O Loo Ola le Afioga a Ieova

Manatu Tāua Mai le Vaega Lona Lua o le Tusi o Salamo

ONA o i tatou o auauna a Ieova, e tatou te faatalitalia puapuaga ma tofotofoga e oo iā i tatou. Na tusi le aposetolo o Paulo: “O i latou uma foʻi o ē loto ina nonofo ma le amio Atua iā Keriso Iesu, e sauāina i latou.” (2 Timoteo 3:12) O le ā e fesoasoani iā i tatou e onosaʻia ai puapuaga ma sauāga, lea e faamaonia ai lo tatou faamaoni i le Atua?

O le lona lua, o vaega e lima o salamo o loo aumai ai lenā fesoasoani. O le Salamo 42 e oo i le 72 ua faaalia ai faapea, pe afai e tatou te mananaʻo e taulau manuia i le onosaʻia o puapuaga, e ao ona tatou tuu atu lo tatou faatuatuaga atoatoa iā Ieova ma faatalitali atu iā te ia mo le laveaʻia o i tatou. Maʻeu se lesona tāua tele mo i tatou! O le feʻau o loo i le Vaega Lona Lua o le Tusi o Salamo, e pei lava foʻi o isi vaega o le Afioga a le Atua, e mautinoa lava o loo ‘ola ma o loo matuā galue foʻi’ e oo lava i aso nei.—Eperu 4:12.

O IEOVA O LO TATOU ‘MALU MA LE MALOSI’

(Salamo 42:1–50:23)

O loo faaaunuua se sā Levī. Ona o le faanoanoa ona e lē o mafai ona toe alu atu i le malumalu o Ieova e tapuaʻi ai, na ia faamāfanafanaina ai o ia e faapea: “Loʻu agaga e, se ā ea le mea ua e faanoanoa ai? ma e atuatuvale ai i totonu ia te aʻu? ia e faamoemoe i le Atua.” (Salamo 42:5, 11; 43:5) O le toe aliali mai o lenei fuaiupu ua fesootaʻi ai vaega e tolu o Salamo 42 ma le 43 i se solo se tasi. O le Salamo 44 o se talosaga mo le nuu o Iuta—o se nuu ua pagatia, atonu ona o le faamataʻu ane o osofaʻiga a ʻautau a Asuria i aso o le tupu o Esekia.

O le Salamo 45, o se pese e faatatau i le faaipoipoga a se tupu, o loo faavaloaga atu i le Tupu ma o le Mesia. O salamo e tolu o loo sosoo mai, o loo faaataina ai Ieova o “le malu ia ma lo tatou malosi,” “o le Tupu silisili ia i le lalolagi atoa,” ma o le “ʻolo maualuga.” (Salamo 46:1; 47:2; 48:3) Maʻeu le matagofie o le faaalia mai e le Salamo 49 e faapea, e lē mafai lava e se tagata “ona faatau i lona uso”! (Salamo 49:7) O uluaʻi salamo e valu o le vaega lona lua e manatu faapea na tusia e atalii o Koru. O le lona iva, o le Salamo 50, na tusia e Asafo.

Taliina o Fesili Faale-Tusi Paia:

44:19—O le ā “le mea o i ai tānimo”? Atonu na faasino atu le faisalamo i se tafā o taua, lea na avea ai i latou na fasiotia, e fai ma meaʻai a tānimo po o luko.

45:13, 14a—O ai “le alofafine o le Tupu” lea e faapea, o le a “taʻitaʻiina o ia i le Tupu”? O ia o le alofafine po o le afafine o le “Tupu o augātupulaga,” o Ieova le Atua. (Faaaliga 15:3) Ua fai o ia ma sui o le faapotopotoga faamamaluina, o Kerisiano e 144,000, lea ua avea ma fanau fai a Ieova e ala i le faauuina o i latou i lona agaga paia. (Roma 8:16) O lenei “alofafine” o Ieova, “ua saunia pei o se faatoʻānofotane ua teuteuina mo lana tane,” o le a auina atu i lana tane—o le Tupu ma o le Mesia.—Faaaliga 21:2.

45:14e, 15—O ai o loo faaataina e “taupou”? O le “motu o tagata e toʻatele” o tagata tapuaʻi moni, o loo aufaatasi ma fesoasoani i le vaega totoe faauuina. Ona o loo latou “ō mai nai le  puapuaga tele” o loo ola pea, o le a latou iai la i inei i le lalolagi i le taimi e māeʻa ai le faaipoipoga a le Tupu ma o le Mesia i le lagi. (Faaaliga 7:9, 13, 14) Ona o lenā tulaga, o le a faatumulia i latou i le “fiafia ma le olioli.”

45:16—O le ā le auala o le a suia ai tamā e avea ma alo? Ina ua soifua mai Iesu i le lalolagi, sa iai ona augātamā faalelalolagi. O le a avea i latou ma ona alo pe a ia toe faatutū mai i latou nai le oti a o faagasolo le Afe Tausaga o lana Pulega. O nisi o i latou o le a tofia e fai ma “alii sili [po o aloalii] i le lalolagi uma.”

50:2—Aiseā ua taʻua ai Ierusalema o “le mea e silisili ese ona matagofie”? E leʻi taʻua ona faapea e matagofie le foliga mai o lona aai. Ae o le mea e aupito sili ona matagofie ai Ierusalema, ona na faaaogā e Ieova ma faamatagofieina i le avea ma nofoaga na faatūina ai lona malumalu, ma o le aai mo ana tupu faauuina.

Lesona mo i Tatou:

42:1-3. I le pei o se ʻaila fafine, i se vaipanoa mātūtū o loo naunau atu i se vai, sa faapena le sa Levī ona naunau atu iā Ieova. Ona o le matuā faanoanoa o lenei tagata i le lē mafai ona tapuaʻi atu iā Ieova i Lona malumalu, lea na avea ai ‘ona loimata ma ana mea e ʻai i le ao ma le pō’—na lē lagona sona fiaʻai. Pe lē tatau ea ona tatou ati aʻe se talisapaia loloto mo le tapuaʻiga iā Ieova i le aufaatasi ma uso talitonu?

42:4, 5, 11; 43:3-5. Pe afai e iai ni māfuaaga lē maʻalofia ua tatou lē fesootaʻi ai ma le faapotopotoga Kerisiano mo sina taimi, o lea, o le manatuaina o na aufaatasiga fiafia i aso ua mavae e faatumauina ai pea i tatou. Atonu o le taimi muamua, o le manatu i na taimi fiafia ma le faapotopotoga e faaopoopo atu i lagona faanoanoa ona o le tuua toʻatasi, ae e faamanatu mai ai foʻi iā i tatou o le Atua o lo tatou malu, ma e manaʻomia ona tatou faatalitali atu iā te ia mo se mapusaga.

46:1-3. Po o ā lava mala e oo mai iā i tatou, e ao lava ona iai lo tatou faatuatuaga atoatoa o le “Atua, o lo tatou malu ia ma lo tatou malosi.”

50:16-19. O so o se tasi lava e tautala faapiʻopiʻo ma faia amioga leaga, e lē tatau ona tautala e fai o ia ma sui o le Atua.

50:20. Na i lo le naunau e faamatala atu sesē o isi, e ao ona tatou lē amanaʻiaina na sesē.—Kolose 3:13.

“LOʻU AGAGA E, E TE FAALOLOGO LAVA I LUMA O LE ATUA”

(Salamo 51:1–71:24)

O le vaega lenei o salamo e amata i le tatalo a Tavita mai lona loto ua ootia, ina ua uma ona agasala ma Patesepa. O le Salamo 52 seʻia oo i le 57 e faaalia faapea, o le a faasaoina e Ieova i latou e tuu atu o latou popolega iā te ia ma faatalitali atu iā te ia mo le faaolataga. E pei ona faamatalaina i le Salamo 58-64, i ona puapuaga uma, sa fai lava e Tavita Ieova ma ona malu. Na ia pese: “E moni loʻu agaga e, e te faalologo lava i luma o le Atua; auā [e] mai iā te ia lava loʻu faamoemoe.”—Salamo 62:5.

O le iai o se faiā māfana ma Lē na te Laveaʻia i tatou e ao ona uunaʻia ai i tatou e “pepese atu i lona suafa mamalu.” (Salamo 66:2) Ua viiviia Ieova o Lē saunia ma le agalelei mea i le Salamo 65, o loo taʻua o ia o le Atua o le olataga i le Salamo 67 ma le 68, ae o loo taʻua o le Fesoasoani ma o le Faaola i le Salamo 70 ma le 71.

Taliina o Fesili Faale-Tusi Paia:

51:12—O le “loto fiafia” o ai na talosaga Tavita e taofimauina o ia? E lē o faasino atu i le loto o le Atua e fesoasoani iā Tavita po o le agaga paia o Ieova, ae o loo faasino atu i le loto o Tavita lava ia—o faanaunauga o lona lava mafaufau. O loo ia talosaga atu i le Atua e aumai iā te ia le faanaunauga e fai ai le mea ua tonu.

 53:1—E faapefea ona avea le tagata e tetee i le iai o le Atua ma tagata “valea”? O le valea i inei e lē o faasino atu i le leai o se atamai faalemafaufau. O le valea o lea tagata, e masani ona iloa mai le suʻesuʻeina o iʻuga o le fāiifo o tulaga lelei tau amio lea e faamatalaina i le Salamo 53:1-4.

58:3-5—O le ā le auala ua pei ai le tagata amioleaga o se gata? O pepelo o loo latou faamatalaina e faatatau i isi ua pei o se ʻona o se gata. E latou te faaleagaina talaaga lelei o i latou o loo faia i ai faamatalaga taufaaleaga. Ua “pei o le asipi [gata] tutuli ua ia punitia ona taliga,” e faapena ona lē fia faalogo tagata amioleaga i ni taʻiala po o ni faasaʻoga.

58:7—E faapefea i tagata amioleaga ona “liu suāvai i latou, ia pei o le vai ona mavae atu”? Atonu na mafaufau atu Tavita i ni vai o loo tatafe i vanu o le Nuu o le Folafolaga. A o pa mai tafega ma faateleina ai vai i na vanu, ae o na vai e vave lava ona toe mou atu. Na tatalo Tavita ina ia vave ona mou ese atu le tagata amioleaga.

68:13—E faapefea i “apaʻau o le lupe [ona] liloia i ario, ma ona fulu e liloia i le auro samasama”? O nisi o lupe e pei a lanu efuefu e feʻilafi iila mai nisi o latou fulu. O o latou fulu uma e pei o se apamemea lo latou foliga mai i le susulu o le lā. Atonu na faatusa e Tavita tagata tau o Isaraelu ua manumalo mai se taua, i se lupe faapena—e malolosi apaʻau, ma iila lona foliga mai. E manatu nisi o tagata atamamai o le Tusi Paia e faapea, e fetaui foʻi le faaupuga, i se galuega alofilima mataʻina, po o se ipu faamanatu o se manumalo ua avea ma vete. Po o le ā lava le tulaga, ae o lea sa faasino atu manatu o Tavita i manumalo na sa tuuina atu e Ieova i ona tagata e faatoʻilalo ai o latou fili.

68:18—O ai “mea alofa mo tagata”? O i latou nei o tane mai iā i latou na faatagataotauaina i le taimi na faatoʻilaloina ai le Nuu o le Folafolaga. O tane na sa tofia mulimuli ane e fesoasoani i le ʻau sa Levī i la latou galuega.—Esera 8:20.

68:30—O le ā le uiga o le talosaga ia “aʻoaʻi i manu feʻai o i mea ūa”? I le tautala faafaatusa i fili o tagata o Ieova e pei o ni manu feʻai, na talosaga ai Tavita i le Atua ina ia aʻoaʻia i latou, pe ia taofia lo latou malosi e faia ai mea leaga.

69:23—O le ā le uiga o le ‘tetemū o sulugātiti o le fili’? O maso i sulugātiti e tāua i le faia o galuega mamafa, e pei o le sii aʻe ma le amoina o avega mamafa. Ae o sulugātiti e tetemū e taʻu mai ai le leai o se malosi o iai. Na tatalo Tavita ina ia aua neʻi iai se malosi i ona fili.

Lesona mo i Tatou:

51:1-4, 17. O le faia o se agasala e lē faapea ai ua faaleagaina la tatou faiā ma Ieova le Atua. Afai e tatou te salamō, e mafai ona tatou mautinoa lona alofa mutimutivale.

51:5, 7-10. Afai e tatou te agasala, e mafai ona tatou talosaga atu iā Ieova mo le faamagaloga, ona o le agasala tuufaasolo. E ao foʻi ona tatou tatalo iā te ia ina ia faamamā iā i tatou, ia toe faafoʻisia  lo tatou tulaga lelei, ia fesoasoani iā i tatou ina ia aveesea faanaunauga agasala mai o tatou loto, ma foaʻi mai se loto mau i totonu o i tatou.

51:18. O le agasala a Tavita na faamataʻuina ai le tulaga lelei o le nuu atoa. O lea na ia tatalo ai mo le finagalo alofa o le Atua mo Siona. Pe afai e tatou te faia se agasala matuiā, e masani lava ona taʻuleagaina ai le suafa o Ieova faapea ma le faapotopotoga. E manaʻomia ona tatou tatalo i le Atua ina ia toe faaleleia tulaga leaga ua māfua ona o i tatou.

52:8. E mafai ona tatou “pei o se olive [o loo] tāuluulu ola i le fale o le Atua”—i le vavalalata atu iā Ieova ma fua tele mai i lana auaunaga—e ala i le usiusitai iā te ia ma talia ma le lotomalie lana aʻoaʻiga.—Eperu 12:5, 6.

55:4, 5, 12-14, 16-18. O faufauga leaga a lona lava atalii o Apisaloma ma le taufaalata o lana faufautua faamoemoeina o Aitofele, na māfua ai le matuā tigā o faalogona o Tavita. E ui i lea, e leʻi faaitiitia ai le faalagolago atu o Tavita iā Ieova. E lē tatau ona faatagaina le tigā o o tatou faalogona e faaitiitia ai lo tatou faatuatuaina o le Atua.

55:22. E faapefea ona tuuina atu mea e tatou te popole vale ai iā Ieova? E tatou te faia faapea (1) i le tatalo atu iā te ia i mea o loo tatou popole vale ai, (2) i lo tatou faalagolago atu i lana Afioga ma le faalapotopotoga mo le taʻitaʻiga ma le fesoasoani, ma (3) le faia o mea e talafeagai ona tatou fai ina ia faaitiitia ai popolega.—Faataoto 3:5, 6; 11:14; 15:22; Filipi 4:6, 7.

56:8. E silafia e Ieova e lē gata i lo tatou tulaga o loo iai, ae faapea foʻi ma aafiaga e aumaia ai i o tatou faalogona.

62:11. E lē faalagolago le Atua i so o se puna lava o le malosi mai i se isi mea. O ia lava o le puna o le malosi. “O i le Atua le malosi.”

63:3. O le ‘alofa agalelei o le Atua e sili ona lelei lea i le ola’ ona a leai le alofa agalelei, e leai se aogā ma se fuafuaga o le olaga. O se gaoioiga atamai lo tatou ati aʻe o se faauōga ma Ieova.

63:6. I le pō—ua toʻafilemu ma ua leai se mea e faalavelave ai—e mafai ona avea o se taimi sili ona lelei e mafaufau loloto ai.

64:2-4. O tala taufaaleaga e faaleagaina ai le igoa lelei o se tagata o loo mamā. E lē tatau ona tatou faalogo atu i na tala taufaaleaga pe faasalalau atu foʻi.

69:4. Ina ia tatou tausia le filemu, i nisi taimi atonu e sili ai ona toe “avatua” e ala i le faatoese, e tusa lava pe e leʻi faamaonia lo tatou faia o se mea sesē.

70:1-5. E faafofoga Ieova i a tatou faatoga pe a manaʻomia faanatinati se fesoasoani. (1 Tesalonia 5:17; Iakopo 1:13; 2 Peteru 2:9) E ono faataga e Ieova se puapuaga e faaauau, ae e na te aumaia foʻi iā i tatou le atamai e feagai ai ma lenā tulaga, faapea ma le malosi ina ia tumau ai. E na te lē faatagaina i tatou e tofotofoina i talaatu o le mea e tatou te gafatia.—1 Korinito 10:13; Eperu 10:36; Iakopo 1:5-8.

71:5, 17. Na tupu aʻe le loto tele ma le malosi o Tavita i lona avea o Ieova ma ona faatuatuaga i le taimi o talavou—e oo lava i le taimi a o leʻi fesagaʻi ma le Filisitia tinoese o Koliata. (1 Samuelu 17:34-37) E sili atu foʻi ona lelei le faalagolago o talavou iā Ieova i mea uma latou te fai.

“Ia Tumu Foʻi le Lalolagi Uma i Lona Mamalu”

O le pese mulimuli o le vaega lona lua o salamo o le Salamo 72, lea e faatatau atu i le pulega a Solomona, lea o loo faaata mai ai tulaga o le a iai i le pulega a le Mesia. Maʻeu ni faamanuiaga matagofie o le a iai i inā—o le a tele le filemu, o le a iʻu faiga leaga ma faiga sauā, ma o le a tele taumafa o le a iai i le lalolagi! Po o le a tatou iai ea faatasi ma i latou o le a olioli i nei faamanuiaga, ma isi foʻi faamanuiaga o le Malo? E tatou te iai faatasi ma i latou pe afai tatou te pei o le faisalamo, e tatou te lotomalie e faatalitali iā Ieova, ma fai o ia ma o tatou malu ma lo tatou malosi.

“Ua faaiʻuina tatalo a Tavita” i upu: “Ia faafetaia Ieova le Atua, o le Atua o Isaraelu, na o ia lava na te faia vavega. Ia viia lava lona suafa mamalu e faavavau lava; ia tumu foʻi le lalolagi uma i lona mamalu; Amene ma Amene.” (Salamo 72:18-20) O lea, seʻi faapena foʻi ona tatou faapaiaina ma le loto atoa Ieova ma viiviia lona suafa mamalu.

[Ata i le itulau 9]

Pe e te silafia o ai o loo faaata mai e “le alofafine o le Tupu”?

[Ata i le itulau 10, 11]

O loo taʻua Ierusalema o “le mea e silisili ese ona matagofie.” Pe e te silafia le māfuaaga?