“O se Iʻuga Sili Lenei Ona Manaia o Aʻu Aʻoaʻoga”

NA TUSI mai se alii faiaʻoga o se aʻoga maualuga i Sepania: “Ua silia i le selau tausaga o loo faaalia pea e Molimau a Ieova lo latou autasi moni, le faamaoni lē ponā, aemaise lo latou faatuatua lē maluelue.” Aiseā na faia ai e lenei faiaʻoga lenei manatu, e ui o ia o se tasi e lē talitonu e iai se atua?

Na māfua uma mai lava iā Noemí, o se teineitiiti Molimau a Ieova e aʻoga ai i lea aʻoga. Na tofia Noemí e tusia se tala, o se vaega o lana suʻega faaiʻu o ana aʻoaʻoga. Ona ia filifilia lea o le matua “O Tafatolu Violē i le Pulega a Nasi.” (The Purple Triangles Under Nazi Rule)

Aiseā na ia filifilia ai lenā matua? Fai mai Noemí: “Sa ou iloa o le a siaki e se faiaʻoga laʻu tusigatala, ona ou manatu ai lea, o le avanoa lea ou te molimau atu ai iā te ia. Sa ootia tele loʻu loto pe a ou faitau i le tala i le auala na tumau ai le faamaoni o Molimau a Ieova sa iai i taimi o pulega a Nasi o Siamani. Na ou talitonu o le a faapena foʻi ona ootia ai lagona o nisi tagata.”

E toʻatele ni tagata sa matuā telē se aafiaga na oo iā i latou ona o le tala a Noemí; o se mea e na te leʻi faatalitalia. Iā Oketopa 5, 2002, na maua ai e lana tala lea na tusi se faailoga i se tauvaga a le atunuu atoa, sa faia e faatatau i saʻiliʻiliga i mea faasaienisi ma mataupu i fausaga ma mafaufauga o tagata. O faailoga o lenā tauvaga sa tufatufaina e se vaega o faatonu, na iai le toʻa 20 o tagata atamamai ma polofesa mai iunivesite iloga i Sepania.

O lē na tauaaoina atu le faailoga o Noemí, o Pilar del Castillo, o le minisita o aʻoga i Sepania. O le avanoa lenā na avatu ai e Noemí i le minisita se kopi o le kaseti vitiō o le Jehovah’s Witnesses Stand Firm Against Nazi Assault. Na talia fiafia e le minisita le meaalofa.

Sa faamatilatila e le nusipepa a le aai lea e sau ai Noemí, le faailoga na ausia i ana aʻoaʻoga ma toe autalu ai manatu sa taʻua i lana tala na tusi. I lenā taimi, sa tāpā ai e le pule o le aʻoga se kopi o lana tala ina ia faaaofia i le polokalame o loo faatulaga mo le faamanatuina o le 75 tausaga talu ona faavae le aʻoga maualuga.

Fai mai Noemí: “O se iʻuga sili lenei ona manaia o aʻu aʻoaʻoga maualuluga. Sa matuā ou fiafia a o oʻu faitauina upu na tusia e loʻu faiaʻoga, o Mr. Jorge Tomás Calot, e faatomua ai loʻu lipoti, e faapea:

“‘O aʻu ou te lē talitonu e iai se atua, peitaʻi ou te manaʻo ia ou matuā talitonu aʻiaʻi e iai Lē Silisili Ese, o ia lea o loo faaosofiaina i loto o ona tagata tapuaʻi le “alofa i tuaoi’ e sili ona moni.”’”