Ia Malolosi o Outou Lima
Ia Malolosi o Outou Lima
“Ia malolosi o outou lima o ē faalogologo mai i nei ona pō i upu nei i fofoga o perofeta.”—SAKARIA 8:9.
1, 2. Aiseā ua talafeagai ai ona tatou uaʻi atu i tusi o Hakai ma Sakaria?
E UI o valoaga a Hakai ma Sakaria na tusia pe tusa ma le 2,500 tausaga ua mavae, ae mautinoa o loo iai se uiga tāua mo oe. O faamatalaga mai tusi o Hakai ma Sakaria, ua lē na o ni talafaasolopito. O se vaega ‘o mea uma na tusia anamua e aʻoaʻo mai ai i tatou.’ (Roma 15:4) O le tele o faamatalaga tatou te faitauina i na tusi, ua faamanatu mai ai iā i tatou mea moni ua tutupu talu mai le taimi na faavaeina ai i le lagi le Malo i le 1914.
2 I le faasino atu i mea na tutupu ma tulaga na oo i tagata o le Atua i aso ua mavae, na taʻua ai e le aposetolo o Paulo: “Na oo na mea uma iā te i latou e fai ma faailoga; ua tusia foʻi e fai ma apoapoaʻiga mo i tatou o ē ua aulia mai ai tausaga e gata ai.” (1 Korinito 10:11) Atonu la o le a e tau mānatu, ‘O le ā se aogā o nei tusi o Hakai ma Sakaria i o tatou aso?’
3. O le ā le mea na taulaʻi atu uma i ai valoaga a Hakai ma Sakaria?
3 E pei ona taʻua i le mataupu na seʻi mavae atu, o loo aofia i valoaga a Hakai ma Sakaria le taimi na toe foʻi atu ai tagata Iutaia i lo latou laueleele na foaʻiina i ai e le Atua, ina ua faasaʻoloto mai le tafeaga i Papelonia. Na taulaʻi uma atu valoaga a perofeta e toʻalua i le toe fausiaina o le malumalu. Na faia e tagata Iutaia le faavae o le malumalu i le 536 T.L.M. E ui sa taulaʻi atu manatu o nisi tagata matutua o Iutaia i mea ua tuanaʻi, ae i le tulaga aoao tetele, sa tele lava le ‘alaga o le fiafia.’ Peitaʻi o le mea moni, e iai se mea e sili atu ona mataʻina ua tupu i o tatou aso. Ua faapefea ona tupu?—Esera 3:3-13.
4. O le ā na tupu a o leʻi leva talu ona mavae le Taua Muamua a le Lalolagi?
4 E leʻi leva talu ona mavae le Taua Muamua a le Lalolagi, ae toe faasaʻoloto le ʻaufaauuina a Ieova mai noanoataga a Papelonia le Aai Tele. O lenā gaoioiga na matuā mautinoa ai le lagolagosua a Ieova. I le taimi muamua atu, sa foliga mai ua taofia e taʻitaʻi lotu ma a latou aumea faapolotiki, le galuega talaʻi ma le aʻoaʻo atu a Tagata Aʻoga o le Tusi Paia. (Esera 4:8, 13, 21-24) Peitaʻi sa tafiesea e Ieova le Atua toʻatugā na faalavelavea ai le galuega talaʻi ma le faia o soo. I le gasologa o tausaga talu mai le 1919, ua matuā olaola le galuega o le Malo, ma e leai se mea e toe taofia ai lona agaʻigaʻi i luma.
5, 6. O le ā le faatulagaga sili ona mataʻina lea e faasino atu i ai le Sakaria 4:7?
5 Tatou te mautinoa o le a faaauau pea le galuega talaʻi ma le aʻoaʻo atu lea e faia e auauna usiusitai a Ieova, ma o loo iai lana lagolagosua. Ua faapea mai le Sakaria 4:7: “Na te aumaia foʻi le maa tulimanu aupitoaluga, o loo alalaga, Le alofa tunoa e! ia iā te ia le alofa tunoa.” O le ā le faataunuuga sili i o tatou aso o loo faasino atu i ai lenei mea?
6 O loo faasino atu le Sakaria 4:7 i le taimi o le a oo ai le tapuaʻiga moni a le Alii Pule Silisili Ese, i lona tulaga atoatoa i lotoā faalelalolagi o lona malumalu faaleagaga. O lenā malumalu, o le faatulagaga lea a Ieova i le auala e tapuaʻi atu ai iā te ia e faavae i le taulaga talafeagai a Keriso Iesu. E moni, na iai le malumalu sili faaleagaga talu mai le uluaʻi senituri T.A. Peitaʻi, e ao ona oo atu i se tulaga atoatoa le tapuaʻiga moni i lona lotoā faalelalolagi. E faitau miliona tagata tapuaʻi o loo auauna nei i le lotoā faalelalolagi o le malumalu faaleagaga. O i latou nei, faapea ma le toʻatele o tagata e toe faatutūina mai, o le a oo ina lelei atoatoa a o faagasolo le Pulega a Iesu Keriso mo le Afe Tausaga. Ma i le iʻuga o le afe tausaga, e na o tagata tapuaʻi faamaoni o le Atua o le a totoe i le lalolagi ua faamamāina.
7. O le ā le matafaioi a Iesu i le aumaia o le tapuaʻiga moni i lona tulaga atoatoa i o tatou aso, ma aiseā e faamalosia ai i tatou i lenā mea?
7 Sa iai le kovana o Serupapelu, ma le faitaulaga sili o Iosua, e molimauina le māeʻa ona fausia o le malumalu i le 515 T.L.M. I se tulaga tutusa, ua valoia i le Sakaria e 6:12, 13, le matafaioi a Iesu i le aumaia o le tapuaʻiga moni i lona tulaga atoatoa, e faapea: “Ua faapea ona fetalai mai o Ieova o ʻau, o loo faapea mai, Faauta o le tagata o le LA LAAU lona igoa; e tupu aʻe o ia ai le mea e pogai mai ai; . . . o ia lava na te faia le malumalu o Ieova; e iā te ia foʻi le mamalu, e tiʻetiʻe foʻi o ia ma pule i luga o lona nofoālii; e fai foʻi o ia ma faitaulaga i luga o lona nofoālii.” O loo afio Iesu i le lagi ma faapogaia le gafa tautupu o Tavita ia olaola pea; o ia foʻi lenā o loo lagolagoina le galuega o le Malo i le malumalu faaleagaga. I le iloaina o lenā mea, pe e te manatu ea la e iai se tasi e mafai ona ia taofia le faagasologa o le galuega? E matuā leai lava! Po ua lē faamalosia ai ea la i tatou ina ia filigā i la tatou faiva, ae aua le faalavelavea i popolega o aso faisoo?
Mea e Ao Ona Faamuamua
8. Aiseā e tatau ai ona faamuamua i o tatou olaga le galuega i le malumalu faaleagaga?
8 Ina ia maua le lagolagosua ma le faamanuia a Ieova, e tatau ona faamuamua i o tatou olaga le galuega i le malumalu faaleagaga. Ia lē pei i tatou o tagata Iutaia o ē na faapea mai, “E leʻi oo i ona aso,” ae tatau ona tatou manatua, o loo tatou ola i “aso e gata ai.” (Hakai 1:2; 2 Timoteo 3:1) Na valoia e Iesu faapea o le a talaʻiina e ona soo faamaoni le tala lelei o le Malo ma fai isi ma soo. E ao ona tatou faaeteete ina ia aua neʻi lafoaʻia lo tatou faaeaga o le auaunaga. E leʻi oo ina faaiʻuina le galuega talaʻi ma le aʻoaʻo atu lea sa taofia mo sina taimi e tagata tetee, ae sa toe faaauau talu mai le 1919. Ae ia e mautinoa, o le a faaiʻuina lava!
9, 10. O le ā e faalagolago i ai le mauaina e se tasi o faamanuiaga a Ieova, ma o le ā le uiga o lenā mea mo i tatou?
9 O le tele e faaauau ai pea ona tatou galulue maelega, o le tele foʻi lea o le a faamanuiaina ai i tatou. Mātau le folafolaga a Ieova lea e faalaeiauina ai i tatou. O le taimi lava na toe faia ai ma le loto atoa e tagata Iutaia la latou tapuaʻiga, ma amata ona galulue maelega i le faavaeina o le malumalu, na fetalai atu ai Ieova iā i latou: “E amata mai i lenei lava aso ona ou faamanuia iā te outou.” (Hakai 2:19) O le a aogā iā i latou le toe faafoʻisia atoatoa mai o lona finagalo malie. Seʻi mafaufau i faamanuiaga na folafola e le Atua: “E i ai le fua o le toʻalemu; e fua mai e le vine i ona lava fua, e fua mai foʻi le laueleele i ona lava fua, o le lagi foʻi e totō ifo ai lona sau; ou te avatua foʻi ia mea uma i ē ua totoe o lenei nuu e fai mā latou.”—Sakaria 8:9-13.
10 E pei lava ona faamanuia e Ieova na tagata Iutaia i lo latou itu faaleagaga ma le faaletino, o le a faapena foʻi ona ia faamanuia mai a o tatou faia ma le filigā, ma i se loto fiafia, le galuega ua ia tofia mai iā i tatou. E aofia ai i nei faamanuiaga le filemu i le va ma o tatou uso, le saogalemu, le manuia, ma le faatuputeleina faaleagaga. Ae mafai ona e mautinoa, e faalagolago le mauaina pea o faamanuiaga a Ieova, i lo tatou faia o le galuega i le malumalu faaleagaga i le auala o loo tusa ma lona finagalo.
11. E faapefea ona tatou faia se iloiloga o i tatou lava?
11 O le taimi lenei e ‘tatou te mafaufau ai i o tatou ala.’ (Hakai 1:5, 7) E tatau ona tatou iloilo mea o faamuamua i o tatou olaga. E faalagolago faamanuiaga a Ieova iā i tatou i aso nei, i le tele o loo tatou faamamaluina ai lona suafa, ma agaʻi pea i luma i la tatou galuega i lona malumalu faaleagaga. E te ono fesili ifo iā te oe lava: ‘Po ua suia ea mea ou te faamuamuaina? E faapefea i loʻu maelega o loo iai nei mo Ieova, mo lana upu moni, ma lana galuega, ona faatusatusa atu i loʻu maelega lea sa iai ina ua ou faatoʻā papatiso? Po o avea ea loʻu naunau atu i se olaga tamaoaiga, ma itu ua afaina ai le tele o oʻu uaʻi atu ai iā Ieova ma lona Malo? Po o avea ea le fefe i tagata—le popole i mafaufauga o isi—ma pogai ua taofia ai aʻu mai le faatinoina o aʻu matafaioi faaleagaga?’—Faaaliga 2:2-4.
12. O le ā le tulaga sa iai tagata Iutaia, lea o loo faamatilatila mai e le Hakai 1:6, 9?
12 Tatou te lē mananaʻo e taofia e le Atua ana faamanuiaga mai iā i tatou, ona o lo tatou faatalalē i le galuega o le faamamaluina o lona suafa. Toe mafaufau i le taimi ina ua iai se amataga lelei i le toe fausiaina o le malumalu. I le Hakai 1:9 o loo taʻua ai le mea na fai e tagata Iutaia o ē na toe foʻi, na ‘taʻitasi ma momoʻe mo lona lava fale.’ Sa latou pupū i le faamalieina o o latou lava olaga ma manaʻoga o aso taʻitasi. O le iʻuga, sa ‘itiiti mea na latou au mai,’ sa leʻi lava ni meaʻai lelei, ni vaiinu, ma ni ofu māfanafana na latou maua. (Hakai 1:6) Na aveesea e Ieova ana faamanuiaga. Po o iai se lesona i lenei mea mo i tatou?
13, 14. E faapefea ona tatou faatatauina le lesona mai le Hakai 1:6, 9, ma aiseā e tāua ai?
13 Ina ia maua pea faamanuiaga a Ieova, e tatau ona tatou teena le saʻilia o mea mo i tatou lava ma lafoaʻi ai le tapuaʻiga iā Ieova. O le mea tonu lenā e tatau ona tatou fai, ia teena mea e faalavelavea pe faaluafesasi ai o tatou mafaufau. E aofia i nei mea le saʻilia o se tamaoaiga tele, o auala e vave ai ona mauʻoa, le naunautaʻi ia maualuluga aʻoaʻoga ina ia maua se galuega e lelei le totogi, po o polokalame mo le faamalieina o i tatou lava.
14 E lē faapea e leaga na mea. Peitaʻi pe a e faatusatusa i le mauaina o le ola e faavavau, e mautinoa lava la, o na mea o ni “galuega e oti ai.” (Eperu 9:14) I le ā le itu? O ni mea e leai se lelei faaleagaga e maua ai, o ʻai a le matagi, ma e lē aogā. Afai e faaauau pea e se tasi na galuega, o le a iʻu ai ina oti faaleagaga. Sa tupu lenā mea i nisi Kerisiano faauuina i le vaitaimi o le ʻauaposetolo. (Filipi 3:17-19) Ua tupu foʻi i nisi i lo tatou vaitaimi. Atonu o e iloa nisi na faifai mālie lava ona lē toe faatasitasi ma le faapotopotoga, ma lē toe auai i gaoioiga faa-Kerisiano; i le taimi nei ua matuā leai lava so latou faanaunauga e toe fia auauna iā Ieova. Tatou te faanaunau ina ia toe foʻi mai na tagata iā Ieova; peitaʻi o le mea moni, o le saʻilia o “galuega e oti ai,” e iʻu ina lē toe maua ai le finagalo malie ma faamanuiaga a Ieova. E ese le faanoanoa o lenā tulaga, auā o le a lē toe iai se olioli ma le filemu lea e faatupuina e le agaga o le Atua. Aemaise ai le faanoanoa auā o le a lē toe iai se aufaatasiga māfana ma le ʻauuso Kerisiano!—Kalatia 1:6; 5:7, 13, 22-24.
15. Ua faaalia faapefea e le Hakai 2:14 le tāua o la tatou tapuaʻiga?
15 O se mataupu e tāua tele lenei. Seʻi mātau mai i le Hakai 2:14 le silafaga a Ieova i tagata Iutaia, o ē na lafoaʻia le teuteuina o lona maota mo le tapuaʻiga, ae sagaʻi e teuteu o latou lava fale, pe i se uiga moni pe faafaatusa. “Ua faapena nei tagata, ua faapena foʻi lenei nuu i oʻu luma, o loo fetalai mai ai Ieova; ua faapena foʻi mea uma ua faia e o latou lima, o mea foʻi ua latou avatua i inā ua leaga lava ia.” Po o ā lava taulaga sa ofoina atu e na tagata Iutaia faalotolotolua i luga o le fata faitaulaga lea sa i Ierusalema, ae e leʻi talia talu ai sa latou lafoaʻia le tapuaʻiga moni.—Esera 3:3.
E Mautinoa le Lagolagosua
16. O le ā sa faamautinoa atu i tagata Iutaia, ona o vaaiga na maua e Sakaria?
16 E valu ni vaaiga sa maua e Sakaria, sa faamautinoa ane ai le lagolagosua a le Atua i tagata usiusitai o Iutaia, o ē na galulue e toe fausia lona malumalu. O le uluaʻi vaaiga sa faamautinoa mai ai le faamāeʻaina o le malumalu, ma le manuia mo Ierusalema ma Iuta, pe a latou faia ma le usiusitai le galuega. (Sakaria 1:8-17) O le vaaiga lona lua, na folafola mai ai le iʻuga o le a oo i malo uma sa tetee i le tapuaʻiga moni. (Sakaria 1:18-21) O isi vaaiga, sa faamautinoa mai ai le puipuiga a le Atua a o fausia le malumalu, le lolofi o tagata mai le tele o atunuu i le fale e fai ai le tapuaʻiga iā Ieova. Sa faamautinoa mai foʻi le filemu ma le saogalemu moni, le aveesea o toʻatugā i le galuega, le tafiesea o le amioleaga, faapea le taʻitaʻiga ma le puipuiga a agelu. (Sakaria 2:5, 11; 3:10; 4:7; 5:6-11; 6:1-8) Ona o na faamautinoaga o le lagolagosua a le Atua, ua e malamalama la i le pogai na fetuutuunaʻi ai e tagata usiusitai o latou olaga, ae taulaʻi atu o latou mafaufau i le galuega na ala ai ona faasaʻolotoina i latou e le Atua.
17. Talu ai ua iā i tatou le faamautinoaga, o ā la fesili e tatau ona tatou fesili ifo ai iā i tatou lava?
17 E faapena foʻi i lo tatou tulaga. Talu ai ua iai faamautinoaga o le a manumalo le tapuaʻiga moni, e tatau foʻi la ona tatou faia ni gaoioiga ma mafaufau loloto e uiga i le maota e fai ai le tapuaʻiga iā Ieova. Fesili ifo iā te oe lava: ‘Afai ou te talitonu o le taimi lenei e talaʻi ai le tala lelei o le Malo ma faia isi ma soo, po o ōgatusa la oʻu sini ma le auala o loo oʻu ola ai, ma oʻu talitonuga? Po o lava se taimi o oʻu suʻesuʻeina ai le Afioga a le Atua, manatu mamafa i ai, ma talanoa ai ma isi oʻu uso Kerisiano, po o nisi lava tagata ou te feiloaʻi i ai?’
18. O ā mea o le a tutupu i le lumanaʻi, e pei ona faamatala e le mataupu e 14 o le Sakaria?
18 Sa faasino faamatalaga a Sakaria i le faaumatiaga o Papelonia le Aai Tele, lea e sosoo mai ai ma le taua iā Amaketo. Tatou te faitau i ai faapea: “E oo mai le aso, e tasi lava ia, (ua silafia lava e Ieova,) e lē o le ao, e lē o le pō; a e a oo i le itu aso afiafi e malamalama ai.” E mautinoa, o le a avea le aso o Ieova o se aso pogisa ma le mataʻutia mo ona fili i le lalolagi! Ae o le a avea o se taimi e faamalamalama ai pea ma faafiafia ai ona tagata tapuaʻi faamaoni. Na faamatala foʻi e Sakaria le auala o le a faalauiloa ai e mea uma i le lalolagi fou le paia o Ieova. O le tapuaʻiga moni i le malumalu sili faaleagaga o le Atua, e na o le pau lea o le tapuaʻiga o le a iai i le lalolagi. (Sakaria 14:7, 16-19) Maʻeu se faamautinoaga mataʻina! O le a tatou tofo ai i le faataunuuga o mea na valoia mai, ma vaai i le faamaoniga o le pule silisili ese a Ieova. Maʻeu le mataʻina o le a iai lenā aso o Ieova!
Faamanuiaga Tumau
19, 20. Aiseā ua faalaeiauina ai oe i le Sakaria 14:8, 9?
19 Pe a mavae lenā aso silisili ma le mataʻutia, ona taofia lea o Satani ma ana temoni i le to e lē gata, o le a lē mafai ai ona toe gaoioi. (Faaaliga 20:1-3, 7) Ona tafe mai ai lea o faamanuiaga i le taimi o le Pulega a Keriso i le Afe o Tausaga. Ua faapea mai le Sakaria 14:8, 9: “O lea aso foʻi e alu atu ai le vai ola nai Ierusalema o le tasi ona vaega e tafe atu i le sami i sasaʻe, a o le isi ona vaega e tafe atu i le sami i sisifo; o le tausaga vevela ma le tausaga maalili e fai ai ia mea. E fai foʻi Ieova ma Tupu i le lalolagi uma lava; o lea aso ua na o Ieova ai lava, ma lona suafa e āu tasi lea.”
20 O “vai ola,” po o le “vaitafe manino o le vai o le ola,” o loo faaatagia ai sauniuniga a Ieova mo le ola e faavavau, o le a tafe mai pea mai le nofoālii o le Malo faa-Mesia. (Faaaliga 22:1, 2) O le motu o tagata e toʻatele, o ē tapuaʻi iā Ieova ma faasaoina mai iā Amaketo, o le a maua aogā e ala i le tuusaʻoloto o i latou mai le faasalaga o le oti na tuufaasolo mai iā Atamu. O ē ua maliliu o le a toe faatutūina mai. O inā o le a amata ai se vala fou o le pulega a Ieova i le lalolagi. O le a iloa ai e tagata soifua uma, o Ieova le Pule Silisili Ese i le Aoao o mea, ma e na o Ia lava e tatau ona tapuaʻia.
21. O le ā sa tatou filifiliga ua tatau ona fai?
21 Pe a fua i mea uma sa valoia e Hakai ma Sakaria, aemaise o latou faataunuuga, ua aumaia ai iā i tatou se māfuaaga tatau e agaʻi ai i luma e fai le galuega, lea ua tofia mai e Ieova iā i tatou e fai i lotoā faalelalolagi o lona malumalu faaleagaga. Tau ina ia tatou taumafai uma ia faamuamua manaʻoga o le Malo seʻia oo i le taimi, e atoatoa ai le faatinoga o le tapuaʻiga moni. Ua faamalosiau mai le Sakaria 8:9 iā i tatou: “Ia malolosi o outou lima o ē faalogologo mai i nei ona pō i upu nei i fofoga o perofeta.”
E te Manatua?
• O le ā se tulaga tutusa i le talafaasolopito, ua mataʻina ai tusi o Hakai ma le Sakaria i aso nei?
• O ā lesona o mea e sili ona tāua ua taʻu mai iā i tatou e tusi a Hakai ma Sakaria?
• Aiseā ua avea ai le talanoaina o le Hakai ma Sakaria, ma pogai ua tatou mautinoa ai le lumanaʻi?
[Fesili mo le Suʻesuʻega]
[Ata i le itulau 26]
Na faamalosiau atu Hakai ma Sakaria i tagata Iutaia, ina ia galulue ma le loto atoa ma maua ai faamanuiaga
[Ata i le itulau 27]
Po o e ‘momoʻe mo lou lava fale’?
[Ata i le itulau 28]
Na folafola mai e Ieova se faamanuiaga, ma ua ia foaʻiina mai