Pāʻia le Loto o se Tamaitiiti

PE NA e faanoanoa ea i le vaai atu i se tamaitiiti o taalo i taaloga, pe faaaogā ni meataalo e atagia ai tulaga fetauaʻi? Ua taatele nei vaaiga e oo lava i tamaiti laiti, auā ua oo atu faiga sauā i le lalolagi o faafiafiaga. E faapefea ona e fesoasoani i se tamaitiiti e tataʻi ese lona mafaufau mai taaloga fetauaʻi, ae uaʻi atu i taaloga e aogā iā te ia? Na maua e Waltraud o se tasi ua loa tausaga o avea ma misionare o Molimau a Ieova, se auala e fesoasoani ai i se tamaitiiti e faia faapea.

Ona o faigātaua, na tuua ai e Waltraud le atunuu na ola ai ma siitia atu i se isi atunuu i Aferika. O inā sa ia suʻesuʻe ai le Tusi Paia ma le tinā o se tamaitiiti e lima tausaga. O taimi uma e asia ai le tinā, o loo taalo lava le tamaitiiti i se tamaʻi fana, ma e na o le pau lea o lana meataalo. E leʻi vaai Waltraud o taʻi e le tamaitiiti le fana i se mea, ae e pisi lava e tatala ma tapuni e pei o loo ia utu i ai ni pulufana.

Na fesili Waltraud i le tamaitiiti: “Werner, e te iloa le māfuaaga ua ou nofo ai i lou atunuu? Ona o faigātaua, sa tatau ona ou sola ese ai mai tamāloloa leaga o loʻu atunuu ia sa tafanaina tagata i a latou fana, e tai pei o lau fana. E te iloa o se mea lelei le tafanaina o tagata?”

“Leai,” o le tali faanoanoa lea a Werner.

“E saʻo lelei oe,” o le tala lea a Waltraud. Ona ia fesili lea: “E te iloa le māfuaaga ou te asiasi mai ai i a oulua ma lou tinā i vaiaso taʻitasi? Ona e fia fesoasoani Molimau a Ieova i isi ia tausia le filemu, ia iai sa latou faiā lelei ma le Atua ma tuaoi.” Ina ua maua e Waltraud se faatagaga a le tinā, ona ia fai atu lea iā te ia: “O le a ou tiaʻia lau fana pe a e tuu maia iā te aʻu, ma ou te folafola atu o le a ou aumaia sau loli meataalo e fā ona paʻu.”

Na ave i ai e Werner lana fana meataalo. Sa ia faatali mo vaiaso e fā, ae ina ua maua lana meataalo fou, o se loli laupapa lea sa ia talia ma le fiafia.

Pe e iai se taimi e te talanoa ai i lau fanau, ma taumafai e pāʻia o latou loto, ina ia uunaʻia e tiaʻi meataalo ia e pei o ni auupega e fetauaʻi ai? Afai o e faia faapea, ua e aʻoaʻo atu la iā i latou se lesona lea o le a aogā mo le olaga atoa.