Fesili Mai le ʻAufaitau

O le ā na uiga i ai Iesu ina ua ia fetalai atu iā Nikotemo: “E leai foʻi se tasi na alu aʻe i le lagi, na o ia na alu ifo mai le lagi, o le Atalii lea o le tagata o loo i le lagi”?—Ioane 3:13.

O le taimi lenā o loo iai pea Iesu i le lalolagi, ma e leʻi oo i le taimi e afio aʻe pe toe foʻi atu ai i le lagi. Peitaʻi, o mea ua tatou iloa e uiga iā Iesu ma manatu o loo siʻomia ai lana fetalaiga lenei, e mafai ona fesoasoani iā i tatou ina ia malamalama ai i le uiga moni o lona manatu.

Na “alu ifo mai le lagi” Iesu, mai le nofoaga sa iai o se agaga faatasi ma lona Tamā, o lea, i le taimi atofaina, na faaliliuina ai le soifua o lona Alo ma ui mai i le manava o Maria, e pei ona fanau mai ai o se tagata. (Luka 1:30-35; Kalatia 4:4; Eperu 2:9, 14, 17) Pe a mavae lona maliu, o le a faatūina aʻe Iesu o se foafoaga ola agaga ma toe afio atu ina ia faatasi ma Ieova. O lea la, i se taimi a o lē o toe umi ae fasiotia o ia, na tatalo ai Iesu e faapea: “Loʻu Tamā e, ia e tuu mai iā te au le mamalu faatasi ma oe, o le mamalu lava sa iā te i taʻua ma oe, a o leʻi faia le lalolagi.”—Ioane 17:5; Roma 6:4, 9; Eperu 9:24; 1 Peteru 3:18.

Ina ua talanoa atu Iesu iā Nikotemo, o se Faresaio ma o se faiaʻoga i Isaraelu, e leʻi oo i le taimi e toe foʻi atu ai o ia i le lagi. O le mea moni, e leʻi iai lava se isi tagata na maliu ma alu atu i le lagi. Na faapea mai Iesu lava ia, sa avea Ioane le Papatiso o se perofeta lē mafaatusalia a le Atua, ae “o lē aupito itiiti i le malo o le lagi, e sili lea iā te ia.” (Mataio 11:11) Na faamatala foʻi e le aposetolo o Peteru e faapea o le tupu faamaoni o Tavita lea ua maliu, o loo iai pea o ia i lona tuugamau; e leʻi alu aʻe la Tavita i le lagi. (Galuega 2:29, 34) E iai le māfuaaga e leʻi ō ai i le lagi i latou na maliliu muamua iā Iesu e pei o Tavita, Ioane le Papatiso ma isi tane faatuatua. Ona na maliliu i latou na, a o leʻi faaavanoaina e Iesu le ala ina ia mafai ai ona faatutūina aʻe tagata i le olaga faalelagi. Na tusi le aposetolo o Paulo, o Iesu lē na muamua atu, “ua faaavanoaina e ia . . . le ala fou e ola ai” i le lagi.—Eperu 6:19, 20; 9:24; 10:19, 20.

Talu ai e leʻi maliu ma toetū mai Iesu, o le ā na uiga i ai lana faamatalaga ina ua fetalai iā Nikotemo: “E leai foʻi se tasi na alu aʻe i le lagi, na o ia na alu ifo mai le lagi, o le Atalii lea o le tagata o loo i le lagi”? (Ioane 3:13) Seʻi manatu i le mataupu atoa, po o le ā na talanoa ai Iesu ma Nikotemo.

Ina ua alu atu lenei pule Iutaia iā Iesu i le pō, na fetalai atu i ai Iesu: “E moni, e moni, ou te fai atu iā te oe, a lē toe fanau le tagata, e lē mafai ona iloa e ia o le malo o le Atua.” (Ioane 3:3) I le tali atu a Nikotemo, na fesili ai faapea: ‘E faapefea ona tupu lenā mea? E faapefea ona toe fanau se tagata?’ E leʻi malamalama Nikotemo i le aʻoaʻoga lenei a le Atua e uiga i le sao atu i le Malo o le Atua. Pe na iai se isi auala na te aʻoaʻoina ai lenei mea? E mautinoa sa lē mafai ona ia aʻoaʻoina mai se isi tagata; e leai se tagata na iai muamua i le lagi ma o lea, sa leai ai se isi sa mafai ona faamatalaina se mea e uiga i le sao atu i le Malo. Sa na o Iesu lava. Sa mafai e Iesu ona ia aʻoaʻoina Nikotemo ma isi ona o Ia na alu ifo mai le lagi, ma sa agavaa e aʻoaʻo tagata i nei mea.

O le fesili e uiga i lenei mau e mafai ona faataʻitaʻia ai se manatu tāua i le suʻesuʻeina o le Afioga a le Atua. E lē manaʻomia ona tatou masalomia se mau e tasi ona o le foliga mai e faigatā ona malamalama i ai. O faamatalaga a le Tusi Paia i nisi mau e ao ona iloiloina i le malamalamaga o isi mau ma e ao ona ōgatusa nei manatu. E lē gata i lea, e masani lava ona fesoasoani ni manatu o loo siʻomia ai se mau—atonu o le faatulagaga po o le mataupu—ina ia tatou maua ai le malamalamaga tatau ma talafeagai, i se mau e foliga mai e faigatā ona malamalama i ai.