Maua le Fiafia i le Faatatauina o Mataupu Silisili o le Tusi Paia

E MAUTINOA ua e tagaʻi i se pusi o loo fālōlō ma taviʻo solo lona tino faapea ma si ona tamaʻi leo ʻīʻī a o faia ana gaoioiga—o se faailoaga lea o lona fiafia. Maʻeu le lelei o le iai i se tulaga e pei o le pusi i le mauaina o le fiafia! Ae peitaʻi, o le toʻatele lava o tagata, e lē faigofie ona maua le fiafia, ma afai foʻi e maua, e lē tumau lenā fiafia. Aiseā ua faapea ai?

Ona o lo tatou tulaga lē lelei atoatoa, e masani ai lava ona tatou faia mea sesē, ma e ao foʻi ona tatou onosaʻia mea sesē o loo faia e isi. Lona lua, o loo tatou ola i se vaitaimi ua taʻua e le Tusi Paia o “aso e gata ai,” lea ua “oo mai ai aso faigatā.” (2 Timoteo 3:1-5) E tusa lava po o loo teu mau pea i o tatou mafaufau lo tatou fiafia na iai i le taimi a o laiti, ae o le toʻatele o i tatou ua lagonaina i le taimi nei le malosi o omiga o nei “aso faigatā.” Po o mafai ea ona tatou maua le fiafia i aso nei?

Mātau, o loo faapea mai le Tusi Paia o nei aso faigatā e lē faapea o le a lē mafai ona fesagaʻia, ae o le a faigatā ona feagai ai ma nei taimi. E mafai ona tatou feagai ma nei aso e ala i le faatatauina o mataupu silisili o le Tusi Paia. Atonu o le a lē mafai i taimi uma ona foʻia o tatou faafitauli, ae o le a tatou mauaina lava sina fiafia e ui i na tulaga. Seʻi o tatou iloiloina ni mataupu silisili se tolu.

Ia Iai se Vaaiga Saʻo iā te Oe Lava

Ina ia maua le fiafia, e ao ona tausia se vaaiga saʻo i mea e gata mai ai lo tatou mafai, faapea ma mea e mafaia e isi. Na taʻua e le aposetolo o Paulo i lana tusi i Kerisiano i Roma e faapea: “Ua agasala tagata uma lava, ma ua lē oo i le mamalu o le Atua.” (Roma 3:23) O le tele o vala o le mamalu o Ieova e lē matāea e o tatou mafaufau. O se faataʻitaʻiga, o le mea moni faigofie o loo taʻua i le Kenese 1:31: “Ua silasila atu le Atua i mea uma ua na faia, faauta foʻi, ua matuā lelei lava.” O lea, po o fea lava le taimi e toe manatu ai Ieova i mea na ia faia, e mafai lava ona ia fetalai mai faapea, “ua matuā lelei lava.” E leai se tagata e mafai ona faapea mai, e matuā lelei lava mea uma na te faia. O le iloaina o le mea e gata mai ai lo tatou mafai o le laasaga muamua lea i le mauaina o le fiafia po o le lagona faamalieina. Ae peitaʻi, o loo iai se isi mea e manaʻomia. E manaʻomia ona tatou malamalama ma talia le silasila a Ieova e faatatau i se mataupu.

O le upu Eleni ua faaliliuina i le agasala e sau mai le upu o lona uiga, ua misi le faailoga po o le taulaʻiga na sini atu i ai. Ina ia faataʻitaʻi: Seʻi mafaufau i se tagata o loo faamoemoe e maua se faailoga, e ala i le taʻi saʻo atu o le ū ina ia tau saʻo lava i le taulaʻiga o loo sini atu i ai. O loo iai ana ū e tolu. Ua ia fana atu lana uluaʻi ū ae e tasi le iata (mita) ua misi ai. Ua ia toe taʻi lelei ma fana atu le ū lona lua, ae na misi i le futu e tasi (30 senitimita). O le ū mulimuli la, ua ia matuā taulaʻi atoatoa atu a o fanaina atu le ū, ae na misi lava i si inisi e tasi (2 senitimita). Na matuā lalata lava i le taulaʻiga, ae o le misi lava o le misi.

E pei uma lava i tatou o le tagata fanafana ū lenā. I nisi o taimi e foliga mai ua telē lava la tatou misi o le taulaʻiga. I nisi taimi e toetoe lava a tau tonu i le taulaʻiga ae o loo misi lava.  Ua tatou lagona le lē fiafia ona o loo tatou taumafai malosi, ae e lē o oo i le lelei lea tatou te manaʻomia. O lea, seʻi o tatou toe vaai atu i le faataʻitaʻiga i le tagata fanafana ū.

Ua faifaimālie ona ia liliu ese atu, ua faanoanoa ona na ia manaʻo tele i le faailoga. Peitaʻi, na faafuaseʻi ona toe valaau mai le tagata o loo pulea le tauvaga, ma tuu atu iā te ia le faailoga ma faapea atu: “Ou te manaʻo e avatu iā te oe le faailoga, ona ou te fiafia iā te oe, ma na ou iloa le tele o au taumafaiga na fai.” Na matuā olioli le tagata fanafana ū.

Ua matuā olioli lava o ia! O le a lagona uma e tagata le olioli faapena, pe a latou mauaina “le mea foaʻifuaina mai” le Atua, o le ola e faavavau i tulaga lelei atoatoa. (Roma 6:23) Pe a oo i lenā tulaga, o mea uma e latou te faia o le a lelei atoatoa—o le a lē tāitai ona toe misi le taulaʻiga. O le a latou maua le lotomalie atoatoa. Ae i le taimi nei, afai e teu i o tatou mafaufau lenā manatu, o le a lelei ai o tatou faalogona iā i tatou lava faapea foʻi ma isi.

Ia Iloa o Mea Uma Lava e Alu ai le Taimi

O le mea moni, e so o se mea lava e alu ai le taimi. Pe na e mātauina le faigatā tele ona tumau le fiafia pe afai ua fai si umi tele ae lē o faataunuuina se mea o loo e faatalitali i ai, po ua umi tele foʻi o iai ni tulaga lē lelei na i lo le umi na e manatu i ai? E ui i lea, o loo iai nisi ua mafai lava ona tausia le fiafia i tulaga faapena. Seʻi manatu i le faaaʻoaʻoga a Iesu.

A o leʻi afio mai i le lalolagi, na avea Iesu ma faaaʻoaʻoga matilatila o le usiusitai a o iai i le lagi. E ui i lea, a o iai i inei i le lalolagi na “aʻoaʻoina ai o ia ia usiusitai.” E faapefea? I “mea sa tigā ai o ia.” Na ia mātauina muamua mafatiaga ae peitaʻi e leʻi oo totino o ia i lenā tulaga. A o iai i le lalolagi, aemaise lava mai le taimi o lona papatisoga i le Ioritana seʻia oo i lona maliu i Kolokota, na oo totino ai o ia i le tele o tulaga faigatā. E tatou te lē iloa faamatalaga uma e faatatau i le auala na “faaatoatoaina” ai Iesu, ae e tatou te iloa na manaʻomia se taimi ina ia oo ai i lenā tulaga.—Eperu 5:8, 9.

Na taulau Iesu ona sa ia mafaufau loloto i “le olioli sa tuu i ona luma,” o le taui o lona faamaoni. (Eperu 12:2) E ui i lea, na iai taimi na ia “tatalo . . . ma ʻaiʻoi atu ma le tagi tele ma loimata.” (Eperu 5:7) E ono iai ni taimi e tatou te tatalo atu ai i se uiga faapena. E faapefea ona tagaʻi Ieova i na tatalo? O le fuaiupu lava lenā o loo faaalia ai le faafofogaina ma le lotomalie e Ieova o le tatalo a Iesu. O le a faia foʻi faapena e le Atua iā i tatou. E faapefea ona tatou iloa?

Ona e silafia e Ieova le mea e muta mai ai lo tatou mafai, ona ia fesoasoani mai lea iā i tatou. E tofu uma lava tagata ma mea e muta mai ai mea e mafai ona latou onosaia. Ua iai se faaupuga e masani ai e faapea, “Aua le soona asosi fua i le mea e lē oo i ai le mafai.” E sili atu ona silafia lelei e Ieova le mea e gata mai ai lo tatou mafai. O le ‘alofaina ma le alofa tunoa e fesoasoani mai i ona aso e tatau ai,’ lea ua ia saunia mo i tatou. (Eperu 4:16) Na ia faia faapea iā Iesu, ma na ia faia foʻi mo le tele o isi tagata. Seʻi manatu i le auala na maua ai e Monika lea fesoasoani.

Na ola aʻe Monika i se olaga e itiiti lava ni mea e popole ai, o se tagata malosi ma e fiafia  lava ona uiga. I le 1968, a o faatoʻā silia i le luasefulu ona tausaga, na faateʻia ai o ia ina ua iloa, ua maua o ia i le maʻi e taʻua o le multiple sclerosis, o se maʻi e masani lava ona oo ai ina pē se vaega o le tino. Na suia atoatoa ai i inā lona olaga, ma na manaʻomia ai ona faia ni suiga tetele i lana faiva faataimi atoa. Na iloa e Monika o le a avea o se tulaga faaumiumi lona maʻi. Na ia faapea mai i le sefuluono tausaga mulimuli ane ai: “O loo lē mafai pea ona maua se fofō o loʻu maʻi ma e ono tumau pea seʻia oo ina faafouina e le faiga fou o mea a le Atua mea uma.” Na ia taʻutino mai e lē faigofie: “E ui lava ina faapea mai aʻu uō o loo tumau pea oʻu uiga fiafia . . . ae o loo iloa e aʻu uō e sili ona vavalalata iā te aʻu, e iai taimi ou te matuā tagi ai lava.”

E ui i lea, na ia faamatala e faapea: “Ua ou aʻoaʻoina ina ia iloa onosai ma olioli i sina suiga lelei o loʻu soifua mālōlōina. Ua faamalosia laʻu faiā ma Ieova i loʻu iloa faapea, e lē taulau le tagata i ana taumafaiga fitā i le foʻiaina o faamaʻi. E na o Ieova e na te aumaia se vaifofō tumau.” Faatasi ai ma le fesoasoani a Ieova, na faatumauina ai pea le fiafia o Monika ma ua mafai nei ona toe manatunatu i le silia i le 40 tausaga ua mavae o lana auaunaga faataimi atoa.

E mautinoa lava, e lē faigofie tulaga e pei o Monika. Ae o le mea e mautinoa, o le a sili atu lou fiafia pe a e iloa faapea, o nisi mea e ono umi atu se taimi e faatali ai na i lo le umi o loo e manatu i ai. I le pei o Monika, e mafai foʻi ona tuu atu lou faatuatuaga iā Ieova auā e “fesoasoani mai i ona aso e tatau ai.”

Aua le Faia ni Faatusatusaga —Faatū Sini Talafeagai

E tū tasi lava oe ia. E leai se tasi lua te tutusa. O loo iai se faaupuga i le gagana Gun a Aferika o loo faamatala puupuu ai le mea moni lenei: “E lē tutusa uma le uumi o tamatamaʻilima.” O se mea valea le faatusatusa o le tasi tamatamaʻilima i le isi. E te lē manaʻo e faatusatusa oe e Ieova i se isi tagata, ma e lē tāitai ona ia faia faapea. E ui i lea, o loo taatele i tagata le uunaʻiga e fai ni faatusatusaga, ma e mafai ona lē mauaina ai e tagata le fiafia. Seʻi manatu i le auala na faataʻitaʻia ai e Iesu lenei mea, a o tatou faitau le Mataio 20:1-16.

Na taʻua e Iesu se “alii” na manaʻomia ni tagata e faigaluega i lana tovine. Ona ia “alausu” lea atonu i le 6:00 i le taeao, e saʻili nisi e faafaigaluega. Na latou lotomalie i le totogi masani o tagata i le aso, e tasi le tenari mo itula e 12 o le aso e galulue ai. E mautinoa na fiafia tagata nei ina ua latou maua se galuega i se totogi e masani ai. Mulimuli ane, ona iloa lea e le alii isi vaega o tagata e lē o faigaluega ma faafaigaluega i latou—i le 9:00 i le taeao, 12:00 i le aoauli, 3:00 i le afiafi, e oo lava i le itula e 5:00 i le afiafi. E leai ma se vaega o tagata nei na galulue i le aso atoa. O o latou totogi, na folafola atu e le alii iā i latou “se mea e tusa,” ma na ioe i ai tagata faigaluega.

I le iʻuga o le aso, ona faatonu lea e le alii lana auauna e pule e avatu totogi o tagata. Na ia faapea atu e valaau tagata faigaluega ma avatu muamua totogi o i latou na faafaigaluega mulimuli. O i latou nei e na o le tasi le itula na faigaluega ai, ae o le mea e ofo ai, na latou maua le totogi o le tagata faigaluega i le aso atoa. Seʻi faaata i lou mafaufau se gugulu ma se pisapisaō na ono tupu aʻe. O i latou na galulue i itula e 12 na latou manatu o lona uiga o le a latou mauaina le aofaʻiga e telē atu, e fua i itula na galulue ai. Ae peitaʻi, na latou mauaina foʻi le totogi lava lea e tasi.

O le ā lo latou uiga na faaalia? ‘Ua maua e i latou, ona latou muimui ai lea i le matai, ua faapea mai, E tasi lava le itu aso na galulue ai i latou nei na mulimuli, a ua e faatusaina i latou ma i matou o ē na tigāina i le galuega ma le vevela o le aso.’

E ese le manatu sa iai i le matai. Na ia taʻu atu iā i latou o lea na latou mauaina lava le aofaʻiga tonu na latou ioe i ai. Ae o isi, na ia filifili e avatu iā i latou le totogi o le aso atoa, ma e mautinoa e sili atu i le mea na latou faatalitalia. O le mea moni lava la, e leai se tasi na laʻitiiti sana mea na maua i lo le mea na ia  malie i ai; ma o le toʻatele lava e sili atu mea na latou maua i lo mea na latou faatalitalia. I le iʻuga, na fesili atu le matai: “E lē faitalia ea aʻu ona pule i aʻu lava mea?”

Seʻi manatu pe ana muaʻi totogi e le auauna e pule le vaega muamua ona ō ese loa lea. Sa tatau ona latou fiafia. Ae o le lē fiafia na tupu aʻe ona na latou vaai ua maua e isi le totogi lava lea e tasi mo itula faigaluega e itiiti ifo. Na feita ai i latou, lea na oo ai ina muimui i le matai, lea e mautinoa sa latou muaʻi loto faafetai i ai ona o le faafaigaluegaina o i latou.

O loo faataʻitaʻia lelei ai i inei le mea e tupu pe a tatou faia ni faatusatusaga. Pe afai e te mafaufau loloto i le lua faiā ma Ieova, ma loto faafetai i le auala ua ia faamanuiaina ai oe, ona e maua lea o le lotomalie. Aua neʻi faatusatusa lou tulaga i isi. Afai ua foliga mai ua manatu Ieova e avatu ni mea e sili atu mo isi, ia olioli i mea ua latou maua ma olioli faatasi ma i latou.

E ui i lea, o loo faatalitali mai Ieova i se mea e te faia. O le ā lenā mea? Ua taʻua i le Kalatia 6:4 e faapea: “Ia taʻitoʻatasi ma faamasino i lana lava galuega, ona iā te ia lea o se mea e mitamita ai iā te ia lava.” I nisi faaupuga, ia faatū ni sini talafeagai mo oe. Ia fuafua ni mea e talafeagai ma e mafai ona e fai, ona fai lea. Pe afai e talafeagai le sini ma ua e faataunuuina, ona iā te oe lea “o se mea e mitamita ai.” O le a e maua le fiafia.

O le a Maua Faamanuiaga

O mataupu silisili e tolu na tatou talanoaina, e faaalia ai o le faatatauina o mataupu silisili o le Tusi Paia e mautinoa le mauaina ai o le fiafia po o le lotomalie e ui lava i nei aso e gata ai ma tulaga lē lelei atoatoa. I la tatou faitau Tusi Paia i aso taʻitasi, aiseā e lē saʻilia ai na mataupu silisili, a lē o taʻu saʻo mai po o loo maua foʻi i ni faamatalaga ma ni talafaatusa?

Afai e te lagona ua fai ifo lou fiafia, ia taumafai e iloa tonu le māfuaaga. Ona vaai lea i mataupu silisili e te faatatauina e faasaʻo ai le tulaga o loo tulaʻi mai. O se faataʻitaʻiga, e ono suʻe atu i itulau e 110-111 o le tusi “O Tusi Paia Uma Lava.” * O loo talanoaina ai i inā le tusi o Faataoto, ma o le a e mauaina ai le anoanoaʻi o mataupu silisili ma fautuaga o loo i lalo o tamaʻi ulutala e 12. O le Watch Tower Publications Index* ma le Watchtower Library i le CD-ROM* e sili atu foʻi ona lelei mo le mauaina o faamatalaga. O le faaaogā soo, o le a e maua ai le tomai e suʻe ai mataupu silisili e fetaui lelei.

O le a oo mai le taimi e avatu ai e Ieova iā i latou ua tatau i ai, le ola e faavavau i se tulaga lelei atoatoa i le lalolagi parataiso. O le a faatumulia o latou olaga i le fiafia.

[Faamatalaga pito i lalo]

[Faamatalaga faaopoopo i le itulau 12]

“Ua agasala tagata uma lava, ma ua lē oo i le mamalu o le Atua.”—Roma 3:23

[Faamatalaga faaopoopo i le itulau 13]

‘Na aʻoaʻoina e Iesu le usiusitai i mea sa tigā ai o ia.’—Eperu 5:8, 9

[Faamatalaga faaopoopo i le itulau 15]

“Ona iā te ia lea o se mea e mitamita ai iā te ia lava, a e lē o se tasi.”—Kalatia 6:4