E Mafai Ona E Maua le Fiafia

O LE fiafia e moni ma tumau, e faigatā ona maua i nisi o taimi. O le pogai autū, o le tele o tagata e sesē le mea o loo saʻili atu i ai mo le fiafia. E maua le fiafia, pe ana fai e iai sa latou uō e maufaatuatuaina ma agavaa e faasino i latou i le ala saʻo!

O le Tusi Paia le puna o lenā ala saʻo. Seʻi tomānatu i se tasi o tusi o loo iai, le Salamo. O lenei tusi o se tuufaatasiga o pese paia iā Ieova e 150, pe tusa o le ʻafa na fatuina e le tupu Isaraelu o Tavita. Ae o le mea e sili atu ona tāua na i lo le iloa o ē na tusia, o le iloa lea na tusia ona na faagaee e le Uō sili a tagata, o Ieova. E tatou te mautinoa la o loo iai i le tusi taʻitaʻiga a le Atua mo lo tatou lelei, ma o loo faasino i tatou i le ala e maua ai le fiafia.

Na mautinoa e tusitala o le Salamo, e maua le fiafia pe a iai se faiā tāua a se tasi ma le Atua. Na tusi le faisalamo: “Amuia le tagata o lē mataʻu iā Ieova.” (Salamo 112:1) E lē mafai e faiā a tagata, meafaitino, po o mea e manuia ai, ona aumaia le fiafia lea e maua i le avea ma “nuu e fai Ieova mo latou Atua.” (Salamo 144:15) Ua faamautinoa mai i mea na tutupu i olaga o le tele o auauna a le Atua i aso nei, le moni o lenei mea.

O se faaaʻoaʻoga o Susana, e 40 ma ona tupu tausaga. * Na ia taʻua: “I aso nei, e toʻatele ua aufaatasi i vaega o tagata e ausia ai ni sini pe auai foʻi i ni mea e fiafia faatasi ai ma isi. Ae e seāseā manatu i tagata uma o loo i le vaega, o se uō. Ae e ese mai ai la tagata o Ieova. O le alofa mo Ieova, ua uunaʻia ai i tatou e alolofa i isi. E lagona e tagata o le Atua le toʻafilemu, po o fea lava o loo tatou iai nei. Ua  matuā faaʻoaina e lenei autasi o tatou olaga. O ai nisi e mafai ona faapea mai, o loo iai a latou uō mai vaega eseese ma ni atunuu eseese? Ou te faapea atu ma loʻu loto atoa, o le avea ma tagata o Ieova, e maua ai le fiafia.”

Na iloa foʻi e Mārī lea na fanau i Sikotilani, e tāua se faiā lelei ma Ieova pe a fia maua e se tasi le fiafia. Na ia taʻua: “A o leʻi oʻu aʻoaʻoina upu moni o le Tusi Paia, sa ou fiafia e matamata i ata taufaafefe tagata. E lē mafai ona ou moe i le pō e aunoa ma le uu o se koluse, e tutuli ai aitu ma tagata oti, ia e taulaʻi ai le tele o ata na ou matamata ai. Ae ina ua ou aʻoaʻoina le upu moni, na ou lē toe matamata loa i nei ata, moe i le pō e aunoa ma le fefe ona o la ma faiā ma Ieova, ma fiafia e auauna i se Atua e sili atu le malosi na i lo temoni po o tagata oti.”

O le Faatuatua iā Ieova e Iʻu i le Fiafia

E leai se māfuaaga tatou te masalosalo ai i le malosi o Lē na Faia Mea, ma lona poto e lē gata mai. Na iloa e Tavita e mafai ona ia matuā faatuatua iā Ieova ma sulufaʻi iā te Ia, na ia tusi: “Amuia le tagata o lē faatuatua iā Ieova.”—Salamo 40:4.

Na taʻua e Maria: “O mea na oo iā te aʻu i Sepania ma isi mea ua ou iloa ai, pe a faia mea i le auala a Ieova, e ui o o tatou faalogona e ono faia ai se mea sesē, o le a tatou maua iʻuga lelei. E iʻu i le fiafia, auā o ala o Ieova e sili ona lelei.”

Ua iloa foʻi e Aneterea, o se toeaina Kerisiano na auauna i atunuu eseese i Europa mai mea na oo iā te ia, e mafai ona tatou faatuatua iā Ieova. Na ia taʻua: “Na telē se taaʻina a loʻu uso matua e lē tutusa a ma lotu iā te aʻu a o talavou, sa ia faalaeiau aʻu e saʻili se galuega e tele tupe e maua ai. Na matuā lē fiafia ina ua ou auai i le faiva faataimi atoa, ma lē faalagolago ai i le saogalemu mai penisione. E leai se taimi na ou manaʻomia ai se mea a o oʻu auauna faataimi atoa, ma na ou maua faamanuiaga ia e moomoo isi ia latou maua.”

I le 1993, na valaaulia ai Filiki e fesoasoani i le toe faatelē o ofisa o le lālā a Molimau a Ieova i Selters, i Siamani. Ina ua uma le galuega, na valaaulia o ia e avea ma sui o le aiga Peteli. O le ā lana tali? “Sa ou talia le valaaulia ma ni masalosaloga. Ae o lea ua toeitiiti sefulu tausaga o oʻu iai i nei, ma ua ou mautinoa na talia e Ieova aʻu tatalo. E na te silafia le mea e sili ona lelei mo  aʻu. O le faatuatua iā te Ia ma tuu na te taʻitaʻia aʻu, ua ou tuu ai se avanoa e na te faailoa mai le mea e finagalo ou te faia.”

Na manaʻo Susana lea na uluaʻi taʻua e auauna o se faifeʻau faataimi atoa, o se paeonia, ae sa iai se faafitauli i le mauaina o se galuega faavaitaimi. Ina ua mavae se tausaga o faatali i se galuega talafeagai, na ia gaoioi loa ma faatuatua iā Ieova. Na ia faamatala mai: “Na ave laʻu tusi talosaga mo le paeonia faataimi atoa. Na lava le tupe na ou sefe e totogi ai tupe faaalu masani, pe tusa mo le masina. Maʻeu se masina inā manaia! O se mea ou te olioli tele ai laʻu faiva, ae sa lē manuia le tele o faatalatalanoaga mo se galuega. E ui i lea, e pei ona folafola mai e Ieova na te leʻi tuua aʻu. I le aso mulimuli o le masina, na ou sainia ai se galuega konekarate. Ua ou iloa nei e mafai ona ou matuā faatuatuaina Ieova! O le mea muamua lenei na tupu i laʻu auaunaga faataimi atoa, na māfua ai ona ou maua se olaga tauia ma fiafia.”

E Atili Fiafia pe a Talia Fautuaga Mai le Atua

Na faia e le tupu o Tavita ni agasala matuiā. I nisi taimi, sa ia manaʻomia se fautuaga poto. Pe tatou te lotomalilie e talia fautuaga ma faatonuga e pei o Tavita?

Na iloa e Aida mai Falani, ua ia faia se mea sesē matuiā. Na ia faapea mai: “O loʻu faanaunauga autū ia toe faaleleia la ma faiā ma Ieova. E leai se isi mea na ou manatu mamafa i ai.” Sa ia faalatalata i toeaina Kerisiano mo se fesoasoani. I le silia nei ma le 14 tausaga o auai i le faiva faataimi atoa, ua ia taʻua: “Maʻeu le fiafia e iloa ua faamagaloina e Ieova laʻu mea sesē!”

O le talia o fautuaga mai le Atua, e puipuia ai i tatou mai le faia o se mea sesē. Na faamatala e Iutiti: “I le 20 o oʻu tausaga, na ou alofa faavalea ai i se alii Siamani faipisinisi, o lē na taumafai malosi e faafiafiaina aʻu. Sa faaaloalogia o ia, lelei lana galuega, ma ua uma foʻi ona faaipoipo! Sa ou iloa e ao ona ou filifili, pe usitai i tulafono a Ieova po o le matuā fulitua iā te Ia. Sa ou taʻuina i oʻu mātua. E leʻi faaʻaloʻaloa faamatalaga a loʻu tamā, i le faamanatu mai o le mea o faatalitalia e Ieova mai iā te aʻu. Sa ia talanoa maumauaʻi mai iā te aʻu, i le mea tonu lava na ou manaʻomia! E ui i lea, na ou manatu e fai se faamolemolega. Na talanoa mai pea loʻu tinā iā te aʻu i le tele o vaiaso, i le aogā ma le faasaoola o tulafono a le Atua. Ou te faafetai ona sa faasolo mālie ona tosina loʻu loto iā Ieova. O le aʻoaʻi ma aʻoaʻo e Ieova, na ou maua ai le fiafiaga tele, o le tele o tausaga faamanuiaina i le faiva faataimi atoa, ma le maua o se paaga Kerisiano lelei e alofa iā te aʻu, ma alofa foʻi iā Ieova ma le loto atoa.”

E manino mai i nei tala o mea na tutupu le moni o upu a Tavita: “Amuia le tagata ua faamagaloina lona solitulafono, ma ua ufitia lana agasala. Amuia le tagata e lē taʻusalaina e Ieova.”—Salamo 32:1, 2.

Fiafia Ona o le Manatua o Isi

Na tusi Tavita: “Amuia le tagata ua manatua lē ua mativa.” Na ia toe faapea mai: “E faasaoina o ia e Ieova i le aso vale. E tausia o ia e Ieova ma faaolaina; e manuia foʻi o ia.” (Salamo 41:1, 2) O le manatu alofa o Tavita iā Mefiposeta, le atalii pipili o lana uō pele o Ionatana, o se faaaʻoaʻoga lea o le vaaiga saʻo e ao ona iai i ē matitiva.—2 Samuelu 9:1-13.

Na maua e Mālī o lē na misionare mo tausaga e 47, se avanoa faapitoa e talaʻi ai i ē na sulufaʻi mai nofoaga lamatia o Aferika, Asia, ma Europa i Sasaʻe. Na ia taʻua: “E eseese uma o latou faafitauli, ma e manatu le toʻatele e lē o talia fiafia i latou, ma o le mea moni na faaesea i latou. O le fesoasoani i ia tagata, e maua ai e lē aunoa le fiafia.”

Na tusi mai Marina e 40 ma ona tupu tausaga: “I le avea o sē e nofofua, na faamāfanafanaina  aʻu i le iloa o loo iai isi e pei o ni uō e fesoasoani iā te oe. Na uunaʻia ai aʻu e faalaeiau tagata i le telefoni pe tusi atu foʻi iā i latou. E toʻatele na faailoa mai lo latou talisapaia. O le fesoasoani i isi e aumaia ai le olioli.”

Na taʻua e Timita e 20 ma ona tupu tausaga: “Na tausia aʻe aʻu e loʻu tinā o se matua nofo toʻatasi. A o oʻu laʻitiiti, sa ou fiafia pe a ave aʻu i le talaʻiga e se ovasia o le Suʻesuʻega Tautusi a le Faapotopotoga i vaiaso taʻitasi e toleni ai. Ou te faafetaia pea lana fesoasoani. Ua ou iloa e leʻi faigofie i taimi uma le uunaʻia o aʻu.” O le loto faafetai i le fesoasoani sa ia muaʻi maua, ua fesoasoani ai nei Timita i isi: “Ou te taumafai e ave se talavou ma se tagata matua i le faiva i le fanua, a itiiti mai e faatasi i le masina.”

O loo taʻua foʻi i le tusi o Salamo isi mea e maua ai le fiafia. O le isi, o le tāua o le faalagolago i le malosi o Ieova na i lo tatou lava malosi: “Amuia le tagata o loo iā [Ieova] lona malosi.”—Salamo 84:5.

E faapena le mea na tupu iā Korina. Na siitia o ia i se atunuu sa tele ai le manaʻoga i le talaʻiga. “Na ou fetaiaʻi ma se gagana fou, aganuu fou, ma se auala fou e mafaufau ai. Na ou lagona e pei ua ou iai i se isi paneta. Na ou popole i le mafaufau e talaʻi i se siʻomaga ese. Sa ou talosaga iā Ieova mo se fesoasoani, ma o lona malosi na mafai ai ona ou talaʻi i le aso atoa i se oganuu maotua. E leʻi umi se taimi, ae ou masani ma ua foliga mai o se mea ua leva ona masani ai. E tele ni suʻesuʻega faale-Tusi Paia na ou amataina, ma o loo oʻu maua pea aogā mai lenei mea na tupu. Na ou iloa ai e mafai ona tatou foʻia toʻatugā e foliga mai e lē gafatia, i le malosi o Ieova.”

Ioe, e eseese vala e saosaolaumea i le mauaina o le fiafia, e pei o le ati aʻe o se faauōga ma le Atua ma ona tagata, matuā faatuatua iā Ieova, talia ana fautuaga, ma le manatuaina o isi. E ala i le savavali i ala o Ieova ma usitai i ana tulafono, o le a tatou fiafia ai i le mauaina o lona finagalo malie.—Salamo 89:15; 106:3; 112:1; 128:1, 2.

[Faamatalaga pito i lalo]

[Ata i le itulau 12]

Maria

[Ata i le itulau 13]

Mārī

[Ata i le itulau 13]

Susana ma Aneterea

[Ata i le itulau 15]

Korina

[Ata i le itulau 15]

Timita