Po ua E Sauni mo le Faasaoina?

“Inā ulu atu ia o oe atoa ma lou aiga uma i le vaa; auā ua ou iloa oe o lē amiotonu i oʻu luma i lenei tupulaga.”—KENESE 7:1.

1. O le ā le sauniuniga na faia e Ieova mo le faasaoina i aso o Noa?

O IEOVA ‘na aumaia le lolo i le lalolagi faalēmataʻu’ i aso o Noa, ae na iai foʻi ma Lana sauniuniga mo le faasaoina. (2 Peteru 2:5) Sa manino faatonuga na avatu e le Atua iā Noa i le auala e fau ai le vaa, mo le faasaoina o ola mai se lolo mataʻutia. (Kenese 6:14-16) E pei lava o lona tulaga o se auauna faamaoni iā Ieova, ua taʻua faapea, “na faia foʻi e Noa e faapei ona poloaʻi atu ai le Atua iā te ia i mea uma.” Ioe, “sa faapea lava ona fai e ia.” O se tasi lea māfuaaga ua mafai ai ona tatou ola mai i aso nei, ona o le usiusitai o Noa.—Kenese 6:22.

2, 3. (a) Na faapeʻī le tali ane a tagata sa iai i na aso i le galuega a Noa? (e) O le ā le ituaiga o mautinoa na ulu atu ai Noa i le vaa?

² E lē o se galuega faigofie le fauina o le vaa. E mautinoa sa maofa le toʻatele o tagata i le galuega na mafai ona faataunuu e Noa ma lona aiga. Peitaʻi, e leʻi lava lenā galuega e faatalitonu ai, o lo latou faaolaina, e fua i lo latou ulu i totonu o le vaa. Ma na iʻu lava ina muta le onosaʻi o le Atua i lenā lalolagi amioleaga.—Kenese 6:3; 1 Peteru 3:20.

³ Ina ua mavae le tele o tausaga o galuega fitā a Noa ma lona aiga, ona fetalai mai lea o Ieova iā Noa: “Inā ulu atu ia o oe atoa ma lou aiga uma i le vaa; auā ua ou iloa oe o lē amiotonu i oʻu luma i lenei tupulaga.” Sa matuā faatuatua ma talitonu Noa i le afioga a Ieova, o lea “na ulu atu [ai o ia], ma ona atalii, ma lana avā, ma avā a ona atalii faatasi ma ia.” Na tapuni e Ieova le faitotoʻa ina ia puipuia ana auauna o i totonu. Ina ua lofia e le Lolo le lalolagi, e mautinoa sa mafai e le vaa na saunia e le Atua ona faasaoina ai ola.—Kenese 7:1, 7, 10, 16.

Mea e Tutusa ai Aso Nei ma Aso o Noa

4, 5. (a) O le ā na faatusatusa i ai e Iesu le taimi o lona faatasi mai? (e) O ā mea e tutusa ai aso o Noa ma o tatou foʻi aso?

⁴ “E pei o ona pō o Noa, e faapea foʻi pe a sau le Atalii o le tagata.” (Mataio 24:37) O fetalaiga nei a Iesu na faaalia ai, o le a tali tutusa aso o Noa ma le taimi o lona faatasi mai lē vaaia, ma o le tulaga moni lenā o loo iai. Aemaise talu mai le 1919, ua faalauiloa atu ai i tagata o nuu uma se feʻau e tai tutusa i le feʻau na folafola atu e Noa i tagata. Ma i se tulaga lautele, e tali tutusa foʻi le tali mai a tagata i aso nei i lenā feʻau, ma le tali mai a tagata i aso o Noa.

⁵ Na faaaogā e Ieova le Lolo e faaumatia ai se lalolagi ‘na tumu i le sauā.’ (Kenese 6:13) Sa mātaulia uma e tagata na matamata ane le tulaga ese o Noa ma lona aiga. Sa latou taumamao ese mai na faiga sauā, ae faaauau pea ma le fifilemu i le fauina o le vaa. E faapena foʻi le tulaga o loo tatou vaaia i aso nei. Ua mafai e tagata loto faamaoni ona latou ‘iloa le eseesega o lē amiotonu ma lē amio leaga; le eseesega o lē ua auauna i le Atua, ma lē ua lē auauna iā te ia.’ (Malaki 3:18) O uiga faamaoni, agalelei, fifilemu, ma le maelega o loo faaalia e Molimau a Ieova, o loo mataʻina i le tagatagaʻi mai a nisi tagata, ma o uiga nei ua iloga ai le eseesega o tagata o le Atua mai le tulaga lautele o loo iai le lalolagi. E teena e  Molimau faiga sauā uma, ae naunau ia taʻitaʻia i latou e le agaga o Ieova. O le iʻuga, ua iā i latou le filemu ma ua māfua ai foʻi ona latou iai i se ala amiotonu.—Isaia 60:17.

6, 7. (a) O le ā sa leʻi taulau ona iloa e tagata i aso o Noa, ma ua faapefea ona tutusa ma aso nei? (e) O ā ni faaaʻoaʻoga e faaalia ai, ua mātaulia i le lautele le ese mai o Molimau a Ieova?

⁶ Sa leʻi taulau ona iloa e i latou na ola i le vaitaimi o Noa faapea, o le Atua na lagolagoina Noa, ma sa mulimuli foʻi Noa i le taʻitaʻiga a le Atua. O le iʻuga, na latou manatu māmā ai i le talaʻiga a Noa, ma lē ano i lana feʻau lapataʻi. E faapefea i aso nei? E ui e toʻatele o loo maofa i le galuega ma amio a Molimau a Ieova, ae o le toʻatele lava e lē o ano mai i le galuega talaʻi ma feʻau lapataʻi a le Tusi Paia. Atonu e viiviia e tuaoi, o pule i galuega, po o tauaiga foʻi, ni uiga lelei o Kerisiano moni; peitaʻi e toe sau ai lava ma le faamatalaga, “Ae pau lava le itu e seu ai, ona e Molimau a Ieova!” O le mea o loo galo i nei tagata, ua māfua ona faaali e Molimau na uiga e pei o le alofa, filemu, agalelei, agamalu, ma le pulea totino, ona ua taʻitaʻia i latou e le agaga paia o le Atua. (Kalatia 5:22-25) O lo latou faaalia o nei uiga ua tatau ona matuā talitonuina ai le moni o la latou feʻau.

⁷ Mo se faataʻitaʻiga, i Rusia na fausia ai e Molimau a Ieova se Maota mo a latou sauniga. Na taʻua e se tamāloa na afe ane ma talanoa i se tasi o le ʻaufaigaluega: “E matuā ese lava lenei galuega; e leai se tasi e ulaula, leai ni gagana matagā, leai foʻi se tasi e onā! Faamata o oe o se Molimau a Ieova?” Ona fesili atu lea i ai o le uso sa galue: “Ae faamata e te talitonu pe a ou fai atu e leai?” Na vave ona toe tali ane le tamāloa: “Ailoga.” I se isi aai i Rusia, na matuā maofa ai lava le pulenuu o le aai ina ua vaai o fausia e Molimau so latou Maota fou mo sauniga. Na ia taʻua, e ui o lona manatu sa iai muamua e tutusa uma lava lotu, ae ina ua ia mātauina le faaalia e Molimau a Ieova o o latou uiga lē manatu faapito, o inā lava na suia ai lona manatu. Ua na o ni faaaʻoaʻoga nei se lua e faaalia ai, e ese tagata o Ieova mai iā i latou e lē o utagiaina tapulaa a le Tusi Paia.

8. O le ā e faalagolago i ai le faasaoina o i tatou i le iʻuga o lenei lalolagi amioleaga?

⁸ I le vaitaimi faaiʻuiʻu o le “lalolagi tuai” lea na faaumatia i le Lolo, sa galue ai Noa o “lē talaʻi le amiotonu.” (2 Peteru 2:5) I nei aso e gata ai o le faiga o mea, o loo faailoa atu e auauna a Ieova ana tapulaa amiotonu ma folafola atu le tala lelei e faatatau i le avanoa e ono faasaoina atu ai i le lalolagi fou. (2 Peteru 3:9-13) E pei lava ona faasaoina Noa ma lona aiga i le vaa talu ai lo latou matataʻu i le Atua, e faapena foʻi ona faalagolago le faasaoina o tagata i aso nei, i lo latou faatuatua ma lo  latou auaumea faamaoni ma le vaega o i le lalolagi o le faalapotopotoga aoao a Ieova.

Manaʻomia le Faatuatua mo le Faasaoina

9, 10. Aiseā e matuā manaʻomia ai le faatuatua ina ia faasaoina i tatou i le iʻuga o le faiga o mea a Satani?

⁹ O le ā e tatau ona fai e se tasi ina ia faasaoina ai mai le faaumatiaga ua matuā lalata mai, o lenei lalolagi ua pulea e Satani? (1 Ioane 5:19) Muamua, e ao i se tasi ona ia amanaʻia lona manaʻomia o se puipuiga, ma tatau loa ona ia faaaogā lelei lenā puipuiga. Sa ola tagata i aso o Noa i le olaga masani, ma latou lē amanaʻia ai se manaʻoga mo le puipuia o i latou mai le mala na faaloloʻi ane. E iai ma se isi mea na latou misia—o le faatuatua i le Atua.

¹⁰ I se faaeseesega, na amanaʻia e Noa ma lona aiga lo latou manaʻomia o se puipuiga ma se faaolataga. Na faaalia foʻi lo latou faatuatua i le Pule Silisili Ese Aoao, o Ieova le Atua. Na tusi le aposetolo o Paulo: “A leai foʻi se faatuatua e lē mafai ona fiafia mai [Ieova]; auā e tatau i lē alu atu i le Atua ona talitonu o loo soifua o ia, o ia foʻi na te tauia mai o ē matuā saʻili iā te ia.” Na ia toe faapea mai: “O le faatuatua na fausia ai e Noa le vaa ina ua mataʻu, e ola ai lona aiga, ina ua aʻoaʻoina e le Atua i mea e leʻi vaaia i ia ona pō, na ia faasalaina ai le lalolagi, ua na maua ai foʻi le amiotonu, o le amiotonu lea e i le faatuatua.”—Eperu 11:6, 7.

11. O le ā se lesona tatou te aʻoaʻoina mai le auala na saunia ai e Ieova le puipuiga i taimi ua teʻa?

¹¹ Ina ia tatou sao mai i le iʻuga o lenei faiga leaga o mea, e iai nisi mea e tatau ona tatou faia na i lo le tau ina talitonu o le a faaumatia. E tatau ona faaalia le faatuatua, ia faaaogā atoatoa sauniuniga a le Atua mo lo tatou faasaoina. O le mea mautinoa, e manaʻomia ona tatou faaalia le faatuatua i le taulaga togiola a le Alo o le Atua, o Iesu Keriso. (Ioane 3:16, 36) Ae peitaʻi, e tatau ona tatou manatua, e na o i latou sa i totonu o le vaa o Noa, na faasaoina mai le Lolo. E faapena foʻi i aai o le sulufaʻiga i Isaraelu anamua; na faatoʻā mafai ona puipuia ai se tasi e fasioti tagata paʻi valea, pe afai e sola atu i se tasi o na aai, ma nofo ai pea i inā seʻia maliu le ositaulaga sili. (Numera 35:11-32) I le mala lona sefulu lea na taia ai Aikupito i aso o Mose, sa fasiotia ulumatua a Aikupito ae faasao na o ulumatua a Isaraelu. Aiseā? Na avatu le faatonuga a Ieova iā Mose: “Ia latou [fanauga a Isaraelu] ave foʻi nisi toto [o le tamaʻi mamoe o le Paseka], ma avatu i pou e lua o le faitotoʻa ma ona faalava i luga i o latou fale latou te aai ai. . . . Aua foʻi neʻi [iai] so outou e ulufafo atu  i le faitotoʻa o lona fale seʻia oo i le taeao.” (Esoto 12:7, 22) Faamata na iai se ulumatua a Isaraelu sa fia loto tele ma musu e utagia na faatonuga maʻoti mai le Atua?

12. O le ā le fesili e tatau i tagata taʻitoʻatasi ona fesili ifo ai iā te ia lava, ma aiseā?

¹² Ua iai la māfuaaga e tatau ai ona tatou mafaufau mamafa i o tatou lava tulaga. Po o tatou iai atoatoa i totonu o le faatulagaga a Ieova mo lo tatou puipuiga faaleagaga? Pe a gāpā le puapuaga tele, o le a vaaia loimata o le olioli ma le faafetai o i latou na saʻili atu mo lenā puipuiga. Ae mo isi, o le a na o loimata o le faanoanoa ma le salamō.

Fetuunaʻiga Faasolosolo e Sauniunia ai Tatou

13. (a) O le ā se aogā o fetuunaʻiga ua faia e le faalapotopotoga? (e) Faamatala nisi o fetuunaʻiga na faasolosolo mai ona fai.

¹³ Ua aumaia e Ieova ni fetuunaʻiga faasolosolo i le vaega o i le lalolagi o lana faalapotopotoga. Ua mafai e nei fetuunaʻiga ona faatulaga lelei, faamautū, ma faamausalī atili lana faatulagaga mo lo tatou puipuiga faaleagaga. I vaitausaga o le 1870 e oo mai i le 1932, sa palota tagata o le faapotopotoga ina ia maua tofiga o toeaina ma tiakono (po o auauna o le faiva). I le 1932, na lē toe palotaina ai toeaina, ae ua filifilia e le faapotopotoga se komiti o le auaunaga e fesoasoani atu i le uso sa tofia e fai ma faatonu o le auaunaga. A o faagasolo le 1938, na fuafua ai le faatinoina i se faiga faale-Atua o le tofiaina o auauna i le faapotopotoga. Ae talu mai le 1972 i le taʻitaʻiga a le Vaega Pule o Molimau a Ieova, na faatulaga ai faapea, e faatutū mai igoa o ni uso ma faia i ai se filifiliga, ma pe afai e talia, ona tusi lea i faapotopotoga, e faailoa ai le tofiaina faale-Atua o ovasia ma auauna o le faiva. A o faagasolo taimi, o loo faatuputeleina pea le matafaioi o loo fai e le Vaega Pule, ma e iai foʻi ni suiga ua fai ina ia sologa lelei le faatinoga o ana galuega.

14. O le ā le polokalame tau aʻoaʻoga na amata i le 1959?

¹⁴ I tuā i le 1950, sa faia ai se iloiloga totoʻa i le Salamo 45:16, ma iʻu ai i se polokalame o aʻoaʻoga faifai pea. E faitauina faapenei lenā mau: “E suia ou tamā i ou alo; e te tofia i latou e fai ma alii sili i le lalolagi uma.” O toeaina o loo taʻimua nei i le faapotopotoga, ua uma ona toleniina i latou mo tiute tauave mai le Atua, e lē gata mo le taimi nei, ae i le lumanaʻi pe a mavae Amaketo. (Faaaliga 16:14, 16) O le 1959 na amata ai le Aʻoga o le Faiva o le Malo. I lenā taimi, sa faagasolo ai se aʻoaʻoga mo le umi e tasi le masina, mo faatonuga e patino lava i auauna o le faapotopotoga, o le taʻu lenā sa taʻu ai ovasia taʻimua i na aso. I aso nei, ua faalautele atu lenā aʻoga ina ia maua e ovasia uma ma auauna o le faiva faatonuga. Mulimuli ane, ua faapena foʻi ona taʻimua nei uso i le aʻoaʻoina o auauna uma taʻitoʻatasi a Ieova i a latou faapotopotoga o iai. Ona maua ai lea e tagata uma lava le fesoasoani faaleagaga ma atili ai ona uigā la latou faiva o nisi e folafola le tala lelei o le Malo.—Mareko 13:10.

15. O ā laasaga e lua o loo fai mo le puipuia o le mamā o le faapotopotoga Kerisiano?

¹⁵ O tagata uma e fia avea ma sui o le faapotopotoga Kerisiano, e tatau ona latou usitaia ni tuutuuga manaʻomia. O le mea moni, e lē faatagaina tagata faatauemu i aso nei e fai ma sui o le faapotopotoga, e pei foʻi ona sa lē  maua e tagata faatauemu i aso o Noa se avanoa e ulu ai i totonu o le vaa. (2 Peteru 3:3-7) Aemaise talu mai le 1952, na lagolagoina ai e Molimau a Ieova se faatulagaga ua faamaninoina atili mo le puipuia o le faapotopotoga—o le faateʻaina lea o tagata e faia le agasala ae lē salamō. E mautinoa lava, o tagata faimea sesē e salamō moni, e avatu i ai le fesoasoani alofa ina ia ‘faalaulelei ala mo o latou vae.’—Eperu 12:12, 13; Faataoto 28:13; Kalatia 6:1.

16. O le ā le tulaga faaleagaga o tagata o Ieova?

¹⁶ O le olaola o le tulaga faaleagaga o tagata o Ieova, e lē o se mea e faateʻia ai, ma e leʻi faafuaseʻi foʻi ona iai. Na fetalai Ieova e ala mai i le perofeta o Isaia: “Faauta mai, e aai aʻu auauna, a o outou tou te fia aai; faauta, e feinu aʻu auauna, a o outou tou te fia inu; faauta, e olioli aʻu auauna, a o outou tou te mamā; faauta, e alalaga aʻu auauna ona o le loto fiafia, a o outou tou te faataiō ona o le loto tigā, ma outou uiō ona o le loto momomo.” (Isaia 65:13, 14) O loo saunia mai pea e Ieova mo i tatou le anoanoaʻi o taumafa tatau faaleagaga, ina ia tausia pea lo tatou malosi faaleagaga.—Mataio 24:45.

Nofosauni mo le Faasaoina

17. O le ā le mea o le a fesoasoani e sauniunia ai i tatou mo le faasaoina?

¹⁷ E leʻi iai lava se isi taimi e pei o le taimi lenei, ua tatau ai ona tatou ‘manatunatu le tasi i le tasi, ina ia taufaatupu le alofa ma galuega lelei; aua le lafoaʻiina le faapotopotoina o i tatou e pei o le masani a isi, a ia fefaamāfanafanaʻi.’ (Eperu 10:23-25) O lo tatou auaumea faatasi ma felagolagomaʻi ma isi i le silia i le 98,000 faapotopotoga o Molimau a Ieova, o le a mafai ai ona sauniunia i tatou mo le faasaoina. O le a lagolago mai o tatou uso talitonu, a o tatou tauivi e faaali atu “le tagata fou” ma fai taumafaiga ma le loto atoa e fesoasoani i isi ina ia latou malamalama i sauniuniga a Ieova mo le faaolataga.—Efeso 4:22-24; Kolose 3:9, 10; 1 Timoteo 4:16.

18. Aiseā ua e filifili maumauaʻi ai e piiama atu i le faapotopotoga Kerisiano?

¹⁸ E naunau tele Satani ma lana lalolagi leaga e faaosoosoina i tatou ma tataʻi ese mai le faapotopotoga Kerisiano. Peitaʻi e mafai lava ona tatou tutumau i le faapotopotoga Kerisiano ma sao atu i le iʻuga o lenei faiga leaga o mea. Tau ina ia avea lo tatou alofa mo Ieova ma le talisapaia o ana sauniuniga alofa, e uunaʻia ai i tatou ia matuā filifili maumauaʻi nei e tetee atu i faaosoosoga a Satani. O le manatunatu loloto i o tatou faamanuiaga i le taimi nei o le a faamalosia atili ai la tatou filifiliga. O le a talanoaina i le mataupu o sosoo mai nisi o nei faamanuiaga.

O ā Au Tali?

• Ua faapefea ona tutusa o tatou aso, i aso o Noa?

• O le ā le uiga e manaʻomia tele mo le faasaoina?

• O ā fetuunaʻiga faasolosolo ua faamausalī ai le faatulagaga a Ieova mo lo tatou puipuiga?

• E mafai faapefea e i tatou lava ia ona sauniuni mo le faasaoina?

[Fesili mo le Suʻesuʻega]

[Ata i le itulau 22]

Sa manatu māmā i latou na ola i le vaitaimi o Noa i le feʻau na ia avatu

[Ata i le itulau 23]

E aogā le manatu mamafa i feʻau lapataʻi a le Atua

[Ata i le itulau 24]

O le ā le fuafuaga mo le Aʻoga o le Faiva o le Malo?

[Ata i le itulau 25]

O le taimi lenei e piiama atu ai i le faapotopotoga Kerisiano