O le ā le Fuafuaga a le Atua mo le Lalolagi?

AISEĀ e te fiafia ai e savalivali i se togālaau matagofie po o se laufanua o loo sasala ai le manogi o fugālaau? Aiseā e te olioli ai pe a vaai atu i se vaituloto matagofie po o atumauga ua ufitia tumutumu e ao? Aiseā e te tu ai e faalogologo i pesega mālie a manu felelei i luga o laau? Ma aiseā foʻi e te fiafia ai e vaavaai atu i se manu o loo osooso po o se lafu mamoe o loo aai i se laufanua lafulemu?

E tasi lava le tali o nei fesili uma. Na foafoaina i tatou ia nonofo i se Parataiso! O inā na uluaʻi soifua ai o tatou uluaʻi mātua o Atamu ma Eva. O i laʻua foʻi na tuufaasolo maia iā i tatou le faanaunauga ia ola i se Parataiso, ma o lenā faanaunauga sa la mauaina mai i Lē na foafoaina i laʻua o Ieova le Atua. Sa ia silafia o le a ola fiafia tagata i se Parataiso, ona sa ia foafoaina i tatou ma ni uiga po o se manaʻoga e nonofo fiafia i le lalolagi.

Aiseā na foafoaina ai e le Atua le lalolagi? Na ia “faia ina ia ʻainā” e tagata. (Isaia 45:18) “Na faia e ia le lalolagi” ma tuuina i ai Atamu ma Eva i se nofoaga parataiso, le faatoʻaga o Etena. (Ieremia 10:12; Kenese 2:7-9, 15, 21, 22) Maʻeu so la fiafia na iai i le tafe o vaitafe, fugālaau, ma laau sa iai! Sa iai manufelelei i le lagi, o ituaiga manuvaefa eseese sa tataa i le laufanua—sa lē avea o ni lamatiaga mo tagata. O iʻa ma isi meaola sa tataa i vai manino ma mamā. Ae sili atu i lenā, sa faatasi Atamu ma Eva. Sa mafai ona maua ni a la fanau ma faalautele atu lo latou nofoaga Parataiso a o faatuputupulaʻia lo latou aiga.

E ui e lē o toe avea le lalolagi ma Parataiso, ae e mafai ona faatusaina i se nofoaga matagofie o se aiga fiafia. O loo i ai i lo tatou nofoaga, le lalolagi na tuuina mai e le Atua, mea uma tatou te manaʻomia—le malamalama, māfanafana, vai, ma mea taumafa. Maʻeu lo tatou talisapaia o le malamalama ma le māfanafana mai le lā, ma le susulu mai o le masina i le pō! I le ogatotonu o le lalolagi po o le eleele, o loo i ai le suāuu ma le koale, lea e faaaogā e maua ai le malosiaga o le vevela. Ona o le faataamilosaga o  le vai, vaitafe, vaituloto ma le sami, ua māfua ai ona i ai le vai. Ma e pei o se kapeta le ufitia o le laueleele e le mutia.

E pei ona teu ni taumafa i se fale, e anoanoaʻi mea taumafa i le lalolagi. E ala i fua o faaeleeleaga, ma fua o togālaau ʻaina, ua aumai e Ieova o ‘tausaga o fuata a le tau, ma faamalilie i o tatou loto i le mea e ʻai ma le olioli.’ (Galuega 14:16, 17) E ui o loo avea le lalolagi ma nofoaga matagofie, ae o le a sili atu le tulaga o le a i ai pe a faaliliuina e avea ma parataiso e Ieova “le Atua manuia”!—1 Timoteo 1:11.

 [Faamatalaga i Ata i le itulau 2]

FAAVAA: Lalolagi: NASA photo; Fetu: NASA, ESA and AURA/Caltech