Fesili Mai le ʻAufaitau

O le ā o loo faapogaia “mea ua manaʻomia e nuu uma,” e ō mai i le “fale” o le tapua’iga moni?—Hakai 2:7.

Na valoia e Ieova e ala mai i le perofeta o Hakai: “Ou te lūlūina fo’i nuu uma, ona ō mai ai lea o mea ua mana’omia e nuu uma; ou te faatumuina foʻi lenei fale i le pupula.” (Hakai 2:7) Po o le lūlūina ea o “nuu uma,” ua faapogaia ai ona talia e “mea ua mana’omia” mai nuu uma—tagata loto faamaoni—le tapua’iga moni? O le tali e leai.

Seʻi manatu i le māfuaaga ua lūlūina ai nuu uma, ma le iʻuga e oo i ai. Ua faapea mai le Tusi Paia ‘ua faanunununu nuu ese, ma mafaufau nuu i le mea e lē aogā.’ (Salamo 2:1) O le “mea lē aogā” o loo latou “mafaufau” pe manatu mamafa i ai, o le faasilisiliina o i latou lava. E leai se isi mea e sili atu ona lūlūina ai nuu, na i lo le faamataʻuina o la latou pulega.

O le faalauiloaina o le Malo o le Atua ua faavaeina o loo faia nei e Molimau a Ieova i le lalolagi atoa, ua matuā faamataʻuina ai lava nuu ese. O le mea moni, o le Malo o le Atua lea e pulea e Iesu o le a “tuʻimomomoina ma faaumatia ia malo uma lava.” (Tanielu 2:44) O le feʻau faafaamasinoga o loo tatou talaʻia ua faapea ona lūlūina ai nuu ese. (Isaia 61:2) Ma e faasolo ina faateteleina le lūlūina a o faatupulaʻia ma faamalosia le galuega talaʻi. O le ā la o loo faaataina mai e le lūlūina lea o loo valoia i le Hakai 2:7?

E faitauina faapenei le Hakai 2:6: “Auā o loo faapea ona fetalai mai o Ieova o ʻau, E toe tasi, e toe itiiti lava, ona ou lūlūina ai lea o le lagi, ma le lalolagi, ma le sami, atoa ma le eleele mātūtū.” Na sii mai e le aposetolo o Paulo le mau lenei ina ua ia tusi: “Ua folafola mai nei e ia, ua faapea mai, E toe tasi ona ou lūlūina, e lē na o le lalolagi, a e atoa foʻi ma le lagi. O lenei upu foʻi, ‘E toe tasi,’ ua faailoa mai ai le aveesega o ia mea e mafai ona lūlūina, e pei o mea ua faia, ina ia tutumau o mea [le Malo] e lē mafai ona lūlūina.” (Eperu 12:26, 27) Ioe, o le a lūlūina ese atu pe faatamaʻia le faiga atoa o mea o loo iai a le lalolagi ina ia iai se avanoa mo le lalolagi fou a le Atua.

O loo tosina tagata loto faamaoni i le tapua’iga moni, ae lē māfua ona ua lūlūina nuu uma. O le gaoioiga o loo tosina ai i latou e tapuaʻi iā Ieova o le gaoioiga lava lea o loo faapogaia ai le lūlūina o nuu uma, o le talaʻia lea i le lalolagi aoao o le Malo o le Atua ua faavaeina nei. O le folafolaina o le ‘tala lelei e faavavau’ ua tosina mai ai i latou ua saunia i le ola e faavavau e tapuaʻi i le Atua moni.—Faaaliga 14:6, 7.

O le feʻau o le Malo o se feʻau faafaamasinoga ma mo le faaolataga. (Isaia 61:1, 2) O lea la, o iʻuga e lua o le talaʻia o lenei feʻau i le lalolagi aoao: o le lūlūina lea o nuu uma, ma le ō mai ai o mea e manaʻomia e nuu, i le pupula o Ieova.