‘Ia Anaana i le Atua i lo Tagata’

“O Loo iā Ieova le Taua”

E LUA ni vaegaʻau faatautavā o loo tutū faafesagaʻi i itu e lua o se vanu. Ua 40 aso o gatete i le matataʻu tamāloloa Isaraelu a o osofaʻia pea i upu taufaifai a le toa Filisitia o Koliata.—1 Samuelu 17:1-4, 16.

O upu nei na luʻi leotele ai e Koliata tagata Isaraelu: “Filifili ia e outou se tagata e alu ifo iā te aʻu; afai na te mafaia ona ma tau, ma fasi iā te aʻu, matou te fai ma auauna iā te outou; a e afai ou te mālō iā te ia, ma ou fasi iā te ia, ona fai lea o outou ma a matou auauna, e auauna mai iā te i matou. . . . O aʻu nei, ou te faamāsiasi i le itu taua a Isaraelu i le aso nei; tuu mai iā te aʻu se tagata ma te tau.”—1 Samuelu 17:8-10.

I aso anamua, o se mea masani le avea o toa ma sui o a latou vaegaʻau i se taua. Sa ave le manumalo i le itu a le toa na mālō. Ae o lenei toa o loo faifai iā Isaraelu, e lē o se fitafita e masani ai. O se tagata umi tinoese, o se fili e mataʻutia ma faafefe tagata. Ae ona o le tauemua o tagata o Ieova, ua fai ai e Koliata lona iʻuga e lē masuia.

E lē o se taua faavaegāʻau e masani ai. O le taua i le va o Ieova ma atua o tagata Filisitia. Na i lo le loto tele o Saulo le tupu o Isaraelu e taʻitaʻi lana ʻautau faasaga i fili o le Atua, ua lē mautonu o ia i le fefe.—1 Samuelu 17:11.

Se Tama Talavou e Faatuatua iā Ieova

A o faia lenei feteenaʻiga, ae asiasi atu loa se tama talavou ua uma ona tofia e avea ma tupu o Isaraelu, i ona uso o loo i le ʻautau a Saulo. O Tavita lona igoa. Ina ua ia faalogo i upu a Koliata, na ia fesili atu: “O ai lenei Filisitia lē peritomeina na te faifai ai i ʻau a le Atua soifua?” (1 Samuel 17:26) O le manatu o Tavita, o loo fai Koliata ma sui o tagata Filisitia ma o latou atua. I lona ita ma manaʻo e fai le mea tonu, sa naunau Tavita e tau ma le toa faapaupau ina ia puipuia le suafa o Ieova ma Isaraelu. Ae na faapea atu le tupu o Saulo: “E te lē lavā ona oulua tau ma lenā Filisitia, auā o oe le tama itiiti.”—1 Samuelu 17:33.

Pagā le eseese o manatu o Saulo ma Tavita! Sa manatu Saulo iā Tavita ua na o se tama leoleo mamoe o loo fia tau faasaga i se toa mataʻutia. Ae sa manatu Tavita iā Koliata ua na o se tagata faatauvaa, ae ua ia luʻia le Alii o Ieova. E faavae le loto tele o Tavita i lona mautinoa, o le a lē tuua e le Atua Lona suafa ma Ona tagata e tauemua e aunoa ma ni faasalaga. A o mitaʻi mai e Koliata lona malosi, sa faatuatua atu Tavita iā Ieova, ma manatu i le auala e pei ona silasila ai le Atua i mea.

“Ou te Alu Atu iā te Oe i le Suafa o Ieova”

Sa mautū le faavae o le faatuatua o Tavita. Sa ia manatua na fesoasoani le Atua e faasao lana mamoe mai se urosa ma se leona. Sa mautinoa e le leoleo mamoe talavou, o le a fesoasoani Ieova iā te ia e feagai ma lenei fili Filisitia e mataʻu ai. (1 Samuelu 17:34-37) O le maatā ma ni maa lamolemole se lima ʻauupega a Tavita, ina ua alu atu e tau ma Koliata.

 Sa filifili Tavita e faafetaiaʻia lenei luʻi faigatā, i le faalagolago i le malosi mai iā Ieova. Sa valaau atu ma le loto tele i le Filisitia: “Ua e sau iā te aʻu ma le pelu, ma le tao, ma le tao leoleo; a o aʻu, ou te alu atu iā te oe i le suafa o Ieova o ʻau, o le Atua o le itu taua a Isaraelu ua e faifai i ai. O le aso nei e tuuina mai ai oe e Ieova i loʻu lima, . . . e iloa ai le lalolagi uma, o i ai le Atua iā Isaraelu. E iloa ai foʻi e lenei faapotopotoga uma, e lē faaolaina tagata e Ieova i se pelu ma se tao; auā o loo iā Ieova le taua.”—1 Samuelu 17:45-47.

O le ā le iʻuga? Ua taʻua i le tala: “Ua mālō Tavita i le Filisitia i le maatā ma le maa; ua na fasi le Filisitia, ua oti ai, a e leai se pelu i le lima o Tavita.” (1 Samuelu 17:50) Sa leai sana pelu, ae sa iā te ia le lagolagosua malosi a Ieova le Atua. *

E mataʻina le auala na faailoa ai le moni o le faatuatua o Tavita iā Ieova i lenā taua! Pe a tatou filifili pe matataʻu i tagata pe faatuatua i le mana laveaʻi o Ieova, e manino le filifiliga: “E tusa ona sili o lo matou anaana i le Atua i lo matou anaana i tagata.” (Galuega 5:29) E lē gata i lea, pe a manatu i tulaga faigatā e pei o le auala e silasila ai Ieova, o le a iai foʻi sa tatou vaaiga paleni i faafitauli tetele.

[Faamatalaga pito i lalo]

[Pusa/Ata i le itulau 9]

E FAAPEʻĪ LE LAPOʻA O KOLIATA?

Ua taʻua i le 1 Samuelu 17:4-7, e silia i le ono kupita pe silia i le iva futu le umī o Koliata [tusa e tolu mita]. E iloa le lapoʻa ma le malosi o Koliata i lona ufi fatafata uʻamea. E 126 pauna [57 kilokalama] le mamafa! O le fuata o lana tao e pei o se laau faalava e lalaga ai ie, ma o le mamafa o le lau o le pelu e 15 pauna [7 kilokalama]. E foliga mai e mamafa atu le ofutau o Koliata na i lo Tavita!