Se Lesona i le Faamaualuga ma le Lotomaulalo

NA IAI se mea na tupu i le soifuaga o le tupu o Tavita na faamatilatila ai le eseesega o le lotomaulalo ma le faamaualuga. Na tupu ina ua uma ona aʻea e Tavita Ierusalema ma avea ma ona aai laumua. Na manatu Tavita iā Ieova o ia moni o le Tupu o Isaraelu, o lea na ia fuafua ai ina ia aumaia i le aai le Atolaau lea sa avea ma faailoga o le afio ai o le Atua. Na mātua tāua iā Tavita lenei mea, ma sa faaalia lona fiafia tele i luma o le lautele a o ia mulimuli atu i le ʻauositaulaga na tauaveina le Atolaau. Na vaaia e tagatānuu o Ierusalema lo latou tupu o “saa” ma “siva . . . ua faamalosi ai lava.”—1 Nofoaiga a Tupu 15:15, 16, 29; 2 Samuelu 6:11-16.

Ae peitaʻi, e leʻi auai le avā a Tavita o Mekala i lenā solo fiafia. Sa ia matamata ane mai se faamalama, na i lo le talisapaia o le auala na avatu ai e Tavita le viiga iā Ieova, na “ʻinoʻino . . . o ia iā te ia i lona loto.” (2 Samuelu 6:16) Aiseā na faapea ai faalogona o Mekala? E foliga mai, sa ia soona faatāua naʻuā lona tulaga o le afafine o Saulo, le uluaʻi tupu o Isaraelu, ma o lea ua avea ma faletua o le tupu lona lua o Isaraelu. Atonu sa ia manatu, sa lē tatau i lana tane, o le tupu, ona tuu o ia i se tulaga maulalo e ala i le auai faatasi ma tagata lautele i fiafiaga. Na aliali ona lagona faamaualuga i le auala na ia faafeiloaʻia ai Tavita ina ua foʻi atu i le fale. Sa ia faapea atu i se uiga faaamuamu: “Ua mamalu naʻuā i le asō le tupu o Isaraelu, lē na faalelavalavā i le asō i luma o auauna fafine a ana auauna, e pei ona faalelavalavā se ulavale.”—2 Samuelu 6:20.

Na faapeʻī le tali atu a Tavita i lenei faitioga? Na aʻoaʻia e Tavita ia Mekala i lona faapea atu i ai, ua teena e Ieova, lona tamā o Saulo, ae fai o ia ma tupu. Na faapea atu atili Tavita: “Ou te toe faalēaogāina aʻu e aʻu e sili i lenā, ma ou faamaulalo lava; a o auauna fafine, na e fai mai ai, e viia lava aʻu e i latou.”—2 Samuelu 6:21, 22.

Ioe, na maumauaʻi Tavita e auauna pea iā Ieova ma le lotomaulalo. Ma o ona uiga nei, ua fesoasoani iā i tatou e malamalama ai i le māfuaaga na taʻua ai Tavita e Ieova “o le tagata e tusa ma loʻu nei loto.” (Galuega 13:22; 1 Samuelu 13:14) O le mea moni, sa mulimuli Tavita i le faaaʻoaʻo sili o le lotomaulalo—o Ieova le Atua lava ia. O le mea e mataʻina ai, ona o le faaupuga lea na faaaogā e Tavita ina ua fai atu iā Mekala, “ou [te] faamaulalo lava” e sau mai se veape autū i le gagana Eperu lea e faamatalaina ai foʻi le silafaga a Ieova i tagata. E ui lava o Ieova Lē Silisili ese i le aoao o mea, ae o loo faamatalaina o ia i le Salamo 113:6, 7, “o lē faamaulaloina [tuu ese o le tulaga maualuga po o le mamalu o se tasi ina ia feutagaʻi ma sē lē taualoa] e ia iā ia e silasila mai i le lagi atoa ma le lalolagi. Na te faatulaʻiina mai le tagatālautele nai le efuefu, na te faaeaina lē ua mativa nai le faatāfuna.”

Talu ai la o Ieova e faamaulalo, o le ala lea o lona ʻinoʻino i “mata faasiasia” o tagata faamaualuluga. (Faataoto 6:16, 17) Ona o le faaalia o lenei uiga leaga ma le lē faaaloalo i lē na tofia e le Atua e avea ma tupu, na lē maua ai e Mekala le faaeaga o le fanaua o se atalii iā Tavita. Na oti o ia e leai sana fanau. Maʻeu se lesona tāua mo i tatou! O i latou uma lava e mananaʻo e maua le finagalo malie o Ieova e tatau ona mulimuli i upu nei: “Ia oofu outou uma lava i le loto maulalo o le tasi i le tasi; auā, E tetee atu le Atua i ē faamaualuluga, a e foaʻiina mai le alofa tunoa i ē faamaulalo.”—1 Peteru 5:5.