Se Taʻiala Mautinoa i le Fiafia

“O LE saʻilia o le Fiafia,” o le aiā tatau a tagata uma. O le manatu lenā na iā i latou na faatulagaina le Faalauiloaga o le Tutoʻatasi o le Iunaite Setete o Amerika. Peitaʻi, o le faatū o se sini, e lē tutusa ma le ausia o se sini. E ui e toʻatele talavou o loo saʻilia galuega i faafiafiaga ma taaloga, ae e te silafia e toʻafia ē o loo maua le manuia tonu lea o loo faanaunau iai? Na taʻua e se tamaʻitaʻi pese lauiloa, o lē na tauivi e avea o se faimusika lelei: “E ono lē mafai ona e taulau manuia.”

Pe afai o lou lagona lenā i le mauaina o le fiafia, e lē o se māfuaaga lenā e lotovaivai ai. E mafai ona e maua le fiafia, pe a saʻo le auala e te saʻilia ai. Aiseā ua moni ai lenā manatu? Na taʻua i le mataupu ua mavae atu “le Atua manuia [fiafia],” o Ieova. (1 Timoteo 1:11) I le Tusi Paia, ua saunia e le Atua le taʻitaʻiga ina ia ʻalofia ai le iʻu atu i faanoanoaga o lou saʻilia o le fiafia. E mafai ona fesoasoani Ieova e foʻia māfuaaga e masani ai ona e faanoanoa. E pei o se faaaʻoaʻoga, seʻi tomānatu i le faamāfanafanaga ua ia ofo mai pe a maliu sē pele iā te oe.

Pe a Maliu Sē Pele

E leai se isi e fiafia i le oti. E tuueseese e le oti mātua mai a latou fanau, ma fanau mai i o latou mātua. E valavala ai ni faigāuō māfana ma lē mautonu ai ni nuu vavalalata. Pe a oo mai le oti, e ono lofitūina se aiga fiafia i le faanoanoa.

E lē tau manaʻomia ona taʻu atu e se isi iā te oe faapea, o le oti o se mala. Ae o nisi, latou te lē manatu i le oti o se mala, ae manatu i ai o se faamanuiaga. Seʻi mātau mai le mea na tupu ina ua mavae le afā o Katerina,  lea na aafia ai le Fagaloa o Mekisikō iā Aokuso 2005. Na taʻua e le faifeʻau i le maliu o se tasi: “E leʻi faaumatia e Katerina lona soifua. Ua amia e le Atua o ia i le lagi.” I se isi taimi, na taʻu atu e se failautusi a le falemaʻi i se teineitiiti e aua le popole, auā ua ave e le Atua lona tinā i le lagi. Na tagi le teineitiiti: “Aiseā ua ia aveesea ai loʻu tinā mai iā te aʻu?”

E manino mai, e lē mafai e nei manatu sesē ona faamāfanafana ai ē ua mafatia. Aiseā? Auā e lē o faamanino mai ai le mea moni e uiga i le oti. O le mea sili ona leaga, ua latou manatu ai ua aveesea e le Atua ē pele mai aiga ma uō i auala leaga ma tigā. Na i lo o se puna o faamāfanafanaga, ua avea ai le Atua e pei o sē e leaga ona o le mala o le oti. Ae ua taʻua i le Afioga a le Atua le mea moni e uiga i le oti.

Ua taʻua i le Tusi Paia le oti o se fili. O loo faatusa ai le oti i se tupu e puleaina tagata. (Roma 5:17; 1 Korinito 15:26) O le oti o le pule lea ua avea ma fili e lē mafai e se isi ona teena, ma ua ia pulea ē pele uma ua maliliu. E ioe le Tusi Paia i le faavauvau ma le lē mafesoasoania tatou te oo i ai pe a maliu sē pele. Ua faamautinoa ai o se mea e masani ai na lagona. Peitaʻi, pe faaaogā e le Atua le fili o le oti e aveese atu ai i le lagi ē pele iā i tatou? O le a tali le Tusi Paia i lenā fesili.

Ua taʻua i le Failauga 9:5, 10: “A o ē ua oti, latou te lē iloa se mea . . . E leai se galuega, po o se mafaufau, po o se iloa, po o se poto i le tuugamau, o loo e alu atu i ai.” I le tuugamau, ua matuā lē toe mafai ona fai se gaoioiga e ē ua maliliu, lē toe minoi, lagona se mea, pe mafaufau foʻi i se mea. E tai pei o loo momoe. Ua taʻua manino i le Tusi Paia, e lē avea e le Atua ē pele iā i tatou ua maliliu e faatasi ma ia i le lagi. Ua tuua i latou i le tuugamau ua maliliu ona o le oti.

Na faamautinoa e Iesu lenei upu moni ina ua maliu lana uō o Lasalo. Na faatusa e Iesu le oti i le moe. Pe ana faapea na alu Lasalo i le lagi e faatasi ai ma le Atua e Ona le Malosi Uma Lava, o le toe faafoʻi mai la e Iesu i le lalolagi ma mulimuli ane toe oti foʻi, o se gaoioiga lē alofa lea. Ua taʻua i le tala, a o iai i le tuugamau na fetalai leo tele atu Iesu: “Lasalo e, inā sau ia i fafo.” Ua taʻua atili i le Tusi Paia: “Ona alu ai lea i fafo o lē na oti.” Na toe ola Lasalo. Na silafia e Iesu e leʻi tuua e Lasalo le lalolagi. Sa iai i le tuugamau e aunoa ma se ola.—Ioane 11:11-14, 34, 38-44.

Ua faamauina lenei tala i le Tusi Paia e fesoasoani iā i tatou e malamalama ai, o le oti e lē o se auala lea a le Atua e avatu ai tagata mai le lalolagi i le lagi. E tatou te faalatalata ai la i le Atua, i le iloaina e lē o Ia e māfua ai o tatou faanoanoaga. E tatou te talitonu foʻi, e na te silafia lelei le faanoanoa ma le faaleagaina ua oo iā i tatou ona o le oti. Ma o le faamatalaga moni a le Tusi Paia i le tulaga o ē ua oti, e faamaonia ai e lē o faapuapuagatia  tagata i se afi po o pulekatolio, ae o loo i tuugamau ua leai se ola. O lea la, o o tatou mafaufauga i ē pele ua maliliu, e lē tatau ona pisia i le ʻinoʻino i le Atua, pe fefefe foʻi i le lē iloaina po o fea o iai i latou. I le ma lea, i le Tusi Paia, ua ofo mai e Ieova iā i tatou se isi faamāfanafanaga.

Faamoemoe e Iʻu i le Fiafia

Ua faaalia i mau na tatou talanoaina le faamoemoe, o se vaega tāua o le fiafiaga moni. O le upu “faamoemoe” e pei ona faaaogā i le Tusi Paia, ua faaalia ai le faatalitalia ma le mautinoa o se mea lelei. Ina ia iloa le auala e iʻu ai le faamoemoe i le fiafia i le taimi nei, seʻi o tatou talanoa atili i le tala iā Iesu ma le faatūina o Lasalo.

A itiiti mai e lua ni māfuaaga na faia ai e Iesu lenā vavega. O le isi ina ia aveesea ai le faanoanoa o Mareta, Maria, ma uō faavauvau. Ona latou olioli ai lea e toe faatasi ma lē e pele iā i latou. Ae na taʻu e Iesu iā Mareta le māfuaaga lona lua e sili atu ona tāua: “Pe na ou lē fai atu ea iā te oe, Afai e te talitonu, ona e iloa lea o le mamalu o le Atua?” (Ioane 11:40) Ua faaliliuina i le New Testament in Modern English a J. B. Phillips, le fuaiupu mulimuli i le “mea ofoofogia e mafai ona fai e le Atua.” Na faaata e Iesu le mea e mafai ona faia e Ieova ma o le a ia faia foʻi i le lumanaʻi, i le faatūina o Lasalo. O nisi nei o faamatalaga e uiga i le “mea ofoofogia e mafai ona fai e le Atua.”

Na fetalai Iesu i le Ioane 5:28, 29: “Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou ō mai ai.” O lona uiga, o le a toe tutū mai ē ua i tuugamau e aofia ai ma ē pele iā i tatou. Ua faailoa atili mai i le Galuega 24:15 lenei mea mataʻina: “O le a toe tutū mai ē ua amiotonu atoa ma ē ua amiolētonu.” E oo foʻi i ē “amiolētonu” e leʻi iloa Ieova ma auauna iā te Ia, o le a maua se avanoa i le lumanaʻi e maua ai le finagalo malie o le Atua.

O fea o le a tupu ai lenei toe tū? Ua taʻua i le Salamo 37:29: “E fai lava le nuu mo tagata amiotonu, e nonofo ai pea i latou.” Seʻi mafaufau po o le ā le uiga o lenā mea! O le a toe feiloaʻi i le lalolagi aiga ma uō na valavala ona o le oti. A o e mafaufau i le maua o le taimi e fiafia ai ma ē sa e manatua a latou faauōga, o se mea tatau la lou fiafia.

E Finagalo Ieova ia E Fiafia

Na tatou iloiloina auala e lua e faateleina ai e Ieova lou fiafia e ui i faafitauli. Muamua, e ala i le Tusi Paia, ua Ia saunia le poto ma le taʻitaʻiga e fesoasoani iā te oe e fesagaʻia ai ma le manuia mafatiaga. E ese mai le fesoasoani i le taulimaina o faanoanoaga ona o le oti, ua fesoasoani foʻi fautuaga a le Tusi Paia e fesagaʻia faafitauli tautupe ma le soifua mālōlōina. E avatu iā te oe le malosi e onosaʻia ai faiga lē tonu ma tulaga fesouaʻiina faapolotiki. Afai e faatatauina i lou olaga taʻitaʻiga a le Tusi Paia, o le a fesoasoani iā te oe e fesagaʻia ai ou faafitauli.

Lona lua, e ala i le suʻesuʻe o le Tusi Paia, e te maua ai se faamoemoe e sili atu na i lo se isi faamoemoe e ofo mai e tagata. O le toe tutū o uō ma aiga, o se vaega lenā o le faamoemoe o loo i le Tusi Paia. Ua taʻua i le Faaaliga 21:3, 4 isi faamatalaga: “E iā te i latou [tagata] le Atua lava. E sōloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.” O lona uiga, ua toeitiiti mou atu e faavavau so o se mea na māfua ai lou faanoanoa. O le a taunuu moni folafolaga o loo i le Tusi Paia, ma o le a e olioli i le faataunuuina. O le tau ina iloa o taimi sili atu ona lelei o loo lumanaʻi nei, e aumaia ai le toʻafilemu. O le iloaina e lē faapuapuagatia oe pe a e maliu, o se māfuaaga lea e fiafia ai.

 Ina ia faataʻitaʻi: E leʻi leva atu le maliu tigā o le tane a Maria ona o le kanesa. A o mafatia pea i le maliu o lana tane, na faamalosia o ia ma lana fanau teine e toʻatolu e ō ese mai le fale, ona o faafitauli tautupe. I le lua tausaga mulimuli ane, sa iloa e Maria ua aafia o ia i le kanesa. E lua ni ona taotoga tetele na fai, ma na ia fesagaʻia le tigā matuitui i aso uma. E ui i nei faafitauli, ae sa iā te ia se manatu saʻo lea na uunaʻia ai e faalaeiauina isi. Na faapefea ona tumau pea lona fiafia?

Ua taʻua e Maria: “Pe a iai soʻu faafitauli, ou te taumafai e aua le mafaufau tele iai. Ou te ʻalofia le faia o fesili pei o nei: ‘Aiseā ua tupu ai lenei mea iā te aʻu? Aiseā ua ou mafatia ai faapenei? Aiseā ua ou maʻi ai?’ O manatu sesē e faavaivaia ai. Na i lo lea, ou te faaaogā loʻu malosi e auauna ai iā Ieova ma fesoasoani ai i isi. Na aumaia ai iā te aʻu le fiafia.”

Na faapefea ona fesoasoani le faamoemoe iā Maria? Sa ia faamoemoe i le lumanaʻi lea o le a aveesea ai e Ieova maʻi, ma isi faafitauli mai tagata. Pe a alu i le falemaʻi mo se togafitiga, e na te tufa atu lona faamoemoe i isi ua aafia foʻi i le kanesa, o ē atonu e lē o iai se faamoemoe. O le ā le aogā o le faamoemoe iā Maria? Ua ia taʻua: “E masani ona ou mafaufau i le mea ua taʻua i le Eperu 6:19, lea na faamatala ai e Paulo le faamoemoe o se taula o le agaga. Pe a aunoa ma lenā taula, o le a e tafea ese pei o se vaa ua tafea i le matagi. Ae a e pipii i lenā taula, o le a e malu e ui i faafitauli tetele e fesagaʻia.” O lenā “faamoemoe i le ola e faavavau, na folafolaina mai e le Atua . . . e lē mafai ona tala pepelo” na fesoasoani iā Maria e tumau ai i le fiafia. E mafai foʻi ona faia faapea iā te oe.—Tito 1:2.

E ala i le suʻesuʻe o le Tusi Paia, o le a e maua ai le fiafia moni e ui i ou faafitauli. Ae atonu o le a iai ni au fesili e uiga i le aogā o le suʻesuʻe o le Tusi Paia. O le a fiafia Molimau a Ieova e faaali atu tali mai le Tusi Paia e ao ona e silafia, ina ia e fiafia moni ai. A o e tatali i le faataunuuga o le faamoemoe ua ofo mai e Ieova, o le a e iai faatasi ma ē ua faamatalaina faapenei: “Latou te maua le olioli ma le fiafia, a e sosola ese le faanoanoa ma le mapuitigā.”—Isaia 35:10.

[Ata i le itulau 5]

E na o upu moni o le Tusi Paia e mafai ona aveesea le faanoanoa

[Ata i le itulau 7]

O le faamoemoe o le toe tū o loo i le Tusi Paia e maua ai le fiafia