faamalosi, ae i le lotomalie e fai.—Mataio 5:41.

“Ia outou leoleo i le lafu mamoe a le Atua o iā te outou, . . . Aua foʻi neʻi faapei o ē pule faasauā i ē ua tofia i ai outou, a ia fai outou ma faaaʻoaʻo i le lafu mamoe.”—1 Peteru 5:2, 3.

Ua iloa e ovasia i aso nei e paʻū iā i latou le lelei faaleagaga o tagata uma i le faapotopotoga. E latou te manatu mamafa la i lenei tiute tauave. A o latou tausia le lafu mamoe a le Atua, latou te taumafai ia faia mai se loto naunau, e tinoū, ma i se uiga alofa. Latou te faataʻitaʻi i le aposetolo o Paulo, e ala i le galulue mamafa e ati aʻe ma faamalosia le faatuatua o ē o loo latou tausia, ae lē o le fia pule i lo latou faatuatua.—2 Korinito 1:24.

Pe afai e manaʻomia ona avatu e toeaina ni fautuaga talafeagai, latou te faia i se uiga agamalu ina ia mafai ona toe faasaʻoina le ala o lē ua sesē, pe fesoasoani i se uso Kerisiano ina ia agaʻigaʻi i luma faaleagaga. E latou te manatua upu faamanatu a le aposetolo o Paulo: “Le ʻau uso e, afai e maua se tagata i se tasi agasala, o outou o i la le Agaga, ia outou faafoʻi mai lē ua faapeaina ma le loto o le agamalu. Ia faaeteete foʻi oe ina neʻi faaosoosoina oe.”—Kalatia 6:1; Eperu 6:1, 9-12.

“Ia fefaapalepaleaʻi, ma ia fefaamagaloaʻi outou, . . . A o le alofa, e lautua lea i nei mea uma, o le fusi lea e atoatoa ona lelei ai.”—Kolose 3:13, 14.

E faapefea ona e feutagaʻi ma se tasi atonu e na te lē o matuā tausisia lelei tapulaa faa-Kerisiano? Pe e te faapalepale i o latou vaivaiga ona o le tino lē lelei atoatoa, e pei foʻi ona faia e Ieova ma Iesu Keriso? (Isaia 42:2-4) Pe e te maumauaʻi e lē tatau lava ona iai sina iota e tasi o le tulafono e solia? (Salamo 130:3) Ia manatua, e tatau ona faaali le agamalu i vala e talafeagai ai, ae faatoʻā faaali le maumauaʻi pe a manaʻomia. O le gaoioi i se uiga alofa e mafai ai ona maua ni faiā māfana, o le mautinoa ma le maufaatuatuaina, i le va o oe ma isi o loo faatino i ai lau pule.

Po o le ā lava se tofiga tau pule ua tuuina atu iā te oe, ia e taumafai malosi e faataʻitaʻi iā Ieova le Atua ma Iesu Keriso, i le auala e faatino ai lenā pule. Seʻi toe manatu i le ata matagofie lea na faaata mai e le faisalamo a o ia faamatalaina le auala o loo faatino ai e Ieova lana pule i ona tagata. Na pese Tavita: “O Ieova, o loʻu leoleo mamoe o ia; e leai se mea ou te mativa ai. Na te ave aʻu i le mea e i ai le vao muʻa ou te taoto ai; na te taʻitaʻi iā te aʻu i tafatafa o vai e tafe lemū. Na te faafoʻisia mai loʻu agaga; na te taʻitaʻi iā te aʻu i ala o le amiotonu ona o lona suafa.” E faapena foʻi Iesu, lea ua tatou faitau ai: “O aʻu nei o le leoleo mamoe lelei; ua ou iloa aʻu mamoe, ua iloa foʻi aʻu e aʻu mamoe; pei ona silafia aʻu e le Tamā ma ou iloa le Tamā. Ou te tuuina atu foʻi loʻu ola mo mamoe.” Maʻeu ni faaaʻoaʻoga ua sili ona lelei e mafai ona tatou faataʻitaʻi atu i ai, i le faatinoina ma le alofa o le pule!—Salamo 23:1-3; Ioane 10:14, 15.

[Faamatalaga faaopoopo i le itulau 18]

E faaaogā e Ieova lona malosi po o lona mana i se auala e ōgatusa lelei ma lana faamasinotonu, poto ma le alofa

[Ata i le itulau 18]

E iai taimi e tatau ai i toeaina ona fautuaina ma le alofa i latou ua faimea sesē

[Ata i le itulau 19]

Na fautua Paulo iā Timoteo ina ia amioaʻi e pei o se atalii faaaloalo ma o se uso e lotoalofa

[Ata i le itulau 20]

E faatino e Iesu Keriso lana pule i se auala poto, amiotonu ma le alofa