E Aʻoaʻoina e Ieova Leoleo Mamoe mo Lana Lafu

“O Ieova na te foaʻi mai le poto; mai lona fofoga le poto ma le faautauta.”—FAATAOTO 2:6.

1, 2. Aiseā e aapa atu ai tane papatiso mo le tele o isi tiute tauave i le faapotopotoga?

“OKA soʻu fiafia ina ua tofia aʻu e avea ma toeaina,” o le tala lea a Niko, ua fitu tausaga talu ona avea ma toeaina. “Sa ou manatu i le faaeaga, o loʻu avanoa lea e faateleina ai laʻu auaunaga iā Ieova. Sa ou matuā faafetaia Ieova mo mea uma ua ia faia mo aʻu. Na ou manaʻo foʻi ia ou faia le mea sili e fesoasoani ai i tagata o le faapotopotoga, e pei lava ona sa fesoasoani mai isi toeaina iā te aʻu.” Ae pagā lea, e ui i lona olioli ae sa iai foʻi ma ona atugaluga. Fai mai a ia: “E maua loʻu tofiga e leʻi atoa le 30 o oʻu tausaga. O le pogai lenā o loʻu atugalu, ona sa leʻi iā te aʻu tomai e pei o le faautauta ma le poto, lea e manaʻomia ina ia tausia lelei ai le faapotopotoga.”

² E tele māfuaaga e fiafia ai ē ua tofia e Ieova e tausia lana lafu mamoe. Na faamanatu e Paulo i toeaina i Efeso se tasi o māfuaaga, ina ua ia toe sii fetalaiga a Iesu ma faapea atu: “E sili le manuia [fiafia] o lē na te foaʻi atu, i lo lē na te talia mai.” (Galuega 20:35) O le galue o se auauna o le faiva po o se toeaina, ua maua ai e tane papatiso nisi avanoa e foaʻi atu ai iā Ieova ma le faapotopotoga. Mo se faaaʻoaʻoga, e galulue soosoo tauʻau auauna o le faiva ma toeaina. E faatino foʻi e auauna o le faiva le anoanoaʻi o isi tofiga talafeagai e ono tele se taimi e alu ai. Ua faia e na uso se auaunaga tāua, ona o lo latou alofa i le Atua ma o latou tuaoi.—Mareko 12:30, 31.

3. Aiseā e ono faatalatū ai nisi e aapa atu mo faaeaga i le faapotopotoga?

³ Ae faapefea se tane Kerisiano o loo faatalatū e aapa atu i le faaeaga o se auauna o le faiva seʻia oo ina avea ma toeaina, ona i lona manatu e lē talafeagai o ia? Atonu e tutusa o la atugaluga ma Niko faapea, e lē o iā te ia tomai e manaʻomia mo se leoleo mamoe lelei. Po o oe o se uso papatiso o iai na lagona? E lē o sesē na atugaluga, auā e faamasinoina e Ieova leoleo mamoe po o toeaina, i le auala latou te tausi ai le lafu mamoe. Na fetalai Iesu: “O lē ua foaʻiina atu i ai o mea e tele, e suʻeina atu foʻi iā te ia o mea e tele; o ia foʻi ua tuuina atu i ai o mea e tele, latou te fai atu iā te ia e au mai mea e sili ona tele.”—Luka 12:48.

4. E faapefea ona fesoasoani Ieova iā i latou ua ia tofia e tausia ana mamoe?

⁴ Po o le finagalo ea o Ieova mo ē ua ia tofia e fai ma auauna ma toeaina, ina ia tauave lava na o i latou la latou avega? Leai; na te saunia fesoasoani aogā ina ia lē gata e mafai ai ona latou gafatia, ae ia taulau manuia ai foʻi. Sa talanoaina i le mataupu na faatoʻā mavae atu, e foaʻi e Ieova iā i latou lona agaga paia, lea e fuaina maia le fua e mafai ai ona latou tausi faapelepele i mamoe. (Galuega 20:28; Kalatia 5:22, 23) E lē gata i lea, e foaʻi mai e Ieova iā i latou le poto, le malamalama, ma le faautauta. (Faataoto 2:6) E faapefea ona ia faia? Seʻi tatou talanoaina ni auala se tolu o loo aʻoaʻo pe toleni ai e Ieova uso taʻitoʻatasi ua ia tofia e tausia ana mamoe.

Aʻoaʻoina e Leoleo Mamoe ua Agavaa

5. Aiseā na lelei ai ma uigā le faatinoga e Peteru ma Ioane o o la faaeaga o ni leoleo mamoe?

⁵ Ina ua tulaʻi Peteru ma Ioane i luma o le ʻau Saniterini po o le fono, sa manatu faamasino atamamai o lenā faamasinoga iā i laʻua, o  ni tagata ‘e leʻi aʻoaʻoina ma le valelea.’ E lē faapea sa leʻi iloa faitau ma tusitusi, peitaʻi, e la te leʻi auai i le suʻesuʻeina o le Tusi Paia i aʻoga faarapi. E ui i na tulaga, ae sa faamaonia le lelei ma le uigā o le aʻoaʻo atu a Peteru ma Ioane faapea foʻi ma isi soo. O le iʻuga, e toʻatele tagata na faalogologo ane ma oo ina ia avea ma tagata talitonu. Na faapefea i nei tane sa leʻi amanaʻia muamua, ona oo ina matuā mataʻina lo latou tomai e aʻoaʻo atu ai? Ina ua māeʻa ona faalogologo atu le faamasinoga iā Peteru ma Ioane, ona latou ‘iloa ai lea sa faatasi i laʻua ma Iesu.’ (Galuega 4:1-4, 13) E mautinoa lava, sa maua e i laʻua le agaga paia. (Galuega 1:8) Ae oo foʻi i faamasino o ē sa leʻi malamalama i mataupu faaleagaga, na matuā manino atu iā i latou, o Iesu lea sa aʻoaʻoina na tane. A o faatasi Iesu ma ona aposetolo i le lalolagi, sa ia aʻoaʻoina i latou i le auala e aoao mai ai ē pei ni mamoe, ma le auala e leoleoina ai i latou pe a oo ina avea ma vaega o le lafu mamoe.—Mataio 11:29; 20:24-28; 1 Peteru 5:4.

6. O le ā le faaaʻoaʻoga i le aʻoaʻoina o isi, na faataatia e Iesu ma Paulo?

⁶ Ina ua toe tū mai Iesu, sa faaauau ona ia aʻoaʻoina i latou ua avea ma leoleo mamoe. (Faaaliga 1:1; 2:1–3:22) Mo se faaaʻoaʻoga, o ia lava na filifilia Paulo ma faatulaga le auala sa toleniina ai. (Galuega 22:6-10) Na faatāua e Paulo le toleniga na ia maua, ma tufa atu i isi toeaina mea sa ia aʻoaʻoina. (Galuega 20:17-35) Mo se faataʻitaʻiga, e tele se taimi ma ni taumafaiga na faaaogā e Paulo e toleni ai Timoteo ina ia avea o sē “faigaluega” lelei i le auaunaga i le Atua, “e leai se mea e mā ai.” (2 Timoteo 2:15) Sa amata ai i inā se faiā māfana a nei tane e toʻalua. Muamua atu, na tusi ai Paulo e faatatau iā Timoteo: “Na ia auauna faatasi ma aʻu i le tala lelei, e pei o se atalii i lona tamā.” (Filipi 2:22) Sa leʻi taumafai Paulo e saʻili iā Timoteo po o se isi lava tagata, ina ia fai mona soo. Na i lo lea, sa ia faalaeiauina ona uso talitonu e ‘faaaʻoaʻo atu iā te ia, e pei foʻi o ia ona faaaʻoaʻo iā Keriso.’—1 Korinito 11:1.

7, 8. (a) O le ā se mea na tupu e faaalia ai iʻuga lelei e maua, pe a faaaʻoaʻo toeaina iā Iesu ma Paulo? (e) O afea e tatau ai i toeaina ona amata toleni ni uso o atagia mai le ono avea o ni auauna ma toeaina?

⁷ Ua faaaʻoaʻo atu toeaina iā Iesu ma Paulo, i lo latou taulamua e toleni uso papatiso ma maua ai iʻuga lelei faapena. O le mea lenei na oo iā Kato. Sa ola aʻe i se aiga e eseese tapuaʻiga, ae talu ai nei na tofia ai o ia e avea ma toeaina. Fai mai a ia: “A o faagasolo tausaga, sa fesoasoani mai toeaina iā te aʻu ina ia ou agaʻigaʻi i luma faaleagaga. Talu ai e lē upu moni loʻu tamā, sa naunau patino mai ai lava na toeaina iā te aʻu ma sa pei o ni oʻu tamā faaleagaga. E tele se taimi na latou toleni ai aʻu i le faiva ma mulimuli ane, e iai se tasi uso na ia toleniina faapitoa aʻu i le auala e faatino ai oʻu tofiga i le faapotopotoga.”

⁸ E pei ona faaalia i le tulaga o Kato, o toeaina e iai le faautautaga mamao, e vave ona latou toleniina ni uso o atagia mai le ono avea o ni auauna o le faiva ma toeaina, a o leʻi taitai agavaa lelei na uso mo nei faaeaga. Aiseā? O le poloaʻiga a le Tusi Paia, e tatau i auauna o le faiva ma toeaina, ona iā i latou se tulaga sili ona lelei tau amio ma le faaleagaga, a o leʻi tofia e auauna i na vala o le auaunaga. E tatau ona ‘muamua tofotofoina i latou pe agavaa.’—1 Timoteo 3:1-10, NW.

9. O le ā le tiute tauave a toeaina ua lava lo latou tomai, ma aiseā?

⁹ Afai e tatau ona tofotofoina uso papatiso, e talafeagai la le muaʻi toleni o i latou. Seʻi faataʻitaʻi: Afai e faatonuina se tamaitiiti aʻoga e suʻe i se suʻega faigatā, ae leʻi muaʻi aʻoaʻo patino ai o ia e lona faiaʻoga i lea mataupu, faamata e pasi le suʻega a le tamaitiiti? Atonu o le a lē pasi. Lona uiga la, e manaʻomia ni aʻoaʻoga po o toleniga. Peitaʻi, o faiaʻoga mataala latou te toleni tamaiti aʻoga ina ia lē gata e pasi le suʻega, ae faaaogā lelei le poto ua latou maua. E faapena foʻi i toeaina filigā ona fesoasoani i uso papatiso e ati aʻe uiga manaʻomia mo se tane e tofia i se faaeaga, e ala i le avatu iā i latou o ni toleniga patino. Latou te faia  faapea, e lē tau ina ia mafai ai ona tofia nei uso i faaeaga, ae ina ia mafai foʻi ona latou tausia lelei le lafu mamoe. (2 Timoteo 2:2) O le mea moni, e tatau i uso papatiso ona taumafai ma galulue malosi ia ausia nei agavaa e manaʻomia mo se auauna o le faiva po o se toeaina. (Tito 1:5-9) Peitaʻi ane, e mafai e toeaina ua lava le tomai, ona fesoasoani i nei uso ina ia vave lo latou agaʻigaʻi i luma, e ala i le lotomalie e toleniina na uso o loo aapa atu mo tiute tauave i totonu o le faapotopotoga.

10, 11. E faapefea i leoleo mamoe ona toleni isi mo isi faaeaga?

¹⁰ E faapefea tonu lava ona toleni e toeaina agavaa isi uso ina ia tauave ni faaeaga i le faapotopotoga? Muamua, e tatau ona naunau moni i uso o le faapotopotoga—ia galulue soo ma i latou i le faiva i le fanua, ma fesoasoani e faalelei lo latou tomai e ‘talaʻitonu ai le upu moni.’ (2 Timoteo 2:15) E talanoa faatasi toeaina taʻumatuaina ma na uso, i le olioli e maua mai le auauna atu i isi, ma le lotomalie ua latou tofo foʻi i ai ona o le faatulaga ma ausiaina sini faaleagaga. Latou te fautuaina foʻi ma le agalelei se uso i le auala e faaleleia atili ai le avea o ia o se “faaaʻoaʻo i le lafu mamoe.”—1 Peteru 5:3, 5.

¹¹ Tusa lava po ua tofia se uso e avea ma auauna o le faiva, e faaauau pea e toeaina mataala ona toleni lenā uso. O Pulusi o lē ua tele tausaga o avea ma toeaina, ua faapea mai: “Ou te fiafia tele ma te nonofo i lalo ma se uso ua faatoʻā tofia e avea ma auauna, ma toe autalu faatonuga ua lomia mai e le auauna faamaoni ma le mafaufau. Ma te faitauina foʻi so o se taʻiala e faatatau i lona tofiga, ona ou faatulaga lea ina ia ma galulue faatasi pea seʻia oo ina masani lelei o ia i ona tiute.” A o faasolo ina maua le poto masani o se auauna, e mafai foʻi ona toleni o ia i le faia o asiasiga faaleoleo mamoe. Ua fai mai atili Pulusi: “Pe a ma ō faatasi ma se auauna o le faiva i se asiasiga faaleoleo mamoe, ou te fesoasoani iā te ia i le filifilia o ni mau patino o le a mafai ona faalaeiau ma faamalosia ai se tagata po o se aiga o le a ma asiasia. E aogā tele le iloa ona faaaogā mau o le Tusi Paia i se auala e pāʻia ai loto o isi, pe afai e manaʻo se auauna ia avea o se leoleo mamoe lelei ma taulau manuia i lona faaeaga.”—Eperu 4:12; 5:14.

12. E faapefea i leoleo mamoe ua lava le tomai ona toleniina toeaina fou?

¹² E telē foʻi se aogā o toleniga faaopoopo i toeaina fou. Fai mai Niko lea na muaʻi taʻua: “Sa telē le aogā iā te aʻu o toleniga na ou maua mai i ni ovasia matutua se toʻalua. Sa malamalama lelei nei uso i le auala e taulimaina ai nisi mataupu. E onosai a o faalogologo mai iā te aʻu, ma sa mafaufau mamafa foʻi i oʻu manatu, e tusa lava pe la te leʻi ioeina. E tele ni mea na ou aʻoaʻoina a o oʻu mātauina le auala lotomaulalo ma le faaaloalo sa la feutagaʻi ai ma uso ma tuafāfine i le faapotopotoga. Na faatāua e nei toeaina le manaʻoga ia faaaogā ma le tomai le Tusi Paia, pe a taulima ni faafitauli po o le avatuina foʻi o ni faalaeiauga.”

Aʻoaʻoina e le Afioga a le Atua

13. (a) O le ā e manaʻomia e se uso ina ia avea ai o se leoleo mamoe lelei? (e) Aiseā na fetalai ai Iesu: “O laʻu mataupu, e lē o saʻu lava”?

¹³ O loo iai i le Tusi Paia tulafono, o mataupu silisili, ma faaaʻoaʻoga, e manaʻomia e se toeaina ina ia matuā “atoatoa ona lelei ai . . . ia saunia lava ia i galuega lelei uma lava.” (2 Timoteo 3:16, 17) Atonu e lelei ni aʻoaʻoga faaleolaga nei a se uso, peitaʻi o le avea o ia o se leoleo mamoe lelei, e fua i lona malamalama i le Tusi Paia ma le auala na te faatatauina  ai. Manatu i le faaaʻoaʻoga a Iesu. E leai se leoleo mamoe faaleagaga e mafai ona faatusatusa atu iā Iesu i le poto, le faautauta, ma le atamai; ae peitaʻi, e leʻi faalagolago Iesu i sona lava atamai a o ia aʻoaʻoina mamoe a Ieova. Na ia fetalai: “O laʻu mataupu, e lē o saʻu lava, a o lana na auina mai aʻu.” Aiseā na ave ai e Iesu le viiga i lona Tamā faalelagi? Fai mai a ia: “O lē tautala fua iā te ia, ua saʻili e ia lona lava viiga.”—Ioane 7:16, 18.

14. E faapefea ona ʻalofia e toeaina le saʻilia o so latou lava viiga?

¹⁴ E ʻalofia e toeaina le saʻilia o so latou lava viiga. O a latou fautuaga ma faalaeiauga, e lē faavae mai i so latou lava atamai, ae mai le Afioga a le Atua. E latou te malamalama, ua tofia i latou e fesoasoani i uso ina ia maua “le finagalo o Keriso,” ae lē o manatu o toeaina. (1 Korinito 2:14-16) Seʻi faapea o loo fesoasoani se toeaina i se ulugalii e foʻia ni faafitauli i le la faaipoipoga. O le ā e ono tupu pe a faavae fautuaga a le toeaina i ona lava tomai, na i lo mataupu silisili a le Tusi Paia, ma faamatalaga mai “le auauna faamaoni ma le mafaufau”? (Mataio 24:45) Atonu o le a tele ina aafia ana fautuaga mai aganuu o ola ai, ma itiiti ni manatu e mafai ona ia fai atu ona o le tapulaa o lona iloa. O le mea moni, e lē o aganuu uma e leaga, ma atonu foʻi ua lava se silafia o le toeaina i le olaga. Peitaʻi e sili atu ona maua e mamoe aogā, pe a faasino i latou e faalogo i le siʻufofoga o Iesu ma fetalaiga a Ieova, na i lo le faalogo i manatu o tagata po o tulafono a aganuu o loo ola ai.—Salamo 12:6; Faataoto 3:5, 6.

Aʻoaʻoina e “le Auauna Faamaoni ma le Mafaufau”

15. O le ā le tofiga na tuuina atu e Iesu i “le auauna faamaoni ma le mafaufau,” ma o le ā se tasi o māfuaaga ua taulau manuia ai le vasega a le auauna?

¹⁵ O leoleo mamoe e pei o Peteru, Ioane, ma Paulo, sa aofia uma i se vaega na taʻua e Iesu, o “le auauna faamaoni ma le mafaufau.” O lenei vasega ua faia aʻe i uso faauuagagaina o Keriso o iai i le lalolagi, o ē faamoemoe e pule faatasi ma ia i le lagi. (Faaaliga 5:9, 10) A o faagasolo aso e gata ai o lenei faiga o mea, e mautinoa ua faaitiitia le aofaʻi o nei uso o Keriso o loo totoe i le lalolagi. Peitaʻi, o le galuega na poloaʻiina i latou e Iesu ia faataunuu—le talaʻia o le tala lelei o le Malo a o leʻi oo mai le iʻuga—ua matuā lautele lava lona salalau atu i le lalolagi aoao. Ma ua matuā taulau manuia ai lava le vasega a le auauna i lenei tulaga. Aiseā? O se tasi o māfuaaga, auā ua latou aʻoaʻoina pe toleniina sui o “isi mamoe” e fesoasoani iā i latou i le galuega talaʻi ma le aʻoaʻo atu. (Ioane 10:16; Mataio 24:14; 25:40) I aso nei, ua faataunuuina ai e lenei vasega faamaoni o isi mamoe, le vaega tele o lea galuega.

16. E faapefea ona toleniina e le vasega a le auauna tane ua latou tofia?

 ¹⁶ O faapefea ona saunia e le vasega a le auauna lenei toleniga? I le uluaʻi senituri, sa tofia ni sui o le vasega a le auauna, e toleni ma tofia ovasia i faapotopotoga, ona toleni foʻi lea e na ovasia, mamoe po o tagata o le faapotopotoga. (1 Korinito 4:17) Ua faapena foʻi aso nei. O le Vaega Pule—le vaega toʻaitiiti o toeaina faauuina o loo fai ma sui o le vasega a le auauna—e tofiaina ni o latou sui, ina ia toleni ma tofia auauna ma toeaina i le anoanoaʻi o faapotopotoga o i le lalolagi aoao. E lē gata i lea, o loo faatulaga e le Vaega Pule aʻoga e toleni ai sui o le Komiti o Lālā, o ovasia femalagaaʻi, o toeaina, ma auauna o le faiva, i le auala e sili ona lelei e tausia ai mamoe. O isi taʻiala e faaauala mai i tusi, o mataupu o Le Olomatamata, faapea isi lomiga e pei o le tusi, Ua Faamaopoopo Ina ia Faia le Finagalo o Ieova. *

17. (a) Ua faaalia faapefea e Iesu lona faatuatuaina o le vasega a le auauna? (e) E faaalia faapefea e leoleo mamoe faaleagaga, lo latou faatuatuaina o le vasega a le auauna?

¹⁷ Sa faatuatuaina tele e Iesu le vasega a le auauna, lea foʻi na ia tofia ai e pule i “ana mea uma,” po o ona manaʻoga uma faaleagaga o iai i le lalolagi. (Mataio 24:47) E faapena foʻi ona faatuatuaina e leoleo mamoe le vasega a le auauna, e ala i le faatatauina o taʻiala ua maua mai le Vaega Pule a lea auauna. Ioe, pe a toleni e leoleo mamoe isi, pe a latou loto malilie e toleni i latou e le Afioga a le Atua, faapea foʻi ma lo latou faatatauina o le toleniga ua saunia e le vasega o le auauna, ona latou faatupuina ai lea o le autasi i totonu o le faapotopotoga. Maʻeu lo tatou faafetaia o Ieova, ona o lona aʻoaʻoina o nei tane, o ē matuā manatu mamafa i sui taʻitoʻatasi o le faapotopotoga Kerisiano!

[Faamatalaga pito i lalo]

E Faapefea Ona E Tali?

• E faapefea i leoleo mamoe taʻumatuaina faaleagaga ona aʻoaʻo isi?

• Aiseā e lē faaaogā ai e leoleo mamoe o latou lava manatu, e faavae ai mea latou te aʻoaʻo atu?

• E faapefea ma aiseā e faatuatuaina ai e leoleo mamoe le vasega a le auauna?

[Fesili mo le Suʻesuʻega]

[Ata i le itulau 24, 25]

E aʻoaʻoina e toeaina Kerisiano tane talavou o i le faapotopotoga

[Ata i le itulau 26]

E anoanoaʻi toleniga ua saunia e “le auauna faamaoni ma le mafaufau” mo toeaina