Po o E Fiafia Moni Ea?

IOE, e te ono fesili ifo iā te oe, ‘Po o oʻu fiafia moni ea?’ O loo taumafai malosi saienitisi e suʻesuʻea mataupu tau i olaga o tagata, e saʻili le auala e tali ai e tagata lenei fesili, ae e lē faigofie la latou tiute. O le fuaina o le fiafia o tagata, e ono faatusa atu i le taumafai e iloa po o le ā le tele o le alofa o se tane i le avā, po o le tele foʻi o le faanoanoa pe a maliu se isi o le aiga. O se mea faigatā le taumafai e iloa po o le ā tonu le tele o ni faalogona. Peitaʻi, ua iloa e saienitisi le mea moni: E mafai ona fiafia tagata uma.

E ui ina tatou feola mai ma le tomai e fiafia ai, ae ua tele faanoanoaga ona o faafitauli matuiā. Seʻi tomānatu i le faaaʻoaʻoga lenei: I nisi aai, ua faatumulia fanuatanu i tuugamau o ē ua maliliu i le AIDS. Ua toe eli e malo tuugamau tuai ina ia teu ai tagata ia faatoʻā maliliu. I vaega o Aferika, o le faia o pusa oti o se vala sili lea e maua ai galuega. Ma po o fea lava e te alaala ai, ua e tagaʻi i le tele o faanoanoaga i ē ua mafatia i faamaʻi mataʻutia, ma ē ua maliliu tauaiga ma uō.

Ae faapefea atunuu e sili atu le tamaoaiga? O mea tutupu faafuaseʻi e leʻi faatalitalia, e ono alu uma ai tupe sa faaagaga mo le lumanaʻi. I le Iunaite Setete, e toʻatele le ʻaulitaea ua toe faigaluega ona ua lē toe maua ni penisione. O le tulaga masani le faaaogā uma o tupe teu a le aiga e totogi ai vailaau faafomaʻi. Ua taʻua e se faufautua: “E momomo lou loto pe a vaai atu i nei tagata ua ō mai mo ni fautuaga i mea tautupe, ma faafitauli o le soifua mālōlōina. O le tele o taimi e ao ona taʻu i ai, ‘e tatau ona faatau atu lou fale ina ia maua se tupe e tausi ai oe.’” Ae faapefea ē o loo iai a latou teugātupe? Pe e ono aafia i latou i faanoanoaga?

E tai tutusa olaga o nisi ma le fatu solo taʻutaʻua o Richard Rodgers. Ua taʻua e uiga iā te ia: “E lē mananaʻo le tele o tagata e faafiafia isi.” E ui o ana pese sa faafiafia ai isi, ae sa ia mafatia i le lotovaivai. Sa ia ausia sini e lua o loo momoo i ai le toʻatele, o tupe ma le taʻutaʻua, ae pe sa ia fiafia ea? Na mātauina e se tusitala: “Na matuā taulau manuia [Rodgers] i lana galuega, fiafia i se olaga tamaoaiga, ma mauaina ni faailoga se lua e taʻua o le Pulitzer Prizes. Sa ia faanoanoa foʻi ma mafatia i le tele o taimi.”

Atonu ua e mātau mai, o le faalagolago i ʻoa e maua ai le fiafia e masani ona ʻolegia ai. Na faamatala e se tusitala o teugātupe mo le nusipepa o le Globe and Mail a Toronto, i Kanata, le “tuua toʻatasi ma le leai o se faamoemoe” e fesagaʻia e ē tamaoaiga. E tusa ai o se faufautua sili o se faletupe, pe a avatu e mātua mauʻoa ni tupe se tele po o ni meaalofa i a latou fanau, “e masani ona iʻu ai i faafitauli i se taimi mulimuli ane.”

 Pe Iai se Faavae Mautū mo le Fiafia?

Ina ia ola se laau ma fua mai, e moomia le palapala lelei, vai, ma ia lelei le tau. Ua faapena foʻi ona iloa e tagata suʻesuʻe e iai mea e manaʻomia ina ia maua ai le fiafia. E aofia ai le soifua mālōlōina lelei; galuega lelei; taumafa lelei, fale, ma lavalava; faamalieina o manaʻoga; ma ni uō lelei.

E mautinoa e te ioe, o tulaga nei e iai se aafiaga lelei mo le mauaina o le fiafia. Ae e iai se vala e tāua atu. O le iloa lelei o “le Atua manuia [fiafia],” o lona suafa o Ieova. (1 Timoteo 1:11) E faapefea ona fesoasoani lenā malamalamaga? O Ieova na faia i tatou ma aumaia le tomai ina ia fiafia. O le mea moni, e na te silafia le auala tatou te maua ai le fiafia moni. O loo taʻua i le mataupu o sosoo mai lana auala, e faasino ai tagata i so o se ala i se olaga e maua ai le fiafia tumau.

[Ata i le itulau 4]

E pei o se laau ina ia fua mai, e moomia tulaga lelei ina ia maua ai le fiafia

[Faamatalaga i Ata i le itulau 3]

© Gideon Mendel/CORBIS