Le Aiā i le Iai o se Suafa

O LOO iai i tagata uma le aiā ia iai sona suafa. I Tahiti, e oo lava i se tamaitiiti na tuulafoaʻiina i lona fanau mai e lē iloa po o ai ni ona mātua, e fai lava sona igoa. E faia e le ofisa lesitala le igoa ma le faaiʻu mo le tamaitiiti lea ua tuulafoaʻiina.

Ae ui i lea, o loo iai se tasi e mafai ona faapea atu ua teena lana aiā, le aiā lea e iai i tagata uma i le iai o sona suafa. Ma o le mea e ofo ai, ona o ia o “le Tamā . . . ua faaigoaina ai le aiga uma o i le lagi atoa ma le lalolagi”! (Efeso 3:14, 15) Ua matuā toʻatele tagata ua mumusu e faaaogā le suafa o Lē na foafoaina mea o loo i le Tusi Paia. Ua sili iā i latou le faaaogā o taʻu e pei o le “Atua,” “le Alii,” po o “Lē Mai le Vavau.” O ai la lona suafa? Ua tali e le faisalamo lenā fesili e faapea: “O oe, e ou le suafa o Ieova, na o oe lava o le Silisili ese i le lalolagi uma.”—Salamo 83:18.

I le ʻafa muamua o le senituri lona 19 ina ua taunuu misionare a le L.M.S. i Tahiti, o le taimi lenā o tapuaʻi tagata Polenisia i le tele o atua. E tofu lava le Atua ma lona igoa, ae o atua autū lava o Oro ma Taaroa. Ina ia faaeseese le Atua o loo taʻua i le Tusi Paia mai isi atua, e leʻi faatalatū misionare e faaaogā le suafa o le Atua, lea na tusia Ieova i le faa-Tahiti.

Na oo ina lauiloa lenā suafa ma faaaogā i talanoaga i aso faisoo faapea ma mea tau fesootaʻiga. Sa faaaogā soo e le Tupu o Pomare II o Tahiti, lea sa avea ma tupu i le amataga o le senituri lona 19 le suafa o le Atua i ana fesootaʻiga na fai. O le faamaoniga o lenā mea o loo i lana tusi e pei ona faaalia i inei. O loo tusia i le faa-Peretania, ma o loo faaalia i le fale Mataaga i Tahiti. O lenei tusi o loo faaalia ai i inei na talia e tagata le suafa o le Atua i lenā taimi. E lē gata i lea, e faitau afe taimi o loo iai le suafa o le Atua i le uluaʻi lomiga o le Tusi Paia i le gagana Tahiti, lea na māeʻa i le tausaga e 1835.

[Ata i le itulau 32]

Tupu o Pomare II

[Faamatalaga i Ata i le itulau 32]

Tupu ma le tusi: Collection du Musée de Tahiti et de ses Îles, Punaauia, Tahiti