“E Amata Atu i le Asō, ua Ou Talitonu e Moni Lava e Iai se Atua”

UA MĀNAVA galuega ma agaʻi i le fale se fafine Ukraine e igoa iā Alexandra o loo nofo i Prague, Czech. Ina ua oo i le nofoaga e faatali ai taavale laʻupasese, sa ia vaaia se ato laʻitiiti o loo taatia i luga o le auala, o loo soli e tagata savavali ane. Ina ua ia tago i le ato ma tatala, na matuā faateʻia o ia. Sa iai i totonu se aofaʻiga tele o ni tupe pepa o le koruna e pe ā ma le 5,000 le aofaʻi! E leai se isi na foliga o suʻeina le ato. Ona e lē o sona atunuu moni le malo o Czech lea e nofo ai, sa lē tagolima le olaga o Alexandra i le saʻilia o mea e ola ai. O le ā o le a ia faia?

Ina ua oo i le fale, sa faaali e Alexandra le ato i lana tama teine o Victoria. Na la suʻeina atoa le ato mo se igoa po o le tuatusi o le tagata e ona le ato, ae leai se mea na maua. E ui i lea, sa iai se fasi pepa na tusia ai ni fuainumera. O le isi itu o le pepa na tusia ai se numera o se tusitupe ae i le isi itu na tusia ai nisi fuainumera. Na maua foʻi i le ato ni faasinoga i se faletupe lata ane ma se pepa e tusia ai le “330,000 koruna” (e tusa ma le $10,000, Amerika). O le aofaʻiga lenā o le tupe na i totonu o le ato.

E leʻi taulau taumafaiga a Alexandra e vili le faletupe, i se numera na foliga o se numera o se telefoni. O lea, na la ō ai i le faletupe ma lana tama teine ma faamatala le mea na tupu. Na la fesili atu e siaki le numera tusitupe lea na maua i le ato. E ui i lea, e leʻi iai se faamaumauga a le faletupe mo lenā numera tusitupe. O le aso na sosoo ai, na toe foʻi ai Alexandra i le faletupe ma le isi numera na maua i totonu o le ato. Na maua e le faletupe se fafine e ana le numera tusitupe lenā. O lea na faafesootaʻi ai loa e Alexandra ma Victoria le fafine, ma sa ia faamaonia le leiloa o lana tupe. Ina ua latou fetaui, sa faafetai le fafine e ana le ato ma fesili iā i laʻua ma le māfana: “E faapefea ona ou tauia oulua mo le toe faafoʻi mai o le tupe?”

Na tali atu Victoria: “E leai se mea. Pe ana faapea ma te mananaʻo i le tupe semanū ua leva ona ma faaaogāina.” Na ia taumafai e faamatala atu e ui ina lē lava lana gagana faa-Czech: “Ua māfua ona ma faafoʻi atu lenei ato ona o i maʻua o ni Molimau a Ieova. Ua aʻoaʻoina o matou lotofuatiaifo e le Tusi Paia ia aua neʻi avea se mea e lē o matou e ana.” (Eperu 13:18) Na faapea mai le fafine ma le fiafia, “E amata atu i le asō, ua ou talitonu e moni lava e iai se Atua.”