Ua Latou Fiafia e Fai le Finagalo o le Atua

NA FAATAATIA e Iesu le faaaʻoaʻoga mo Kerisiano uma lava ina ua tatalo atu i lona Tamā: “Aua le faia loʻu loto, a o lou finagalo.” (Luka 22:42) O loo atagia atu pea i aso nei lenā faaleoga o le usiusitai iā Ieova, e le faitau miliona o auauna a le Atua. Ma o nisi o i latou na, o le toʻa 52 o tagata aʻoga o le vasega lona 120 a le Olomatamata o Kiliata. Iā Mati 11, 2006, sa olioli ai le vasega faauu a o taulaʻi atu i lo latou faiva o le faia o le finagalo o le Atua i atunuu eseese, e ui lava i tulaga faigatā o le a latou fesagaʻia ai.

O le ā se uunaʻiga ua loto malilie ai lenei ʻaufaauu e uaʻi atu o latou olaga i le faia o le finagalo o Ieova? O le tali lenei a Chris ma Leslie, o se ulugalii ua tofia nei e auauna faamisionare i Polivia: “Ona o lenei ua ma faataulagaina o ma faanaunauga, ua ma mananaʻo la e faaavanoa atu i maʻua e faia so o se mea mo le faalapotopotoga a Ieova.” (Mareko 8:34) Na faapea mai foʻi Jason ma Chere, lea ua tofia e auauna i Alapania: “E tofu lava tofiga taʻitasi na ma maua, ma o latou luʻitau. Peitaʻi ua ma talitonu atoatoa i le tāua o lo ma faalagolago atoatoa iā Ieova.”

Faalaeiauga Ina ia Gauaʻi i le Finagalo o Ieova

O le uso o George Smith, o se sui o le aiga Peteli o loo auauna i le matagaluega e tusia ata (Art Department) na ia saunia le tatalo amata o le polokalame. Ona faafeiloaʻi mai lea o le mamalu o le aofia na potopoto, e le uso o Stephen Lett, o se sui o le Vaega Pule o Molimau a Ieova, ma o ia foʻi le taʻitaʻifono o le polokalame o le faauuga. E tusa ma le 23 atunuu na ō mai ai malo eseese na faimalaga atu i le Nofoaga Tau Aʻoaʻoga a le Olomatamata i Patterson, i Niu Ioka, ina ia auai i lenei sauniga fiafia. Na faapea atu le uso o Lett i le ʻaufaauu, o lea o le a latou agaʻi atu e faataunuu “se mea e matuā malosi tele.” Sa ia tataʻi atu manatu i “ʻolo” po o mea malolosi, e pei o aʻoaʻoga sesē, na o le a taumafai misionare fou e lepeti i lalo e ala i le mana o le Tusi Paia. (2 Korinito 10:4, 5) Na faaiʻu mai ana upu: “O le a outou maua le olioli i le iloaina, ua faaaogā outou e Ieova e lepeti i lalo ʻolo po o mea malolosi, i tagata lotofaamaoni i o outou tofiga!”

Na faaautū le lauga a se sui o le ʻaufaigaluega i le ofisa ulu, le uso o Harold Jackson, i le matua “Ni Nai Mea ia Manatua.” Na ia taʻua faapea, e lē tatau i misionare fou ona galo iā i latou le ‘muaʻi saʻilia o le malo ma le amiotonu a le Atua.’ (Mataio 6:33) Ia latou manatua, “o le alofa e faamāfanafana” ma o le ki mautinoa lea i le taulau manuia. (1 Korinito 8:1) Na ia taʻua: “Ia avea le alofa o se uiga e taʻitaʻia ai feutagaʻiga uma tou te faia ma isi.”

Ona sosoo lea ma le lauga a le uso o Geoffrey Jackson, o se sui o le Vaega Pule, o lē na auauna o se misionare mai le tausaga e 1979 seʻia oo mai i le 2003. Na fesiligia e Geoffrey le ʻaufaauu, “Po o E Iloa Ou Tiute Tauave?” Sa ia faatāua le manaʻomia i se tasi ona faapaleni lana vaai iā te ia lava ma lana faiva. O le tiute tauave o Kerisiano o le galulue mamafa i le totōina ma le faasūsūina o fatu o le upu moni. Peitaʻi, o le faatupuina aʻe faaleagaga, o le matafaioi lenā a Ieova, auā o le “Atua o lē na te faatupuina.” (1 Korinito 3:6-9) Ona toe  faaopoopo mai lea o le uso o Jackson: “E faatalitalia oe e Ieova ina ia e faatumauina lou malosi faaleagaga. Ae o le ā lou tiute tauave sili? O lou alofa atu iā Ieova ma alofa i tagata o le a e auauna atu i ai.”

Sa talanoaina e le uso o Lawrence Bowen, o se faiaʻoga a Kiliata, le matua “Ia E Iloa Lau Amio e Tatau Ona Fai.” Na faamanatu i le ʻaufaauu, sa faavavega ona taʻitaʻia ma puipuia e Ieova le fanauga a Isaraelu a o savavali i le vao. (Esoto 13:21, 22) O loo ia taʻitaʻia ma puipuia i tatou i aso nei; o se tasi o auala o loo ia faaaogā, e ala mai le faapotopotoga o Kerisiano faauuina, “o le poutū foʻi lea ma le lagolago o le upu moni.” (1 Timoteo 3:14, 15) Ma o se mea talafeagai i misionare fou ona latou lagolagoina le upu moni o le Tusi Paia, lea e taʻitaʻia ma puipuia ai ē agamalu.

O timaʻiga mo le ʻaufaauu a le uso o Wallace Liverance, o le isi faiaʻoga a Kiliata, ia aua neʻi galo le upu a le Atua o loo i o latou “tua.” O lenā manatu faapea o loo i o tatou tua le upu a le  Atua, o loo faauiga atu i le tele o tausaga ua mavae talu ona faamāeʻa le tusiaina o le Tusi Paia. I le pei o se leoleo mamoe o loo valaau atu a o mulimuli mai tua o se lafu mamoe, ua faapena foʻi Ieova, e peiseaʻī o loo i tua o ana auauna, ma faatonutonu i latou e ala mai “le auauna faamaoni ma le mafaufau.” (Isaia 30:21; Mataio 24:45-47) Ona o le Aʻoga a Kiliata ua mafai ai e le ʻaufaauu ona latou matuā talisapaia galuega o loo faia e le vasega o le auauna. Ua saunia foʻi e le “auauna” le New World Translation of the Holy Scriptures. Na faalaeiau atu le failauga i le ʻaufaauu: “Ia outou faaaogā lenei ʻoa o faamatalaga, e aʻoaʻo atu ai i isi.”—Mataio 13:52.

Faia le Finagalo o Ieova i le Faiva i le Fanua

I le vaega o le polokalame lea sa faamatuaina “Ia Naunau e Folafola le Tala Lelei,” na faamatilatila mai ai e le isi faiaʻoga o Kiliata, le uso o Mark Noumair nisi o mea na tutupu i le ʻaufaauu a o latou auai i le faiva i le fanua i le taimi o faagasolo le Aʻoga a Kiliata. (Roma 1:15) O faatalanoaga sa faia ma le ʻaufaauu na iloa ai, sa latou faaalia moni lava se naunau tele a o talaʻi atu i avanoa taʻitasi.

Na toe maua foʻi e le ʻaufaauu nisi faalaeiauga mai se faatalatalanoaga sa tauaaoina e le uso o Kenneth Flodin, ma ni ovasia femalagaaʻi se toʻatolu o loo auauna nei i le Iunaite Setete. O Richard Keller ma Alejandro Lacayo, o nisi sa auauna i taimi ua mavae i Amerika i Saute ma Amerika Tutotonu, sa la faamatala mai le auala na la onosaia ai tofotofoga eseese, ma faamatala mai nisi o faamanuiaga na olioli ai a o auauna o ni misionare. Sa toe faamanatu mai e Moacir Felisbino, ni aʻoaʻoga na ia maua a o galulue vavalalata ma misionare i Pasili, lea sa ia ola aʻe ai.

E toʻatolu ni misionare ua matuā lava lo latou tomai, o Robert Jones, Woodworth Mills, ma Christopher Slay, sa faatalatalanoa e le uso o David Schafer. Sa faamatala mai e nei uso le auala na mafai ai ona latou gaoioi ma le mautinoa i le fesoasoani a Ieova, a o latou fesagaʻi ma faigatā. Sa latou faamautinoa mai i le vasega e faapea, o le toleniga lea na latou maua mai le faalapotopotoga a Ieova, na sauniunia lelei ai i latou mo o latou tofiga faamisionare. Ona taaofaʻi loa lea e le uso o Mills le matapu i upu nei: “E lē o le vaega tau aʻoaʻoga a Kiliata na sili ona fesoasoani iā te aʻu, ae o le auala na aʻoaʻo ai aʻu e le aʻoga ina ia ou iloa ona lotomaulalo ma alofa.”

O le sui o le Vaega Pule, le uso o Guy Pierce na ia tauaaoina le lauga autū sa faamatuaina, “E Lē Mafai Ona Lē Taulau Fuafuaga a Ieova.” Sa leʻi taulau Atamu, ae pe na lē taulau ai foʻi la ma le vaega a le Atua? Pe e leʻi mafai ea ona foafoaina Atamu e lelei atoatoa, e pei o le manatu o isi tagata? E leai lava, auā “na faia e le Atua le tagata e amiotonu.” (Failauga 7:29) Na taʻua e le failauga, o le soifuaga faamaoni o Iesu a o fesagaʻi ma le tofotofoga sili i le lalolagi, na faamaonia ai, “sa leai se faamolemolega, po o se māfuaaga na alagatatau ai ona lē taulau Atamu.” E faigofie mamao atu le tofotofoga o le usiusitai o Atamu i le faatoʻaga i Etena, na i lo le tofotofoga lea sa manumalo mai ai Iesu. Peitaʻi, sa leʻi taulau ona faamaoni Atamu. Ae ui lava i lea, sa leʻi lafoaʻia ai loa i inā le fuafuaga a Ieova. O le a ia faataunuu lava lana fuafuaga. (Isaia 55:11) Na taʻu atu e le uso o Pierce i misionare fou: “Ua iā te outou le faaeaga e faamamaluina ai Ieova i lo outou agaga faataulagaina. Tau ina ia faatasi atu Ieova iā te outou taʻitoʻatasi, po o fea lava e tou te auauna ai iā te ia o ni misionare.”

Ina ua uma ona momoli mai e le taʻitaʻifono, le uso o Lett, faamanuiaga mai ofisa o lālā eseese a Molimau a Ieova, ona ia tauaaoina atu loa lea i le ʻaufaauu o latou tusipasi ma o latou tofiga. Ona avea ai lea o le uso o Vernon Wisegarver, o se tasi ua leva ona auauna i le aiga Peteli, e fai ma sui o le aofia atoa na te faia le tatalo faaiʻu o le sauniga.

Na lagona e le toʻa 6,872 o le aofia na auai, le toe faafouina o lo latou maelega e faia le finagalo o le Atua, ona o lenei polokalame matagofie o le faauuga. (Salamo 40:8) Na faapea mai Andrew ma Anna, o laʻua o nisi o le ʻaufaauu: “Sa tuuina atu o ma ola iā Ieova. Sa ma folafola iā Ieova o le a ma faia so o se mea na te faatonuina ai i maʻua. O lenei la ua faatonuina i maʻua e Ieova ina ia ō atu i Cameroon, i Aferika.” Ua matuā naunautaʻi i laʻua faapea foʻi isi sui o le vasega faauu, ina ia amata se galuega, lea o le a latou mauaina ai le fiafia ma le faamalieina. Ioe, ua latou fiafia e fai le finagalo o le Atua.

[Pusa i le itulau 17]

FAAMAUMAUGA O LE VASEGA

Aofaʻi o atunuu o loo iai o latou sui: 6

Aofaʻi o atunuu ua tofia i ai: 20

Aofaʻi o tagata aʻoga: 52

Faatatauga o tausaga: 35.7

Faatatauga o tausaga i le upu moni: 18.3

Faatatauga o tausaga i le faiva faataimi atoa: 14.5

[Ata i le itulau 18]

Vasega Faauu Lona 120 o le Aʻoga Faale-Tusi Paia a le Olomatamata o Kiliata

I le lisi i lalo, e amata mai laina i luma ma faasolo i tua ma o suafa e lisi mai i le itu agavale e agaʻi atu i le taumatau.

(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.