Melito Mai Sarataisa—Pe sa Ia Puipuia Upu Moni o le Tusi Paia?

I TAUSAGA taʻitasi, e faamanatu ai e Kerisiano moni le Talisuaga Afiafi a le Alii, i le aso e fetaui iā Nisani 14 i le kalena faa-Eperu. Ua latou usiusitai i le faatonuga a Iesu: “Tou te faia le mea nei e fai ma faamanatuga iā te aʻu.” O Nisani 14 tonu lenā i le 33 T.A., na faavae ai e Iesu le Faamanatuga o lona maliu faataulaga ina ua mavae le faamanatuina o le Paseka. Na maliu o ia a o leʻi iʻu lenā aso.—Luka 22:19, 20; 1 Korinito 11:23–28.

I le senituri lona lua T.A., na amata suia ai e nisi le taimi o le faamanatuga ma le auala na faia ai. Ae na faaaogā pea le aso o le maliu o Iesu i Asia Itiiti. Ae pei ona taʻua i se tasi tusi, “o le tū i Roma ma Alesania, e faamanatu le toe tū o Iesu i le Aso Sa ina ua mavae le aso lea na maliu ai,” lea e taʻua o le Paseka o le Toe tū. Sa lagolagoina e se vaega e taʻua o le ʻau Kuatatesimane po o (Ē Faamanatuina le Aso 14), le faamanatuina o le maliu o Iesu iā Nisani 14. Sa ioe Melito mai Sarataisa i lenei aʻoaʻoga. O ai Melito? Na faapefea ona ia puipuia lenei upu moni o le Tusi Paia ma isi foʻi upu moni?

O Sē na Faasusulu Atu le ‘Malamalama Tele’

I le faaiʻuga o le senituri lona lua, e tusa ai o le tusi Ecclesiastical History a Eusipio le Kaisareia, na lafo ai e Polycrates o Efeso se tusi i Roma e lagolago ai le faamanatuina o “le Paseka i le aso 14 e tusa ai o le Evagelia, e lē taitai see ese ae usitai e tusa ai o le Faa-Kerisiano.” E tusa ai o lenei tusi, o Melito le Epikopō mai Sarataisa lea e i Litia, o se tasi o ē na lagolagoina le aso 14 o Nisani e ao ona faamanatu. Na taʻua i le tusi na manatu ē na latou ola faatasi, o Melito o sē na faasusuluina le ‘malamalama tele lea ua maliu.’ Na taʻua e Polycrates e leʻi faaipoipo Melito, ma “e na o mea faaleagaga sa ia manatu mamafa i ai, ma o loo lagomau i Sarataisa e faatali ai i le valaau mai le lagi, pe a toe tū mai i le oti.” O lona uiga, o Melito o se tasi o ē na talitonu o le a leai se toe tū, seʻia afio mai Keriso.—Faaaliga 20:1-6.

 O lea, e foliga mai e loto tele ma maumauaʻi Melito. O le mea moni, sa ia tusia se tusi e taʻua o le Apology mo Kerisiano, ma o le uluaʻi tusi lea na tusia iā Marcus Aurelius, le emeperoa o Roma mai le 161 i le 180 T.A. E leʻi fefe Melito e puipuia le Faa-Kerisiano ma taʻuleaga tamāloloa leaga ma le matapeʻapeʻa. Na saʻili e nei tamāloloa ni faatonuga mai le emeperoa e fai ma faamolemolega, e sauā ma taʻusala ai ma le lē tonu Kerisiano, ina ia latou gaoia ai a latou meafaitino.

Na tusi ma le loto tele Melito i le emeperoa: “Ua na o le pau lenei o si a matou talosaga i lau susuga, seʻi e tagaʻi totoʻa ane i ē o loo māfua ai le faafitauli [Kerisiano], ma fai se faamasinoga tonu pe ua ono faasala ma oo i ai le oti, pe faasao ma faasaʻoloto. Ae afai e leʻi māfua mai iā te oe lenei āiāiga ma le tulafono fou, lea foʻi e lē fetaui i tagata mai nuu ese, matou te ʻaiʻoi atu la ina ia toe liuliu se tōfā, ina ia aua neʻi galo mai i matou o loo mafatia i faiga faalētaupulea a ē sauā.”

Faaaogā le Tusi Paia e Lagolago ai le Faa-Kerisiano

Sa naunau tele Melito e suʻesuʻe le Tusi Paia. E lē o iā i tatou le lisi atoa o ana tusitusiga, ae o igoa o nisi o ana tusitusiga e faaalia ai sa ia naunau i mataupu o le Tusi Paia. O nisi o ana tusitusiga pe a faa-Samoa e taʻua o le Olaga Faa-Kerisiano ma Perofeta, Le Faatuatua o le Tagata, Le Foafoaga, Le Papatisoga ma le Upu Moni ma le Faatuatua ma le Soifua Mai o Keriso, Le Agalelei, Le Ki i le Iloaina o le Tusi Paia, ma Le Tiapolo ma le Faaaliga a Ioane.

Sa malaga moni Melito i atunuu ia o loo taʻua i le Tusi Paia, e saʻili ai le aofaʻiga saʻo o tusi o Tusitusiga Eperu. I lenei tulaga na ia tusi: “O lea, ina ua ou alu i Sasaʻe ma iai i le nofoaga lea na talaʻia ma tutupu ai nei mea, ma ina ua māeʻa ona ou saʻilia tusi o le Feagaiga Tuai ma faamauina mea moni, sa ou lafo atu loa iā te oe.” E lē o taʻua i lenei lisi tusi o Neemia ma Eseta, ae o le lisi pito sili  lea ona leva o tusi ua faagaeeina o Tusitusiga Eperu, na tusia e ē na faapea mai o Kerisiano.

A o faia lenei saʻiliʻiliga, na tuufaatasi e Melito fuaiupu eseese na ia aumaia mai Tusitusiga Eperu ia e iai valoaga e uiga iā Iesu. O le tusi a Melito ua taʻua o le Upu Sii, ua faaalia ai o Iesu o le Mesia lea ua loa ona tatali i ai, ma na faasino atu le Tulafono a Mose ma perofeta iā Keriso.

Lagolago le Aogā o le Togiola

Sa iai se vaega toʻatele o tagata Iutaia i taulaga tāua o Asia Itiiti. Na faamanatu e tagata Iutaia o Sarataisa i le mea lea na nofo ai Melito, le Paseka faa-Eperu iā Nisani 14. Na tusia e Melito se lauga na faamatuaina O le Paseka, na faaalia ai le saʻo aʻiaʻi o le Paseka e tusa ai o le Tulafono, ma lagolago ai le faamanatuina e Kerisiano o le Talisuaga Afiafi a le Alii iā Nisani 14.

Ina ua uma ona faia manatu o Melito i le Esoto mataupu e 12, ma faaalia le faaatagia e le Paseka o le taulaga a Keriso, ona ia faamatala lea o le pogai e lē tatau ai ona faamanatu e Kerisiano le Paseka. Ona ua faamuta e le Atua le Tulafono a Mose. Na ia faaali le pogai na talafeagai ai le taulaga a Keriso: Na tuu e le Atua Atamu i se parataiso ina ia ola fiafia ai. Ae na lē usitai le uluaʻi tagata i le faatonuga ia aua le ʻai i le laau e iloa ai le lelei ma le leaga. O inā loa na manaʻomia ai se togiola.

Na taʻua atili e Melito, na afio mai Iesu i le lalolagi ma maliu i se laau, ina ia togiola ai ē talitonu mai le agasala ma le oti. O le mea e fiafia ai, ina ua tusi Melito e uiga i le laau na maliu ai Iesu, na ia faaaogā le upu Eleni o le xylon, o lona uiga o le “laupapa.”—Galuega 5:30; 10:39; 13:29.

Na lausilafia Melito i tala atu o Asia Itiiti. Na masani Tetuliano, Clement o Alesania, ma Origen i ana tusitusiga. Ae ua taʻua e le tusitala o talafaasolopito o Raniero Cantalamessa: “Ina ua mālō le faia o le Paseka i le Aso Sa, ma ua amata foʻi ona manatu i le ʻau Kuatatesimane o ni ē ua fulitua, na faasolo ai loa ina fāiifo Melito seʻia oo ina mou atu ai ma ana tusitusiga.” Mulimuli ane, na toetoe lava mou uma atu ai tusitusiga a Melito.

Pe na Afaina i Gaoioiga a Ē na Fulitua i le Upu Moni?

Ina ua maliliu aposetolo, na amata ona aafia le Faa-Kerisiano i ē na fulitua i le upu moni. (Galuega 20:29, 30) E manino mai sa aafia ai Melito. Na atagia mai i ana tusitusiga lavelave filosofia a Eleni ma manatu o tagata Roma. Atonu o le pogai lea sa taʻua ai e Melito le Faa-Kerisiano o la “matou filosofia.” Na ia manatu foʻi i le tuufaatasiga o le mea sa taʻua o le Faa-Kerisiano ma Roma e faapea, o “le faamaoniga silisili . . . mo le manuia.”

E mautinoa e leʻi goto i le loto o Melito le fautuaga a Paulo: “Ia outou, neʻi faatagataotauaina outou e se tasi i le poto lē aogā e faasesē ai, e tusa ma le uputuu a tagata, e tusa ma mataupu muamua a le lalolagi, a e lē tusa ma mataupu a Keriso.” O lea, e ui sa lagolago e Melito nisi upu moni o le Tusi Paia, ae i le tele o vala, sa ia lafoaʻia na upu moni.—Kolose 2:8, LT.

[Ata i le itulau 18]

Na faavaeina e Iesu le Talisuaga Afiafi a le Alii iā Nisani 14