“O Au Tulafono o Loʻu Lava Fiafia Ia”

“O mea uma foʻi na tusia anamua, na tusia ia e aʻoaʻo mai ai iā te i tatou.”—ROMA 15:4.

1. Ua faapefea ona faamanatu mai e Ieova mea iā i tatou, ma aiseā tatou te manaʻomia ai?

E SAUNIA e Ieova tulafono po o mea o loo ia faamanatu mai, mo ana auauna ina ia mafai ona latou faafetaiaʻia omiga o nei aso faigatā. O nisi o nei mea e mafai ona iloa i le faitauina e le tagata lava ia o lana Tusi Paia, a o isi e iloa mai manatu e folasia i sauniga faa-Kerisiano. E lē fou iā i tatou le tele o nei mea e faitau pe faalogo ai i nei faatasiga. Atonu foʻi sa tatou talanoaina muamua nisi o na faamatalaga. Ae talu ai e tele ina galo iā i tatou, e manaʻomia ai pea ona toe faafou lo tatou manatuaina o mea, e tusa ai o fuafuaga, o tulafono, ma faatonuga a Ieova. E tatau ona tatou talisapaia le faamanatu mai a le Atua. E faafouina ai o tatou agaga e ala i le fesoasoani mai, ina ia taulaʻi o tatou mafaufau i māfuaaga na tatou filifili ai e ola i se olaga amio Atua. O le ala lea o le pese o le faisalamo iā Ieova: “O au tulafono o loʻu lava fiafia ia.” I le gagana Eperu o le upu ua faaliliuina “tulafono” i inei o lona uiga o le faamanatu.—Salamo 119:24.

2, 3. (a) Aiseā na faasao mai ai pea e Ieova i o tatou aso, tala i soifuaga o tagata o loo taʻua i le Tusi Paia? (e) O ā tala mai le Tusi Paia o le a talanoaina i lenei mataupu?

² O loo tumau pea le malosi o le Afioga a le Atua e ui ina autausagā talu ona tusia. (Eperu 4:12) O loo faamatala mai ai tala moni i soifuaga o tagata o loo taʻua i le Tusi Paia. E ui lava ua telē se suiga i aso nei i aganuu masani ma manatu sa iai i taimi anamua, ae o luʻitau o loo tatou fesagaʻia e talitutusa lava ma luʻitau sa iai foʻi i na taimi. E tele tala sa faasao mai i le Tusi Paia auā so tatou lelei, o loo taʻu mai ai ni faaaʻoaʻoga matagofie a i latou sa alolofa iā Ieova ma auauna faamaoni iā te ia e ui i tulaga ogaoga sa latou fesagaʻia. O isi tala o loo faasino atu i ituaiga o amioga e inosia e le Atua. Ua tuuina uma lava e Ieova nei tala i mea na tutupu i soifuaga o tagata, o mea lelei ma mea leaga, e faamanatu mai ai iā i tatou. E pei ona tusi mai le aposetolo o Paulo: “O mea uma foʻi na tusia anamua, na tusia ia e aʻoaʻo mai ai iā te i tatou; ina ia tatou maua le faamoemoe e tupu mai i le onosai, ma le faamāfanafana mai o Tusi.”—Roma 15:4.

³ Seʻi tatou uaʻi atu la i ni tala se tolu o loo faamatalaina i le Tusi Paia: le tala i feutagaʻiga a Tavita ma Saulo, le tala iā Anania ma Safaira, ma le tala i le amio na faaalia e Iosefa i le avā a Potifara. O loo iai i tala uma nei ni lesona tāua e aʻoaʻoina ai i tatou.

Faamaoni i Faatulagaga a le Atua

4, 5. (a) O le ā le tulaga na iai sa aafia ai le tupu o Saulo ma Tavita? (e) Na faapeʻī le tali atu a Tavita i le loto matauʻa o Saulo?

⁴ Na oo ina lē faamaoni le tupu o Saulo iā Ieova, ma lē talafeagai ai ona ia pulea Lona nuu. Ona teena lea o ia e le Atua, ae faatonu le perofeta o Samuelu e faauu Tavita ina ia avea mulimuli ane ma tupu o Isaraelu. Ina ua faaalia e Tavita lona lototele o se tagata tau, ma sa viiviia foʻi o ia e tagata, ona amata lea ona avea Tavita o se fili i le mafaufau o Saulo. E tele taimi sa taumafai ai Saulo e fasiotia Tavita, peitaʻi sa faasaoina mai pea Tavita i na taimi, auā sa puipuia o ia e Ieova.—1 Samuelu 18:6-12, 25; 19:10, 11.

⁵ E tele tausaga sa fesolasolataʻi ai Tavita. Ina  ua maua le avanoa e fasioti ai Saulo, sa tauanau ane aumea a Tavita ina ia fasioti loa, i le faapea atu, o le avanoa lea ua tuuina mai e Ieova iā te ia e fasioti ai i lona fili. Peitaʻi, na teena e Tavita lea manaʻo. O lona faamaoni iā Ieova, ma lona faaaloalo i le tofiga o Saulo o se tupu tofia o tagata o le Atua, na māfua ai ona ia lē faia lea gaoioiga. O le mea moni lenā; o Ieova na tofia Saulo e fai ma tupu o Isaraelu. Lona uiga, o Ieova foʻi na te toe aveesea Saulo i lana taimi talafeagai. O le manatu la o Tavita, e leai sana aiā e faalavelave ai i le faatulagaga a Ieova. Ina ua uma taumafaiga a Tavita e faatoʻafimālie le loto matauʻa o Saulo iā te ia, ona faapea ai lea o Tavita: “E fasia lava o ia e Ieova, pe oo i ona aso e oti ai, pe alu ifo i se taua e fano ai. Ia faamamao e Ieova iā te aʻu, ina neʻi faaoo loʻu lima i lē ua faauuina e Ieova.”—1 Samuelu 24:3-15; 26:7-20.

6. Aiseā e tāua ai ona tatou manatunatu i le tala iā Tavita ma Saulo?

⁶ O loo iai se lesona tāua tele i lenei tala. Po ua iai ea se taimi na e tau mānatu ai pe aiseā ua tutupu ai nisi o faafitauli i le faapotopotoga Kerisiano? Atonu e iai se tasi o loo amioaʻi i se auala e lē talafeagai. Atonu e na te lē o faia se agasala matuiā, ae ua avea lana amio ma faalavelave iā te oe. E tatau faapefea ona e tali atu i ai? Talu ai lou naunau i lenā uso Kerisiano aemaise lou faamaoni iā Ieova, o le a e filifili ai e talanoa atu iā te ia i se uiga agalelei, i lou faanaunauga e fesoasoani i lou uso. Ae faapefea pe a faaauau pea le faafitauli? Afai o lenā ua e faia taumafaiga uma, atonu e lelei ona e tuu loa le mataupu iā Ieova. O le mea tonu lava lenā na fai e Tavita.

7. I le faataʻitaʻi iā Tavita, e tatau faapefea ona tatou tali atu pe a oo iā i tatou ni faiga lē tonu po o uiga faaituʻau?

⁷ Atonu o loo e fesagaʻia ni faafitauli o ni faiga lē tonu o le soifuaga nei po o ni uiga faaituʻau ona o le ese o lau tapuaʻiga. Atonu e itiiti pe matuā leai se mea e mafai ona e faia i ai i lenei taimi. E faigatā tele ona onosaia tulaga faapena, peitaʻi ua tatou aʻoaʻoina se lesona mai le auala na tali atu ai Tavita i faiga lē tonu. O salamo na tusia e Tavita o se faamaumauga faamomoiloto e lē gata i ana tatalo i le Atua ina ia puipuia o ia mai le toʻatamaʻi o Saulo, ae ina ia tumau foʻi lona faamaoni iā Ieova ma lona manatu mamafa i le faamamaluina o le suafa o le Atua. (Salamo 18:1-6, 25-27, 30-32, 48-50; 57:1-11) Sa tumau le faamaoni o Tavita iā Ieova e ui lava i le tele o tausaga sa fai ai e Saulo faiga lē tonu iā te ia. E tatau foʻi ona tumau faapena lo tatou faamaoni iā Ieova ma lana faalapotopotoga e tusa lava po o ā faiga lē tonu o tatou fesagaʻia, ae po o ā foʻi mea o loo faia e isi. Ia tatou mautinoa lelei, o loo silasila mai Ieova i mea uma o tutupu.—Salamo 86:2.

8. Na faapeʻī le tali atu o Molimau a Ieova i Mozambique ina ua tofotofoina lo latou faamaoni iā Ieova?

⁸ Ua avea Kerisiano i Mozambique o se faaaʻoaʻoga i aso nei, o nisi na matuā tumau faamaoni iā Ieova i taimi o tofotofoga. I le tausaga e 1984, na osofaʻia faalausosoo o latou nuu e tagata tetee faaauupegaina, o ē na gaoia mea,  susunu fale, ma fasiotia tagata. Sa foliga e leai se mea e mafai ona faia e nei Kerisiano moni e puipuia ai i latou. Na faamalosia e lenei vaega tetee, tagata sa nofoia na vaipanoa ina ia auai atu i a latou gaoioiga, pe lagolago atu e ala i nisi auala. Peitaʻi sa manatu Molimau a Ieova o le faia o lenā mea, o le a lē ōgatusa ma lo latou solitū faa-Kerisiano. Na matuā feita le ʻaufaaauupegaina i le teena o le latou faatonuga. Ma e tusa ma le 30 Molimau na fasiotia ai i lenā taimi loulouā o faalavelave, peitaʻi e leʻi mafai e faamataʻuga o le oti ona talepeina le faamaoni o tagata o le Atua. * I le pei o Tavita, sa latou onosaia faiga lē tonu, ma iʻu lava ina manumalo mai ai.

Se Faamanatuga Lapataʻi

9, 10. (a) E faapefea ona aogā iā i tatou nisi faaaʻoaʻoga o loo taʻua i le Tusi Paia? (e) O le ā na sesē ai gaoioiga a Anania ma Safaira?

⁹ O nisi o tagata o loo taʻua i le Tusi Paia ua faamanatu mai e lapataʻia ai i amioga e ao ona ʻalofia. Ioe, o loo iai i le Tusi Paia le anoanoaʻi o tala i tagata, e oo lava i nisi o auauna a le Atua, na faia mea sesē ma mafatia ai i āuga. (1 Korinito 10:11) O se tasi o na tala, e faatatau iā Anania ma Safaira, o se ulugalii na iai i le faapotopotoga Kerisiano i Ierusalema i le uluaʻi senituri.

¹⁰ Ina ua mavae le Penetekoso 33 T.A., sa manaʻomia ona saunia ni fesoasoani faaletino mo tagata talitonu fou na nonofo ai pea i Ierusalema ina ia auaufaatasi ma aʻoaʻoina mai le ʻauaposetolo. Sa faatau atu e nisi tagata o le faapotopotoga a latou meatotino ina ia maua mai tupe e faasoasoa mo tagata uma. (Galuega 2:41-45) Sa faatau atu e Anania ma Safaira so la fasi fanua, ae na la aumaia na o le ʻafa o le tupe na maua i le ʻauaposetolo, ma le faaupuga, o le tupe uma na maua i le faatauga o le fanua, lea ua la faimeaalofa mai ai. O le mea moni, e pule lava Anania ma Safaira pe tele pe itiiti se tupe la te foaʻia e tusa ma lo la manaʻo. Peitaʻi sa leaga faanaunauga o o la loto, ma e leʻi faamaoni a la gaoioiga. Sa la mananaʻo e faaofo le ʻauaposetolo ma le faapotopotoga i le la foaʻi, ma faafoliga mai ai sa sili atu ona telē le mea na la faia na i lo le mea moni na tupu. Ona musuia lea e le agaga paia le aposetolo o Peteru ia faaaliali le lē faamaoni ma le taufaaʻoleʻole o lenei ulugalii, ona taia ai lea o i laʻua e Ieova ma feoti ai.—Galuega 5:1-10.

11, 12. (a) O ā nisi o faamanatuga e faatatau i le faamaoni? (e) O ā manuia e maua mai pe a faamaoni?

¹¹ Pe afai e tofotofoina i tatou e fai se gaoioiga lē faamaoni i se taumafaiga ina ia fiafia mai ai tagata iā i tatou, talosia ia avea le tala iā  Anania ma Safaira o se faamanatuga manino iā i tatou. Atonu e mafai ona tatou faavaleaina nisi tagata, peitaʻi e lē taitai mafai ona tatou faavaleaina Ieova. (Eperu 4:13) O loo timaʻi mai pea le Tusi Paia ina ia tatou fefaamaoniaʻi, auā o le a leai se nofoaga mo tagata talapepelo i luga o le lalolagi, pe a tafiesea uma le amiolētonu. (Faataoto 14:2; Faaaliga 21:8; 22:15) E tatau ona manino le māfuaaga o lenā folafolaga. O lē o loo uunaʻia faiga lē tonu uma, o Satani le Tiapolo.—Ioane 8:44.

¹² E anoanoaʻi manuia tatou te maua pe a ola i ni olaga faamaoni. O se tasi o na manuia, o se lotofuatiaifo mamā, ma se faamalieina ona o le maufaatuatuaina e isi. I le tele o taimi, o le faamaoni o Kerisiano ua faigofie ai ona maua a latou galuega, pe tumau foʻi i a latou galuega. Peitaʻi o le manuia e sili ona tāua, o lo tatou maua ai lea o se faauōga ma le Atua e Ona le Malosi Uma Lava.—Salamo 15:1, 2.

Tausia o se Tulaga Mamā

13. O le ā le tulaga na fetaiaʻi ma Iosefa, ae na faapefea ona ia tali atu i ai?

¹³ E 17 tausaga o Iosefa, le atalii o Iakopo, ae faatau ese atu e fai ma pologa. Na iʻu ina oo ai o ia i le aiga o Potifara, o se auauna sili i Aikupito, ma o inā na tosina ai iā Iosefa le vaai a le avā a lona alii. Sa manaʻo le fafine ina ia la faia ni feusuaʻiga ma Iosefa, lea ua tuputupu aʻe o se tauleʻaleʻa aulelei; ma o aso uma e tauanau atu ai pea lenei fafine i le tama: ‘Seʻi ta momoe.’ Sa matuā mamao ese Iosefa mai lona aiga, e leai se tasi o iloa maia o ia i lea nuu ua iai. E ono mafai telē ona la faia ni feusuaʻiga ma lenei fafine e aunoa ma le iloa e isi tagata. Peitaʻi, ina ua iʻu lava ina maua o ia e le avā a Potifara ma taumafai e taofi o ia, sa sola ese Iosefa.—Kenese 37:2, 18-28; 39:1-12.

14, 15. (a) Aiseā tatou te uaʻi atu ai i le tala iā Iosefa? (e) Aiseā na loto faafetai ai se tuafafine Kerisiano ona o lona utagia o mea na faamanatu mai e le Atua?

¹⁴ Na tausi aʻe Iosefa i se aiga e matataʻu i le Atua, ma sa ia malamalama lelei, e sesē pe a faia ni feusuaʻiga a se alii ma se tamaʻitaʻi ae lē o i laʻua o se ulugalii faaipoipo. Na ia fesili atu i le fafine: “Pe faapefea ona ou faia lenei mea leaga tele ma ou agasala ai i le Atua?” E foliga na fai e Iosefa lana faaiʻuga, ona sa malamalama i tapulaa a le Atua mo tagata, e pei ona faamatalaina i Etena, e na o le toʻatasi le paaga faaipoipo a se tagata. (Kenese 2:24) E maua aogā e tagata o le Atua i aso nei pe a toe tomānatu i le auala na gaoioi ai Iosefa i lenā tulaga. I nisi vaipanoa, o se mea fua le faia o feusuaʻiga, ma o talavou e mumusu e auai i nei amioga lē mamā, ua taulaʻi i ai taufaifaiga a a latou aumea. Ua taatele i tagata matutua le fai o nisi toʻalua e ese mai le toʻalua faaipoipo. Ua talafeagai lelei la le mea o loo faamanatu mai e le tala iā Iosefa iā i tatou. O loo tumau pea  tapulaa a le Atua, o le agasala le faia o le faitaaga ma le mulilua. (Eperu 13:4) O le toʻatele o nisi na paʻūʻū atu i tofotofoga e faia feusuaʻiga lē mamā, ua ioe mai e iai se māfuaaga malosi e lē tatau ai ona faia nei amioga. O iʻuga leaga nei e oo i ai, e pei o lagona māsiasi, se lotofuatiaifo ua matuā mafatia, o lagona fuā, se maʻitaga, ma faamaʻi pipisi ona o feusuaʻiga. E pei lava ona faamanatu mai le Tusi Paia iā i tatou, o le tagata e faia le faitaaga, e tusa o loo ‘agasala o ia i lona lava tino.’—1 Korinito 5:9-12; 6:18; Faataoto 6:23-29, 32.

¹⁵ O Sieni, * o se tuafafine Molimau e nofofua, sa matuā loto faafetai ona o le auala na faamanatu ai e le Atua iā te ia le mea e tatau ona fai. Sa iai se alii aulelei na la faigaluega faatasi, ma sa faaali ane e lenei alii uiga faatosina iā te ia. Ina ua lē talileleia e Sieni na uiga, sa atili ai ona faamalolosi ane faatosinaga a lenei alii. Na taʻutino mai Sieni: “O se tauiviga tele na ou faia ina ia tumau laʻu amio mamā, auā e te lagona lava le nenee pe afai o loo mataʻiina ma amanaʻia mai oe e se tasi o le isi itupā.” Peitaʻi sa iloa e Sieni, na pau le mea o loo manaʻo i ai lenei alii, ia aofia ai ma ia i le lisi o isi foʻi tamaʻitaʻi ua uma ona faia a latou feusuaʻiga. Pe a lagona e Sieni ua tau faavaivai i lana faaiʻuga e tetee atu, sa faatoga iā Ieova ina ia fesoasoani mai i le tausia o lona faamaoni iā te Ia. Na iloa e Sieni, o mea na ia aʻoaʻoina mai ana saʻiliʻiliga i le Tusi Paia ma lomiga faale-Tusi Paia, sa pei o ni “faamanatu mai, lea na pei o se tui i lona lima ina ia toe malosi ai.” O se tasi o mea na faamanatu mai, o le tala iā Iosefa ma le avā a Potifara. Na faauma mai ana upu: “Pe afai ou te faamanatu pea iā te aʻu le telē o loʻu alofa iā Ieova, ona ou lē fefe ai lea ina neʻi oʻu faia lenei mea leaga tele ma ou agasala ai iā te ia.”

Ia Utagia Faamanatu Mai le Atua!

16. E faapefea ona aogā iā i tatou le toe faitauina ma mafaufau loloto i soifuaga o tagata o loo taʻua i le Tusi Paia?

¹⁶ E atili faateleina lo tatou talisapaia o tapulaa a Ieova, pe a taumafai e malamalama i le māfuaaga ua faasao mai ai nisi tala i le Tusi Paia mo i tatou. O le ā ua aʻoaʻo mai ai iā i tatou? O ā uiga po o faanaunauga o loo faataʻitaʻia mai e nisi tagata o le Tusi Paia, e manaʻomia ona tatou faataʻitaʻi i ai pe ʻalofia foʻi? E faitau selau nisi o loo taʻua i le Afioga a le Atua. O tagata uma e mananaʻo i faatonuga mai le Atua, e tatau ona latou atiaʻe se naunau mo le poto foaʻi ola, lea e aofia ai lesona o loo tatou aʻoaʻoina mai faaaʻoaʻoga ua faasaoina e Ieova i totonu o lana Afioga. E masani ona talanoaina i lenei mekasini ni mataupu e faatatau i na tagata o loo tatou aʻoaʻoina ai se lesona mai o latou olaga. Aiseā e lē faaalu ai se taimi e toe faitau ai nei tala?

17. O le ā sou lagona i mea o faamanatu mai e Ieova, ma aiseā?

¹⁷ Maʻeu so tatou loto faafetai i le silasila alofa mai o Ieova i ē o loo taumafai e fai lona finagalo! E tatou te lē lelei atoatoa, e pei foʻi o tane ma fafine o loo taʻua i le Tusi Paia. Peitaʻi, o faamatalaga o loo tusia e faatatau i a latou gaoioiga ua matuā aogā lava iā i tatou. O le utagiaina o mea e faamanatu mai e Ieova, e tatou te ʻalofia ai le faia o ni mea sesē matuiā, ae faataʻitaʻi atu i faaaʻoaʻoga lelei a ē na savavali i ala o le amiotonu. O le faia faapea, o le a mafai ai ona tatou pepese faatasi ma le faisalamo: “Amuia i latou o ē tausi i tulafono [a Ieova], o ē saʻiliʻili iā te ia ma le loto atoa; Ua tausi au tulafono i loʻu loto; ma ou matuā naunau i ai.”—Salamo 119:2, 167.

[Faamatalaga pito i lalo]

O le a Faapefea Ona E Tali?

• O le ā se lesona tatou te aʻoaʻoina mai le uiga na faaalia e Tavita iā Saulo?

• O le ā ua aʻoaʻoina ai i tatou mai le tala iā Anania ma Safaira?

• Aiseā ua tāua tele ai iā i tatou i aso nei le tala i le soifuaga o Iosefa?

[Fesili mo le Suʻesuʻega]

[Ata i le itulau 26]

Aiseā na musu ai Tavita e fasioti Saulo?

[Ata i le itulau 27]

O le ā tatou te aʻoaʻoina mai le tala iā Anania ma Safaira?

[Ata i le itulau 28]

O le ā na faapogai ai ona teena e Iosefa faatosinaga i amioga lē mamā?