O Faamanuiaga o le Savali ma le Faamaoni
O Faamanuiaga o le Savali ma le Faamaoni
“O le faamanuia a Ieova, o lea e faatamaoaiga aʻi; na te lē faaopoopo i ai se tigā.”—FAATAOTO 10:22.
1, 2. Aiseā e lē tatau ai ona tatou soona popole fua i le lumanaʻi?
“O LE soona popole fua i le lumanaʻi . . . e faigatā ai ona tatou fiafia moni i mea o loo tatou maua i le taimi nei,” o le faamatalaga lea a se alii faitofā mai Amerika. E faapena foʻi i tamaiti, o ē ua alu uma o latou mafaufau i mea e mafai ona latou ausia pe a matutua, ae galo ai manuia e tatau ona fiafia ai i o latou olaga o ni tamaiti.
2 E iai foʻi i auauna a Ieova na ituaiga o mafaufauga i nisi taimi. E pei o lenei. Ua tatou moomoo i le faataunuuina o le folafolaga a Ieova mo se lalolagi parataiso. Ua tatou tatalia ma le naunautaʻi se olaga e lē toe iai se maʻi, le soifua matua, o tigā, ma mafatiaga. E lē leaga lo tatou faatalitalia o na mea. Ae faapefea pe afai ua tatou soona popole naʻuā i manuia faaletino i le lumanaʻi, ae galo ai o tatou manuia faaleagaga o iai i le taimi nei? Pagā se faanoanoa o lenā mea! E faigofie ai ona tatou loto vaivai ma ‘faanoanoa pe a tuai ona taunuu o tatou faamoemoega.’ (Faataoto 13:12) O faafitauli ma toʻatugā i le olaga e ono lagona ai e peiseaʻī ua tatou saisaitia i mafatiaga po o le faanoanoa. Ona tatou lē taumafai lea e foʻia tulaga lē lelei ua iai, ae ua amata ona oso aʻe uiga faitio. Peitaʻi e ʻalofia nei mea uma, pe a tatou manatunatu i se agaga talisapaia, i o tatou faamanuiaga o iai i le taimi nei.
3. O ā vala o le a tatou uaʻi atu i ai i lenei mataupu?
3 Fai mai le Faataoto 10:22: “O le faamanuia a Ieova, o lea e faatamaoaiga aʻi; na te lē faaopoopo i ai se tigā.” Pe tatou te lē o olioli ea i le tamaoaiga faaleagaga o iai auauna a Ieova i aso nei? Seʻi tatou talanoa i nisi o vala o lo tatou tamaoaiga faaleagaga, ma lona faatatauga mai iā i tatou. O le tōmānatu i faamanuiaga ua liligi ifo e Ieova ‘i lē amiotonu o loo savali i lona faamaoni’ e mautinoa o le a matuā faamalosia ai la tatou filifiliga e auauna atu pea ma le olioli i lo tatou Tamā faalelagi.—Faataoto 20:7.
Faamanuiaga ua Tatou Sapi ai Nei
4, 5. O lē fea aʻoaʻoga a le Tusi Paia e sili ona e faatāuaina, ma aiseā?
4 Ua iloa le poto saʻo i aʻoaʻoga a le Tusi Paia. I le tulaga lautele o lotu ua taʻua o lotu Kerisiano, e faapea mai o loo talitonu i le Tusi Paia. Peitaʻi, e lē ioe i mea o aʻoaʻo mai e le Tusi Paia. E oo lava i tagata e tutusa lotu, e masani ona eseese o latou manatu i mea o loo aʻoaʻo mai e le Tusi Paia. E matuā vala lava o latou tulaga mai auauna a Ieova! Po o ā lava o tatou atunuu, o aganuu, po o ituaiga tatou te tupuga mai ai, ae tatou te tapuaʻi uma i le Atua lea ua tatou iloa lona suafa. E lē o ia o se atua lilo o le tasitolu. (Teuteronome 6:4; Salamo 83:18; Mareko 12:29) Ua tatou iloa foʻi, ua toeitiiti ona faasaʻoina lea o le finauga autū i le pule silisili ese a le Atua, ma pe afai e tausia pea lo tatou faamaoni iā te ia, o le a tatou taʻitoʻatasi ma aafia ai i lenā finauga. Ua tatou malamalama i le mea moni e uiga i ē ua oti, ma tatou lē fefefe ai fua i se Atua ua taʻua faapea o loo ia faapuapuagatia tagata i se afi i hele, pe avatu i latou i pulekatolio.—Failauga 9:5, 10.
5 Tatou te olioli foʻi i le iloa, e leʻi teʻiteʻi lava maua mai i tatou i se faiga faaevolusione. Na i lo lea, na foafoaina i tatou e le Atua, na ia faia i lona lava faatusa. (Kenese 1:26; Malaki 2:10) O le pese lenei a le faisalamo i lona Atua: “Ou te vivii atu iā te oe, auā na faia aʻu e ala ai ona mataʻutia ma ofo tele ai; o mea na e faia, o mea mamana ia; ua ou matuā iloa e aʻu nei mea.”—Salamo 139:14.
6, 7. O ā ni suiga i lou olaga pe i olaga o isi e te masani ai, ua avea o se faamanuiaga?
6 Ua saʻoloto mai masaniga ma faiga e faaleagaina ai. Ua fau ma soloi faasalalauga o lapataʻiga i le mataʻutia o le ulaula tapaa, le inu tele i le ʻava malosi, ma amioga lē mamā faaleituaiga. Peitaʻi o le tele lava o tagata e lē o amanaʻia nei lapataʻiga. Ae faapefea pe a oo ina iloa e se tagata loto faamaoni, e taʻusalaina e le Atua moni nei faiga, ma e faanoanoa Lona finagalo i tagata o loo faia nei amioga? E mautinoa o le a ia taumafai e ʻalofia nei uiga mai lona olaga! (Isaia 63:10; 1 Korinito 6:9, 10; 2 Korinito 7:1; Efeso 4:30) E ui o lona faanaunauga autū mo nei suiga ina ia faafiafia Ieova le Atua, ae mafai foʻi ona ia maua ai aogā—o le a lelei lona soifua mālōlōina ma maua le filemu o le mafaufau.
7 E toʻatele tagata ua faigatā tele ona toe taofia ni masaniga leaga ua ola ai. Peitaʻi o loo mafai ona faia faapea i tausaga taitasi e le faitau afe o isi tagata. Ua tuuina atu o latou ola iā Ieova, ma papatisoina, e faailoa atu ai i le lautele le matuā tuuesea mai o latou olaga o nei faiga e lē fiafia ai le Atua. O se faalaeiauga lea mo i tatou uma! Ua atili mausalī ai la tatou filifiliga, ia saʻoloto mai le faapologaina i amioga agasala e faaleagaina ai.
8. O le ā le fautuaga a le Tusi Paia ua mafai ai ona maua se olaga fiafia i le aiga?
8 Ua iai ni olaga fiafia faaleaiga. I le tele o atunuu, ua faasolo ina vaivai le olaga faaleaiga. E tele faaipoipoga ua toe tatala, ma tuua ai nai fanau i ni mafatiaga tumau e sili ona ogaoga. I nisi atunuu i Europa, e toetoe lava o le 20 pasene o aiga uma, o ni aiga e na o le toʻatasi se matua o iai. Ua faapefea ona fesoasoani mai Ieova ina ia tatou savavali ma le faamaoni e tusa ai o lenei tulaga? Seʻi faitau faamolemole le Efeso 5:22–6:4, ma mātau le fautuaga matagofie o aumaia e le Afioga a le Atua i tane, i avā, ma i fanau. O le faatatauina o lenā fautuaga ma isi fautuaga o i le Tusi Paia, e mautinoa le atili malosi ai o le fusi o le faaipoipoga, e aogā i le tausia lelei aʻe o fanau, ma maua ai se olaga fiafia i le aiga. Pe lē o se faamanuiaga ea lenā e olioli ai?
9, 10. Ua faapefea ona ese la tatou vaaiga i le lumanaʻi mai le vaaiga a le lalolagi?
9 Ua mautinoa e toe o se aga ona foʻia lea o faafitauli o iai i le lalolagi. E ui lava i le poto faasaienisi ma le poto i masini faaonapōnei ua iai, aemaise foʻi taumafaiga faamaoni a nisi taʻitaʻi, ae lē o mafai lava ona foʻia faafitauli tugā o loo iai i aso nei. Na taʻua talu ai nei e Klaus Schwab, o lē na faavaeina le Faalapotopotoga mo le Tamaoaiga a le Lalolagi (World Economic Forum) e faapea, “ua faateleina faafitauli o fesagaʻi ma le lalolagi, a ua faaitiitia le taimi ua maua e foʻia ai nei faafitauli.” Sa ia taʻua “lamatiaga o loo aafia ai atunuu uma, e pei o osofaʻiga a tagata faatupu faalavelave, le faaleagaina o le siʻosiʻomaga, ma le lē mautū o le tulaga tau tupe.” Na faaiʻu mai upu a Schwab: “O le faatoʻā oo lenei o le lalolagi i se tulaga sa leʻi iai muamua; ua fesagaʻi nei ma tulaga moni lea ua matuā manaʻomia ai le galulue faatasi o tagata uma ma ia vave ona faia ni faaiʻuga ina ia foʻia nei faafitauli.” A o faagasolo pea lenei senituri, ae ua matuā lē mautonu lava tagata i so latou lumanaʻi o le a iai.
10 Maʻeu le faamalieina i le iloa, ua faatūina e Ieova lana faatulagaga ina ia mafai ona foʻia faafitauli uma o tagata—le Malo Faa-Mesia o le Atua! O inā o le a ‘faaiʻua ai taua’ e le Atua moni, ae aumai le ‘tele o le manuia po o le filemu.’ (Salamo 46:9; 72:7) O le a ‘laveaʻi e Iesu Keriso, o le Tupu faauuina, lē ua mativa, o lē ua puapuagatia, ma lē ua vaivai mai le sauā ma le faamalō po o faiga sauā.’ (Salamo 72:12-14) O le a anoanoaʻi taumafa i le pulega a le Malo. (Salamo 72:16) “E sōloiesea foʻi e [Ieova] loimata uma i o [tatou] mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.” (Faaaliga 21:4) Ua faavaeina nei i le lagi le Malo, ma ua toe o se aga ona gaoioi mai lea e foʻia faafitauli uma o loo iai i le lalolagi.—Tanielu 2:44; Faaaliga 11:15.
11, 12. (a) Po o le saʻilia ea o faafiafiaga e aumaia ai le fiafiaga tumau? Faamatala. (e) O le ā e aumaia ai le fiafiaga moni?
11 Ua tatou iloa le ala e maua ai le fiafiaga moni. E faapefea ona maua le fiafiaga moni? Na taʻua e se alii e suʻesuʻe i mafaufau ma amioga a tagata e faapea, e tolu vala e manaʻomia mo le mauaina o le fiafia—faafiafiaga, auai i se mea (e pei o galuega ma le aiga), ma le faamalieina (galue mo se fuafuaga, pe mo le lelei o isi na i lo oe lava). Mai lenā tolu, sa ia faatulaga faafiafiaga, o le vala lea e itiiti sona tāua, ma faapea mai: “O lenei le vala ua sili ona agaʻi i ai talanoaga auā e toʻatele tagata ua uaʻi atoa o latou olaga i le saʻilia o faafiafiaga.” Ae o ā fa a le Tusi Paia i lenei mea?
12 Na taʻua e Solomona, le tupu o Isaraelu anamua: “Ua ou faapea ifo i loʻu loto, Sau ia, ou te tofotofo iā te oe i le olioli, inā e fiafia ia i mea lelei; faauta foʻi, o le mea faatauvaa lava lea. Ua ou faapea i le ʻataʻata, Ua valea lea; o le olioli foʻi, Se ā se mea na te faia?” (Failauga 2:1, 2) E tusa ai ma le Tusi Paia, po o le ā lava se fiafiaga e maua mai faafiafiaga, e lē umi ona iai. Ae ā le auai i se galuega? Ua iā i tatou le galuega e sili ona aogā e faia ai so tatou sao—le galuega talaʻi o le Malo ma le faia o isi ma soo. (Mataio 24:14; 28:19, 20) O le tufa atu i isi o le feʻau o le faaolataga ua faamatala mai e le Tusi Paia, ua tatou auai ai i se galuega e lē gata ina faaolaina ai i tatou, ae faapea foʻi ma ē faalogologo mai iā i tatou. (1 Timoteo 4:16) Ona o tatou o ‘le ʻau faigaluega faatasi ma le Atua,’ ua tatou tofo ai i le moni o le manatu “e sili le manuia [po o le fiafia] o lē na te foaʻi atu, i lo lē na te talia mai.” (1 Korinito 3:9; Galuega 20:35) O le galuega lenei ua aumaia ai se faamalieina i o tatou olaga ma ua mautali ai Lē na Foafoaina Mea i lē o faifai iā te ia, o Satani le Tiapolo. (Faataoto 27:11) Ioe, ua faaalia mai e Ieova iā i tatou faapea, o le tuutoina atu iā te ia e aumaia ai le fiafiaga e moni ma tumau.—1 Timoteo 4:8.
13. (a) Aiseā ua avea ai le Aʻoga o le Faiva Faatiokarate o se faamanuiaga tatou te olioli ai? (e) Po ua aogā iā te oe le Aʻoga o le Faiva Faatiokarate?
13 Se aʻoaʻoga tāua ma aogā. O Gerhard o se toeaina i se tasi o faapotopotoga a Molimau a Ieova. A o toe mafaufau i aso o lona talavou, ua faapea mai a ia: “A o oʻu talavou, sa faigatā tele laʻu tautala. Pe a ou popole, e toetoe lava lē mafai ona manino lelei le faaleoina o oʻu manatu, ma amata ai ona fesasiaʻi solo laʻu tautala. Sa ou lagona le faanoanoa ma oo ai ina ou mafatia. Sa faatulaga e oʻu mātua ni lesona e aʻoaʻo ai laʻu tautala, ae e leʻi aogā, auā e lē o se faafitauli na iai moni, ae māfua mai i loʻu mafaufau. Peitaʻi, sa iai se sauniuniga ofoofogia mai iā Ieova—o le Aʻoga o le Faiva Faatiokarate. Ina ua ou auai i lenei aʻoga, o inā na ou toe maua ai le loto tele. Sa ou taumafai malosi e faatino mea na ou aʻoaʻoina, ma sa aogā! Na toe saʻoloto laʻu tautala, ua ou lē toe mafatia, ma ua sili ona ou loto tele e auai i le faiva. I le taimi nei ua ou faia ni lauga i le lautele. Ou te faafetaia Ieova, auā o ia na toe faaleleia loʻu olaga e ala mai i lenei aʻoga.” Pe tatou te lē olioli ea, i le auala o loo toleni ai i tatou e Ieova mo le faia o lana galuega?
14, 15. O ā fesoasoani e mafai ona maua i taimi o mafatiaga? Faataʻitaʻi.
14 Ua iai se faiā māfana ma Ieova ma le lagolagosua mai le ʻauuso autasi i le lalolagi aoao. O Katerina e nofo i Siamani, ae na matuā popole lava a o faalogo atu i lipoti o se mafuiʻe tele, ma se galulolo na tupu i saute sasaʻe o le atu Asia. E fetaui le tupu o lenā mala, ae o loo asiasi atu lana tama teine i Taialani. E 32 itula o lē mautonu lenei tinā pe mata o ola mai pea si ana tama, po o aofia i le anoanoaʻi o tagata ua manunuʻa pe maliliu foʻi. Ae maʻeu se mapusaga ina ua maua e Katerina se telefoni e faamautinoa ane ai, o loo saogalemu si ana tama!
15 Na faapefea ona maua se fesoasoani o Katerina i na itula mafatia? Ua ia tusi mai: “Toetoe lava i lenā taimi atoa, sa ou tatalo atu iā Ieova. Ma na ou iloa i taimi uma le telē o le toʻamālie ma le filemu o le mafaufau na ia foaʻi mai iā te aʻu. E lē gata i lea, sa asiasi mai oʻu uso ma tuafāfine faaleagaga ma faamatalaloto iā te aʻu.” (Filipi 4:6, 7) Pagā se faigatā na semanū e oo iā te ia pe ana nofonofo ai i na itula o mafatiaga e aunoa ma se tatalo iā Ieova ma leai ni faamāfanafanaga mai se ʻauuso faaleagaga! O la tatou faiā māfana ma Ieova ma lona Alo, aemaise la tatou aufaatasiga vavalalata ma le ʻauuso Kerisiano, o se faamanuiaga tutasi ma tautele, e lē tatau ona tatou manatu māmā i ai!
16. Taʻu mai se tala o loo faataʻitaʻia ai le tāua o le faamoemoe o le toetū.
16 Ua mautinoa le faamoemoe o le toe feiloaʻi atu i ē pele ua maliliu. (Ioane 5:28, 29) Na ola aʻe le tama talavou o Makiasi, o se tasi o Molimau a Ieova. Peitaʻi, na te leʻi amanaʻia ona faamanuiaga, ma tafetafea ese atu ai mai le faapotopotoga Kerisiano i le sefulu ma ona tupu o ona tausaga. I le taimi nei ua ia tusi mai: “E leai lava ni a ma talanoaga lelei na fai ma loʻu tamā. O le tele o taimi e ma te finau ai. Peitaʻi sa manaʻo pea loʻu tamā ia ou maua se olaga e sili ona lelei. Sa alofa tele iā te aʻu, ae sa leʻi mafai ona ou malamalama i lenā mea i na taimi. I le 1996, a o oʻu saofai ane i autafa o lona moega, sa ou uu lona lima ma ou tagi masūsū, a o oʻu faatoese atu iā te ia i mea uma na ou faia; sa ou taʻu atu foʻi i ai loʻu alofa iā te ia. Ae pagā lea, e leʻi mafai ona ia toe lagona mai aʻu. E leʻi umi lona maʻi ae maliu loa. Pe afai ou te faasaoina atu ma ou vaai i si oʻu tamā i le toetū, o le a ma toe faaleleia mea sa faalētonu i le taimi ua teʻa. Ma e mautinoa o le a fiafia o ia e faalogo, ua avea nei lona atalii o se toeaina, ma ua maua e lona atalii ma lana avā se faaeaga e auauna ai o ni paeonia.” Ua avea moni lava le faamoemoe o le toetū o se faamanuiaga iā i tatou!
“Na te Lē Faaopoopo i ai se Tigā”
17. E faapefea ona aogā iā i tatou le mafaufau i faamanuiaga a Ieova?
17 Na fetalai Iesu Keriso e faatatau i lona Tamā faalelagi: “Na te faaoso i lona la i ē ua amio leaga atoa ma ē ua amio lelei; ua ia faatotō ifo foʻi le ua i ē ua amiotonu, atoa ma ē ua amiolētonu.” (Mataio 5:45) Afai o loo faatotō ifo e Ieova le Atua ana faamanuiaga i tagata amiolētonu ma ē amio leaga, e sili atu la ona ia faamanuiaina i latou o loo savavali ma le faamaoni! Fai mai le Salamo 84:11: “E lē taofia e [Ieova] se mea lelei i ē ua sao lo latou savavali.” Tatou te matuā lagona le faafetai ma le olioli, pe a mafaufau atu i le tausiga faapitoa o loo ia faia mo ē e alolofa iā te ia!
18. (a) O le ā le uiga o le faapea atu, e leai ni tigā o le faamanuia a Ieova? (e) Aiseā ua mafatia ai le toʻatele o auauna faamaoni a le Atua?
18 “O le faamanuia a Ieova”—ua tamaoaiga ai ona tagata i le itu faaleagaga. Ma e tatou te mautinoa “na te lē faaopoopo i ai se tigā.” (Faataoto 10:22) Ae aiseā la e tutupu ai tofotofoga ma puapuaga i le tele o auauna faamaoni a le Atua, ma latou tofo ai i le tele o tigā ma mafatiaga? E tolu māfuaaga autū. (1) O o tatou lava faanaunauga agasala. (Kenese 6:5; 8:21; Iakopo 1:14, 15) (2) O Satani ma ana temoni. (Efeso 6:11, 12) (3) O le lalolagi leaga. (Ioane 15:19) E ui ina lē taofia e Ieova mea leaga mai le tutupu iā i tatou, ae lē o ia na faatupuina. O le mea mautinoa, ‘o mea lelei uma e foaʻifuaina mai, atoa ma mea alofa uma e atoatoa ona lelei, e mai lugā lava ia, e alu ifo mai le Tamā o le malamalama.’ (Iakopo 1:17) E leai se tigā e maua i faamanuiaga mai iā Ieova.
19. O le ā ua faatalitalia mai iā i latou o ē savavali ma le faamaoni?
19 O le tamaoaiga faaleagaaga e tatau lava ona fuifuilua ma se faiā vavalalata ma le Atua. O le iai o sa tatou faiā māfana ma Ieova, tatou te ‘teua ai oloa mo i tatou lava, o le faavae lelei mo aso atalī, ina ia tatou fetagofi atu i le ola moni’—o le ola lea e faavavau. (1 Timoteo 6:12, 17-19) I le lalolagi fou a le Atua o loo fotuaʻi mai, o le a lē gata i lo tatou tamaoaiga faaleagaga, ae faapea foʻi i faamanuiaga faaletino. O i latou uma o ē “faalogo [pea] i le siʻufofoga o Ieova” o le a maua le ola moni, lea o le a anoanoaʻi ai faamanuiaga a le Atua. (Teuteronome 28:2) I se filifiliga ua matuā toe faamausalīina, seʻi o tatou faaauau pea ona savavali ma le faamaoni.
O le ā se Mea na E Aʻoaʻoina?
• Aiseā e lē atamai ai le soona popole fua i le lumanaʻi?
• O ā faamanuiaga o loo tatou olioli ai nei?
• Aiseā e mafatia ai auauna faamaoni a le Atua?
[Fesili mo le Suʻesuʻega]