Talavou e, Filifili Nei e Auauna iā Ieova
Talavou e, Filifili Nei e Auauna iā Ieova
“Inā filifili ia o outou i le aso nei, po o ai tou te auauna i ai.”—IOSUA 24:15.
1, 2. O ā papatisoga sesē o loo faia i atunuu Kerisiano?
“TUU [tamaiti] e fai ma Kerisiano pe afai ua mafai ona latou iloa Keriso.” O upu na sa tusia e le tusitala o Tetuliano, a o lata i le iʻuga o le senituri lona lua T.A. Sa tetee o ia i le papatisoga o pepe, ae o se faiga na matuā faamausalī e i latou na tetee i le Faa-Kerisiano moni i na aso. Sa lē ioeina e le faatamā o le lotu, o Aokusotino le manatu o Tetuliano faapea le Tusi Paia. Fai mai lona manatu, o le papatisoga e fufulu ese ai pisipisia o le uluaʻi agasala, ma afai e malaia pe feoti ni pepe a o leʻi papatisoina, o lona uiga ua ō atu na pepe i le afi i seoli. O le talitonuga lenā na māfua ai ona faamalosia le vave papatiso o pepe i le taimi lava faatoʻā fananau mai ai.
2 E tele lotu autū e faapea mai o Kerisiano, o loo latou papatisoina pea pepe. A o faagasolo foʻi taimi ua mavae, sa faamalosia ai e pule ma taʻitaʻi lotu o atunuu na faapea mai o Kerisiano, le papatisoina o “tagata faapaupau” na puʻea mai i taua. Peitaʻi o le papatisoga o pepe ma le papatiso faamalosi o tagata matutua, e leai so la faavae faale-Tusi Paia.
E Lē Faafuaseʻi Ona Faia ni Tuuina Atu i Aso Nei
3, 4. O le ā e mafai ona fesoasoani i fanau a mātua ua tuuina atu iā Ieova, ina ia loto malilie ai e faia foʻi so latou tuuina atu?
3 Ua taʻua e le Tusi Paia faapea, e paia i le silafaga a le Atua fanauiti e tusa lava pe na o le toʻatasi so latou matua o loo avea ma Kerisiano faamaoni. (1 Korinito 7:14) Pe avea ai la na tamaiti o ni auauna ua tuuina atu iā Ieova? Leai. Peitaʻi o fanau ua tausi aʻe e mātua ua tuuina atu iā Ieova, ua latou maua se toleniga lea e mafai ona loto malilie ai na fanau e tuuina atu foʻi o latou ola iā Ieova. Na tusi le poto o Solomona: “Loʻu atalii e, ia e tausi i poloaʻiga a lou tamā; aua foʻi e te tuulafoaʻiina le upu e aʻoaʻo atu a lou tinā. . . . A e savali, e taʻitaʻiina ai oe; a ē moe, e leoleoina ai oe; a ē ala, e tautala ai ma oe. Auā o le poloaʻiga o le sulu lea; ma le upu e aʻoaʻo atu, o le malamalama lea; o aʻoaʻiga foʻi e aʻoaʻoina ai, o le ala o le ola lea.”—Faataoto 6:20-23.
4 E mafai ona avea taʻitaʻiga a mātua Kerisiano o se puipuiga mo talavou, pe afai e mananaʻo na talavou e usitaia. Na taʻua foʻi e Solomona: “O le atalii poto na te faafiafia lona tamā; a o le tama valea e faanoanoa ai lona tinā.” “Ia e faalogo mai, loʻu atalii e, ma ia e poto; ma e taʻitaʻi tonu lou loto i le ala.” (Faataoto 10:1; 23:19) Ioe talavou e, afai tou te fia manuia mai aʻoaʻoga a mātua, e tatau la ona tou naunau e talia fautuaga, o timaʻiga ma aʻoaʻiga. E tou te leʻi fananau mai ua outou popoto, ae mafai ona outou ‘popoto’ ma tou loto malilie ai e savavali i “le ala o le ola.”
O le ā e Uiga i ai le Upu Apoapoaʻiga?
5. O le ā le fautuaga a Paulo i mātua ma i tamā?
5 Na tusi mai Paulo: “O outou le fanau, ia outou faalogo i o outou mātua i le Alii, auā o le mea tonu lava lea. Ia e ava i lou tamā ma lou tinā; o le uluaʻi tulafono lea ua i ai le mea ua folafolaina; ina ia manuia ai oe, ma ia e nofo tuluʻi ai i luga o le laueleele. O outou tamā foʻi, aua neʻi tou faaonoono atu i a outou fanau, a ia tausi atu i ai i aʻoaʻiga ma apoapoaʻiga a le Alii.”—Efeso 6:1-4.
6, 7. O ā mea e aofia i le tausia aʻe o fanau i ‘apoapoaʻiga a Ieova,’ ma aiseā ua lē uiga ai lenei mea faapea o loo puleaina lē tatau e mātua a latou fanau?
6 Pe a tausi aʻe e mātua Kerisiano a latou fanau i ‘aʻoaʻiga ma apoapoaʻiga a Ieova,’ o lona uiga ea ua latou avatu ni taaʻiga lē tatau i a latou fanau? E leai. O ai e mafai ona ia taʻuleagaina mātua ona o le aʻoaʻoina o fanau i mea ua latou iloa e tonu ma aogā i tulaga tau amio? E lē o faitioina tagata faapaupau i le aʻoaʻoina o a latou fanau faapea e lē o soifua le Atua. E manatu tagata Katoliko o lo latou tiute le aʻoaʻo o a latou fanau i talitonuga a le Katoliko, ma e seāseā faitioina i latou i le taumafai e fai lenā mea. E faapena foʻi la i Molimau a Ieova; e lē tatau ona tuuaʻia faapea ua latou puleaina mafaufauga o a latou fanau, a o taumafai e tausi aʻe i latou ia talia le silafaga a Ieova i upu moni faavae ma mataupu silisili i amioga tatau.
7 I se faamatalaga a le Theological Dictionary of the New Testament, o le uluaʻi upu Eleni lea e faaliliu i le “apoapoaʻiga” i le Efeso 6:4, o loo faasino atu i se faagasologa o le “taumafai e faasaʻo le mafaufau, e faatulaga saʻo se mea o sesē, e faaleleia le uiga faaleagaga po o le uiga agaʻi i le Atua.” Ae faapefea pe a teena e se talavou le tausiga ma toleniga a ona mātua ona o omiga mai aumea, le faanaunauga e fia faataʻitaʻi i mea o fai e le toʻatele? O ai e tatau ona tuuaʻia i le aumaia o omiga—o mātua po o aumea a le talavou? Afai o loo uunaʻia e aumea le talavou e faaaogā fualaau faasāina, ia inutele i le ʻava malosi, pe auai i amioga lē mamā, pe tatau la ona faitioina mātua ona o le taumafai e faasaʻosaʻo mafaufauga o le la tama, ma fesoasoani ia ona iloa āuga o na amioga mataʻutia?
8. O le ā sa aofia ai i le ‘faamautinoa atu o Timoteo ina ia talitonu’?
8 Na tusi le aposetolo o Paulo i le talavou o Timoteo: “Ia e tumau i mea ua aʻoaʻoina ai oe, ma ua [faamautinoa atu,] iā te oe, ina ua e iloa o ia na aʻoaʻo atu ai iā te oe; talu foʻi ina o e tama itiiti ua e iloa tusi paia, e mafaia ona faapoto ai iā te oe e iʻu ai i le faaolataga i le faatuatua ua iā Keriso Iesu.” (2 Timoteo 3:14, 15) Mai lava i uluaʻi tausaga o le olaga o Timoteo, sa faataatia ai e lona tinā ma le tinā o lona tinā, se faavae malosi mo lona faatuatua i le Atua, e ala i mea na malamalama ai i le Tusi Paia. (Galuega 16:1; 2 Timoteo 1:5) Mulimuli ane, ina ua avea i laʻua ma Kerisiano, e la te leʻi faamalosia Timoteo e talitonu ae na la ‘faamautinoa iā te ia,’ e ala i ni fetalanoaʻiga talafeagai e faavae aʻe i se malamalamaga mai le Tusi Paia.
Ua Valaaulia Oe e Ieova e Fai Lau Filifiliga
9. (a) Na faapefea ona faamamaluina e Ieova ana foafoaga, mo le ā le māfuaaga? (e) Na faapefea ona faaaogā e le Alo pele e toʻatasi o le Atua lona saʻolotoga e filifili ai?
9 Sa ono mafai e Ieova ona faia ana foafoaga e pei o ni ropati po o ni masini ua uma ona faapolokalame mo le faia o lona finagalo, ma e lē mafai lava ona ese se mea latou te fai. Na i lo lea, sa ia faamamaluina i latou i le foaʻi mai i ai o se saʻolotoga e filifili ai. E fiafia le finagalo o le Atua pe a gaoioi ana auauna ona o le lotomalie. E fiafia lona finagalo pe a silasila mai i ana foafoaga, o ē matutua ma ē talavou, o loo auauna atu iā te ia ona o le alofa. O le faaaʻoaʻoga sili o le gauaʻi ma le alofa i le finagalo o le Atua, o lona lava Alo pele e toʻatasi, lea na faasino i ai le fetalaiga a Ieova: “O loʻu Atalii pele lenā, ua ou fiafia lava iā te ia.” (Mataio 3:17) Na faapea atu lenei Alo ulumatua i lona Tamā: “Loʻu Atua e, ou te fiafia e fai lou finagalo; o loo i totonu lava iā te aʻu lau tulafono.”—Salamo 40:8; Eperu 10:9, 10.
10. O le ā e fua i ai le taliaina e Ieova o se auaunaga iā te ia?
10 E faatalitalia e Ieova i latou o loo auauna iā te ia e ala i le taʻitaʻiga a lona Alo, ina ia latou faaalia lea lava gauaʻi ma le lotomalie e fai Lona finagalo. Na pese faavaloaga le faisalamo: “E fai taulaga ma le loto ou tagata i le aso o lou malosi i au mea paia e matagofie mai le manava o le vave ao; e iā te oe le sau o lou tauleʻaleʻa.” (Salamo 110:3) O le faalapotopotoga atoa a Ieova, i ona vaega i le lagi ma le lalolagi, o loo faagaoioia uma ona o le gauaʻi atu ma le alofa i le finagalo o le Atua.
11. O le ā le filifiliga ua taatia atu i talavou uma o loo tausi aʻe e mātua ua tuuina atu iā Ieova?
11 E tatau ona outou malamalama talavou, e lē faamalosia outou e outou mātua, po o toeaina o le faapotopotoga, ina ia outou papatiso. E tatau ona iai so outou lava faanaunauga e fia auauna iā Ieova. Na taʻu atu e Iosua i le fanauga a Isaraelu: “Ia outou . . . auauna iā [Ieova] ma le loto saʻo ma le faamaoni . . . Inā filifili ia o outou i le aso nei, po o ai tou te auauna i ai.” (Iosua 24:14-22) E faapena foʻi outou; e tatau ona outou filifili ma le lotomalie e tuuina atu iā Ieova, ma tuutoina outou ola e fai lona finagalo.
Talia Lou Tiute Tauave
12. (a) E ui ina aʻoaʻoina e mātua a latou fanau, ae o le ā e lē mafai ona latou faia mo fanau? (e) O lē fea taimi e mafai ai ona tali atu le talavou iā Ieova mo filifiliga na te faia?
12 E oo mai le taimi e lē toe puipuia ai outou talavou e outou mātua. (1 Korinito 7:14) Na tusi mai le soo o Iakopo: “O lē ua iloa e fai le mea lelei, a e lē faia, o le agasala lea iā te ia.” (Iakopo 4:17) E lē mafai e mātua ona auauna i le Atua e fai ma sui o a latou fanau; e pei foʻi ona lē mafai e fanau ona auauna i le Atua e fai ma sui o o latou mātua. (Esekielu 18:20) Po ua e a aʻoaʻoina ea ala o Ieova ma ana fuafuaga? Po ua lava ea lou matua e te malamalama ai i mea ua e aʻoaʻoina ma ati aʻe se faiā totino ma ia? Po ua lē talafeagai ea la ona manatu, ua silafia e le Atua e mafai ona fai lau lava filifiliga e auauna atu ai iā te ia?
13. O ā fesili e tatau ona fesili ifo ai talavou ua matutua ae leʻi papatiso?
13 Po o oe o se talavou e leʻi papatiso na tausi aʻe e ni mātua e tapuaʻi i le Atua, o loo e auai i sauniga faa-Kerisiano, ma auai foʻi i le talaʻia o le tala lelei o le Malo? Afai o lou tulaga lenā, seʻi e fesili ifo iā te oe: ‘Aiseā ou te faia ai nei mea? Po o le pogai ea o loʻu auai i sauniga ma le galuega talaʻi, ona o loo faatonu mai aʻu e oʻu mātua, pe ona o loʻu manaʻo e faafiafia Ieova?’ Po ua e faamautinoa ea le “finagalo o le Atua, [i] mea ua lelei, ma le mālie, ma le atoatoa”?—Roma 12:2.
Aiseā e Faatuai ai Ona Papatiso?
14. O ā ni faaaʻoaʻoga o loo taʻua i le Tusi Paia e faaalia ai, e lē tatau ona tolopōina le papatisoga e aunoa ma se māfuaaga tatau?
14 “Se ā ea se mea e vaoia ai aʻu e aua le papatisoina o a’u?” O le tamāloa Aitiope lea na faia le fesili lenei iā Filipo le faievagelia, o lea faatoʻā ia iloa i le taimi lava lea, o Iesu o ia o le Mesia. Peitaʻi sa lava le malamalama o le tamāloa Aitiope i le Tusi Paia na ia iloa ai, e lē tatau ona toe taofia lona molimau atu i le lautele faapea, o le a amata mai i lenā taimi ona ia auauna iā Ieova o se vaega o le faapotopotoga Kerisiano, ma o inā foʻi na māfua ai lona olioli tele. (Galuega 8:26-39) Sa faapena foʻi se fafine e igoa iā Litia, o lē na tatalaina lona loto “ia naunau i upu na tautala aʻi Paulo,” ma e leʻi umi lava ae “papatisoina” o ia atoa ma lona aiga. (Galuega 16:14, 15) Na faapena foʻi i le pule o le falepuipui i Filipi; sa faalogologo atu iā Paulo ma Sila a o la ‘tautala atu i le afioga a le Alii iā te ia,’ ona “papatisoina loa lea o ia ma lona aiga uma.” (Galuega 16:25-34) O lea afai ua iā te oe le malamalamaga faavae e uiga iā Ieova ma ana fuafuaga, ma iai sou faanaunauga moni e faia lona finagalo, o loo lelei lou talaaga i le faapotopotoga, ma o loo e auai e lē aunoa i sauniga ma le talaʻia o le tala lelei o le Malo, aiseā la e toe tolopō ai lou papatisoina?—Mataio 28:19, 20.
15, 16. (a) O le ā se māfuaaga lē saʻo e ono faatalatū ai nisi talavou mai le papatisoina? (e) Ua avea faapefea le tuuina atu ma le papatisoga o se puipuiga mo talavou?
15 Faamata e ala ona e faatalatū e uia lenei laasaga tāua, ona o lou popole neʻi e nofosala ai pe a e faia se amioga sesē? Afai o le māfuaaga lenā, seʻi manatu i le mea lenei: Po o le a e musu ea e fai sou laisene avetaavale, talu ai lou palaai ina neʻi e aafia i se faalavelave tau taavale? E mautinoa e leai! E lē tatau foʻi la ona e faatalatū e te papatiso, pe afai ua e agavaa. O le mea moni, o le a sili ai ona e faamalosi e fai le mea sili e teena amioga sesē, pe afai ua tuuina atu lou ola iā Ieova, ma ua e lotomalie e fai lona finagalo. (Filipi 4:13) Faamolemole talavou e, aua neʻi e manatu faapea e lelei le tolopō o lou papatisoga, e te lē nofosala ai pe a e faia se mea sesē. Auā afai ua e ausia le matua ua mafai ai ona e tauaveina ni tiute tauave, lona uiga e faamasinoina oe e Ieova i le auala o loo e gaoioi ai, e tusa lava po ua e papatiso pe leai.—Roma 14:11, 12.
16 E toʻatele Molimau i le lalolagi aoao ua latou iloa le tele o ni fesoasoani ua latou maua ona o la latou filifiliga ina ia papatiso a o talavou. E pei o se uso talavou e 23 ona tausaga mai se atunuu i Europa i Sisifo. E na te manatua ina ua papatiso i le 13 o ona tausaga, sa avea lea o se uunaʻiga iā te ia e matuā faaeteete ai mai le ono maileia “i tuʻinanau o tauleleʻa” po o talavou. (2 Timoteo 2:22) A o laʻitiiti lava, sa ia faataatia sona sini e fia auai i le auaunaga faataimi atoa. I aso nei, o loo auauna ma le fiafia i se ofisa o le lālā a Molimau a Ieova. E anoanoaʻi faamanuiaga o le a manuia ai talavou uma, e aofia ai foʻi ma oe, o ē filifili e auauna iā Ieova.
17. O ā vala o le olaga e talafeagai ai ona iloa “le finagalo o [Ieova]”?
17 O le tuuina atu ma le papatisoga, o le amataga lea o se olaga ua tatou amanaʻia ai le silafaga a Ieova i mea uma tatou te faia. O le faatinoga o lo tatou tuuina atu e aofia ai le “faatauina mai o le taimi.” E faapefea ona fai? Ia faaaogā le taimi lea na semanū tatou te faaalu i le saʻilia o isi mea lē aogā, e uaʻi atu ai i le suʻesuʻeina o le Tusi Paia, le auai e lē aunoa i sauniga, ma faia se sao atoatoa i le talaʻia o le “tala lelei o le malo.” (Efeso 5:15, 16, NW; Mataio 24:14) O lo tatou tuuina atu iā Ieova ma lo tatou faanaunauga e fai lona finagalo o le a iai se aafiaga lelei i vala uma o lo tatou olaga, e aofia ai le auala e fai ai a tatou faiga mālōlōga, tatou te aai ma inu ai, ma ituaiga o musika o loo tatou faalogologo ai. Aiseā e lē filifili ai le ituaiga o faiga mālōlōga o le a mafai ona e olioli ai e oo i le faavavau? E toʻatele Molimau talavou o le a latou faamatala atu iā te oe le tele o auala lelei e te fiafia ai, ae i le taimi e tasi o loo e faamalieina pea “le finagalo o [Ieova].”—Efeso 5:17-19.
“Tatou te Ō ma Outou”
18. O le ā le fesili e tatau ona fesiligia ai e talavou i latou lava?
18 I le 1513 T.L.M. seʻia oo mai i le Penetekoso 33 T.A., sa faamaopoopo ai e Ieova i luga o le lalolagi se nuu po o ni tagata ua ia filifilia e tapuaʻi iā te ia ma avea ma ana molimau. (Isaia 43:12) Ma na fananau mai talavou Isaraelu o ni tagata o lenā nuu. Talu mai le Penetekoso, sa toe saunia e Ieova se “nuu” fou i le lalolagi, o Isaraelu faaleagaga, o “se nuu mo lona suafa.” (1 Peteru 2:9, 10; Galuega 15:14; Kalatia 6:16) Na taʻua e Paulo faapea na faamamāina e Keriso ni tagata ‘e fai ma ona lava nuu, o ē maelega i galuega lelei.’ (Tito 2:14) Seʻi mafaufau la outou talavou, po o fea tou te maua i ai na tagata. O ai i aso nei o loo faia aʻe ai le “nuu amiotonu o ē tausi le mea moni,” ma ola e tusa ai o mataupu silisili o le Tusi Paia? O ai o loo amioaʻi o ni Molimau faamaoni mo Ieova, ma latou folafola atu lona Malo, ua na o le pau lea o le faamoemoe mo tagata? (Isaia 26:2-4) Seʻi tagaʻi atu i lotu o loo faapea mai o Kerisiano ma isi lava lotu, ona vaai lea pe tutusa a latou amioga ma mea o loo faatalitalia e le Tusi Paia mai auauna moni a le Atua.
19. O le ā ua mautinoa e le faitau miliona o tagata i le lalolagi aoao?
19 E faitau miliona tagata i le lalolagi aoao e aofia ai ma talavou, ua latou mautinoa o loo faia aʻe lenā “nuu amiotonu” i le vaega totoe faauuina o Molimau a Ieova. Ua latou faapea atu i nei Isaraelu faaleagaga: “Tatou te ō ma outou; auā ua matou faalogo, o loo iā te outou le Atua.” (Sakaria 8:23) O o matou moomooga sili ma le tatalo, ina ia filifili outou talavou e auai faatasi ma tagata o le Atua, ma ‘filifili ai i le ola’—le ola lea e faavavau i le lalolagi fou a Ieova.—Teuteronome 30:15-20; 2 Peteru 3:11-13.
O se Autaluga
• O ā mea e aofia i apoapoaʻiga?
• O le ā le ituaiga o auaunaga e talia e Ieova?
• O le ā le filifiliga ua taatia atu i talavou uma o loo tausi aʻe e mātua ua tuuina atu iā Ieova?
• Aiseā e lē tatau ai ona tolopōina le papatisoga e aunoa ma se māfuaaga tatau?
[Fesili mo le Suʻesuʻega]
[Ata i le itulau 26]
O ai o le a e faalogo i ai?
[Ata i le itulau 28]
E faapefea ona puipuia oe e le tuuina atu ma le papatisoga?
[Ata i le itulau 29]
O le ā se mea o taofia oe mai le papatisoina?