Se Asiasiga na Māfua ai se Suiga

“SA OU lē manofo i le fia faamatala atu i loʻu aiga o ni ‘agelu’ e toʻalua na auina mai e le Atua iā te aʻu.” O le tusi mai lenā a se tamāloa na asiasi ane i ai ni tamaʻitaʻi se toʻalua e Molimau a Ieova. Na maliu lana avā i ni nai vaiaso na muamua atu, ma motusia ai le mafutaga ua 45 tausaga. Sa matuā lofitūina o ia i le faanoanoa. Na ia maua sina faamāfanafanaga mai lana fanau matutua, peitaʻi e mamao lava le mea ua latou nonofo ai nei. E leai foʻi ni ana uō po o ni tuaoi na asiasi ane iā te ia.

Na faapea atu le tamāloa lenei i tamaʻitaʻi na asiasi ane: “Ou te lē o toe fia talanoa i le Atua.” Peitaʻi, na faaali pea le tigā alofa e nei tamaʻitaʻi ma tuu ai se sāvali faale-Tusi Paia e faaulutalaina faapea, O le ā le Faamoemoe mo Ē Pele ua Maliliu? Na faitauina e le tamāloa i le afiafi lava lenā ma ia mauaina ai se faamāfanafanaga.

Mulimuli ane, na toe asiasi atu tamaʻitaʻi Molimau nei. Na la manatuaina le faanoanoa o le tamāloa i le taimi muamua na asiasi atu ai, ma o lea na la toe foʻi ai e vaai po o ā mai o ia. Na faapea atili le faamatalaga a le tamāloa: “Na ou matuā maofa, ona o le manatu mamafa o nei tagata ese mo loʻu lelei.” Na faalaeiauina o ia i manatu o le Tusi Paia sa faasino atu i ai. Na taʻu atu e tamaʻitaʻi o le a la toe asiasi ane foʻi. Na matuā faagaeetia lenei tamāloa ma uunaʻia ai o ia e tusi ana faamatalaga o i luga i se tusi, ma lafo i le Maota mo sauniga a Molimau a Ieova na latalata ane.

A o leʻi siitia atu lenei tamāloa i se nofoaga e lata i se tasi o ona atalii, na auai ai o ia i se sauniga a Molimau a Ieova ma faiʻaiga ma le aiga o se tasi o tamaʻitaʻi. Na ia tusi i lana tusi e faapea: “O le a ou alu ese ma lenei vaipanoa, ae o le a lē faagaloina i loʻu loto ma aʻu tatalo nei tamaʻitaʻi talavou ma le tou lotu. Ioe, ua toe amata nei ona ou tatalo ma ua faifai pea. Ua ou matuā faia se suiga atoa. Ma ua māfua ona o na talavou, ma ou te faafetaia lava i laʻua.”