Po o E “Saʻoloto e Tautala Atu”?

E SILIA i le ono miliona tagata i atunuu e 235, o loo olioli i le mauaina o le mea ua taʻua i le Tusi Paia, o le “saʻolotoga e tautala atu ai.” E 16 taimi o loo taʻua ai lenei faaupuga i le Tusi Paia Kerisiano Eleni. (Filipi 1:20, NW; 1 Timoteo 3:13, NW; Eperu 3:6, NW; 1 Ioane 3:21, NW) O le ā le uiga o le “saʻoloto e tautala atu”? O le ā e fesoasoani iā i tatou e maua ai lea saʻolotoga? O ā vala o fesootaʻiga e tatou te saʻoloto ai e tautala atu?

E tusa ai ma le Expository Dictionary of Old and New Testament Words a Vine, o le upu Eleni mo le faaupuga, “saʻoloto e tautala atu,” ua faaalia ai le “saʻoloto e tautala, tautala saʻo, . . . lē fefe e tautala ma le loto tele; o lea, e uiga i le mautinoa, loto tele, ma le toa, ae lē faasino i taimi uma i le tautala.” Ae, e lē tutusa le loto tele e tautala, ma le tautala lē talafeagai po o le lē mafaufau. Ua taʻua i le Tusi Paia: “Ia lē aunoa a outou upu ma le alofa.” (Kolose 4:6) O le saʻoloto e tautala, e aofia ai le faaaloalo lea e lē avea ai le mafatia po o le fefe i tagata, e taofia ai lo tatou tautala atu.

Po o sa tatou aiā le saʻoloto e tautala? Seʻi manatu i le tusi a Paulo i Kerisiano i Efeso. Na ia faapea atu: “Ua au mai iā te aʻu, lē aupito itiiti lava i le ʻau paia uma, lenei lava alofa tunoa, ina ia ou folafola atu i nuu ese le oloa faulaʻi o Keriso e lē masuʻesuʻeina lava.” Na faaopoopo atu Paulo, ona o Iesu Keriso, ua “tatou maua ai le saʻolotoga tele e tautala atu ai, ma le ala e sao atu ai ma le loto tele, i le faatuatua iā te ia.” (Efeso 3:8-12, NW) Na i lo sa tatou aiā, ua tatou saʻoloto e tautala atu ona o la tatou faiā ma Ieova, e faavae i le faatuatua iā Iesu. Seʻi o tatou iloilo po o le ā e fesoasoani iā i tatou e maua ai lenei saʻolotoga, ma le auala e faaali ai pe a tatou talaʻi, aʻoaʻo atu, ma tatalo.

O le ā e Fesoasoani iā i Tatou ia Talaʻi ma le Loto Tele?

O Iesu le faaaʻoaʻo sili o sē na saʻoloto e tautala. O lona maelega na uunaʻia ai o ia e saʻili avanoa e talaʻi ai. Pe mālōlō, tausami i se aiga, pe savali i le ala, sa ia faaaogā avanoa uma e talanoa ai i le Malo o le Atua. E leʻi mafai e tauemuga ma teteega ona faafefe Iesu ina ia lē toe tautala atu. Na i lo lea, sa ia faaalialia ma le loto tele i lumāmea taʻitaʻi o  lotu sesē. (Mataio 23:13-36) E oo foʻi ina ua puʻea ma ave i le faamasinoga, sa tautala ma le lē fefe Iesu.—Ioane 18:6, 19, 20, 37.

Sa tautatala ma le loto tele foʻi aposetolo o Iesu. I le Penetekoso 33 T.A., na saʻoloto Peteru e tautala atu i luma o se motu o tagata e silia ma le 3,000. O le mea e mataʻina ai, ona e leʻi leva tele atu, na fefe ai Peteru ina ua mātauina e se auauna teine. (Mareko 14:66-71; Galuega 2:14, 29, 41) E leʻi fefefe Peteru ma Ioane ina ua toso i luma o taʻitaʻi lotu. E aunoa ma le faatalatū, na la molimau ma le loto tele e uiga iā Iesu ua toe tū. O le mea moni, o le lototetele o Peteru ma Ioane e tautatala, na māfua ai ona iloa e taʻitaʻi lotu sa faatasi nei tane ma Iesu. (Galuega 4:5-13) O le ā na māfua ai ona la tautatala ma le loto tele?

Na folafola e Iesu i ona aposetolo: “Pe a latou tuuina atu outou, aua tou te popole pe faapefea, pe se ā foʻi tou te fai atu ai; auā e foaʻiina mai iā te outou i lea lava itu aso se upu tou te fai atu ai. Auā e lē o outou e tautala atu ai, a o le Agaga o lo outou Tamā e tautala mai ai i totonu iā te outou.” (Mataio 10:19, 20) Sa fesoasoani le agaga paia iā Peteru ma isi e foʻia le matamuli po o le fefe, lea sa ono taofia ai lo latou saʻoloto e tautatala atu. E mafai foʻi ona fesoasoani taaʻiga a lenā mana malosi iā i tatou.

E lē gata i lea, na tofia e Iesu ona soo e ō e fai ni soo. Sa fetaui lea mea, auā sa avatu iā te Ia le “pule uma lava . . . i le lagi ma le lalolagi.” Ma o loo ia faatasi atu ‘iā i latou.’ Mataio 28:18-20) O le iloa o le lagolagosua a Iesu, na avatu ai i uluaʻi soo le mautinoa, a o feagai ma pulega a ē na taumafai e taofia la latou talaʻiga. (Galuega 4:18-20; 5:28, 29) O le a fesoasoani foʻi iā i tatou lea lagolagosua.

I le faasino atu i le isi māfuaaga e tautala ai ma le loto tele, na tuufaatasi e Paulo le faamoemoe ma le “saʻoloto e tautala atu.” (2 Korinito 3:12, NW; Filipi 1:20, NW) Ona e ofoofogia le feʻau o le faamoemoe, sa lē mafai la ona nātia e Kerisiano, ae ao ona taʻu atu i isi. Ioe, tatou te saʻoloto e tautala atu ona o lo tatou faamoemoe.—Eperu 3:6, NW.

Talaʻi ma le Loto Tele

E mafai faapefea ona tatou talaʻi ma le loto tele e ui i tulaga sili ona faigatā? Seʻi manatu i le faaaʻoaʻoga a Paulo. A o avea ma pagota i Roma, sa ia talosaga i ona uso talitonu ina ia tatalo e ‘tuuina atu le upu iā te ia, ina ia faamalosi ona tautala atu ma faailoa atu le mea lilo a le tala lelei.’ (Efeso 6:19, 20) Pe na talia na tatalo? Ioe! A o iai i le falepuipui, sa faaauau e Paulo ona “talaʻi le malo o le Atua, . . . ma saʻoloto e tautala atu, e leʻi vaoia.”—Galuega 28:30, 31, NW.

O le faaaogā o avanoa e avatu ai se molimau i galuega, aʻoga, ma a o faimalaga, e tofotofo ai lo tatou saʻoloto e tautala atu. O le matamuli, fefe i le tali mai a isi, po o le lē mautinoa i a tatou taumafaiga, e ono taofia ai lo tatou tautala atu. Na faataatia e Paulo se isi faaaʻoaʻoga lelei. Na ia tusi: “Ua matou loto tele ona o lo tatou Atua e tautala atu iā te outou i le tala lelei a le Atua ma le finafinau tele lava.” (1 Tesalonia 2:2) Sa faia e Paulo mea sa lē mafai ona ia faia i lona lava malosi, ona sa ia faalagolago iā Ieova.

Sa fesoasoani le tatalo iā Sieli e tautala ai ma le loto tele, ina ua maua se avanoa e molimau lē fuafuaina ai. I se tasi aso a o faatali i lana tane, sa ia iloa ai se fafine o loo faatali foʻi. Na taʻua e Sieli: “Ona o loʻu popole tele, sa ou tatalo ai iā Ieova mo le loto tele.” A o sōsō atu Sieli i le fafine, ae taunuu ane loa se faifeʻau o le lotu Papatiso. E leʻi mafaufau Sieli e talanoa i se faifeʻau. Ae sa ia toe tatalo ma mafai ai loa ona molimau atu. Sa ia tuu ni lomiga i le fafine ma faia ni fuafuaga mo se toe asiga. Pe a tatou puʻea avanoa e molimau ai, e tatou te mautinoa o le faalagolago iā Ieova, o le a fesoasoani e tautala ai ma le loto tele.

 Tautala ma le Loto Tele pe a Aʻoaʻo Atu

E fesootaʻi le saʻoloto e tautala ma le aʻoaʻo atu. Ua taʻua i le Tusi Paia e tusa ai “o tane e auauna i se auala lelei” i le faapotopotoga e faapea: “O loo fausia aʻe mo i latou lava se talaaga lelei ma le saʻolotoga tele e tautala atu ai i le faatuatua e fesootaʻi atu iā Keriso Iesu.” (1 Timoteo 3:13, NW ) Ua latou maua lenei saʻolotoga, i le faatatauina lea o mea ua latou aʻoaʻo ai isi. O le faia faapea, ua puipuia ma faamalosia ai le faapotopotoga.

Pe a tatou saʻoloto e tautala i lenei auala, o le a sili atu ona uigā a tatou fautuaga ma o le a usitaia foʻi. Na i lo le tosina ese o tagata ona o se faaaʻoaʻoga leaga, e faalaeiauina i latou pe a vaaia le aogā o le faatatauina o mea ua latou aʻoaʻoina. O lenei saʻolotoga e mafai ai e ē ua agavaa faaleagaga ona toe ‘faafoʻi mai lo latou uso,’ a o leʻi tugā se faafitauli. (Kalatia 6:1) I se faaeseesega, e ono faatalatū sē ua faia se faaaʻoaʻoga leaga e avatu se fautuaga, i lona manatu, e leai sana aiā e tautala ai. O le tuai ona avatu o se fautuaga o manaʻomia, e ono iai ni iʻuga lē lelei.

O lo tatou lototetele e tautala, e lē uiga i le faitio, maumaututū, po o le tautū i o tatou lava manatu. Na apoapoaʻi Paulo iā Filemoni “ona o le alofa.” (Filemoni 8, 9) E mautinoa sa lelei iʻuga o upu a le aposetolo. Ioe, o le alofa e uunaʻia ai se toeaina e avatu so o se fautuaga!

E tāua le saʻoloto e tautala pe a avatu se fautuaga. E iai foʻi isi taimi e tāua ai. Na tusi Paulo i le faapotopotoga i Korinito: “Ua ou saʻoloto e tautala atu iā te outou. Ua tele loʻu mitamita ona o outou.” (2 Korinito 7:4, NW) E leʻi faatalatū Paulo e avatu le faamālō talafeagai i ona uso ma tuafāfine. Na uunaʻia o ia e le alofa e taulaʻi atu i uiga lelei o ona uso talitonu, e ui sa ia iloa a latou mea sesē. E faapena foʻi ona agaʻi i luma le faapotopotoga Kerisiano i aso nei, pe a faamālō ma faamalosiau toeaina i o latou uso ma tuafāfine.

Ina ia uigā le aʻoaʻo atu, e ao ona saʻoloto Kerisiano uma e tautatala atu. Na manaʻo Sieli lea na uluaʻi taʻua, e faamalosiau lana fanau e molimau i le aʻoga. Ua ia taʻua: “E ui sa ou ola aʻe i le upu moni, ae e seāseā ou molimau i le aʻoga. E seāseā foʻi oʻu molimau atu lē fuafuaina. Sa ou fesili iā te aʻu, “O le ā le faaaʻoaʻoga lea ua ou faataatia mo laʻu fanau?’” Sa uunaʻia e lenei mea Sieli e faia se taumafaiga tele e molimau lē fuafuaina atu ai.

 Ioe, e iloa e isi a tatou gaoioiga, ma mātau lo tatou lē taulau e faatatau mea ua tatou aʻoaʻo atu. O lea, ia saʻoloto e tautala atu, i le taumafai e faaōgatusa a tatou gaoioiga ma upu.

Tatalo e Aunoa ma le Faatalatū

E tāua le saʻoloto e tautala pe a tatou tatalo iā Ieova. E aunoa ma le faatalatū, e sasaa atu mea o i o tatou loto iā Ieova, ma le mautinoa o le a Ia faafofogaina ma talia a tatou tatalo. O le a tatou olioli ai i se faiā māfana ma le Tamā o i le lagi. Aua neʻi faatalatū e faalatalata iā Ieova, i le manatu ua tatou faatauvaa tele. Ae ā pe afai o o tatou lagona nofosala i se mea sesē po o se agasala, ua taofia ai le faia o faaupuga mai le loto? Pe e mafai pea ona tatou saʻoloto e faalatalata atu i le Silisili ese i le aoao o mea?

O le tulaga faaeaina o Iesu o se Ositaulaga Sili, ua faamaonia atili ai le mautinoa i le faia o tatalo. I le Eperu 4:15, 16, NW e faapea: “Auā e lē iā te i tatou se ositaulaga sili e lē mafaia ona tigā alofa faatasi ma i tatou i o tatou vaivai, a ua faaosoosoina o ia i mea uma pei o i tatou, a ua leai se agasala iā te ia. O le mea lea ia tatou faalatalata atu ai ma saʻoloto e tautala atu i le nofoālii o le alofa tunoa, ina ia alofaina ai o i tatou, ia maua ai foʻi le alofa tunoa e fesoasoani mai i ona aso e tatau ai.” O le aogā lea o le maliu o Iesu ma lana matafaioi o le Ositaulaga Sili.

Afai tatou te matuā saʻili e usiusitai iā Ieova, e mautinoa foʻi o le a Ia fiafia e faafofoga mai. Na tusi Ioane: “Le ʻau pele e, afai e lē faasala o tatou loto iā i tatou, e maua e i tatou le saʻolotoga tele e tautala atu ai i luma o le Atua. O mea uma foʻi tatou te ole atu ai, e maua mai iā te ia, auā ua tatou tausi i ana poloaʻiga, tatou te faia foʻi mea e lelei i ona luma.”—1 Ioane 3:21, 22, NW.

O le saʻoloto e faalatalata iā Ieova i le tatalo, o lo tatou taʻu atu lea o so o se mea iā te Ia. Po o ā mea o tatou matataʻu, ootia, fāʻatu, po o ni popolega o mafatia ai, e mafai ona taʻu atu uma iā Ieova, i le mautinoa o le a Ia faafofoga i a tatou tatalo faamaoni. E tusa pe na tatou faia se agasala matuiā, e lē taofia e lagona nofosala i tatou mai le tatalo, pe a salamō moni.

E tautele le meaalofa foaʻi fua o le saʻoloto e tautala. E ala i lenei meaalofa, ua tatou viia ai le Atua i le galuega talaʻi ma le aʻoaʻo atu, ma atili faalatalata atu ai iā te Ia i le tatalo. “Aua le lafoaʻi lo tatou saʻolotoga tele e tautala atu ai, auā ua i ai le taui e tele,” o le ola e faavavau.—Eperu 10:35, NW.

[Ata i le itulau 13]

Sa tautala ma le loto tele Paulo

[Ata i le itulau 15]

O le aʻoaʻo ma le uigā e manaʻomia ai le saʻoloto e tautala atu

[Ata i le itulau 16]

E tāua le saʻoloto e tautala atu i le tatalo