Po o Lelei a Oulua Fesootaʻiga?

“TUSI Aualofa a le ʻAu 60 Tausaga.” O le ʻauʻau lenā o le tauvaga na faatautaia e se faletupe i Iapani i ni nai tausaga ua mavae. Sa uunaʻia e lenei tauvaga tane ma fafine Iapani uma mai le 50 i le 60 ma ona tupu tausaga, ina ia faaleo mai o latou “lagona moni” i a latou paaga. O le mea lenei na tusia e se tasi o sui tauvā i lana avā: “Atonu e te ʻata i laʻu tala lenei, ae o le a ou faanoanoa pe a ou lē taʻuina atu, ma o oʻu lagona moni lava nei: Ou te faafetai tele atu ona o lou filifilia o aʻu e fai mau tane faaipoipo.”

E iai aganuu, e aofia ai nisi o aganuu i Sasaʻe, e lē o se mea lelei le faaleo atu o ni lagona tuua toʻatasi o se tasi. Peitaʻi i lenā tauvaga o tusi alofa, e silia i le 15,000 tagata na tali lagolago atu i ai. O le fiafia tele i ai o tagata na iʻu ai lava ina toe sosoo atu ma le isi tauvaga. Na oo foʻi ina lolomi ai ma tusi e faavae mai i tusi aualofa o le tauvaga. E taʻu mai ai i lenei mea na tupu, le toʻatele o tagata o loo matuā faanaunau, ina ia faaleo atu o latou lagona e uiga i a latou paaga e pele iā i latou. Peitaʻi e iai foʻi isi, e lē mananaʻo e fai lenā mea. Aiseā? Atonu e telē se taumafaiga e manaʻomia ona latou faia ina ia mafai ai e isi—e pei o se paaga—ona malamalama mai i o latou faalogona.

I se faamatalaga a Hitoshi Kato, o lē na tusia se tusi e faatatau i le mālōlō litaea, na ia taʻua ai, o le tele o talaga faaipoipoga a ulugalii matutua i Iapani e faamaʻite lava e avā. E māfua mai i ni lagona ita ua matuā mauaa lea na faaputuputu mai i le tele o tausaga. “Peitaʻi,” o lana faamatalaga lea, “o le isi foʻi pogai, e lē o iai ni talanoaga lelei a le ulugalii e fefaaaliaʻi ai o la lagona pe a tulaʻi mai faafitauli.”

O le mea ua tupu, o lea faatoʻā mālōlō litaea mai se tane i le galuega, ae faateʻia i le tuu atu i ai e le avā o pepa e saini e tatala ai le faaipoipoga. Atonu ua tele tausaga e lē o talatalanoa lenei ulugalii ma fefaaaliaʻi o la faalogona.  Pe atonu sa la taumafai, peitaʻi sa lē mafai ona la faia i taimi uma ni talanoaga fiafia ma aogā. O le iʻuga, na i lo le fafau aʻe o se mafutaga māfana ma vavalalata, ae ua na o taugāupu ma misa i taimi uma.

E mafai faapefea e se tane ma se avā ona foʻia ni o la feeseeseaʻiga i se auala toʻafilemu, ma fefaaaliaʻi o la faalogona i se uiga e logomālie? O le a e maofa i le iloaina, o fautuaga e sili ona aogā i lenei mataupu, e lē o maua i se tusi mai aso nei a se tagata faufautua i faaipoipoga, ae maua i se tusi mai anamuā lava, ua ausenituri o faatāuaina ma faapelepele i ai—o le Tusi Paia lea.