Le Aogā o ‘le Ipu ua Sili Ona Vaivai’

NA TUSI le aposetolo o Peteru: “Ia faapea outou tane, ia nonofo faatasi ma i latou ma le poto, ia āva i le avā, auā o le ipu ia ua sili ona vaivai.” (1 Peteru 3:7, LT) Po o taʻu faatauvaaina e lenei mau o le Tusi Paia fafine i le faatusa atu o i latou i se ‘ipu ua sili ona vaivai’? Seʻi o tatou iloiloina le uiga moni na faatatau i ai le manatu o le tusitala lea na faagaeeina e le Atua.

O le nauna Eleni lea e faaliliu mai ai le “āva” e mafai ona uiga i le “taugatā, aogā ma le faaaloalo.” O lea la, e tatau i se tane Kerisiano ona faapelepele i lana avā ma feutagaʻi ma ia i se auala talafeagai, e pei o se ipu mataʻetaʻe ma tāua. E lē o taʻu faatauvaaina la i inei avā. Mo se faataʻitaʻiga, seʻi manatu i se ituaiga mōlī teufale taugatā. (Tiffany lotus lamp) O lenei mōlī e matagofie ma e faaeteetegatā tele pe mataʻetaʻe. Pe e avea le mataʻetaʻe ma le faaeteetegatā o lenei mōlī e faaitiitia ai lona tau po o lona aogā? E leai! I le tausaga e 1997 na taulia ai le uluaʻi mōlī o le ituaiga lea, (Tiffany lotus lamp) i le $2.8 miliona. E leʻi avea le tulaga faaeteetegatā ma le mataʻetaʻe o lenei mōlī, ma mea e faaitiitia ai lona tau po o lona aogā ae sa atili ai ona tāua.

O lea la, o le āva i le avā ona o le ipu e sili ona vaivai e lē o taʻu faatauvaaina ai o ia. O le nonofo faatasi o le tane ma lana avā “i le poto,” o lona uiga na te manatua mea e malosi ai lana avā ma mea e gata mai ai lona malosi, o mea e fiafia i ai ma mea e lē fiafia i ai, o ona manatu ma ona faalogona. O se tane alofa na te amanaʻia ma le faaaloalo tulaga e eseese ai o la uiga ma lana avā. E manatu mamafa foʻi i lana avā “ina neʻi faalavelaveina [ana] tatalo.” (1 Peteru 3:7) O se tane e lē manatu mamafa i uiga maʻaleʻale o lana avā, o le a faaleagaina lana faiā ma le Atua. E manino la, e le o taʻu faatauvaaina e le Afioga a le Atua avā. Na i lo lea, o loo faamamaluina i latou.

[Faamatalaga i Ata i le itulau 32]

© Christie’s Images Limited 1997