Manatu Tāua Mai le Vaega Muamua o le Tusi o Salamo
O Loo Ola le Afioga a Ieova
Manatu Tāua Mai le Vaega Muamua o le Tusi o Salamo
O LE ā se igoa talafeagai mo se tusi o le Tusi Paia o loo iai le tele o viiviiga o Lē na Faia Mea, o Ieova le Atua? E leai se isi igoa e sili ona fetaui lelei na i lo le Salamo. O loo iai i lenei tusi aupito umi o le Tusi Paia pese matagofie ua uma ona fatu, o loo faamatalaina ai uiga matagofie o le Atua ma ana galuega mamana ma o loo taʻua ai foʻi le anoanoaʻi o valoaga. O le tele lava o pese o loo faaleo mai ai lagona o le ʻautusitala a o pagatia i mafatiaga. O faamatalaga o loo iai e aofia ai se vaitaimi pe tusa ma le afe tausaga—mai aso o le perofeta o Mose seʻia oo mai i se vaitaimi talu ona iʻu lo latou faatagataotauaina i Papelonia. O ona tusitala, o Mose, le tupu o Tavita, faapea ma isi. E iai le manatu o le faitaulaga o Esera na faatulagaina le tusi e pei ona iai nei.
I le amataga, sa vaevaeina le tusi o Salamo i vaega e lima o tuufaatasiga o pese: (1) Salamo 1-41, (2) Salamo 42-72, (3) Salamo 73-89, (4) Salamo 90-106, ma le (5) Salamo 107-150. O loo talanoaina i le mataupu lenei le vaega muamua o le Salamo. O le vaega lenei o le salamo e na o le tolu salamo e leʻi tusiaina e le tupu Isaraelu anamua o Tavita. E lē o faailoaina mai i latou na tusia le Salamo 1, 10, ma le 33.
“O LOʻU ATUA O LOʻU PAPA”
Ina ua uma ona faalauiloa mai e le salamo muamua faapea o le tagata e fiafia o le tagata e naunau i le tulafono a Ieova, o le salamo lona lua ua talanoa saʻo atu lava i le Malo. * O lenei vaega o le salamo, o loo tele i ōlega i le Atua. O le salamo 3-5, 7, 12, 13, ma le 17, mo se faataʻitaʻiga, o talosaga mo le laveaʻiina mai i fili. O le salamo 8 o loo faamatilatila ai le tulaga maoaʻe o Ieova pe a faatusatusa atu i le faatauvaa tele o le tagata.
I le faamatalaina o Ieova o ia o le Leoleo i ona tagata, na pese ai Tavita e faapea: “O loʻu Atua, o loʻu papa, ou te faatuatua iā te ia.” (Salamo 18:2) O loo viiviia Ieova o Lē na Foafoaina Mea ma o le Faitulafono i le Salamo 19, o loo taʻua o ia o le Faaola i le Salamo 20, ae o loo taʻua o ia o le Faaola o lana Tupu ua faauuina i le Salamo 21. I le salamo 23 o loo faaata ai o ia o le Leoleo Mamoe Sili, ae i le salamo 24 o loo faaata ai o ia o se Tupu mamalu.
Taliina o Fesili Faale-Tusi Paia:
2:1, 2—O ā “mea lē aogā” ua faanunununu ai nuu ese? O “mea lē aogā” o popolega faifai pea o faigāmalo a tagata ina ia faatinoina pea a latou lava pule. E lē aogā lenā mea, talu ai, ua leva lava ona mautinoa le lē taulau o a latou fuafuaga. Pe mafai ea e atunuu ona iai so latou faamoemoega moni e taulau, pe afai o lea o loo latou “tetee atu iā Ieova ma lē na ia faauuina”?
2:7—O le ā “le tulafono [a Ieova]”? O lenei tulafono o se feagaiga mo se Malo, lea na faia e Ieova ma lona Alo pele, o Iesu Keriso.—Luka 22:28, 29.
2:12—O le ā le auala e mafai ai e taʻitaʻi o nuu ona ‘sogi i le Atalii’? I taimi o le Tusi Paia, o le sogi o le faailoaga o le faauōga, faapea ma le faamaoni. O se auala e faafeiloaʻia ai malo. Ua poloaʻia tupu o le lalolagi e sogi i le Atalii—o lona uiga, ia faafeiloaʻia o ia o le Tupu ma o le Mesia.
3:ulutala—O le ā le fuafuaga o ulutala o loo iai i nisi o salamo? O le ulutala e faailoa ai i nisi taimi le tagata na tusia po o le mauaina ai foʻi o faamatalaga e faatatau i tulaga na māfua ai ona tusia le salamo, e pei o le Salamo 3. E mafai foʻi e le ulutala ona faamatalaina le fuafuaga po o le aogā o se salamo patino (Salamo 4 ma le 5) faapea ma le avatua o faatonuga tau musika (Salamo 6).
3:2—O le ā le uiga o le upu “Selā”? O le faaupuga lenei e masani ona manatu e faailoa ai le mea e mālōlō ai ina ia mafaufau lemū, e lē gata i pese e usu gutu, ae atoa ai foʻi ma le usuina faatasi ma musika. O le aogā o le mālōlōga lenei, ina ia saga faamamafa ai se lagona po o se manatu. E lē manaʻomia ona taʻu le upu Selā pe a faitau i le lautele le tusi o Salamo.
11:3—O ā faavae ua fulisia? O faavae nei o loo faalagolago atu i ai le sosaiete o tagata—tulafono, poloaʻiga, ma faamasinoga tonu. Pe afai e lē maopoopo faavae nei, ona malepe foʻi lea o le olaga masani o tagata, ma leai foʻi se faamasinoga tonu. Pe a oo mai na tulaga, e tatau i “le tagata amiotonu” ona tuu atu atoatoa lona faatuatuaga i le Atua.—Salamo 11:4-7.
21:3—O le ā le mea tāua e faatatau i “le palealii auro lelei”? E lē o taʻua mai pe o se palealii moni pe e faafaatusa, e faaata mai ai le mamalu sa faaopoopo atu iā Tavita ona o ona manumalo. Ae peitaʻi, o le fuaiupu lenei o loo faasino faavaloaga atu i le palealii o le tulaga tautupu o Iesu lea na maua mai iā Ieova i le tausaga e 1914. Ona o le palealii e faia i le auro, ua taʻu mai ai, o lana nofoaiga e silisili atu ona lelei.
22:1, 2—Aiseā na lagona ai e Tavita faapea ua tuulafoaʻi o ia e Ieova? Na oo iā Tavita teteega ogaoga mai ona fili lea na ia faapea mai ai, “o loʻu loto ua pei o le pulu, ua liu suāvai i totonu o loʻu manava.” (Salamo 22:14) Atonu na foliga mai iā Tavita ua tuulafoaʻi o ia e Ieova. Ina ua faasatauroina Iesu, sa iai foʻi ona lagona faapena. (Mataio 27:46) Na atagia mai i upu a Tavita lona tulaga masani faaletagata i le auala e tali atu ai i lona tulaga atuatuvale. O lana tatalo o loo faamauina i le Salamo 22:16-21, e manino mai ai e leʻi mou atu le faatuatua o Tavita i le Atua.
Lesona mo i Tatou:
1:1. E ao ona ʻalofia le aufaatasi ma i latou e lē alolofa iā Ieova.—1 Korinito 15:33.
1:2. E lē tatau ona aunoa se aso ma le talanoaina o ni mea faaleagaga.—Mataio 4:4.
4:4. Pe a ita pe toʻatamaʻi, e atamai le taofiofi o la tatou tautala ina ia aua neʻi fai atu se tala lea e te toe salamō mulimuli ane ai.—Efeso 4:26.
4:5. O a tatou taulaga faaleagaga, o “taulaga tatau [amiotonu]” pe a fai e saʻo uunaʻiga ma pe afai e ōgatasi a tatou amio ma mea e faafinagaloina e Ieova.
6:5. O le ā se māfuaaga lelei tatou te mananaʻo ai e ola?—Salamo 115:17.
9:12. E tagaʻi Ieova i le totomasaa ina ia faasalaina e ia le tagata faamasaatoto, ae na te lē faagaloina “le tagi o ē ua puapuagatia.”
15:2, 3; 24:3-5. E ao i tagata tapuaʻi moni ona tautala ma le faamaoni ae ʻalofia le tautō pepelo, ma le taufaaleaga.
15:4. Seʻi vaganā ua tatou iloa ua tatou faia se folafolaga e feteenaʻi ma le aʻoaʻoga a le Tusi Paia, ae e ao ona tatou faia mea uma e mafai e faataunuu ai a tatou upu e fai atu, e tusa lava pe matuā faigatā ona faataunuu.
15:5. Ona o i tatou o tagata tapuaʻi o Ieova, e tatau ona ʻalofia le faaaogāsesēina o tupe.
17:14, 15. O “tagata o le lalolagi” e tuutoina o latou olaga i le mauaina o se olaga lelei, tausia o fanau, ma ia iai se vaega ʻoa e teu mo fanau. Ae o le mea na mamafa i le manatu o Tavita i le olaga, o le faia lea o se igoa lelei ma le Atua ina ia mafai ona ‘vaavaai i ona fofoga’ po o le mauaina o le finagalo malie o Ieova. O le “ala” aʻe i folafolaga a Ieova ma taʻutinoga, na lagona ai e Tavita le ‘malie e vaavaai i Ona fofoga,’ po ua olioli o ia ona sa iai Ieova iā te ia. I le pei o Tavita, pe lē ao ea ona taulaʻi atu o tatou loto i ʻoa faaleagaga?
19:1-6. Afai o loo vivii atu iā Ieova le foafoaga e lē tautatala pe mafaufau, pe ua lē sili ai ea iā i tatou e mafai ona mafaufau, tautala, ma tapuaʻi ona faia faapea?—Faaaliga 4:11.
19:7-11. O mea o loo faafinagaloina e Ieova—e aogā lea mo i tatou!
19:12, 13. O mea sesē ma gaoioiga faamaualuga o ni agasala e ao ona ʻalofia.
19:14. E ao ona tatou manatu mamafa e lē gata i mea e tatou te faia ae o upu foʻi e tatou te tautala ai ma mea e mafaufau i ai.
“E TE TAOFIA AʻU I LUGA I LAʻU AMIO SAʻO”
Maʻeu se faanaunauga mai le loto ma se naunautaʻiga malosi ina ia tausia lona faamaoni lea na faaalia e Tavita i uluaʻi salamo e lua o lenei vaega! Na pese Tavita e faapea: “A e peitaʻi aʻu nei, ou te savali ma laʻu amio saʻo.” (Salamo 26:11) Na ia taʻutino i lana tatalo mo le faamagaloina o agasala: “Na ou faalologo, ona palagia ai lea o oʻu ivi i loʻu faataiō i le aso atoa.” (Salamo 32:3) Ua faamautinoa mai e Tavita i tagata faamaoni o Ieova e faapea: “O fofoga o Ieova o loo faasaga i ē amiotonu, e liliu mai foʻi ona taliga i a latou alaga.”—Salamo 34:15.
Maʻeu le tāua o fautuaga i le Salamo 37 i tagata Isaraelu faapea foʻi ma i tatou, a o tatou ola i “aso e gata ai” o lenei faiga o mea! (2 Timoteo 3:1-5) I le talanoa i se tulaga faavaloaga iā Iesu Keriso, ua taʻua e le Salamo 40:7, 8: “Faauta, ou te alu atu; ua tusia aʻu i le tusi tāʻai, Loʻu Atua e, ou te fiafia e fai lou finagalo; o loo i totonu lava iā te aʻu lau tulafono.” O le salamo mulimuli o lenei vaega o salamo, e faatatau atu i le talosaga a Tavita mo le fesoasoani a Ieova i tausaga fesouaʻiina o lona olaga ina ua uma le agasala ma Patesepa. Na pese o ia: “A o aʻu nei, e te taofia aʻu i luga i laʻu amio saʻo.”—Salamo 41:12.
Taliina Fesili Faale-Tusi Paia:
26:6—E faapefea ona tatou pei o Tavita i se tulaga faafaatusa, o loo faataamilomilo i le fata faitaulaga o Ieova? O loo fai le fata faitaulaga ma sui o le taliaina e Ieova o le taulaga togiola a Iesu Keriso mo le togiolaina o tagata. (Eperu 8:5; 10:5-10) E tatou te faataamilomilo la i le fata faitaulaga o Ieova e ala i le faatuatua i lenā taulaga.
29:3-9—O le ā o loo faaata i le faatusaina o le siʻufofoga o Ieova i se faititili lea e lagonaina ai le mataʻu pe a faalogo ai? O le tulaga lenei: O le malosi e lē mafaamatalaina o Ieova!
31:23—E faapefea ona matuā tauia lē amio faamaualuga? O le taui o loo taʻua i inei i le Salamo, o le faasalaga. O le tagata amiotonu o lē na te faia mea sesē e leʻi loto i ai, e tauia o ia e ala i se aʻoaʻiga mai iā Ieova. Talu ai o le tagata faamaualuga e lē liliu ese mai lona ala sesē, e matuā tauia ai o ia i se faasalaga ogaoga.—Faataoto 11:31; 1 Peteru 4:18.
33:6—O le ā “le agaga” po o le “mānava,” o le fofoga o Ieova? O le agaga o le malosi galue o le Atua, po o le agaga paia, lea na ia faaaogā i le faia o le lagi faitino. (Kenese 1:1, 2)
35:19—O le ā le uiga o le talosaga a Tavita ia aua neʻi fegenoaʻi mata o ē ʻinoʻino iā te ia? O le fegenoaʻi po o le faaʻivi o se mata e faaalia ai le fiafia o fili o Tavita i le taulau manuia o a latou faufauga leaga iā te ia. Na talosaga la Tavita ina ia aua neʻi tupu lenā mea.
Lesona mo i Tatou:
26:4. O se tulaga atamai le ʻalofia o le auaufaatasi ma i latou e natia lo latou tulaga moni i le Initineti, ma i latou i le aʻoga po o galuega e faafoliga mai o ni a tatou uō ona o ni māfuaaga e faalilolilo ona fai, o tagata ua liliu ese mai le upu moni ua latou faafoliga mai e matuā moni lava o latou manatu, faapea ma i latou o loo ola i ni olaga uigalua.
26:7, 12; 35:18; 40:9. E tatau ona tatou vivii iā Ieova i a tatou faatasiga faa-Kerisiano.
26:8; 27:4. Po o tatou fiafia ea e auai i sauniga faa-Kerisiano?
26:11. A o faaalia lona faanaunauga e tausia lona faamaoni, na talosagaina foʻi e Tavita se faamagaloga. Ioe, e mafai ona tausia lo tatou faamaoni e ui i lo tatou tulaga lē lelei atoatoa.
29:10. O le tiʻetiʻe i luga o “le lolo,” o loo faaalia ai o loo pulea atoatoa e Ieova mea i lona malosi.
30:5. O le uiga autū o Ieova o le alofa—ae lē o le toʻatamaʻi po o le ita.
32:9. E lē finagalo Ieova ia tatou pei o se fālata po o se asini e usitai ona o se faagutu po o se sasa. Na i lo lenā, e finagalo o ia e tatou te filifili e usitai iā te ia ona o lo tatou malamalama i lona finagalo.
33:17-19. E leai ni faatulagaga o mea fai a tagata, e tusa lava po o le ā le malolosi o iai, e mafai ona aumaia le olataga. E ao ona tuu atu lo tatou faatuatuaga iā Ieova ma fuafuaga a lona Malo.
34:10. Maʻeu se faamautinoaga mo i latou e tuu faamuamua manaʻoga o le Malo i o latou olaga!
39:1, 2. Pe a saʻili e tagata amioleaga faamatalaga e faaleagaina ai o tatou uso talitonu, o se gaoioiga atamai le ‘faaeteete i o tatou gutu, ma ia taofiofi’ ma ia lē gaoiā.
40:1, 2. O le faatalitali po o le faamoemoe iā Ieova e mafai ai ona tatou gafatia mafatiaga e pei lava o loo “aveina aʻe [i tatou] ai le lua e malaia ai, ma le mea matuā palapalā.”
40:5, 12. E lē avea le oo mai o mala po o sesē o le tagata lava ia po o le ā lava le tele, e fai ma mea e lofitūina ai i tatou, pe afai e lē o mou atu lo tatou iloa faapea, o o tatou faamanuiaga o loo maua ua “lē mafaitaulia” pe a faatusatusa atu i faigatā o loo iai.
“Ia Faafetaia Ieova”
Maʻeu le faamāfanafanaina ma faalaeiauina ai i salamo e 41 o le vaega muamua! E tusa lava po o tatou mafatia i puapuaga po o pagatia i le iai o se lotofuatiaifo ua ōia, e mafai lava ona tatou maua le malosi ma faalaeiauga mai le vaega lenei o le Afioga mamana a le Atua. (Eperu 4:12) O loo iai i nei salamo faamatalaga o loo aumaia ai taʻiala maufaatuatuaina mo le olaga. Ua faamautinoa mai e lē aunoa i tatou e faapea, e ui lava i faigatā e oo iā i tatou, ae o le a lē tuulafoaʻia i tatou e Ieova.
Ua faaiʻu mai le vaega muamua o salamo i upu nei: “Ia faafetaia Ieova, le Atua o Isaraelu, mai le vavau e oo lava i le faavavau. Amene ma Amene.” (Salamo 41:13) Ina ua uma ona iloiloina le vaega muamua o salamo, pe e leʻi uunaʻia ai ea i tatou e vivii iā Ieova?
[Faamatalaga pito i lalo]
[Faamatalaga faaopoopo i le itulau 19]
Afai o loo faamamaluina Ieova e mea o le foafoaga e leai ni ola, pe lē sili atu ai la ona tatau ona tatou viiviia ma faamamaluina Ieova!
[Ata i le itulau 17]
Na tusia e Tavita le tele o uluaʻi salamo e 41
[Ata i le itulau 18]
Pe e te silafia o fea le salamo o loo faaata ai Ieova o se Leoleo Mamoe?
[Ata i le itulau 20]
Aua neʻi aunoa se aso ae leʻi talanoaina ni mea faaleagaga
[Faamatalaga i Ata i le itulau 17]
Fetu: Faatagaga a le United States Naval Observatory
[Faamatalaga i Ata i le itulau 19]
Fetu, itulau 18 ma le 19: Faatagaga a le United States Naval Observatory
[Faamatalaga i Ata i le itulau 20]
Fetu: Faatagaga a le United States Naval Observatory