E Laveaʻi Ieova i Lē o Puapuagatia

“E tele lava mea leaga e oo i lē ua amiotonu; a e laveaʻiina o ia e Ieova ai ia mea uma.”—SALAMO 34:19.

1, 2. O le ā le faafitauli na fesagaʻi ma se tasi Kerisiano faamaoni, ma aiseā e oo ai foʻi iā i tatou na faalogona?

O SE tamaʻitaʻi talavou e suafa iā Keiko * ua silia ma le 20 tausaga o avea o se Molimau a Ieova. Na iai se taimi na auauna ai o se paeonia sauatoa, po o se tagata talaʻi faataimi atoa o le Malo. Sa matuā pele iā te ia lenā faaeaga. Peitaʻi e leʻi leva, ae lofitūina Keiko i lagona ua leai se faamoemoe ma faaesea mai isi. Fai mai lana faamatalaga: “Na pau lava laʻu mea na fai o le tagi.” Ina ia foʻia ona mafaufauga lē saʻo, sa matuā tuu atoa atu le taimi o Keiko e fai ai ana ia lava suʻesuʻega. Fai mai a ia: “Ae sa lē mafai lava ona ou foʻia loʻu faafitauli. Na oo lava ina ou mafaufau e sili ai ona ou oti.”

² Po o e tauivi ea ma ni lagona faapena? Afai o oe o se Molimau a Ieova, e tatau la ona anoanoaʻi māfuaaga o iā te oe e te olioli ai auā o le tuutoina po o le amio Atua, “o loo i ai le mea ua folafola mai i la le olaga nei atoa ma le atalī.” (1 Timoteo 4:8) O loo e maeva nei i se parataiso faaleagaga! Po o le uiga ea la, ua matuā malupuipuia ai oe mai puapuaga uma? E leai! Ua faapea mai le Tusi Paia: “E tele lava mea leaga e oo i lē ua amiotonu.” (Salamo 34:19) E lē o se mea lenei e faateʻia ai, auā “o le lalolagi uma o loo nofo toʻilalo i loo leaga,” o Satani le Tiapolo. (1 Ioane 5:19) Ua tatou tofo uma i āuga o lenā mea moni.—Efeso 6:12.

O Aafiaga o Puapuaga

3. Taʻu mai ni faaaʻoaʻoga a le Tusi Paia i ni auauna a le Atua na feagai ma mafatiaga ogaoga.

³ O ni mafatiaga faaumiumi e mafai ona faapogisa ai la tatou vaai i mea uma lava. (Faataoto 15:15) Seʻi manatu i le tagata amiotonu o Iopu. A o fesagaʻi Iopu ma le ogaoga o ona mafatiaga, na ia faapea mai: “O le tagata ua fanau mai i le fafine, ua saasaa ona aso, mona ua tumu i le atuatuvale.” (Iopu 14:1) Na mou ese le olioli o Iopu. E iai se taimi na oo lava ina manatu Iopu, ua lafoaʻia o ia e Ieova. (Iopu 29:1-5) E lē na o Iopu se auauna a le Atua ua tofo i le ogaoga o tigā. Ua taʻu mai e le Tusi Paia, sa ‘tigā le loto’ o Hana ona o lona tulaga lē fanau. (1 Samuelu 1:9-11) Ina ua matuā tigā Repeka i se tulaga sa iai i lona aiga, na ia faapea mai: ‘Ua ou fiu i loʻu ola.’ (Kenese 27:46) Ina ua toe mafaufau Tavita i ana mea sesē na fai, ona ia faapea mai lea: “Ou te fealuaʻi ma le eleelea [faanoanoa] i le aso atoa.” (Salamo 38:6) O nei faaaʻoaʻoga ua faamanino mai ai, e oo lava i tane ma fafine matataʻu i le Atua i tuā a o leʻi oo  mai i taimi o uluaʻi Kerisiano, sa latou onosaia foʻi ni vaitaimi o mafatiaga ogaoga.

4. Aiseā ua lē o se mea e ofo ai, le iai o ni Kerisiano o “loto iti” pe loto mafatia i aso nei?

⁴ Ae ā Kerisiano? Sa iloa e le aposetolo o Paulo le talafeagai ona taʻu atu i Kerisiano i Tesalonia ina ia “faamāfanafana i ē loto iti” pe loto mafatia. (1 Tesalonia 5:14) O loo taʻua i se tasi tusi e faapea, o le upu Eperu ua faaliliuina i le “loto iti” e mafai ona faasino atu iā i latou “ua lofitūina mo sina taimi ona o mafatiaga o le olaga.” E faaalia mai i upu a Paulo, sa iai nisi Kerisiano faauuagagaina i lenā faapotopotoga i Tesalonia sa loto mafatia. O loo iai foʻi ni Kerisiano loto iti pe loto mafatia i aso nei. Ae aiseā ua mafatia ai? Seʻi tatou talanoa i ni māfuaaga taatele se tolu.

Ona o lo Tatou Tulaga Agasala

5, 6. O ā ni faamāfanafanaga tatou te maua mai le Roma 7:22-25?

⁵ E ese mai ē ua “lē lagona se mea” lelei, o Kerisiano moni latou te lagona le mafatia ona o lo latou tulaga agasala. (Efeso 4:19) Atonu e tutusa o latou lagona ma le aposetolo o Paulo, o lē na tusi mai: “Ou te fiafia i le tulafono a le Atua i le tagata i totonu. A ua ou iloa le tulafono ese i oʻu tino, o loo tau le taua i le tulafono a loʻu mafaufau, ua fai foʻi aʻu ma tagata o taua i le tulafono a le agasala o loo i oʻu tino.” Ona alaga lea o Paulo: “Auē o aʻu le tagata malaia!”—Roma 7:22-24.

⁶ Pe na iai ea se taimi na oo ai iā te oe na lagona sa iā Paulo? E lē o se mea leaga le mamafa i lou loto o lou tulaga lē lelei atoatoa, auā e atili ai ona e amanaʻia le mamafa o le agasala, ma atili faamausalīina ai lau filifiliga e ʻaloese mai le leaga. Peitaʻi, e lē manaʻomia ona e fatufatu ai lava na lagona mafatia ona o ou vaivaiga. Ina ua uma ona taʻua e Paulo ana upu i lona mafatia, ona ia toe faapea mai lea: “Ou te faafetai lava i le Atua, auā o Iesu Keriso lo tatou Alii.” (Roma 7:25) Ioe, sa mautinoa e Paulo, e mafai e le toto na maligi o Iesu, ona faamagaloina o ia mai le agasala tuufaasolo.—Roma 5:18.

7. O le ā e mafai ona fesoasoani i se tasi ina ia lē mafatia ai ona o ni ona faanaunauga agasala?

⁷ Afai ua lofitūina oe i mafatiaga o lou tulaga agasala, ia faamāfanafanaina oe i upu a le aposetolo o Ioane, o lē na tusi mai: “Pe afai foʻi e agasala se tasi, o iā te i tatou le fautua i luma o le Tamā, o Iesu Keriso lea, o lē amiotonu. O le togiola foʻi o ia mo a tatou agasala, e lē gata foʻi i a tatou, a e atoa foʻi ma agasala a le lalolagi uma lava.” (1 Ioane 2:1, 2) Afai o loo e mafatia ona o ou faanaunauga agasala, ia e manatua, na maliu Iesu mo tagata agasala, ae lē mo tagata lelei atoatoa. O le mea moni, “ua agasala tagata uma lava, ma ua lē oo i le mamalu o le Atua.”—Roma 3:23.

8, 9. Aiseā e tatau ai ona tatou teena mafaufauga lea tatou te taʻusalaina ai i tatou lava?

⁸ Peitaʻi, seʻi faapea sa e faia se agasala matuiā i taimi ua tuanaʻi. E mautinoa, atonu ua e tatalo soo iā Ieova mo lenā mataupu. Sa avatu foʻi e toeaina Kerisiano ni fesoasoani faaleagaga iā te oe. (Iakopo 5:14, 15) Sa e faaalia le salamō moni ma lē tuuesea ai oe mai le faapotopotoga. Pe atonu foʻi na e tuua le faalapotopotoga a le Atua mo se vaitaimi, ae na mulimuli ane e salamō ma toe maua se faiā lelei ma ia. Po o le ā lava le tulaga, ae atonu e tau pea lou mafaufau i lau agasala sa fai ma e toe mafatia ai. Afai o tupu lenā mea, seʻi manatua, e “matuā” faamagalo e Ieova o ē salamō moni. (Isaia 55:7) E lē finagalo foʻi Ieova e oo iā te oe ni lagona faapea ua leai sou faamoemoe. O faalogona na e manaʻo Satani ia oo iā te oe. (2 Korinito 2:7, 10, 11) O le a faaumatia le Tiapolo auā ua tatau lenā iʻuga mo ia, ae o lona manaʻo, ia iā te oe le lagona faapea e tatau foʻi ona faapena lou iʻuga. (Faaaliga 20:10) Aua neʻi e faatagaina Satani e manumalo i le tineia o lou faatuatua. (Efeso 6:11) Na i lo lea, ‘ia e tetee atu iā te ia,’ e pei foʻi ona e faia i isi taimi.—1 Peteru 5:9.

⁹ I le Faaaliga 12:10, o loo taʻua ai Satani o “lē na molia o tatou uso”—Kerisiano faauuina. O loo ia “molia i latou i luma o lo tatou Atua i le ao ma le pō.” Pe a e mafaufau la i lenā fuaiupu,  ona e iloa ai lea, o le a fiafia Satani pe afai e te moliaina ma e taʻusalaina oe lava, e ui e lē o faia e Ieova lenā mea iā te oe. (1 Ioane 3:19-22) Aiseā e te nofo tigā ai pea i ou vaivaiga, ma oo ai lava ina e lē toe fia ola? Aua e te faatagaina Satani e lepeti le lua faiā ma le Atua. Aua lava neʻi e faataga le Tiapolo e faatauaso oe i le mea moni, o Ieova e “alofa mutimutivale ma le alofa fua, e telegese lona toʻasā, a e tele le alofa ma le faamaoni.”—Esoto 34:6.

Ona o le Tapulaa o Mea Tatou te Mafaia

10. E faapefea ona tatou ono loto vaivai ona o le tapulaa o mea tatou te mafaia?

¹⁰ Ua loto vaivai nisi Kerisiano ona ua afaina la latou auaunaga i le Atua, talu ai ua tapulaa mea latou te mafaia. Po o le tulaga lenā o loo e iai? Atonu o sou maʻi tugā, po ua afu lou soifua, po o nisi lava tulaga ua lē mafai ai ona e faaaluina le tele o le taimi e pei ona sa iai muamua. O loo faalaeiauina Kerisiano ina ia latou faaaogā tatau le taimi mo le auaunaga i le Atua. (Efeso 5:15, 16) Ae faapefea pe afai ua iai moni ni tulaga lē maʻalofia ua tapulaa ai le tele o mea e mafai ona e fai i le faiva, ma ua e loto vaivai ai?

11. Ua faapefea ona aogā iā i tatou le fautuaga a Paulo o loo faamauina i le Kalatia 6:4?

¹¹ O loo uunaʻia i tatou e le Tusi Paia ina ia aua neʻi paiē ae ia “faaaʻoaʻo i ē ua maua i le faatuatua ma le onosai mea na folafolaina.” (Eperu 6:12) E faatoʻā mafai ona tatou faia lenā mea, pe a tatou iloiloina la latou faaaʻoaʻoga lelei ma saʻili e faataʻitaʻi i lo latou faatuatua. Peitaʻi tatou te lē maua se mea aogā pe a tatou faatusatusa fua ma le lē fetaui i tatou i isi, ma fai ai ma le faaiʻuga faapea, e leaga uma lava mea o tatou faia. O le ala lea e lelei ai pe a tatou faatatauina le fautuaga a Paulo e faapea: “A ia taʻitoʻatasi ma faamasino i lana lava galuega, ona iā te ia lea o se mea e mitamita ai iā te ia lava, a e lē o se tasi.”—Kalatia 6:4.

12. Aiseā e mafai ai ona tatou mitamita i la tatou auaunaga iā Ieova?

¹² Ua talafeagai ona mitamita Kerisiano, e tusa lava pe tapulaa mea latou te mafaia ona o ni toʻatugā i le soifua mālōlōina. Ua faamautinoa mai le Tusi Paia iā i tatou: “E lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa.” (Eperu 6:10) Atonu pe ona o tulaga ua lē mafai ona e gafatia, ua faigatā ai ona e faataunuu le tele o mea sa masani ona e faia muamua. Peita’i, o le fesoasoani a Ieova e mafai ai ona e faia se sao atoatoa i nisi o vala o le faiva faa-Kerisiano, e pei o le molimau atu i telefoni, ma le tusiaina o ni tusi. E mafai ona e mautinoa, o le a faamanuia Ieova le Atua iā te oe, i lau auaunaga ma lou loto atoa, ma le alofa o loo e faaalia mo ia ma ou uso a tagata.—Mataio 22:36-40.

Ona o “Aso Faigatā”

13, 14. (a) E faapefea i nei “aso faigatā” ona faapogaia ai o tatou mafatiaga? (e) Ua faamaonia mai faapefea i aso nei le leai o se uiga lotoaiga?

¹³ E ui o loo tatou tulimataʻi atu le olaga i totonu o le lalolagi fou amiotonu a le Atua, ae i le taimi nei, o loo tatou ola i “aso faigatā.” (2 Timoteo 3:1) Ae faamāfanafanaina i tatou i le iloa, o mafatiaga o loo iai nei, o se faamaoniga lea o le latalata mai o lo tatou faasaoina. Peitaʻi ua tatou aafia ona o tulaga o loo siʻomia ai i tatou. Mo se faaaʻoaʻoga, o le ā se aafiaga e oo iā te oe pe a teʻi ua e lē toe faigaluega? Atonu e lē o faigofie ona maua ni galuega, ma a o faagasolo masina e te ono tau mānatu, po o silafia mai e Ieova ou mafatiaga ma faafofoga mai i au tatalo. Pe atonu foʻi o loo taulaʻi mai iā te oe ni faiga lē tonu. E oo lava i lou faitau atu i mea o loo faamatala mai i nusipepa, e ono oo ai iā te oe lagona e pei ona sa iai i le tagata amiotonu o Lota, o lē ‘sa matuā tigā’ lona loto ona o amioga lē taupulea a i latou sa iai i ona vaitaimi.—2 Peteru 2:7.

¹⁴ E iai se isi vala patino o aso e gata ai e lē tatau ona faatuatuanaʻi i ai. Na valoia e le Tusi Paia faapea e toʻatele tagata o le a ‘leai se lotoaiga.’ (2 Timoteo 3:3) O le tele o nisi aiga ua matuā leai lava se alofa māfana faaleaiga. O loo taʻua i se tusi Family Violence, “o mea o loo  tutupu ua faamaonia ai, e toʻatele tagata ua fasiotia, ua sauāina i le tino, le mafaufau, pe i faiga faaleituaiga, e isi lava tagata o o latou aiga. O le nofoaga lea sa tatau ona avea ma maluapapa ma maua ai le alofa ma le saogalemu o tagata, ae ua avea nei ma nofoaga e sili ona lamatia ai ola o nisi tagata.” O i latou o loo ola aʻe i ni siʻomaga faaleaiga lē lelei, atonu i ni tausaga mulimuli ane o le a latou fesagaʻi ai ma ni lagona atuatuvale ma le mafatia. E faapefea pe afai o le tulaga lenei o loo e iai?

15. Ua faapefea ona sili aʻe le alofa o Ieova na i lo le alofa o se tagata?

¹⁵ Na pese le faisalamo o Tavita: “E ui lava ina tuua aʻu e loʻu tamā ma loʻu tinā, a e talia aʻu e Ieova.” (Salamo 27:10) Maʻeu se faamāfanafanaloto o le iloa, e sili mamao atu le alofa o Ieova na i lo le alofa o se matua faaletagata! Po o le ā lava le tigā o le teena, le faileagaina, po o le lafoaʻia e se matua, ae lē taitai ona faatusatusa atu lenā i le tele o le alofa mai o Ieova iā te oe. (Roma 8:38, 39) Manatua, o le Atua na te tosina maia i latou ua ia alofa i ai. (Ioane 3:16; 6:44) E tusa lava po o ā faiga o loo fai mai e tagata iā te oe, ae o loo alofa mai lou Tamā faalelagi iā te oe!

Laasaga Aogā e Mapu i ai Lagona Mafatia

16, 17. Pe a fesagaʻi ma lagona mafatia, o le ā se mea e mafai e se tasi ona fai ina ia faatumauina pea lona malosi faaleagaga?

¹⁶ E iai laasaga aogā e mafai ona e uia e te onosaia ai lagona mafatia. Mo se faataʻitaʻiga, mulimuli i se faasologa aogā o gaoioiga faa-Kerisiano. Mafaufau loloto i le Afioga a le Atua, aemaise pe afai ua tetele mai lagona lotovaivai. Na pese le faisalamo: “Na ou fai ane, O loo mapeva loʻu vae; ona taofi aʻe lea o aʻu e lou alofa, Ieova e. O le tele o manatunatu i loʻu loto ua fiafia ai loʻu agaga ona o faamāfanafanaga mai iā te oe.” (Salamo 94:18, 19) O le faitauina e lē aunoa o le Tusi Paia o le a faatumu ai lou mafaufau i upu faamāfanafanaloto ma manatu e faatumauina ai oe.

¹⁷ E tāua foʻi le tatalo. E tusa lava pe lē mafai ona e faaupu lelei atu ou faalogona, ae o loo silafia lava e Ieova le mea o loo e taumafai e taʻu atu. (Roma 8:26, 27) O le faamautinoaga lenei na fai mai ai le faisalamo: “Ia e tuuina atu iā Ieova o mea e te popole vale ai; o ia lava na te tausia oe; na te lē tuuna e faavavau le amiotonu ia faagaeetia.”—Salamo 55:22.

18. O ā laasaga aogā e ono uia e se tasi ua mafatia?

¹⁸ O nisi ua fesagaʻi ma faanoanoaga ona o mafatiaga o le mafaufau. * Afai o loo e aafia i lenā mafatiaga, taumafai e taulaʻi atu i le lalolagi fou a le Atua, ma le taimi o le a ‘lē toe fai  mai ai se tasi ua mau ai, ou te maʻi.’ (Isaia 33:24) Afai e faalausosoo pea ona e lagonaina na mafatiaga, o se mea atamai le saʻili atu mo se fesoasoani mai fomaʻi faapitoa i na faafitauli. (Mataio 9:12) E tāua foʻi le tausia lelei o lou tino faaletino. Atonu e aogā le faapaleni lelei o lau taumafa, ma fai foʻi ni nai faamalositino. Ia faamautinoa o loo lava lau mālōlōga. Aua e te ala umi i le pō e matamata le televise; ia e ʻalofia ituaiga o faafiafiaga e iʻu ina tuua ai oe i se tulaga ua e vaivai faaletino ma vaivai foʻi i ou faalogona. Ae o le sili o nei mea uma, ia e auai pea i galuega e faamalieina ai le Atua! E ui lava e leʻi oo i le taimi e ‘soloiesea ai e Ieova loimata uma,’ ae o le a ia fesoasoani iā te oe ina ia e tutumau.—Faaaliga 21:4; 1 Korinito 10:13.

Ola “i Lalo o le Aao Malosi o le Atua”

19. O le ā ua folafola mai e Ieova iā i latou o loo mafatia?

¹⁹ Ua faamautinoa mai e le Tusi Paia iā i tatou faapea, e ui lava ina tele mea leaga e oo i le tagata amiotonu, ae “laveaʻiina o ia e Ieova ai ia mea uma.” (Salamo 34:19) E faapefea ona faia e le Atua lenei mea? A o tatalo pea lava pea le aposetolo o Paulo mo se laveaʻiga o ia mai ‘mea matuitui sa i lona tino,’ na taʻu atu e Ieova iā te ia: “O le vaivai e faaatoaina ai loʻu mana.” (2 Korinito 12:7-9) O le ā na folafola e Ieova iā Paulo, ma o le ā ua ia folafola mai iā te oe? E leʻi folafola mai se vaifofō vave, ae o le mana e tumau ai.

20. Po o ā lava o tatou tofotofoga, ae o le ā ua faamautinoa iā i tatou e le 1 Peteru 5:6, 7?

²⁰ Na tusi le aposetolo o Peteru: “Ia faamaulalo ai outou i lalo o le aao malosi o le Atua, ina ia faamaualugaina outou e ia i ona pō e tatau ai. Ia tuuina atu iā te ia mea uma tou te popole ai, auā o loo manatu mai o ia iā te outou.” (1 Peteru 5:6, 7) Talu ai e alofa Ieova iā te oe, o le a na lē lafoaʻia la oe. O le a ia lagolago mai iā te oe e tusa lava po o ā tofotofoga o loo e fesagaʻia. Teu i lou mafaufau o Kerisiano faamaoni o loo “i lalo o le aao malosi o le Atua.” E foaʻi mai e Ieova le malosi tatou te tutumau ai, a o tatou auauna atu iā te ia. Afai tatou te faamaoni iā te ia, e leai se mea e mafai ona faaleagaina ai e faavavau lo tatou tulaga faaleagaga. O lea, tau ina ia tatou faamaoni pea iā Ieova, ina ia tatou maua le ola e faavavau i lana lalolagi fou ua folafola mai, ma oo atu ai i lea aso, o le a ia laveaʻiina moni ai e faavavau lē o puapuagatia!

[Faamatalaga pito i lalo]

E te Manatua?

• Aiseā e oo ai lava i auauna a Ieova, o loo aafia foʻi i mafatiaga?

• O ā ni vala e māfua ai ona mafatia tagata o le Atua?

• E faapefea ona fesoasoani mai Ieova ina ia tatou manumalo mai o tatou popolega?

• Ua faapefea ona tatou “i lalo o le aao malosi o le Atua”?

[Fesili mo le Suʻesuʻega]

[Ata i le itulau 25]

Po o ā lava tofotofoga, ae o loo olioli pea auauna a Ieova

[Ata i le itulau 28]

O le molimau atu i telefoni o se tasi lea auala e te faia ai le mea silisili mo Ieova