O Lona Faatuatua e Faalaeiauina ai Isi

INA ua fanau mai Silivia iā Tesema 1992, na foliga mai o se teineitiiti na atoatoa lona malosi. Peitaʻi ina ua lua ona tausaga, na aafia i le faamaʻi o le cystic fibrosis, o se faamaʻi e lē mafai ona togafitia ma e māfua ai ona faalētonu āla ea ma faafitauli i le faamalūina o meaʻai. Ina ia taumafai e onosaʻia lona maʻi, e inuina ai e Silivia ni fualaau e 36 i aso uma, e iai ma togafitiga e ala i le mānava, ma fai ana faamalositino. Talu ai sa na o le 25 pasene le malosi o ona māmā e pamuina ai le okesene, pe a faatusatusa i le māmā lelei, sa manaʻomia ai ona fealuaʻi ma feaveaʻi se tane (masini) okesene.

Na faapea mai le faamatalaga a lona tinā o Teresa: “O se mea e ofo ai ona o le auala e onosaʻia ai e Silivia lenei faamaʻi. O lona malamalama i le Tusi Paia ua ala ai ona malosi lona faatuatua. O lona faatuatua lea ua fesoasoani iā te ia e faafetaiaʻia ona faalogona faanoanoa ma mafatia. Na te manatuaina pea le folafolaga a Ieova mo le lalolagi fou, o le a faamālōlōina ai ē mamaʻi.” (Faaaliga 21:4) I nisi taimi pe a loto vaivai lona aiga, e faalaeiau lava i latou e le ʻataʻata a Silivia. E faapea atu lava o ia i ona mātua ma lona tuagane: “O le a sili atu ona faaleleia i le lalolagi fou lo tatou tulaga mafatia i le taimi lenei.”

E masani ona taʻu atu e Silivia le tala lelei mai le Tusi Paia i isi, ma e mātauina e tagata e talanoa i ai ona foliga fiafia ma olioli. E fiafia lava sui o la latou faapotopotoga Kerisiano i Canary Islands, e faalogologo i ona sao e faia i sauniga. Pe a māeʻa sauniga taʻitasi, e fiafia lava Silivia e talatalanoa i uso ma tuafāfine Kerisiano. O ona uiga faaleuō ma fiafia ua alofagia tele ai o ia e tagata uma o le faapotopotoga.

Ua faapea mai lona tamā o Antonio: “Ua matou aʻoaʻo mai iā Silivia se lesona tāua, e ui lava ina iai o tatou faafitauli, o se meaalofa mai le Atua le ola, ma e tatau ona tatou talisapaia.” E pei o Silivia, e manaʻomia e auauna uma lava a le Atua—pe laʻitiiti pe matua—ona faatalitali ma le naunautaʻi i le taimi o le a “lē fai mai foʻi se tasi ua mau ai, Ou te maʻi.”—Isaia 33:24.

[Ata i le itulau 31]

E faitauina e Silivia se mau mai le Tusi Paia a o taofia e lona tinā le tane (masini) okesene