Aua Tou te Matataʻu o Loo Faatasi Ieova ma Outou!

I LE silia ma le 50 tausaga talu ai, a o leʻi leva lava ona pāpā uluaʻi pomu niukilia, sa faapea mai ai se saienitisi na malo i le Nobel Prize o Harold C. Urey e uiga i le lumanaʻi: “O le a oo ina faatumulia olaga o tagata i le matataʻu po o le fefefe.” I aso nei, ua tumu le lalolagi i le mataʻu ma e lē o se mea e faateʻia ai! I aso taʻitasi, ua faasalalauina e nusipepa ni tala mataʻutia i faiga faatupu faalavelave, solitulafono mataʻutia, ma faamaʻi fou e leʻi iai muamua.

Ona o i tatou o ni Kerisiano, ua tatou iloa ai le māfuaaga o nei tulaga. Ua faaalia i nei mea, ua tatou ola i “aso e gata ai” o lenei lalolagi leaga, lea na valoia mai e le Tusi Paia o le a mātaulia ai “aso faigatā.” (2 Timoteo 3:1) O lea la, ua faamalosia ai lo tatou mautinoa iā Ieova le Atua, o le a lē toe umi ae ia aumaia se lalolagi fou lea o le a ola ai le tagata amiotonu. (2 Peteru 3:13) Ae i le taimi nei, po o sao mai ai Kerisiano i le matataʻu?

Le Vaaiga a Auauna a le Atua i le Mataʻu

Na fesagaʻia e Iakopo, Tavita ma Elia ni tulaga mataʻutia e ono matataʻu ai. (Kenese 32:6, 7; 1 Samuelu 21:11, 12; 1 Tupu 19:2, 3) E leʻi faaitiitia ai le faatuatua o nei tane. Na i lo lenā, na latou faalagolago maumauaʻi iā Ieova. Ae peitaʻi, o Iakopo, Tavita ma Elia ua na o ni tagata, ma o lea, sa ono aafia pea i latou i le mataʻu. Na tusi le soo o Iakopo: “O Elia o le tagata ia e tusa ma i tatou.”—Iakopo 5:17.

Atonu tatou te lagona foʻi le fefe a o fesagaʻia ni toʻatugā i le taimi nei po o se faafitauli e ono tulaʻi mai i le lumanaʻi. Ua talafeagai ona iai na lagona o le mataʻu. Auā o loo taʻua i le Tusi Paia ua maumauaʻi Satani le Tiapolo e “tau le taua” ma i latou “ua tausi i poloaʻiga a le Atua, ma ua taofi le mau iā Iesu.” (Faaaliga 12:17) E ui ina faasino patino atu na upu i Kerisiano faauuina, ae na tusi Paulo: “O i latou uma foʻi o ē loto ina nonofo ma le amio Atua iā Keriso Iesu, e sauāina i latou.” (2 Timoteo 3:12) O lea, e lē tatau ai ona tatou matataʻu pe a fesagaʻia faafitauli. Aiseā?

“O le Atua o le Olataga”

Na tusi le faisalamo o Tavita: “O lo tatou Atua, o le Atua o le olataga [faaolataga] lea.” (Salamo 68:20) Ua faaalia soo mai e Ieova, na te mafaia ona faasaoina ona tagata, e ala i le laveaʻiina mai tulaga lamatia po o le avatu o le malosi ina ia lavātia ma onosaia ai faafitauli. (Salamo 34:17; Tanielu 6:22; 1 Korinito 10:13) I lou iloiloina o le Tusi Paia, o e manatuaina ni mea na tutupu na faaolaina ai e le Atua nisi?

Aiseā e lē faaaogāina ai le Watch Tower Publications Index * (Tusi Faasino Mataupu), e suʻesuʻe ai nisi o tala moni o mea na tutupu, e pei o le Lolo i aso o Noa, le laveaʻiina o Lota ma ona afafine mai Sotoma ma Komoro, le tuua e Isaraelu o Aikupito ma le savaliga i le sami Ulaula, aemaise foʻi le faufauga a Hamanu e fasiotia tagata Iutaia? O le faitau ma mafaufau loloto i nei tala, o le a faamalosia ai lou faatuatua, o Ieova o le Atua o le olataga. Ma o le a fesoasoani foʻi iā te oe ina ia fesagaʻia ma le lē mataʻu tofotofoga o lou faatuatua.

Faaaʻoaʻoga i Aso Nei

Pe e mafai ona e manatunatu i ni faaaʻoaʻoga o ē na tutumau i aso nei, i lou lava vaipanoa? Atonu o se tasi na faafalepuipuiina ona o lona faamaoni i le Atua. Atonu e te iloaina se Kerisiano ua loa le soifua, ae o loo auauna pea iā Ieova e ui ina lē lelei le soifua mālōlōina. Pe  manatu foʻi i talavou o loo tumau ona vavae ese mai le lalolagi e ui ina matuā malolosi omiga mai aumea i le aʻoga. O loo iai foʻi mātua nofo toʻatasi, o loo tausia aʻe fanau e aunoa ma se paaga, po o i latou e nofofua o loo auauna iā Ieova e ui ina iai faalogona o le tuua toʻatasi. O le ā e te aʻoaʻoina mai nei tagata? O le manatunatu i lo latou faamaoni, o le a fesoasoani lea iā te oe ina ia tumau ma le lē mataʻu a o onosaia so o se faigatā e tulaʻi mai.

E manaʻomia le loto tele ina ia fesagaʻia ai teteega ma sauāga, pe afai foʻi ua amata ona tatou masalosalo i le alofa o Ieova. E manaʻomia ona ati aʻe le uiga mautinoa i le aogā o le togiola a Keriso iā i tatou taʻitoʻatasi. (Kalatia 2:20) O le a mafai ai ona tatou faalatalata atu iā Ieova e aunoa ma le mataʻu lē tatau, po o le fefe. Pe afai e tatou te lagona le lē talafeagai o le alofa o Ieova iā i tatou, e aogā ona tatou manatunatu loloto i upu a Iesu i ona soo: “E lē faataulia ea ni manu iti se lua i le asari? E leai foʻi so laʻua e paʻū i le eleele e aunoa ma lo outou Tamā. A o outou lauulu lava ua faitaulia uma ia. O lea aua tou te matataʻu ai; e sili outou i manu iti e tele.”—Mataio 10:29-31.

E masani ona lomia i mekasini o le Olomatamata ma le Ala Mai! ni tala i mea na tutupu i Molimau a Ieova i aso nei, o ē na onosaia ma le lē mataʻu ni luʻi. Ae e lē faapea na leʻi faanoanoa ai e faatatau i lo latou tulaga. Peitaʻi, latou te leʻi faatagaina nei faalogona e taofia ai le auauna iā Ieova. O le a fesoasoani a latou tala iā te oe ina ia e onosai ai ma le lē mataʻu. Seʻi manatu i ni faaaʻoaʻoga se lua.

Se Faalavelave na Suia ai Lona Olaga

I le Ala Mai! faa-Peretania o Aperila 22, 2003 na iai se mataupu, pe a faa-Samoa e faapea, “Le Auala na Suia ai e se Faalavelave Loʻu Olaga.” Na faamatalaina ai e Stanley Ombeva, o se tasi o Molimau a Ieova i Kenya, le tele o faigatā na ia fesagaʻia ina ua lavea i se taavale saosaoa. A o faasolo ina faalētonu lona soifua mālōlōina, na oo ina mālōlō mai lana galuega ma lē mauaina ai foʻi isi ana alagātupe uma. Na faapea mai le uso o Ombeva: “A o faasolo ina ou malamalama atoatoa i le tugā o le tulaga o loʻu maʻi, na amata ai ona ou lē fiafia, manatu tau o aʻu lava, ma māitaitagofie.” E ui i lenei tulaga, sa tumau pea ma le loto tele lenei tane Kerisiano. Na te leʻi faatagaina faalogona lē fiafia e lofitūina ai o ia ma oo ai ina fiu. Na i lo lea, sa ia faalagolago atu iā Ieova. Na faapea mai le uso o Ombeva: “Na fesoasoani mai Ieova iā te aʻu i taimi uma, i mea uma na oo iā te aʻu, ma i nisi taimi sa ou lagona ai le māsiasi. Na ou faia ai se faaiʻuga ina ia faitau ma manatunatu loloto i mau o le Tusi Paia ou te iloa e fesoasoani i loʻu tulaga.”

O nei upu faamaoni a le uso o Ombeva na fesoasoani i le tele o isi e onosaia ai tofotofoga ma le loto tele. Na tusi se tasi o tuafafine Kerisiano: “Na ou tagi ina ua ou faitauina lenei tala, sa ou lagona le fesoasoani ma le alofa mai o Ieova iā te aʻu.” Na faapea mai se isi Molimau: “O tala faapea, e maua ai se faamāfanafanaga tele mo i matou o loo fesagaʻia tulaga faapena ma o loo mafatia lē leoa foʻi.”

Faafetaiaʻia o Faalogona Mafatia

O se isi tala faamomoi loto, o le mea na tupu iā Herbert Jennings i le mataupu, “E Lē Iloa e Outou se Mea e Tupu a Taeao.” * Na maua le uso o Jennings i le maʻi faalemafaufau lea e  taʻua o le bipolar disorder. A manatunatu i aso na faatoʻā amata ai lona maʻi, na ia faapea mai: “O se tauiviga matuā faigatā le tau lava ina auai i sauniga faa-Kerisiano. Ae peitaʻi, sa ou matuā talitonu atoatoa i le tāua o le aufaatasiga faaleagaga. Ina ia faafetaiaʻia lea tulaga, sa masani lava ona ou alu i le Maota o loo fai ai sauniga pe a uma ona nofoi le aofia, ma ou te alu ese foʻi pe a uma le polokalame a o leʻi amata ona taape tagata.”

O le auai i le faiva i le fanua na aumaia ai se isi luʻi tele. Ua faapea mai le uso o Jennings: “I nisi taimi, e tusa lava po ua ou taunuu i se fale, ae sa leai se loto tele iā te aʻu e faatatagi ai le logo o le faitotoʻa. Ae peitaʻi, ou te leʻi faavaivai ai lava, auā ua ou iloa o la tatou faiva o le faaolataga lea mo i tatou lava faapea ma le toʻatele o nisi e tali lelei mai. (1 Timoteo 4:16) Ina ua mavae sina taimi, sa mafai ai ona ou pulea oʻu faalogona, ma alu atu ai i le isi fale e sosoo ai, ma toe taumafai ai foʻi. O le auai pea i le faiva, sa mafai ai ona ou maua pea se malosi talafeagai faaleagaga, ma na faateleina ai e lenā mea loʻu tomai e feagai ai ma le maʻi.”

Na fesoasoani faamatalaga a le uso o Jennings i le tele o tagata faitau, ina ia fesagaʻia tulaga faigatā e aunoa ma le mataʻu. O se faaaʻoaʻoga, na tusi mai se tuafafine Kerisiano e faapea: “I le 28 tausaga talu ona ou faitauina lomiga o le Olomatamata ma le Ala Mai!, e leʻi faapea muamua ona matuā faagaeetia aʻu ina ua ou faitauina lenei tala. Ona sa tatau ona tuua laʻu auaunaga faataimi atoa, o lea sa leaga ai lava oʻu faalogona, ma ou faapea ifo ai, ana telē loʻu faatuatua semanū o faaauau pea laʻu auaunaga. Ae o le faitauina o le tala i le uso o Jennings, lea na ia tuua foʻi lana auaunaga na tofia ai ina ia tausi lelei lona maʻi, sa fesoasoani iā te aʻu ina ia iai se vaaiga paleni i loʻu tulaga. O le mea moni, o le tali lea i aʻu tatalo!”

Na faapea mai foʻi se uso Kerisiano: “Ina ua mavae le sefulu tausaga o oʻu auauna o se toeaina i la matou faapotopotoga, sa manaʻomia ai ona tuua oʻu faaeaga ona o se maʻi faalemafaufau. Sa malolosi tele oʻu faalogona o le lē taulau, lea sa ou lē fia faitauina ai ni tala i talaaga o soifuaga o auauna a Ieova, lea e masani ona faamatalaina ai mea na latou faataunuuina i se auala e tulaga ese lava i la latou auaunaga. Sa avea le tumau o le uso o Jennings o se tala faagaee loto iā te aʻu. Ua faafia ona ou faitau ma saga faitau i lenei tala.”

Agaʻi i Luma ma le Mautinoa

I le pei o uso o Ombeva ma Jennings, e toʻatele Molimau a Ieova o loo faaauau pea ona tapuaʻi iā Ieova e ui i tulaga faigatā. Afai o e faia faapea, e faamālō atu iā te oe. Ia e mautinoa: “E lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa, auā na outou auauna i le ʻau paia, i le o loo outou auauna i ai.”—Eperu 6:10.

E pei lava ona fesoasoani Ieova i ana auauna faamaoni i aso anamua e manumalo mai o latou fili, e faapena foʻi ona Ia fesoasoani iā te oe ia manumalo mai so o se faigatā e te fesagaʻia. O lea la, ia ave i fale upu na fetalai ai Ieova e ala mai iā Isaia: “Aua e te fefe, auā ou te iā te oe; aua le fetepatepaʻi, auā o aʻu o lou Atua; ou te faamalosia oe; e moni, ou te fesoasoani iā te oe; e moni, ou te taofia oe i loʻu lima taumatau e i ai le amiotonu.” —Isaia 41:10.

[Faamatalaga pito i lalo]

[Ata i le itulau 16]

E toʻatele o loo auauna iā Ieova e aunoa ma le mataʻu e pei o Stanley Ombeva (i luga) ma Herbert Jennings (itu taumatau)

[Faamatalaga i Ata i le itulau 14]

Ata a le USAF