Fesili Mai le ʻAufaitau

I le Tulafono a Mose, aiseā na manatu ai i le tulaga masani o le alu ese o le sua o le tane, ma le maʻi masina o le fafine, o se mea e “leaga” pe lē mamā ai se tagata?

Na faatulaga e le Atua le faia o feusuaʻiga, e lē gata mo le fanauina mai o tagata, ae mo se fiafiaga foʻi o ulugalii faaipoipo. (Kenese 1:28; Faataoto 5:15-18) Peitaʻi, i le mataupu e 12 ma le 15 o le Levitiko, o loo auʻiliʻili mai ai tulafono e faatatau i mea e lē mamā, e pei o le alu ese o le sua o le tane, le maʻi masina o le fafine, ma le fanau mai o se pepe. (Levitiko 12:1-6; 15:16-24) O tulafono na sa avatu iā Isaraelu anamua e faalelei atili ai le ola mālōlōina, le faatāuaina o amioga mamā, ma faamamafa ai le paia o le toto ma le manaʻoga mo se togiola o agasala.

O mea sa manaʻomia e le Tulafono a Mose e faatatau i le tulaga masani o le alu ese o le sua o le tane ma le maʻi masina o le fafine, sa faatāua ai le soifua mālōlōina lautele o tagata Isaraelu. O loo taʻua i le tusi The Bible and Modern Medicine e faapea: “O le usitaia o le tulafono i le faasāina ona toe faia o ni feusuaʻiga a o alu le maʻi masina o le fafine, o se tulafono ua aogā tele mo le puipuia ai mai nisi o faamaʻi e māfua i feusuaʻiga . . . ma o se matuā puipuiga foʻi i le ono aafia ai i le kanesa o le totoga fanau.” O na tulafono na puipuia ai tagata o le Atua mai le aafia i ni faamaʻi sa leʻi iloa pe latou te leʻi ono mateʻia foʻi. O le mālōlōina lelei o o latou totoga fanautama, sa atili ai ona faatoʻateleina tagata o le nuu, lea sa faamanuia i ai le Atua ina ia faatoʻateleina ma faateleina lo latou tamaoaiga. (Kenese 15:5; 22:17) Sa iai foʻi se aogā i faalogona o tagata o le Atua. O le usitaia o nei tulafono, na mafai ai e tane ma avā ona pulea lelei o latou manaʻoga tau feusuaʻiga.

Peitaʻi, e iai se isi mataupu sa sili atu ona tāua i mea na manatu i ai e lē mamā, e māfua mai i totoga fanautama. O lea mataupu, o le tafe ese po o le alu ese o le toto. E tusa ai o tulafono a Ieova mo le toto, o mea nei sa mautinoa lelei e tagata Isaraelu e faatatau i le toto. E lē gata e paia le toto, ae e iai foʻi sona faaaogāina faapitoa i le tapuaʻiga a Ieova, ua taʻua lea, o le faaaogāina i taulaga ma le totogia o agasala.—Levitiko 17:11; Teuteronome 12:23, 24, 27.

E felataʻi la le sootaga a mea o loo manaʻomia e le Tulafono i lenei vala, ma le tulaga lē lelei atoatoa o le tagata. Na iloa e le fanauga a Isaraelu e faapea, talu mai ona agasala Atamu ma Eva, ua lē mafai ona la fanauina mai ni fanau e lelei atoatoa. O le a mafatia uma a la fanau i aafiaga o le agasala tuufaasolo—le lē lelei atoatoa ma le oti. (Roma 5:12) O lea, ua faasolo mai ai e mātua se olaga e lē lelei atoatoa ma le iʻuvale, e ui lava sa muaʻi fuafuaina totoga fanautama o le tagata, e faasolo mai ai se ola lelei atoatoa pe a feusuaʻi se ulugalii faaipoipo.

O āiāiga la a le Tulafono i le tausia o le mamā, ua faamanatu ai i tagata Isaraelu lo latou tulaga agasala tuufaasolo, faapea foʻi lo latou manaʻomia o se taulaga togiola, ina ia faamagalo ai agasala ma toe faafoʻisia le lelei atoatoa o le tagata. E mautinoa sa lē mafai e taulaga na osia i manu, ona faataunuu lenā mea. (Eperu 10:3, 4) O le fuafuaga o le Tulafono a Mose, ina ia taʻitaʻia i latou iā Keriso ma latou iloa ai, e na o le taulaga na osia i le tino faaletagata lelei atoatoa o Iesu, na mafai ona maua ai se faamagaloga moni, ma tatala ai le ala mo ē faamaoni e taʻitaʻia atu ai i le ola e faavavau.—Kalatia 3:24; Eperu 9:13, 14.